೭. ವಿಹಾರಕಾರಸಿಕ್ಖಾಪದವಣ್ಣನಾ

೩೬೫. ಸತ್ತಮೇ ಪೂಜಾವಚನಪ್ಪಯೋಗೇ ಕತ್ತರಿ ಸಾಮಿವಚನಸ್ಸಪಿ ಇಚ್ಛಿತತ್ತಾ ‘‘ಗಾಮಸ್ಸ ವಾ ಪೂಜಿತ’’ನ್ತಿ ವುತ್ತಂ. ರೂಪಿನ್ದ್ರಿಯೇಸು ವಿಜ್ಜಮಾನಂ ಸನ್ಧಾಯ ಏಕಿನ್ದ್ರಿಯತಾ ವುಚ್ಚತೀತಿ ಆಹ ‘‘ಕಾಯಿನ್ದ್ರಿಯಂ ಸನ್ಧಾಯಾ’’ತಿ. ತೇ ಹಿ ಮನಿನ್ದ್ರಿಯಮ್ಪಿ ಭೂತಗಾಮಾನಂ ಇಚ್ಛನ್ತಿ.

೩೬೬. ಕಿರಿಯತೋ ಸಮುಟ್ಠಾನಾಭಾವೋತಿ ವತ್ಥುನೋ ಅದೇಸನಾಸಙ್ಖಾತಂ ಅಕಿರಿಯಂ ವಿನಾ ನ ಕೇವಲಂ ಕಿರಿಯಾಯ ಸಮುಟ್ಠಾನಭಾವೋ. ಕಿರಿಯಾಕಿರಿಯತೋ ಹಿ ಇದಂ ಸಮುಟ್ಠಾತಿ. ಇಮಸ್ಮಿಂ ಸಿಕ್ಖಾಪದೇ ಭಿಕ್ಖೂ ವಾ ಅನಭಿನೇಯ್ಯಾತಿ ಏತ್ಥ ವಾ-ಸದ್ದೋ ಸಮುಚ್ಚಯತ್ಥೋ, ತೇನ ‘‘ಮಹಲ್ಲಕಞ್ಚ ವಿಹಾರಂ ಕರೇಯ್ಯ, ಭಿಕ್ಖೂ ಚ ಅನಭಿನೇಯ್ಯಾ’’ತಿ ಕಿರಿಯಞ್ಚ ಅಕಿರಿಯಞ್ಚ ಸಮುಚ್ಚಿನೋತಿ.

ವಿಹಾರಕಾರಸಿಕ್ಖಾಪದವಣ್ಣನಾ ನಿಟ್ಠಿತಾ.