೮. ವಸ್ಸಸುತ್ತವಣ್ಣನಾ

೧೦೩೪. ಪಾರಂ ವುಚ್ಚತಿ ನಿಬ್ಬಾನಂ ಸಂಸಾರಮಹೋಘಸ್ಸ ಪರತೀರಭಾವತೋ. ತೇನಾಹ – ‘‘ತಿಣ್ಣೋ ಪಾರಙ್ಗತೋ, ಥಲೇ ತಿಟ್ಠತಿ ಬ್ರಾಹ್ಮಣೋ (ಸಂ. ನಿ. ೪.೨೩೮; ಇತಿವು. ೬೯; ಪು. ಪ. ೧೮೮), ಯೇ ಜನಾ ಪಾರಗಾಮಿನೋ’’ತಿ (ಧ. ಪ. ೮೫) ಚ. ಅಥ ವಾ ಪಾತಿ ರಕ್ಖತೀತಿ ಪಾರಂ, ನಿಬ್ಬಾನಂ. ಯೋ ಪಟಿವಿಜ್ಝತಿ, ತಂ ವಟ್ಟದುಕ್ಖತೋ ಪಾತಿ ರಕ್ಖತಿ, ಅಚ್ಚನ್ತಹಿತೇನ ಚ ವಿಮುತ್ತಿಸುಖೇನ ಚ ರಮೇತಿ, ತಸ್ಮಾ ಪಾರನ್ತಿ ವುಚ್ಚತಿ. ಗಚ್ಛಮಾನಾ ಏವಾತಿ ಪಾರಂ ನಿಬ್ಬಾನಂ ಗಚ್ಛಮಾನಾ ಏವ. ತೇ ಧಮ್ಮಾ ಆಸವಾನಂ ಖಯಾಯ ಸಂವತ್ತನ್ತಿ ಸಚ್ಛಿಕಿರಿಯಾಪಹಾನಪಟಿವೇಧಾನಂ ಸಮಕಾಲತ್ತಾ.