೨. ದುತಿಯಗಮನಾದಿವಗ್ಗವಣ್ಣನಾ

೨೨೪-೩೦೧. ದುಕ್ಖವಸೇನ ವುತ್ತನ್ತಿ ‘‘ಇತಿ ಖೋ, ಭಿಕ್ಖವೇ, ದುಕ್ಖೇ ಸತಿ ದುಕ್ಖಂ ಉಪಾದಾಯಾ’’ತಿಆದಿದುಕ್ಖವಸೇನ ವುತ್ತಂ. ತಾದಿಸಮೇವ ದುತಿಯಂ ವೇಯ್ಯಾಕರಣಗಮನಂ. ತೇನಾಹ ‘‘ತತ್ರಾಪಿ ಅಟ್ಠಾರಸೇವ ವೇಯ್ಯಾಕರಣಾನೀ’’ತಿ. ತೇಹೀತಿ ‘‘ರೂಪೀ ಅತ್ತಾ ಹೋತೀ’’ತಿಆದಿನಯಪವತ್ತೇಹಿ ವೇಯ್ಯಾಕರಣೇಹಿ ಸದ್ಧಿಂ. ತನ್ತಿ ದುತಿಯಂ ಗಮನಂ.

ಆರಮ್ಮಣಮೇವಾತಿ ಕಸಿಣಸಙ್ಖಾತಂ ಆರಮ್ಮಣಮೇವ. ತಕ್ಕಿಸದ್ದೇನ ಸುದ್ಧತಕ್ಕಿಕಾನಂ ಗಹಣಂ ದಟ್ಠಬ್ಬಂ.

ಅನಿಚ್ಚದುಕ್ಖವಸೇನಾತಿ ‘‘ಯದನಿಚ್ಚಂ, ತಂ ದುಕ್ಖಂ, ತಸ್ಮಿಂ ಸತಿ ತದುಪಾದಾಯ ಏವಂ ದಿಟ್ಠಿ ಉಪ್ಪಜ್ಜತೀ’’ತಿ ವುತ್ತಅನಿಚ್ಚದುಕ್ಖವಸೇನಾತಿ. ತೇಹಿಯೇವಾತಿ ದುತಿಯೇ ಪೇಯ್ಯಾಲೇ ವುತ್ತಪ್ಪಕಾರೇಹಿಯೇವ. ತಿಪರಿವಟ್ಟವಸೇನಾತಿ ತೇಹಿಯೇವ ಛಬ್ಬೀಸತಿಯಾ ಸುತ್ತೇಹಿ ಚತುತ್ಥಪೇಯ್ಯಾಲೇ ತಿಪರಿವಟ್ಟವಸೇನ ವುತ್ತೋತಿ ಯೋಜನಾ.

ದುತಿಯಗಮನಾದಿವಗ್ಗವಣ್ಣನಾ ನಿಟ್ಠಿತಾ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ದಿಟ್ಠಿಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.