೩. ದುಟ್ಠುಲ್ಲವಾಚಾಸಿಕ್ಖಾಪದವಣ್ಣನಾ

೨೮೫. ತತಿಯೇ ಅಸದ್ಧಮ್ಮಪಟಿಸಞ್ಞುತ್ತನ್ತಿ ಮೇಥುನಧಮ್ಮಪಟಿಸಂಯುತ್ತಂ. ಬಾಲಾತಿ ಸುಭಾಸಿತದುಬ್ಭಾಸಿತಂ ಅಜಾನನ್ತೀ, ಸುರಾಮದಮತ್ತತಾಯ ಉಮ್ಮತ್ತಕಾದಿಭಾವೇನ ಚ ಅಜಾನನ್ತೀಪಿ ಏತ್ಥೇವ ಸಙ್ಗಯ್ಹತಿ. ನ ತಾವ ಸೀಸಂ ಏತೀತಿ ಸಙ್ಘಾದಿಸೇಸಪಚ್ಚಯತ್ತಸಙ್ಖಾತಂ ಮತ್ಥಕಂ ಪಾರಿಪೂರಿ ನ ಹೋತಿ, ಮಗ್ಗಮೇಥುನೇಹಿ ಅಘಟಿತತ್ತಾ ದುಕ್ಕಟಂ ಪನ ಹೋತಿ ಏವ.

ಅಪಸಾದೇತೀತಿ ಅಪಸಾದಕರವಚನಂ ಕರೋತಿ. ದೋಸಂ ದೇತೀತಿ ದೋಸಂ ಪತಿಟ್ಠಾಪೇತಿ. ತೀಹೀತಿ ಅನಿಮಿತ್ತಾಸೀತಿಆದೀನಂ ಪದಾನಂ ಅದುಟ್ಠುಲ್ಲಭಾವೇನಾಪಿ ಅತ್ಥಯೋಜನಾರಹತ್ತಾ ಪಸ್ಸಾವಮಗ್ಗಾದಿಪಟಿಸಞ್ಞುತ್ತತಾನಿಯಮೋ ನತ್ಥೀತಿ ವುತ್ತಂ, ತೇಹಿ ಪನ ಅಟ್ಠಹಿ ಪದೇಹಿ ಪರಿಬ್ಬಾಜಿಕಾವತ್ಥುಸ್ಮಿಂ (ಪಾರಾ. ೨೮೯) ವಿಯ ಥುಲ್ಲಚ್ಚಯನ್ತಿ ವೇದಿತಬ್ಬಂ.

ಕುಞ್ಚಿಕಪನಾಳಿಮತ್ತನ್ತಿ ಕುಞ್ಚಿಕಾಛಿದ್ದಮತ್ತಂ. ಸುಕ್ಖಸೋತಾತಿ ದಕಸೋತಸ್ಸ ಸುಕ್ಖತಾಯ ಲೋಹಿತವಣ್ಣವಿಗಮೋ ಹೋತೀತಿ ವುತ್ತಂ.

ಸುದ್ಧಾನೀತಿ ಮೇಥುನಾದಿಪದೇಹಿ ಅಯೋಜಿತಾನಿಪಿ. ಮೇಥುನಧಮ್ಮೇನ ಘಟಿತಾನೇವಾತಿ ಇದಂ ಉಪಲಕ್ಖಣಮತ್ತಂ, ವಚ್ಚಮಗ್ಗಪಸ್ಸಾವಮಗ್ಗೇಹಿಪಿ ಅನಿಮಿತ್ತೇ ‘‘ತವ ವಚ್ಚಮಗ್ಗೋ, ಪಸ್ಸಾವಮಗ್ಗೋ ವಾ ಈದಿಸೋ’’ತಿಆದಿನಾ ಘಟಿತೇಪಿ ಆಪತ್ತಿಕರಾನೇವ.

೨೮೬. ಗರುಕಾಪತ್ತಿನ್ತಿ ಭಿಕ್ಖುನಿಯಾ ಉಬ್ಭಜಾಣುಮಣ್ಡಲಿಕಾಯ ಪಾರಾಜಿಕಾಪತ್ತಿಂ ಸನ್ಧಾಯ ವದತಿ.

೨೮೭. ಹಸನ್ತೋ ಹಸನ್ತೋತಿ ಉಪಲಕ್ಖಣಮತ್ತಂ, ಅಹಸನ್ತೋಪಿ ಯೇನ ಕೇನಚಿ ಆಕಾರೇನ ಅತ್ತನೋ ವಿಪರಿಣತಚಿತ್ತತಂ ಇತ್ಥಿಯಾ ಪಕಾಸೇನ್ತೋ ವದತಿ, ಆಪತ್ತಿಯೇವ.

ಕಾಯಚಿತ್ತತೋತಿ ಹತ್ಥಮುದ್ದಾಯ ಓಭಾಸೇನ್ತಸ್ಸ ಕಾಯಚಿತ್ತತೋ ಸಮುಟ್ಠಾತಿ.

೨೮೮. ತಸ್ಮಾ ದುಕ್ಕಟನ್ತಿ ಅಪ್ಪಟಿವಿಜಾನನತೋ ದುಕ್ಕಟಂ, ಪಟಿವಿಜಾನನೇ ಪನ ಸತಿ ಥುಲ್ಲಚ್ಚಯಮೇವ ಪರಿಬ್ಬಾಜಿಕಾವತ್ಥುಸ್ಮಿಂ (ಪಾರಾ. ೨೮೯) ವಿಯ ಅಖೇತ್ತಪದತ್ತಾ. ಖೇತ್ತಪದೇ ಹಿ ಪಟಿವಿಜಾನನ್ತಿಯಾ ಸಙ್ಘಾದಿಸೇಸೋವ ಸಿಯಾ ಮೇಥುನಧಮ್ಮಯಾಚನವತ್ಥುದ್ವಯೇ (ಪಾರಾ. ೨೮೯) ವಿಯ, ತಂ ಪನ ವತ್ಥುದ್ವಯಂ ಮೇಥುನಯಾಚನತೋ ಚತುತ್ಥಸಙ್ಘಾದಿಸೇಸೇ ವತ್ತಬ್ಬಮ್ಪಿ ದುಟ್ಠುಲ್ಲವಾಚಸ್ಸಾದಮತ್ತೇನ ಪವತ್ತತ್ತಾ ಇಧ ವುತ್ತನ್ತಿ ವೇದಿತಬ್ಬಂ. ಏವಂ ಖೇತ್ತಪದೇನ ವದನ್ತಸ್ಸ ಇತ್ಥಿಯಾ ಅಪ್ಪಟಿವಿಜಾನನ್ತಿಯಾ ಕಿಂ ಹೋತೀತಿ? ಕಿಞ್ಚಾಪಿ ಅಯಂ ನಾಮ ಆಪತ್ತೀತಿ ಪಾಳಿಅಟ್ಠಕಥಾಸು ನ ವುತ್ತಂ, ಅಥ ಖೋ ಥುಲ್ಲಚ್ಚಯೇನೇವೇತ್ಥ ಭವಿತಬ್ಬಂ. ತಥಾ ಹಿ ಅಖೇತ್ತಪದೇ ಅಪ್ಪಟಿವಿಜಾನನ್ತಿಯಾ ದುಕ್ಕಟಂ, ಪಟಿವಿಜಾನನ್ತಿಯಾ ಥುಲ್ಲಚ್ಚಯಂ ವುತ್ತಂ. ಖೇತ್ತಪದೇ ಪನ ಪಟಿವಿಜಾನನೇ ಸಙ್ಘಾದಿಸೇಸೋವ ವುತ್ತೋ, ಅಪ್ಪಟಿವಿಜಾನನೇ ಥುಲ್ಲಚ್ಚಯಮೇವ ಭವಿತುಂ ಯುತ್ತಂ, ನ ದುಕ್ಕಟಂ, ಅಖೇತ್ತಪದತೋ ವಿಸೇಸಾಭಾವಪ್ಪಸಙ್ಗೋತಿ ಗಹೇತಬ್ಬಂ. ಯಥಾ ಚೇತ್ಥ, ಏವಂ ಚತುತ್ಥಸಿಕ್ಖಾಪದೇಪಿ ಅಖೇತ್ತಪದೇ ಪಟಿವಿಜಾನನ್ತಿಯಾ ಥುಲ್ಲಚ್ಚಯಂ, ಅಪ್ಪಟಿವಿಜಾನನ್ತಿಯಾ ದುಕ್ಕಟಂ, ಖೇತ್ತಪದೇ ಪನ ಅಪ್ಪಟಿವಿಜಾನನ್ತಿಯಾ ಥುಲ್ಲಚ್ಚಯನ್ತಿ ವೇದಿತಬ್ಬಂ. ಪಾಳಿಯಂ ನವಾವುತನ್ತಿ ನವವೀತಂ.

೨೮೮. ಅಸದ್ಧಮ್ಮಂ ಸನ್ಧಾಯಾತಿ ಮೇಥುನಂ ಸನ್ಧಾಯ ವುತ್ತಂ. ತಞ್ಹಿ ಪುತ್ತಸಮುಪ್ಪತ್ತಿಯಾ ಬೀಜನಿಕ್ಖೇಪತೋ ವಪ್ಪಪರಿಯಾಯಂ ಲಭತೀತಿ.

ಸಂಸೀದತೀತಿ ವಹತಿ, ಸಂಸರೀಯತೀತಿ ವಾ ಅತ್ಥೋ. ಮನುಸ್ಸಿತ್ಥೀ, ತಥಾಸಞ್ಞಿತಾ, ದುಟ್ಠುಲ್ಲವಾಚಸ್ಸಾದರಾಗೋ, ತೇನ ಓಭಾಸನಂ, ತಙ್ಖಣವಿಜಾನನನ್ತಿ ಇಮಾನೇತ್ಥ ಪಞ್ಚ ಅಙ್ಗಾನಿ.

ದುಟ್ಠುಲ್ಲವಾಚಾಸಿಕ್ಖಾಪದವಣ್ಣನಾ ನಿಟ್ಠಿತಾ.