೩. ಪೇಸಲಸುತ್ತವಣ್ಣನಾ

೨೧೧. ಏತೇಸನ್ತಿ ಏತೇಸಂ ಮಹಲ್ಲಕಾನಂ. ನ ಪಾಳಿ ಆಗಚ್ಛತಿ ಅಪ್ಪಗುಣಭಾವತೋ. ನ ಚ ಪಾಳಿ ಉಪಟ್ಠಾತಿ, ಏಕಾಯ ಪಾಳಿಯಾ ಸತಿ ಪಾಳಿಗತಿಯಾ ತಥಾ ತಥಾ ಉಪಟ್ಠಾನಮ್ಪಿ ನೇಸಂ ನತ್ಥೀತಿ ವದತಿ. ನ ಅಟ್ಠಕಥಾತಿ ಏತ್ಥಾಪಿ ಏಸೇವ ನಯೋ. ಸಿಥಿಲಧನಿತಾದಿತಂತಂಬ್ಯಞ್ಜನಬುದ್ಧಿಂ ಅಹಾಪೇತ್ವಾ ಉಚ್ಚಾರಣಂ ಪದಬ್ಯಞ್ಜನಮಧುರತಾ. ಅತಿಕ್ಕಮಿತ್ವಾ ಮಞ್ಞತಿ ಅಞ್ಞೇ ಭಿಕ್ಖೂ. ಹೀಳನವಸೇನ ಅಭಿಭವಿತ್ವಾ ಪಟಿಭಾನಸುತೇನ ಅತ್ತಾನಂ ಪಸಂಸತಿ ಸಮ್ಭಾವೇತಿ. ಮಾನಸ್ಸ ಪವತ್ತಿತಾಯ ಸಹಜಾತನಿಸ್ಸಯಾದಿಪಚ್ಚಯಧಮ್ಮಾ ತಂಸಹಭುಧಮ್ಮಾ. ಮಾನವಸೇನ ವಿಪ್ಪಟಿಸಾರೀ ಅಹುವಾ. ಮಾ ಅಹೋಸೀತಿ ಯೋಜನಾ. ವಣ್ಣಭಣನನ್ತಿ ಪರೇಹಿ ಕಿರಿಯಮಾನಂ ಗುಣಾಭಿತ್ಥವಂ. ಅಖಿಲೋತಿ ಪಞ್ಚಚೇತೋಖಿಲರಹಿತೋ. ನಿಸ್ಸೇಸಂ ನವವಿಧನ್ತಿ ನವವಿಧಮ್ಪಿ ಮಾನಂ ಕಸ್ಸಚಿ ಏಕದೇಸಸ್ಸಪಿ ಅಸೇಸತೋ. ವಿಜ್ಜಾಯಾತಿ ಅಗ್ಗಮಗ್ಗವಿಜ್ಜಾಯ. ಅಚ್ಚನ್ತಮೇವ ಸಮಿತತಾಯ ವೂಪಸಮಿತತಾಯ ಸಮಿತಾವೀ.

ಪೇಸಲಸುತ್ತವಣ್ಣನಾ ನಿಟ್ಠಿತಾ.