೨. ರಾಧಸಂಯುತ್ತಂ

೧. ಪಠಮವಗ್ಗೋ

೧. ಮಾರಸುತ್ತವಣ್ಣನಾ

೧೬೦. ಮಾರಸದ್ದೋಯಂ ಭಾವಸಾಧನೋತಿ ದಸ್ಸೇನ್ತೋ ‘‘ಮಾರೋ ವಾ ಅಸ್ಸಾತಿ ಮರಣಂ ವಾ ಭವೇಯ್ಯಾ’’ತಿ ಆಹ. ಮಾರೇತಾತಿ ಮರಿತಬ್ಬೋ ಮಾರಂ ಮರಣಂ ಏತಬ್ಬೋತಿ ಆಹ ‘‘ಮಾರೇತಬ್ಬೋ’’ತಿ. ಅನುಪಾದಾನಿಬ್ಬಾನತ್ಥಾತಿ ಫಲವಿಮುತ್ತಿಸಙ್ಖಾತಾ ಅರಹತೋ ಅರಹನ್ತತಾ ನಾಮ ಯಾವದೇವ ಅನುಪಾದಾನಿಬ್ಬಾನತ್ಥಾ. ನಿಬ್ಬಾನಬ್ಭನ್ತರೇತಿ ಅನುಪಾದಾನಿಬ್ಬಾನಾಧಿಗಮಸ್ಸ ಅಬ್ಭನ್ತರೇ ತತೋ ಓರಮೇವ ಇದಂ ಮಗ್ಗಂ ಬ್ರಹ್ಮಚರಿಯಂ ವುಸ್ಸತಿ, ನ ತತೋ ಪರಂ. ಅಸ್ಸಾತಿ ಬ್ರಹ್ಮಚರಿಯಸ್ಸ.

ಮಾರಸುತ್ತವಣ್ಣನಾ ನಿಟ್ಠಿತಾ.

೨-೧೦. ಸತ್ತಸುತ್ತಾದಿವಣ್ಣನಾ

೧೬೧-೧೬೯. ಲಗ್ಗಪುಚ್ಛಾತಿ ಲಗ್ಗನಸ್ಸ ಬಜ್ಝನಸ್ಸ ಪುಚ್ಛಾ. ಯದಿ ರೂಪಾದೀಸು ಸತ್ತತ್ತಾ ಸತ್ತೋ, ಖೀಣಾಸವಾ ಕಥಂ ಸತ್ತಾತಿ? ಸತ್ತಭೂತಪುಬ್ಬಾತಿ ಕತ್ವಾ. ಕೀಳಾವಿಗಮನ್ತಿ ಕೀಳಾಯ ಅಪನಯನಂ ಓರಮಣಂ. ಯನ್ತರಜ್ಜು ವಿಯ ಭವಪಬನ್ಧಸ್ಸ ನಯನತೋ ಭವರಜ್ಜೂತಿ ತಣ್ಹಾ ವುತ್ತಾ.

ಸತ್ತಸುತ್ತಾದಿವಣ್ಣನಾ ನಿಟ್ಠಿತಾ.

ಪಠಮವಗ್ಗವಣ್ಣನಾ ನಿಟ್ಠಿತಾ.

೨. ದುತಿಯವಗ್ಗೋ

೧-೧೨. ಮಾರಸುತ್ತಾದಿವಣ್ಣನಾ

೧೭೦-೧೮೧. ರೂಪಾದಿವಿನಿಮುತ್ತಂ ಮರಣಂ ನಾಮ ನತ್ಥಿ ರೂಪಾದೀನಂಯೇವ ವಿಭವೇ ಮರಣಸಮಞ್ಞಾತಿ. ಮರಣಧಮ್ಮೋ ವಿನಾಸಭಾವೋ.

ಮಾರಸುತ್ತಾದಿವಣ್ಣನಾ ನಿಟ್ಠಿತಾ.

ದುತಿಯವಗ್ಗವಣ್ಣನಾ ನಿಟ್ಠಿತಾ.

೩-೪. ಆಯಾಚನವಗ್ಗಾದಿ

೧-೧೧. ಮಾರಾದಿಸುತ್ತಏಕಾದಸಕವಣ್ಣನಾ

೧೮೨-೨೦೫. ಸುಖುಮಂ ಕಾರಣಂ ಉಪಟ್ಠಾತಿ, ತೇನೇಸ ಥೇರೋ ಪಟಿಭಾನೇಯ್ಯಕಾನಂ ಏತದಗ್ಗೇ ಠಪಿತೋ. ವಿಮುತ್ತಿಪರಿಪಾಚನೀಯಧಮ್ಮವಸೇನೇವ, ನ ಪಟಿವೇಧಾವಹಭಾವೇನ.

ಮಾರಾದಿಸುತ್ತಏಕಾದಸಕವಣ್ಣನಾ ನಿಟ್ಠಿತಾ.

ಆಯಾಚನವಗ್ಗಾದಿವಣ್ಣನಾ ನಿಟ್ಠಿತಾ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ರಾಧಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.