೪. ಪವಾರಣಾಕ್ಖನ್ಧಕೋ

ಅಫಾಸುವಿಹಾರಕಥಾದಿವಣ್ಣನಾ

೨೦೯. ಪವಾರಣಾಕ್ಖನ್ಧಕೇ ಪಾಳಿಯಂ ಪಿಣ್ಡಾಯ ಪಟಿಕ್ಕಮೇಯ್ಯಾತಿ ಪಿಣ್ಡಾಯ ಚರಿತ್ವಾ ಪಟಿಕ್ಕಮೇಯ್ಯ. ಅವಕ್ಕಾರಪಾತಿನ್ತಿ ಅತಿರೇಕಪಿಣ್ಡಪಾತಠಪನಕಂ ಏಕಂ ಭಾಜನಂ. ಅವಿಸಯ್ಹನ್ತಿ ಉಕ್ಖಿಪಿತುಂ ಅಸಕ್ಕುಣೇಯ್ಯಂ. ವಿಲಙ್ಘನಂ ಉಕ್ಖಿಪನಂ ವಿಲಙ್ಘೋ, ಸೋ ಏವ ವಿಲಙ್ಘಕೋ, ಹತ್ಥೇಹಿ ವಿಲಙ್ಘಕೋ ಹತ್ಥವಿಲಙ್ಘಕೋತಿ ಆಹ ‘‘ಹತ್ಥುಕ್ಖೇಪಕೇನಾ’’ತಿ. ಅಥ ವಾ ವಿಲಙ್ಘಕೇನ ಉಕ್ಖೇಪಕೇನ ಹತ್ಥೇನಾತಿಪಿ ಅತ್ಥೋ, ಅಞ್ಞಮಞ್ಞಂ ಸಂಸಿಬ್ಬಿತಹತ್ಥೇಹೀತಿ ವುತ್ತಂ ಹೋತಿ.

೨೧೩. ಸಚೇ ಪನ ವುಡ್ಢತರೋ ಹೋತೀತಿ ಪವಾರಣಾದಾಯಕೋ ಭಿಕ್ಖು ವುಡ್ಢತರೋ ಹೋತಿ. ಏವಞ್ಹಿ ತೇನ ತಸ್ಸತ್ಥಾಯ ಪವಾರಿತಂ ಹೋತೀತಿ ಏತ್ಥ ಏವಂ ತೇನ ಅಪ್ಪವಾರಿತೋಪಿ ತಸ್ಸ ಸಙ್ಘಪ್ಪತ್ತಿಮತ್ತೇನ ಸಙ್ಘಪವಾರಣಾಕಮ್ಮಂ ಸಮಗ್ಗಕಮ್ಮಮೇವ ಹೋತೀತಿ ದಟ್ಠಬ್ಬಂ. ತೇನ ಚ ಭಿಕ್ಖುನಾತಿ ಪವಾರಣಾದಾಯಕೇನ ಭಿಕ್ಖುನಾ.

೨೩೪. ಬಹೂಪಿ ಸಮಾನವಸ್ಸಾ ಏಕತೋ ಪವಾರೇತುಂ ಲಭನ್ತೀತಿ ಏಕಸ್ಮಿಂ ಸಂವಚ್ಛರೇ ಲದ್ಧೂಪಸಮ್ಪದತಾಯ ಸಮಾನುಪಸಮ್ಪನ್ನವಸ್ಸಾ ಸಬ್ಬೇ ಏಕತೋ ಪವಾರೇತುಂ ಲಭನ್ತೀತಿ ಅತ್ಥೋ.

೨೩೭. ಪಾಳಿಯಂ ಮಿಚ್ಛಾದಿಟ್ಠೀತಿ ‘‘ನತ್ಥಿ ದಿನ್ನ’’ನ್ತಿಆದಿ (ದೀ. ನಿ. ೧.೧೭೧; ಮ. ನಿ. ೧.೪೪೫; ೨.೯೪, ೯೫, ೨೨೫; ೩.೯೧, ೧೧೬, ೧೩೬; ಸಂ. ನಿ. ೩.೨೧೦; ಧ. ಸ. ೧೨೨೧) ನಯಪ್ಪವತ್ತಾ. ಅನ್ತಗ್ಗಾಹಿಕಾತಿ ಸಸ್ಸತುಚ್ಛೇದಸಙ್ಖಾತಸ್ಸ ಅನ್ತಸ್ಸ ಗಾಹಿಕಾ. ಯಂ ಖೋ ತ್ವನ್ತಿಆದೀಸು ಯಂ ಪವಾರಣಂ ಠಪೇಸಿ, ತಂ ದಿಟ್ಠೇನ ಠಪೇಸೀತಿ ತಂ-ಸದ್ದಂ ಅಜ್ಝಾಹರಿತ್ವಾ ಯೋಜೇತಬ್ಬಂ.

೨೩೯. ವತ್ಥುಂ ಪಕಾಸೇನ್ತೋತಿ ಪುಗ್ಗಲೇ ಪರಿಸಙ್ಕುಪ್ಪತ್ತಿಯಾ ನಿಮಿತ್ತಭೂತಂ ವತ್ಥುಮತ್ತಂಯೇವ ಸನ್ಧಾಯ ವುತ್ತಂ. ಯಂ ಪನ ವತ್ಥುಂ ಸನ್ಧಾಯ ‘‘ಪುಗ್ಗಲೋ ಪಞ್ಞಾಯತಿ, ನ ವತ್ಥೂ’’ತಿ ಆಹ, ನ ತಂ ಸನ್ಧಾಯೇತಂ ವುತ್ತಂ. ಯದಿ ಪನ ತಸ್ಸ ಭಿಕ್ಖುನೋ ವಸನಟ್ಠಾನೇ ಪೋಕ್ಖರಣಿತೋ ಮಚ್ಛಗ್ಗಹಣಾದಿ ದಿಸ್ಸೇಯ್ಯ, ತದಾ ‘‘ವತ್ಥು ಚ ಪುಗ್ಗಲೋ ಚ ಪಞ್ಞಾಯತೀ’’ತಿ ವತ್ತಬ್ಬಂ ಭವೇಯ್ಯ. ತೇನಾಹ ‘‘ಪುರಿಮನಯೇನೇವ ಚೋರೇಹೀ’’ತಿಆದಿ. ಭಿಕ್ಖುನೋ ಸರೀರೇ ಮಾಲಾಗನ್ಧಞ್ಚ ಅರಿಟ್ಠಗನ್ಧಞ್ಚ ದಿಸ್ವಾ ಏವಂ ‘‘ವತ್ಥು ಚ ಪುಗ್ಗಲೋ ಚ ಪಞ್ಞಾಯತೀ’’ತಿ ವುತ್ತನ್ತಿ ವೇದಿತಬ್ಬಂ.

ಅಫಾಸುವಿಹಾರಕಥಾದಿವಣ್ಣನಾ ನಿಟ್ಠಿತಾ.

ಭಣ್ಡನಕಾರಕವತ್ಥುಕಥಾವಣ್ಣನಾ

೨೪೦. ದ್ವೇ ಚಾತುದ್ದಸಿಕಾ ಹೋನ್ತೀತಿ ತತಿಯಪಕ್ಖೇ ಚಾತುದ್ದಸಿಯಾ ಸದ್ಧಿಂ ದ್ವೇ ಚಾತುದ್ದಸಿಕಾ ಹೋನ್ತಿ. ‘‘ಭಣ್ಡನಕಾರಕಾನಂ ತೇರಸೇ ವಾ ಚಾತುದ್ದಸೇ ವಾ ಇಮೇ ಪನ್ನರಸೀಪವಾರಣಂ ಪವಾರೇಸ್ಸನ್ತೀ’’ತಿ ಇಮಿನಾ ಯಥಾಸಕಂ ಉಪೋಸಥಕರಣದಿವಸತೋ ಪಟ್ಠಾಯ ಭಿಕ್ಖೂನಂ ಚಾತುದ್ದಸೀಪನ್ನರಸೀವೋಹಾರೋ, ನ ಚನ್ದಗತಿಸಿದ್ಧಿಯಾ ತಿಥಿಯಾ ವಸೇನಾತಿ ದಸ್ಸೇತಿ. ಕಿಞ್ಚಾಪಿ ಏವಂ ‘‘ಅನುಜಾನಾಮಿ, ಭಿಕ್ಖವೇ, ರಾಜೂನಂ ಅನುವತ್ತಿತು’’ನ್ತಿ (ಮಹಾವ. ೧೮೬) ವಚನತೋ ಪನೇತ್ಥ ಲೋಕಿಯಾನಂ ತಿಥಿಂ ಅನುವತ್ತನ್ತೇಹಿಪಿ ಅತ್ತನೋ ಉಪೋಸಥಕ್ಕಮೇನ ಚಾತುದ್ದಸಿಂ ಪನ್ನರಸಿಂ ವಾ, ಪನ್ನರಸಿಂ ಚಾತುದ್ದಸಿಂ ವಾ ಕರೋನ್ತೇಹೇವ ಅನುವತ್ತಿತಬ್ಬಂ, ನ ಪನ ಸೋಳಸಮದಿವಸಂ ವಾ ತೇರಸಮದಿವಸಂ ವಾ ಉಪೋಸಥದಿವಸಂ ಕರೋನ್ತೇಹಿ. ತೇನೇವ ಪಾಳಿಯಮ್ಪಿ ‘‘ದ್ವೇ ತಯೋ ಉಪೋಸಥೇ ಚಾತುದ್ದಸಿಕೇ ಕಾತು’’ನ್ತಿ ವುತ್ತಂ. ಅಞ್ಞಥಾ ದ್ವಾದಸಿಯಂ, ತೇರಸಿಯಂ ವಾ ಉಪೋಸಥೋ ಕಾತಬ್ಬೋತಿ ವತ್ತಬ್ಬತೋ. ‘‘ಸಕಿಂ ಪಕ್ಖಸ್ಸ ಚಾತುದ್ದಸೇ, ಪನ್ನರಸೇ ವಾ’’ತಿಆದಿವಚನಮ್ಪಿ ಉಪವುತ್ಥಕ್ಕಮೇನೇವ ವುತ್ತಂ, ನ ತಿಥಿಕ್ಕಮೇನಾತಿ ಗಹೇತಬ್ಬಂ.

ಭಣ್ಡನಕಾರಕವತ್ಥುಕಥಾವಣ್ಣನಾ ನಿಟ್ಠಿತಾ.

ಪವಾರಣಾಸಙ್ಗಹಕಥಾವಣ್ಣನಾ

೨೪೧. ‘‘ಪವಾರೇತ್ವಾ ಪನ ಅನ್ತರಾಪಿ ಚಾರಿಕಂ ಪಕ್ಕಮಿತುಂ ಲಭನ್ತೀ’’ತಿ ಇಮಿನಾ ಪವಾರಣಾಸಙ್ಗಹೇ ಕತೇ ಅನ್ತರಾ ಪಕ್ಕಮಿತುಕಾಮಾ ಸಙ್ಘಂ ಸನ್ನಿಪಾತಾಪೇತ್ವಾ ಪವಾರೇತುಂ ಲಭನ್ತೀತಿ ದಸ್ಸೇತಿ.

ಪವಾರಣಾಸಙ್ಗಹಕಥಾವಣ್ಣನಾ ನಿಟ್ಠಿತಾ.

ಪವಾರಣಾಕ್ಖನ್ಧಕವಣ್ಣನಾನಯೋ ನಿಟ್ಠಿತೋ.