೭. ಹೇತುಸುತ್ತವಣ್ಣನಾ

೨೧೨. ಉಭಯೇನಾತಿ ಹೇತುಪಚ್ಚಯಪಟಿಸೇಧವಚನೇನ. ಸಂಕಿಲೇಸಪಚ್ಚಯನ್ತಿ ಸಂಕಿಲಿಸನಸ್ಸ ಮಲೀನಭಾವಸ್ಸ ಕಾರಣಂ. ವಿಸುದ್ಧಿಪಚ್ಚಯನ್ತಿ ಸಂಕಿಲೇಸತೋ ವಿಸುದ್ಧಿಯಾ ವೋದಾನಸ್ಸ ಕಾರಣಂ. ನತ್ಥಿ ಬಲನ್ತಿ ಸತ್ತಾನಂ ದಿಟ್ಠಧಮ್ಮಿಕಸಮ್ಪರಾಯಿಕನಿಬ್ಬಾನಸಮ್ಪತ್ತಿಆವಹಂ ಬಲಂ ನಾಮ ಕಿಞ್ಚಿ ನತ್ಥಿ. ತೇನಾಹ ‘‘ಯಮ್ಹೀ’’ತಿಆದಿ. ನಿದಸ್ಸನಮತ್ತಞ್ಚೇತಂ, ಸಂಕಿಲೇಸಿಕಮ್ಪಿ ಚಾಯಂ ಪಟಿಕ್ಖಿಪತೇವ. ಅಞ್ಞಮಞ್ಞವೇವಚನಾನೀತಿ ತಸ್ಸಾ ತಸ್ಸಾ ಕಿರಿಯಾಯ ಉಸ್ಸನ್ನಟ್ಠೇನ ಬಲಂ, ಸೂರವೀರಭಾವಾವಹಟ್ಠೇನ ವೀರಿಯಂ, ತಮೇವ ದಳ್ಹಗ್ಗಾಹಭಾವತೋ ಪೋರಿಸಂ ಧುರಂ ವಹನ್ತೇನ ಪವತ್ತೇತಬ್ಬತೋ ಪುರಿಸಥಾಮೋ, ಪರಂ ಪರಂ ಠಾನಂ ಅಕ್ಕಮನಪ್ಪವತ್ತಿಯಾ ಪುರಿಸಪರಕ್ಕಮೋತಿ ವುತ್ತೋತಿ ವೇದಿತಬ್ಬಂ.

ಸತ್ವಯೋಗತೋ, ರೂಪಾದೀಸು ವಾ ಸತ್ತತಾಯ ಸತ್ತಾ, ಪಾಣನತೋ ಅಸ್ಸಾಸನಪಸ್ಸಾಸನವಸೇನ ಪವತ್ತಿಯಾ ಪಾಣಾ, ತೇ ಪನ ಸೋ ಏಕಿನ್ದ್ರಿಯಾದಿವಸೇನ ವಿಭಜಿತ್ವಾ ವದತೀತಿ ಆಹ ‘‘ಏಕಿನ್ದ್ರಿಯೋ’’ತಿಆದಿ. ಅಣ್ಡಕೋಸಾದೀಸು ಭವನತೋ ಭೂತಾತಿ ವುಚ್ಚನ್ತೀತಿ ಆಹ ‘‘ಅಣ್ಡ…ಪೇ… ವದನ್ತೀ’’ತಿ. ಜೀವನತೋ ಪಾಣಂ ಧಾರೇನ್ತಾ ವಿಯ ವಡ್ಢನತೋ ಜೀವಾತಿ ಸಾಲಿಯವಾದಿಕೇ ವದನ್ತಿ. ನತ್ಥಿ ಏತೇಸಂ ಸಂಕಿಲೇಸವಿಸುದ್ಧೀಸು ವಸೋತಿ ಅವಸಾ. ನತ್ಥಿ ತೇಸಂ ಬಲಂ ವೀರಿಯನ್ತಿ ಅಬಲಾ ಅವೀರಿಯಾ. ನಿಯತತಾತಿ ಅಚ್ಛೇಜ್ಜಸುತ್ತಾವುತಾಭೇಜ್ಜಮಣಿನೋ ವಿಯ ನಿಯತಪ್ಪವತ್ತಿತಾಯ ಗತಿಜಾತಿಬನ್ಧಾಪವಗ್ಗವಸೇನ ನಿಯಮೋ. ತತ್ಥ ತತ್ಥ ಗಮನನ್ತಿ ಛನ್ನಂ ಅಭಿಜಾತೀನಂ ವಸೇನ ತಾಸು ತಾಸು ಗತೀಸು ಉಪಗಮನಂ. ಸಮವಾಯೇನ ಸಮಾಗಮೋ ಸಙ್ಗತಿ. ಸಭಾವೋಯೇವಾತಿ ಯಥಾ ಕಣ್ಟಕಸ್ಸ ತಿಕ್ಖತಾ, ಕಪಿತ್ಥಫಲಾನಂ ಪರಿಮಣ್ಡಲತಾ, ಮಿಗಪಕ್ಖೀನಂ ವಿಚಿತ್ತಾಕಾರತಾ, ಏವಂ ಸಬ್ಬಸ್ಸಪಿ ಲೋಕಸ್ಸ ಹೇತುಪಚ್ಚಯೇಹಿ ವಿನಾ ತಥಾ ತಥಾ ಪರಿಣಾಮೋ, ಅಯಂ ಸಭಾವೋ ಏವ ಅಕಿತ್ತಿಮೋ ಏವ. ತೇನಾಹ ‘‘ಯೇನ ಹೀ’’ತಿಆದಿ. ಛಳಭಿಜಾತಿಯೋ ಪರತೋ ವಿತ್ಥಾರೀಯನ್ತಿ. ಸುಖಞ್ಚ ದುಕ್ಖಞ್ಚ ಪಟಿಸಂವೇದೇನ್ತೀತಿ ವದನ್ತಾ ಅದುಕ್ಖಮಸುಖಭೂಭಿಂ ಸಬ್ಬೇನ ಸಬ್ಬಂ ನ ಜಾನನ್ತೀತಿ ಉಲ್ಲಿಙ್ಗೇನ್ತೋ ‘‘ಅಞ್ಞಾ ಸುಖದುಕ್ಖಭೂಮಿ ನತ್ಥೀತಿ ದಸ್ಸೇನ್ತೀ’’ತಿ ಆಹ.

ಹೇತುಸುತ್ತವಣ್ಣನಾ ನಿಟ್ಠಿತಾ.