೮. ನಾಗಸಂಯುತ್ತಂ

೧. ಸುದ್ಧಿಕಸುತ್ತವಣ್ಣನಾ

೩೪೨. ಅಣ್ಡಜಾತಿ ಅಣ್ಡೇ ಜಾತಾ. ವತ್ಥಿಕೋಸೇತಿ ವತ್ಥಿಕೋಸಸಞ್ಞಿತೇ ಜರಾಯುಪುಟೇ ಜಾತಾ. ಸಂಸೇದೇತಿ ಸಂಸಿನ್ನೇ ಕಿಲಿನ್ನಟ್ಠಾನೇ ಉಪ್ಪನ್ನಾ. ಉಪಪತಿತ್ವಾ ವಿಯಾತಿ ಕುತೋಚಿಪಿ ಅವಪತಿತ್ವಾ ವಿಯ ನಿಬ್ಬತ್ತಾ. ಪುಗ್ಗಲಾನನ್ತಿ ತಥಾ ವಿನೇತಬ್ಬಪುಗ್ಗಲಾನಂ.

ಸುದ್ಧಿಕಸುತ್ತವಣ್ಣನಾ ನಿಟ್ಠಿತಾ.

೨-೫೦. ಪಣೀತತರಸುತ್ತಾದಿವಣ್ಣನಾ

೩೪೩-೩೯೧. ವಿಸ್ಸಟ್ಠಕಾಯಾತಿ ‘‘ಯೇ ಚಮ್ಮೇನ ವಾ ರುಧಿರೇನ ವಾ ಅಟ್ಠಿನಾ ವಾ ಅತ್ಥಿಕಾ, ತೇ ಸಬ್ಬಂ ಗಣ್ಹನ್ತೂ’’ತಿ ತತ್ಥ ನಿರಪೇಕ್ಖಚಿತ್ತತಾಯ ಅಧಿಟ್ಠಿತಸೀಲತಾಯ ಪರಿಚ್ಚತ್ತಸರೀರಾ. ದುವಿಧಕಾರಿನೋತಿ ‘‘ಕಾಲೇನ ಕುಸಲಂ, ಕಾಲೇನ ಅಕುಸಲ’’ನ್ತಿ ಏವಂ ಕುಸಲಾಕುಸಲಕಾರಿನೋ. ಸಹ ಬ್ಯಯತಿ ಪವತ್ತತೀತಿ ಸಹಬ್ಯೋ, ಸಹಚಾರೋ. ತಸ್ಸ ಭಾವೋ ಸಹಬ್ಯತಾ, ತಂ ಸಹಬ್ಯತಂ. ಅದನೀಯತೋ ಅನ್ನಂ. ಖಾದನೀಯತೋ ಖಜ್ಜಂ. ಪಾತಬ್ಬತೋ ಪಾನಂ. ನಿವಸನೀಯತೋ ವತ್ಥಂ. ನಿವಸಿತಬ್ಬಂ ನಿವಾಸನಂ. ಪರಿವರಿತಬ್ಬಂ ಪಾವುರಣಂ. ಯಾನ್ತಿ ತೇನಾತಿ ಯಾನಂ, ಉಪಾಹನಾದಿಯಾನಾನಿ. ಆದಿಸದ್ದೇನ ವಯ್ಹಸಿವಿಕಾದೀನಂ ಸಙ್ಗಹೋ. ಛತ್ತಮ್ಪಿ ಪರಿಸ್ಸಯಾತಪದುಕ್ಖಪರಿರಕ್ಖಣೇನ ಮಗ್ಗಗಮನಸಾಧನನ್ತಿ ಕತ್ವಾ ‘‘ಛತ್ತುಪಾಹನ’’ನ್ತಿಆದಿ ವುತ್ತಂ. ತೇನ ವುತ್ತಂ ‘‘ಯಂ ಕಿಞ್ಚಿ ಗಮನಪಚ್ಚಯ’’ನ್ತಿ. ಪತ್ಥನಂ ಕತ್ವಾ…ಪೇ… ತತ್ಥ ನಿಬ್ಬತ್ತನ್ತಿ ಚಮ್ಪೇಯ್ಯನಾಗರಾಜಾ ವಿಯಾತಿ ದಟ್ಠಬ್ಬಂ.

ಪಣೀತತರಸುತ್ತಾದಿವಣ್ಣನಾ ನಿಟ್ಠಿತಾ.

ನಾಗಸಂಯುತ್ತವಣ್ಣನಾ ನಿಟ್ಠಿತಾ.