೯. ಕೋಣ್ಡಞ್ಞಸುತ್ತವಣ್ಣನಾ

೨೧೭. ಏವಂಗಹಿತನಾಮೋತಿ ‘‘ಅಞ್ಞಾಸಿ ವತ, ಭೋ, ಕೋಣ್ಡಞ್ಞೋ’’ತಿ ಸತ್ಥು ವಚನಂ ನಿಸ್ಸಾಯ ಭಿಕ್ಖೂಹಿ ಅಞ್ಞೇಹಿ ಕೋಣ್ಡಞ್ಞನಾಮಕೇಹಿ ವಿಸೇಸನತ್ಥಂ ಏವಂಗಹಿತನಾಮೋ. ದ್ವಾದಸನ್ನಂ ಸಂವಚ್ಛರಾನಂ ವಸೇನ ಚಿರಸ್ಸಂ. ಛದ್ದನ್ತಭವನೇತಿ ಛದ್ದನ್ತನಾಗರಾಜಭವನಟ್ಠಾನೇ. ಪಞ್ಞವಾ ಮಹಾಸಾವಕೋ ರತ್ತಞ್ಞುತಾಯ. ‘‘ದಸಸಹಸ್ಸಚಕ್ಕವಾಳೇ ದೇವಮನುಸ್ಸಾನನ್ತಿ ದಸಸಹಸ್ಸಚಕ್ಕವಾಳೇ ದೇವಾನಂ, ಇಮಸ್ಮಿಂ ಚಕ್ಕವಾಳೇ ದೇವಮನುಸ್ಸಾನಞ್ಚಾತಿ ಏವಂ ದಸಸಹಸ್ಸಚಕ್ಕವಾಳೇ ದೇವಮನುಸ್ಸಾನ’’ನ್ತಿ ವದನ್ತಿ. ಅಗ್ಗನ್ತಿಆದಿತೋ. ತತ್ಥಾತಿ ಮನ್ದಾಕಿನಿತೀರೇ.

ವಸ್ಸಗ್ಗೇನಾತಿ ವಸ್ಸಪಟಿಪಾಟಿಯಾ. ತನ್ತಿ ಅಞ್ಞಾಸಿಕೋಣ್ಡಞ್ಞತ್ಥೇರಂ. ಮಹಾಬ್ರಹ್ಮಾನಂ ವಿಯ ಲೋಕಿಯಮನುಸ್ಸಾ ಹರಾಯನ್ತಿ. ಪಾಮೋಕ್ಖಭೂತೋ ಆಯಸ್ಮಾ ಥೇರೋ ಅನ್ತರನ್ತರಾ ತತ್ಥ ತತ್ಥ ಜನಪದೇ ವಸಿತ್ವಾ ತದನುಕ್ಕಮೇನ ಮನ್ದಾಕಿನಿತೀರಂ ಉಪಗತೋ, ತಸ್ಮಾ ವುತ್ತಂ – ‘‘ಇಚ್ಛಾಮಹಂ, ಭನ್ತೇ, ಜನಪದೇ ವಸಿತು’’ನ್ತಿ.

ಆನುಭಾವಸಮ್ಪನ್ನಾ ದಿಬ್ಬಾಯುಕಾ ತೇ ಹತ್ಥಿನಾಗಾತಿ ವುತ್ತಂ ‘‘ಪುಬ್ಬೇ ಪಚ್ಚೇಕಬುದ್ಧಾನಂ ಪಾರಿಚರಿಯಾಯ ಕತಪರಿಚಯಾ’’ತಿ. ಥೇರಸ್ಸ ಸಞ್ಚರಣಟ್ಠಾನೇ ಆವರಣಸಾಖಾ ಹರಿತ್ವಾ ಅಪನೇತ್ವಾ. ಮುಖೋದಕಞ್ಚೇವ ದನ್ತಕಟ್ಠಞ್ಚ ಠಪೇತೀತಿ ಸಳಲದೇವದಾರುಕಟ್ಠಾದೀನಿ ಅಞ್ಞಮಞ್ಞಂ ಘಂಸಿತ್ವಾ ಅಗ್ಗಿಂ ನಿಬ್ಬತ್ತೇತ್ವಾ ಜಾಲೇತ್ವಾ ತತ್ಥ ಪಾಸಾಣಖಣ್ಡಾನಿ ತಾಪೇತ್ವಾ ತಾನಿ ದಣ್ಡಕೇಹಿ ವಟ್ಟೇತ್ವಾ ತಳಾಕಾಸು ಉದಕಸೋಣ್ಡೀಸು ಖಿಪಿತ್ವಾ ಉದಕಸ್ಸ ತತ್ತಭಾವಂ ಞತ್ವಾ ನಾಗಲತಾದನ್ತಕಟ್ಠಂ ಉಪನೇನ್ತೋ ಮುಖೋದಕಞ್ಚ ಠಪೇತಿ. ವತ್ತಂ ಕರೋತೀತಿ ಅನ್ತೋಕುಟಿಯಾ ಬಹಿ ಚ ಪಮುಖೇಪಿ ಅಙ್ಗಣೇಪಿ ಸಾಖಾಭಙ್ಗೇಹಿ ಸಮ್ಮಜ್ಜನ್ತೋ ವಕ್ಖಮಾನನಯೇನ ಆಹಾರಂ ಉಪನೇನ್ತೋ ವತ್ತಂ ಕರೋತಿ.

ಪತಿಟ್ಠಪ್ಪಮಾಣೇತಿ ಕಟಿಪ್ಪಮಾಣೇ, ಅಯಮೇವ ವಾ ಪಾಠೋ ತಾವ ಮಹನ್ತಮೇವಾತಿ ಯಾವ ಮಹನ್ತಂ ಸೇತಪದುಮವನಂ, ತಾವ ಮಹನ್ತಮೇವ. ಏಸೇವ ನಯೋ ರತ್ತಕುಮುದವನಾದೀಸು. ಖಾದನ್ತಾ ಮನುಸ್ಸಾ. ಪಕ್ಕಪಯೋಘನಿಕಾ ವಿಯಾತಿ ಸುಪಕ್ಕಪಯೋಘನಂ ವಿಯ. ಘನಭಾವೇನ ಪನ ಪಕ್ಖಿತ್ತಖುದ್ದಮಧು ವಿಯ ಹೋತಿ. ತೇನಾಹ ‘‘ಏತಂ ಪೋಕ್ಖರಮಧು ನಾಮಾ’’ತಿ. ಮುಳಾಲನ್ತಿ ಸೇತಪದುಮಾನಂ ಮೂಲಂ. ಭಿಸನ್ತಿ ತೇಸಂಯೇವ ಕನ್ದಂ. ಏಕಸ್ಮಿಂ ಪಬ್ಬೇತಿ ಏಕೇಕಸ್ಮಿಂ ಪಬ್ಬನ್ತರೇ. ಪಾದಘಟಕನ್ತಿ ದೋಣಸ್ಸ ಚತುಭಾಗೋ ಸಣ್ಠಾನತೋ ಖುದ್ದಕೋ, ತಸ್ಮಾ ಪಾದಘಟಕಪ್ಪಮಾಣನ್ತಿ ತುಮ್ಬಮತ್ತಂ. ಸೋಣ್ಡಿಆವಾಟೇತಿ ಖುದ್ದಕಸೋಣ್ಡಿಯೋ ಚೇವ ಖುದ್ದಕಆವಾಟೇ ಚ.

ಏತಂ ಭೋಜನನ್ತಿ ಯಥಾವುತ್ತಂ ನಿರುದಕಪಾಯಸಭೋಜನಂ. ಕೇಚಿ ಸಞ್ಜಾನನ್ತಿ ಯೇ ಥೇರಾ ವುಡ್ಢತರಾ. ಕೇಚಿ ನ ಸಞ್ಜಾನನ್ತಿ ಯೇ ನವಾ ಅಚಿರಪಬ್ಬಜಿತಾ.

ಬುದ್ಧಾನುಬುದ್ಧೋತಿ ಬುದ್ಧಸ್ಸ ಅನುಬುದ್ಧೋ. ಬಾಳ್ಹವೀರಿಯೋತಿ ಚತುನ್ನಂ ಸಮ್ಮಪ್ಪಧಾನಾನಂ ವಸೇನ ಚಿರನಿಚಿತವೀರಿಯೋ. ತಿಣ್ಣಂ ವಿವೇಕಾನನ್ತಿ ಕಾಯಚಿತ್ತಉಪಧಿವಿವೇಕಾನಂ ಲಾಭೀತಿ ಯೋಜನಾ. ಚತಸ್ಸೋ ವದತಿ ವಙ್ಗೀಸತ್ಥೇರೋ ಸಯಂಪಟಿಭಾನಂ, ನ ಸೇಸಾಭಿಞ್ಞಾನಂ ಅಭಾವತೋತಿ ಆಹ ‘‘ಇತರಾ’’ತಿಆದಿ. ಪರಿಸಾ ಸನ್ನಿಸೀದಿ ನಿಸ್ಸದ್ದಭಾವೇನ ತುಣ್ಹೀ ಅಹೋಸೀತಿ ಅತ್ಥೋ. ಅನುಜಾನಾಪೇಸೀತಿ ಪಠಮಂ ಅತ್ತನಾ ಞಾತಂ ಉಪಟ್ಠಿತಂ ಅತ್ತನೋ ಪರಿನಿಬ್ಬಾನಕಾಲಂ ಅನು ಪಚ್ಛಾ ಸತ್ಥಾರಂ ಜಾನಾಪೇಸೀತಿ ಏವಂ ಏತ್ಥ ಅತ್ಥೋ ದಟ್ಠಬ್ಬೋ.

ತನ್ತಿ ಆಸಾಳ್ಹಿಪುಣ್ಣಮಾಯ ಇಸಿಪತನೇ ಯಂ ದಸ್ಸನಂ, ಯಂ ವಾ ದುಕ್ಕರಚರಿಯಾಯಂ ತುಮ್ಹಾಕಂ ಉಪಟ್ಠಾನಂ ಆದಿತೋ ದಸ್ಸನಂ, ತಂ, ಭನ್ತೇ, ಪಠಮದಸ್ಸನಂ. ಓನತವಿನತಾತಿ ಹೇಟ್ಠಾ ಉಪರಿ ಚ ಓನತಾ ವಿನತಾ. ಕಮ್ಪೇತ್ವಾತಿ ಥೋಕಂ ಚಾಲೇತ್ವಾ ದಸ್ಸನತ್ಥಂ ಏಕನಿನ್ನಾದೋ ತೇಸಂ ಹತ್ಥಿನಾಗಾನಞ್ಚೇವ ನಾಗಯಕ್ಖಕುಮ್ಭಣ್ಡಾನಂ ದೇವತಾನಞ್ಚ ಸದ್ದೇನ. ಬ್ರಹ್ಮಾನೋ ದೇವಾನಂ ಅದಂಸೂತಿ ಸಮ್ಬನ್ಧೋ.

ಸಜ್ಝಾಯಮಕಂಸು ಪಸಾದನೀಯೇಸು ಪಸಾದವಸೇನ ಸನ್ನಿಪತಿತಪರಿಸಾಯ ಪಸಾದಜನನತ್ಥಂ ಭಗವತಿ ನಿಕ್ಖಮಿತ್ವಾತಿ ಭಗವತಿ ಗನ್ಧಕುಟಿತೋ ನಿಕ್ಖಮಿತ್ವಾ. ಧರತಿಯೇವಾತಿ ಅದುಟ್ಠತಂ ಪತ್ವಾ ತಿಟ್ಠತೇವ.

ಕೋಣ್ಡಞ್ಞಸುತ್ತವಣ್ಣನಾ ನಿಟ್ಠಿತಾ.