೪. ತುಲಾಕೂಟಸುತ್ತವಣ್ಣನಾ

೧೧೬೪. ರೂಪಕೂಟಂ ಸರೂಪೇನ ಸದಿಸೇನ ಛಲವೋಹಾರೋ. ಅಙ್ಗಕೂಟಂ ಅತ್ತನೋ ಹತ್ಥಾದಿನಾ ಅಙ್ಗಾನಂ ಛಲಕರಣಂ. ಗಹಣಕೂಟಂ ಮಾನೇಸು ಗಹಣವಸೇನ. ಪಟಿಚ್ಛನ್ನಕೂಟಂ ಅಯಚುಣ್ಣಾದಿನಾ ಪಟಿಚ್ಛನ್ನೇನ ಛಲಕರಣಂ. ಮಹತಿಯಾ ತುಲಾಯ. ಪಚ್ಛಾಭಾಗೇತಿ ತುಲಾಯ ಪಚ್ಛಿಮಭಾಗೇ. ಹತ್ಥೇನಾತಿ ಹತ್ಥಪದೇಸೇನ. ಅಕ್ಕಮತೀತಿ ಉಟ್ಠಾತುಂ ಅದೇನ್ತೋ ಗಣ್ಹಾತಿ. ದದನ್ತೋ ಪುಬ್ಬಭಾಗೇತಿ ಪರೇಸಂ ದದನ್ತೋ ಪುಬ್ಬಭಾಗೇ ಹತ್ಥೇನ ತುಲಂ ಅಕ್ಕಮತಿ. ತನ್ತಿ ಅಯಚುಣ್ಣಂ.

ಲೋಹಪಾತಿಯೋತಿ ತಮ್ಬಲೋಹಪಾತಿಯೋ. ಸುವಣ್ಣವಣ್ಣಾ ಕರೋನ್ತೀತಿ ಅಸನಿಖಾದಸುವಣ್ಣಕನಕಲಿಮ್ಪಿತಾ ಸುವಣ್ಣವಣ್ಣಾ ಕರೋನ್ತಿ. ಮಾನಭಾಜನಸ್ಸ ಹದಯಭೂತಸ್ಸ ಅಬ್ಭನ್ತರಸ್ಸ ಭಿನ್ನಂ ಹದಯಭೇದೋ. ನಿಮಿಯಮಾನಸ್ಸ ತಿಲತಣ್ಡುಲಾದಿಕಸ್ಸ ಸಿಖಾಯ ಅಗ್ಗಕೋಟಿಯಾ ಭಿನ್ನಂ ಸಿಖಾಭೇದೋ. ಖೇತ್ತಾದೀನಂ ಮಿನನರಜ್ಜುಯಾ ಅಞ್ಞಥಾಕರಣಂ ರಜ್ಜುಭೇದೋ. ರಜ್ಜುಗಹಣೇನೇವ ಚೇತ್ಥ ದಣ್ಡಕಸ್ಸ ಗಹಣಂ ಕತಮೇವಾತಿ ದಟ್ಠಬ್ಬಂ.