೫. ಭಿಕ್ಖುಸುತ್ತವಣ್ಣನಾ

೧೮೬. ಬೋಧಾಯಾತಿ ಏತ್ಥ ಬೋಧೋ ನಾಮ ಬುಜ್ಝನಂ, ತಂ ಪನ ಕಿಸ್ಸ ಕೇನಾತಿ ಪುಚ್ಛನ್ತೋ ‘‘ಕಿಂ ಬುಜ್ಝನತ್ಥಾಯಾ’’ತಿ ವತ್ವಾ ತಂ ದಸ್ಸೇನ್ತೋ ‘‘ಮಗ್ಗೇನಾ’’ತಿಆದಿಮಾಹ. ಮಗ್ಗೇನ ನಿಬ್ಬಾನಂ ಬುಜ್ಝನತ್ಥಾಯ ಸಂವತ್ತನ್ತಿ, ಪಚ್ಚವೇಕ್ಖಣಾಯ ಕತಕಿಚ್ಚತಂ ಬುಜ್ಝನತ್ಥಾಯ ಸಂವತ್ತನ್ತಿ, ಪಠಮವಿಕಪ್ಪೇ ಸಚ್ಛಿಕಿರಿಯಾಭಿಸಮಯೋ ಏವ ದಸ್ಸಿತೋತಿ ತೇನ ಅತುಟ್ಠೇ ‘‘ಮಗ್ಗೇನ ವಾ’’ತಿ ದುತಿಯವಿಕಪ್ಪಮಾಹ. ವಿವೇಕನಿಸ್ಸಿತಂ ವಿರಾಗನಿಸ್ಸಿತನ್ತಿ ಪದೇಹಿ ಸಬ್ಬಂ ಮಗ್ಗಕಿಚ್ಚಂ ತಸ್ಸ ಫಲಞ್ಚ ದಸ್ಸಿತಂ. ನಿರೋಧನಿಸ್ಸಿತನ್ತಿ ಇಮಿನಾ ನಿಬ್ಬಾನಸಚ್ಛಿಕಿರಿಯಾ. ಕಾಮಾಸವಾಪಿ ಚಿತ್ತಂ ವಿಮುಚ್ಚತೀತಿಆದಿನಾ ಕಿಲೇಸಪ್ಪಹಾನಂ. ವಿಮುತ್ತಸ್ಮಿಂ ವಿಮುತ್ತಮಿತಿ ಞಾಣಂ ಹೋತೀತಿಆದಿನಾ ಪಚ್ಚವೇಕ್ಖಣಾ ದಸ್ಸಿತಾ.

ಭಿಕ್ಖುಸುತ್ತವಣ್ಣನಾ ನಿಟ್ಠಿತಾ.