೩. ಗೋಧಸಕ್ಕಸುತ್ತವಣ್ಣನಾ

೧೦೧೯. ತೀಹೀತಿ ರತನತ್ತಯೇ ಉಪ್ಪನ್ನೇಹಿ ತೀಹಿ ಪಸಾದಧಮ್ಮೇಹಿ. ಚತೂಹೀತಿ ತೇಹಿ ಏವ ಸದ್ಧಿಂ ಸೀಲೇನ. ಕೋಚಿದೇವಾತಿಆದಿ ಪರಿಕಪ್ಪವಸೇನ ವುತ್ತಂ ಭಗವತಿ ಅತ್ತನೋ ಸದ್ಧಾಯ ಉಳಾರತಮಭಾವದಸ್ಸನತ್ಥಂ. ತೇನಾಹ ‘‘ಭಗವತೋ ಸಬ್ಬಞ್ಞುತಾಯಾ’’ತಿಆದಿ. ಧಮ್ಮೋ ಸಮುಪ್ಪಾದೋತಿ ವಿವಾದಧಮ್ಮಉಪ್ಪತ್ತಿಹೇತು. ತದೇವ ಹಿ ಸನ್ಧಾಯಾಹ ‘‘ಕಿಞ್ಚಿದೇವ ಕಾರಣ’’ನ್ತಿ. ಕಾರಣನ್ತಿ ನಾನಾಕಾರಣಂ. ಕಲ್ಯಾಣಕುಸಲವಿಮುತ್ತನ್ತಿ ಅಕಲ್ಯಾಣಂ ಅಕುಸಲಂ, ತದಿದಂ ಯಥಾವುತ್ತಅಪ್ಪಸಾದನೇನ ಅಪನೀತಅತ್ಥದಸ್ಸನತ್ಥಂ. ಅಸ್ಸಾತಿ ಮಹಾನಾಮಸಕ್ಕಸ್ಸ. ಅನವಜ್ಜನದೋಸೋ ಏಸೋತಿ ಚತೂಸು ಧಮ್ಮೇಸು ಏಕೇನಪಿ ಸಮನ್ನಾಗತೋ ಸೋತಾಪನ್ನೋ ಹೋತೀತಿ ಅನುಜಾನಿತ್ವಾ ಚತೂಹಿಪಿ ಸಮನ್ನಾಗತೇನ ಆಚಿಕ್ಖಿತಬ್ಬನ್ತಿ ಯಾಥಾವತೋ ಅನವಜ್ಜನದೋಸೋತಿ ಅತ್ಥೋ.