೨. ಉಪಾಸಕವಗ್ಗೋ

೧. ಕಸಿಭಾರದ್ವಾಜಸುತ್ತವಣ್ಣನಾ

೧೯೭. ದಕ್ಖಿಣಾಗಿರಿಸ್ಮಿನ್ತಿ ದಕ್ಖಿಣಾಗಿರಿಜನಪದೇ, ತಸ್ಮಿಂ ದಕ್ಖಿಣಾಗಿರಿಜನಪದೇ ದಕ್ಖಿಣಾಗಿರಿವಿಹಾರೇ. ಖನ್ಧೇಸು ಠಪೇತ್ವಾ ಯುಗೇ ಯೋತ್ತೇಹೀತಿ ಯೋತ್ತರಜ್ಜೂಹಿ ಯುತ್ತಾನಿ ಪಯೋಜಿತಾನಿ ಇಚ್ಚೇವ ಅತ್ಥೋ.

ಪಠಮದಿವಸೇತಿ ವಪನದಿವಸೇಸು ಪಠಮದಿವಸೇ ಆರದ್ಧದಿವಸೇ. ಪಞ್ಚಙ್ಗಾನಿಪಿ ಪರಿಪುಣ್ಣಾನಿ, ಪಗೇವ ಇತರಙ್ಗಾನೀತಿ ದಸ್ಸೇತುಂ ‘‘ಪರಿಪುಣ್ಣಪಞ್ಚಙ್ಗಾ’’ಇಚ್ಚೇವ ವುತ್ತಂ. ಹರಿತಾಲಮನೋಸಿಲಾಅಞ್ಜನೇಹಿ ಉರತ್ಥನಾದೀಸು ಠಪಿತತ್ತಾ ಆಭಾಯ ಉಜ್ಜಲಗತ್ತಾ. ಅವಸೇಸಾ ಬಲೀಬದ್ದಾ. ಕಿಲನ್ತಗೋಣಂ ಮೋಚೇತ್ವಾ ಅಕಿಲನ್ತಸ್ಸ ಯೋಜನಂ ಕಿಲನ್ತಪರಿವತ್ತನಂ.

ಸೀಹಕುಣ್ಡಲಾನೀತಿ ಸೀಹಮುಖಕುಣ್ಡಲಾನಿ. ಬ್ರಹ್ಮವೇಠನನ್ತಿ ಬ್ರಹ್ಮುನೋ ವೇಠನಸದಿಸಂ, ಅಸ್ಸನಖವೇಠನಸದಿಸನ್ತಿ ಅತ್ಥೋ.

ಬುದ್ಧಾನಂ ಕಿಚ್ಚಾನಿ ಕಾಲವಸೇನ ವಿಭತ್ತಾನಿ ಪಞ್ಚ ಕಿಚ್ಚಾನಿ ಭವನ್ತಿ. ಪುರೇಭತ್ತಕಿಚ್ಚನ್ತಿ ಭತ್ತತೋ ಪುಬ್ಬೇ ಬುದ್ಧೇನ ಕಾತಬ್ಬಕಿಚ್ಚಂ. ವೀತಿನಾಮೇತ್ವಾತಿ ಫಲಸಮಾಪತ್ತಿಯಾ ಕಾಲಂ ವೀತಿನಾಮೇತ್ವಾ. ಕದಾಚಿ ಏಕೋತಿಆದಿ ತೇಸಂ ತೇಸಂ ವಿನೇಯ್ಯಾನಂ ವಿನಯನಾನುರೂಪಪಟಿಪತ್ತಿದಸ್ಸನಂ. ಪಕತಿಯಾತಿ ಪಕತಿಬುದ್ಧವೇಸೇನ. ಬುದ್ಧಾನಂ ಹಿ ರೂಪಕಾಯಸ್ಸ ಅಸೀತಿಅನುಬ್ಯಞ್ಜನಪಟಿಮಣ್ಡಿತ-ಬಾತ್ತಿಂಸಮಹಾಪುರಿಸ- ಲಕ್ಖಣ-ಕಾಯಪ್ಪಭಾ-ಬ್ಯಾಮಪ್ಪಭಾ-ಕೇತುಮಾಲಾವಿಚಿತ್ತತಾ ಬುದ್ಧವೇಸೋ. ಕದಾಚಿ ಅನೇಕೇಹಿ ಪಾಟಿಹಾರಿಯೇಹಿ ವತ್ತಮಾನೇಹೀತಿ ಇಮಿನಾ ಪಾರಮೀನಂ ನಿಸ್ಸನ್ದಭೂತಾನಿ ಪಾಟಿಹಾರಿಯಾನಿ ರುಚಿವಸೇನೇವ ಪಕಾಸನಕಾನಿ ಭವನ್ತಿ, ನ ಸಬ್ಬದಾತಿ ದಸ್ಸೇತಿ. ಏವಞ್ಚ ಕತ್ವಾ ‘‘ಇನ್ದಖೀಲಸ್ಸ ಅನ್ತೋ ಠಪಿತಮತ್ತೇ ದಕ್ಖಿಣಪಾದೇ’’ತಿಆದಿವಚನಂ ಸಮತ್ಥಿತಂ ಹೋತಿ. ಭಗವತೋ ಕಾಯೇ ಪೀತರಸ್ಮೀನಂ ಯೇಭುಯ್ಯತಾಯ ‘‘ಸುವಣ್ಣರಸಸಿಞ್ಚನಾನಿ ವಿಯಾ’’ತಿ ವತ್ವಾ ಕಾಯಮ್ಹಿ ನೀಲಾದಿರಸ್ಮೀಹಿ ತಹಂ ತಹಂ ಪೀತಮಿಸ್ಸಿತಂ ಸನ್ಧಾಯ ‘‘ವಿಚಿತ್ರಪಟಪರಿಕ್ಖಿತ್ತಾನಿ ವಿಯ ಚಾ’’ತಿ ವುತ್ತಂ. ಮಧುರೇನಾಕಾರೇನ ಸದ್ದಂ ಕರೋನ್ತಿ ತುಟ್ಠರವರವನತೋ.

ತತ್ಥಾತಿ ವಿಹಾರೇ. ಗನ್ಧಮಣ್ಡಲಮಾಳೇತಿ ಹತ್ಥೇನ ಕತಪರಿಭಣ್ಡೇ ಸಮೋಸರಿತಗನ್ಧಪುಪ್ಫದಾಮೇ ಮಣ್ಡಲಮಾಳೇ.

ಉಪಟ್ಠಾನೇತಿ ಪಮುಖೇ. ‘‘ಓವದತೀ’’ತಿ ವತ್ವಾ ತತ್ಥೋವಾದಂ ಸಾಮಞ್ಞತೋ ದಸ್ಸೇತುಂ, ‘‘ಭಿಕ್ಖವೇ’’ತಿಆದಿ ವುತ್ತಂ. ಸಮ್ಪತ್ತೀತಿ ಚಕ್ಖಾದಿಇನ್ದ್ರಿಯಪಾರಿಪೂರಿ ಚೇವ ಹತ್ಥಾದಿಸಮ್ಪದಾ ಚ. ಸಮಸ್ಸಾಸಿತಕಾಯೋ ಕಿಲಮಥವಿನೋದನೇನ. ‘‘ತಞ್ಚ ಖೋ ಸಮಾಪಜ್ಜನೇನಾ’’ತಿ ವದನ್ತಿ. ದುತಿಯಭಾಗೇತಿ ಇಮಿನಾ ಅಪರಭಾಗಂ ತಯೋ ಭಾಗೇ ಕತ್ವಾ ತತ್ಥ ಪುರಿಮಭಾಗಂ ಸೇಯ್ಯನಿಸಜ್ಜಾವಸೇನ ಸಮಾಪತ್ತೀಹಿ ವೀತಿನಾಮೇತೀತಿ ದಸ್ಸೇತಿ. ಲೋಕನ್ತಿ ರಾಜಗಹಾದೀಸು ಯಂ ತದಾ ಉಪನಿಸ್ಸಾಯ ವಿಹರತಿ, ತತ್ಥ ಅಞ್ಞತ್ಥ ವಾ ಬುಜ್ಝನಕಂ ವಿನೇಯ್ಯಸತ್ತಲೋಕಂ ಬುದ್ಧಚಕ್ಖುನಾ ವೋಲೋಕೇತಿ. ಕಾಲಯುತ್ತನ್ತಿ ತೇಸಂ ಇನ್ದ್ರಿಯಪರಿಪಾಕಕಾಲಾನುರೂಪಂ. ಸಮಯಯುತ್ತನ್ತಿ ತಸ್ಸೇವ ವೇವಚನಂ. ಸಮಯಯುತ್ತನ್ತಿ ವಾ ತೇಹಿ ಆಜಾನಿತಬ್ಬವಿಸೇಸಪಟಿಲಾಭಾನುರೂಪಂ.

ಪಟಿಸಲ್ಲೀನೋತಿ ಕಾಲಪರಿಚ್ಛೇದಂ ಕತ್ವಾ ಸಮಾಪತ್ತಿಂ ಸಮಾಪನ್ನೋ. ಅಧಿಪ್ಪಾಯಂ ಸಮ್ಪಾದೇನ್ತೋ ತಂ ಅವಿರಾಧೇನ್ತೋ, ಅಜ್ಝಾಸಯಾನುರೂಪನ್ತಿ ಅತ್ಥೋ.

ಸಕಲ…ಪೇ… ದೇವತಾಯೋತಿ ಏತ್ಥ ಲೋಕಧಾತುಸಾಕಲ್ಯಂ ದಟ್ಠಬ್ಬಂ, ನ ದೇವತಾಸಾಕಲ್ಯಂ. ನ ಹಿ ಮಹಾಸಮಯೇ ವಿಯ ಸಬ್ಬದಾ ಮಜ್ಝಿಮಯಾಮೇ ದಸಸಹಸ್ಸಚಕ್ಕವಾಳೇ ಸಬ್ಬತ್ಥ ಸಬ್ಬಾ ದೇವತಾ ಸತ್ಥು ಸಮೀಪಂ ಉಪಗಚ್ಛನ್ತಿ. ಕಿಲಾಸುಭಾವೋ ಕಿಲಮಥೋ.

ವಿಹಾರಚೀವರಪರಿವತ್ತನವಸೇನಾತಿ ವಿಹಾರೇ ನಿವತ್ಥನಿವಾಸನಪರಿವತ್ತನವಸೇನ. ಆದಿಯಿತ್ವಾತಿ ಪಾರುಪನವಸೇನ ಗಹೇತ್ವಾ. ತೇನಾಹ ‘‘ಧಾರೇತ್ವಾ’’ತಿ. ಭಿಕ್ಖಾಚಾರನ್ತಿ ಭಿಕ್ಖತ್ಥಂ ಚರಿತಬ್ಬಟ್ಠಾನಂ.

ಅತಿರೋಚಮಾನನ್ತಿ ತಂ ತಂ ಅತಿಕ್ಕಮಿತ್ವಾ ಸಮನ್ತತೋ ಸಬ್ಬದಿಸಾಸು ವಿರೋಚಮಾನಂ. ಸರೀರಪ್ಪಭನ್ತಿ ಅತ್ತನೋ ಸರೀರಪ್ಪಭಂ. ಜಙ್ಗಮಂ ವಿಯ ಪದುಮಸರನ್ತಿ ರತನಮಯಕಿಞ್ಜಕ್ಖಂ ರಜತಮಯಕಣ್ಣಿಕಂ ಸಮನ್ತತೋ ಸಮ್ಫುಲ್ಲಿತಕಞ್ಚನಪದುಮಂ ಸಞ್ಚಾರಿಮಸರಂ ವಿಯ. ಗಗನತಲನ್ತಿ ಅಬ್ಭಮಹಿಕಾದಿಉಪಕ್ಕಿಲೇಸವಿಗಮೇನ ಸುವಿಸುದ್ಧಆಕಾಸತಲಂ ವಿಯ. ತಮ್ಪಿ ಹಿ ತಾರಾಗಣಕಿರಣಜಾಲಸಮುಜ್ಜಲತಾಯ ಸಮನ್ತತೋ ವಿರೋಚತಿ. ಕನಕಸಿಖರನ್ತಿ ಕನಕಗಿರಿಸಿಖರಂ. ಸಿರಿಯಾ ಜಲಮಾನನ್ತಿ ಸಬ್ಬಸೋ ಅನವಜ್ಜಾಯ ಸಬ್ಬಾಕಾರೇನ ಪರಿಪುಣ್ಣಕಾಯತಾಯ ಅನಞ್ಞಸಾಧಾರಣಾಯ ರೂಪಕಾಯಸಿರಿಯಾ ಸಮುಜ್ಜಲಂ, ಯಸ್ಸಾ ರುಚಿರಭಾವೋ ವಿದ್ಧೇ ವಿಗತವಲಾಹಕೇ ಪುಣ್ಣಮಾಸಿಯಂ ಪರಿಪುಣ್ಣಕಲಮನೋಮಮಣ್ಡಲಂ ಚನ್ದಮಣ್ಡಲಂ ಅತಿರೋಚತಿ, ಪಭಸ್ಸರಭಾವೋ ಸಹಸ್ಸರಂಸಿಕಿರಣತೇಜೋಜಾಲಸಮುಜ್ಜಲಂ ಸೂರಿಯಮಣ್ಡಲಂ ಅಭಿಭವತಿ, ಹೇಮಸಮುಜ್ಜಲಭಾವೋ ತದುಭಯೇ ಅಭಿಭುಯ್ಯ ಪವತ್ತಮಾನಂ ಏಕಕ್ಖಣೇ ದಸಸಹಸ್ಸಿಲೋಕಧಾತುವಿಜ್ಜೋತನಸಮತ್ಥ-ಮಹಾಬ್ರಹ್ಮುನೋ ಪಭಾಸಮುದಯಂ ಅಭಿವಿಹಚ್ಚ ಭಾಸತಿ ತಪತಿ ವಿರೋಚತಿ.

ಸಮನ್ತಪಾಸಾದಿಕೇತಿ ಸಮನ್ತತೋ ಪಸಾದಾವಹೇ. ತಞ್ಚ ಖೋ ಸಬ್ಬಸೋ ಸರಿತಬ್ಬತಾಯಾತಿ ಆಹ ‘‘ಪಸಾದನೀಯೇ’’ತಿ. ಉತ್ತಮದಮಥಸಮಥಮನುಪ್ಪತ್ತೇತಿ ಕಾಯವಾಚಾಹಿ ಅನುತ್ತರಂ ದನ್ತಭಾವಞ್ಚೇವ ಅನುತ್ತರಂ ಚಿತ್ತವೂಪಸಮಞ್ಚ ಸಮ್ಪತ್ತೇ. ಅಪ್ಪಸಾದೇನಾತಿ ಪಸಾದಾಭಾವೇನ, ಪಸಾದಪಟಿಕ್ಖೇಪೇನ ವಾ ಅಸ್ಸದ್ಧಿಯೇನ. ಉಭಯಥಾಪಿ ನೋತಿ ಅಪ್ಪಸಾದೋ ಮಚ್ಛರಿಯನ್ತಿ ಉಭಯಥಾಪಿ ನೋ ಏವ, ಅಥ ಖೋ ಅನತ್ತಮನತಾಯ ಉಪಾರಮ್ಭಾಧಿಪ್ಪಾಯೇನ ಅಪಸಾದೇನ್ತೋ, ಭಗವತೋ ಮುಖತೋ ಕಿಞ್ಚಿ ದೇಸೇತುಕಾಮೋ ವಾ ಏವಮಾಹ. ತತ್ಥ ಕಾರಣಂ ದಸ್ಸೇನ್ತೋ ‘‘ಭಗವತೋ ಪನಾ’’ತಿಆದಿಮಾಹ. ಅತಿತ್ತನ್ತಿ ತಿತ್ತಿಂ ಅಗಚ್ಛನ್ತಂ. ಕಮ್ಮಭಙ್ಗನ್ತಿ ಕಮ್ಮಹಾನಿಂ.

ತಿಕ್ಖಪಞ್ಞೋ ಏಸ ಬ್ರಾಹ್ಮಣೋ, ತಥಾ ಹಿ ನ ಚಿರಸ್ಸೇವ ಅರಹತ್ತಂ ಸಚ್ಛಿಕರಿಸ್ಸತಿ. ಕಥಾಪವತ್ತನತ್ಥಮ್ಪಿ ಏವಮಾಹ – ‘‘ಏವಂ ಅಹಂ ಇಮಸ್ಸ ಕಞ್ಚಿ ಧಮ್ಮಂ ಸೋತುಂ ಲಭಿಸ್ಸಾಮೀ’’ತಿ. ವೇನೇಯ್ಯವಸೇನಾತಿ ಅತ್ತನೋ ಕಸನಕಾರಿಭಾವಕಿತ್ತನಮುಖೇನ ವಿನೇತಬ್ಬಪುಗ್ಗಲವಸೇನ.

ಓಳಾರಿಕಾನೀತಿ ಪಾಕತಿಕಾನಿ. ‘‘ಏಸ ಉತ್ತಮದಕ್ಖಿಣೇಯ್ಯೋ’’ತಿ ಸಞ್ಜಾತಬಹುಮಾನೋ. ಪಾಳಿಯಂ ‘‘ಯುಗಂ ವಾ ನಙ್ಗಲಂ ವಾ’’ತಿ ವಾ-ಸದ್ದೋ ಅವುತ್ತವಿಕಪ್ಪತ್ಥೋ. ತೇನ ಬೀಜಾದಿಂ ಸಙ್ಗಣ್ಹಾತಿ, ತಸ್ಮಾ ಬೀಜಂ ವಾ ಈಸಂ ವಾ ಪರಿಗ್ಗಹಯೋತ್ತಾನಿ ವಾತಿ ಅಯಮತ್ಥೋ ದಸ್ಸಿತೋ ಹೋತಿ. ತಥಾ ಹಿ ಭಗವಾ ಬ್ರಾಹ್ಮಣಸ್ಸ ಪಟಿವಚನಂ ದೇನ್ತೋ ‘‘ಸದ್ಧಾ ಬೀಜ’’ನ್ತಿಆದಿಮಾಹ. ಪುಬ್ಬಧಮ್ಮಸಭಾಗತಾಯಾತಿ ಪಠಮಂ ಗಹಿತಧಮ್ಮಸಭಾಗತಾಯ. ಯಂ ಪನೇತ್ಥ ವತ್ತಬ್ಬಂ, ತಂ ಅಟ್ಠಕಥಾರುಳ್ಹಮೇವ ಗಹೇತಬ್ಬಞ್ಚ ಸದ್ದತೋ ಅತ್ಥಾಪತ್ತಿತೋ ವಾ ಇಧ ದಟ್ಠಬ್ಬಂ. ಬುದ್ಧಾನಂ ಆನುಭಾವೋ ಅಯಂ, ಯದಿದಂ ಪಸಙ್ಗಾಗತಧಮ್ಮಮುಖೇನ ದೇಸನಂ ಆರಭಿತ್ವಾ ವೇನೇಯ್ಯವಿನಯನಂ.

ಅನನುಸನ್ಧಿಕಾತಿ ಪುಚ್ಛಾನುಸನ್ಧಿವಸೇನ ಅನನುಸನ್ಧಿಕಾ. ಏವನ್ತಿ ಇದಾನಿ ವುಚ್ಚಮಾನಾಕಾರೇನ. ಏತ್ಥಾತಿ ಏತಿಸ್ಸಾ ದೇಸನಾಯ. ಸೋತಿ ಭಗವಾ. ತಸ್ಸಾತಿ ಬ್ರಾಹ್ಮಣಸ್ಸ. ಅನುಕಮ್ಪಾಯಾತಿ ಅಸಬ್ಬಞ್ಞೂ ಹಿ ಸತಿಪಿ ಅನುಕಮ್ಪಾಯ ಪುಚ್ಛಿತಮತ್ತೇ ತಿಟ್ಠೇಯ್ಯ, ತಥಾ ಜಾನನ್ತೋಪಿ ಅನನುಕಮ್ಪಕೋ, ಭಗವಾ ಪನ ಉಭಯಧಮ್ಮಪಾರಿಪೂರಿಯಾ ‘‘ಇದಂ ಅಪುಚ್ಛಿತ’’ನ್ತಿ ಅಪರಿಹಾಪೇತ್ವಾ ಕಥೇತಿ. ಸಮೂಲನ್ತಿಆದಿನಾ ಸಙ್ಖೇಪೇನ ವುತ್ತಮತ್ಥಂ ವಿವರನ್ತೋ ‘‘ತತ್ಥಾ’’ತಿಆದಿಮಾಹ. ತತ್ಥ ಬೀಜಸ್ಸ ಕಸಿಯಾ ಮೂಲಭಾವೋ ನಾನನ್ತರಿಯತೋ ತಪ್ಪಮಾಣವಿಧಾನತೋ ಚಾತಿ ಆಹ ‘‘ತಸ್ಮಿಂ…ಪೇ… ಕತ್ತಬ್ಬತೋ’’ತಿ. ತೇನ ಅನ್ವಯತೋ ಬ್ಯತಿರೇಕತೋ ಚ ಬೀಜಸ್ಸ ಕಸಿಯಾ ಮೂಲಭಾವಂ ವಿಭಾವೇತಿ. ಕುಸಲಾತಿ ಇಮಿನಾ ಅಕುಸಲಾ ತತೋ ಅಞ್ಞಥಾಪಿ ಕರೋನ್ತಿ, ತಂ ಪನ ಅಪ್ಪಮಾಣನ್ತಿ ದಸ್ಸೇತಿ.

ತಸ್ಸಾತಿ ಬ್ರಾಹ್ಮಣಸ್ಸ ಬೀಜಟ್ಠಾನಿಯಸ್ಸ ಧಮ್ಮಸ್ಸ ಚ ಉಪಕಾರಭಾವತೋ. ಧಮ್ಮಸಮ್ಬನ್ಧಸಮತ್ಥಭಾವತೋತಿ ತಥಾ ವುತ್ತಧಮ್ಮಸ್ಸ ಫಲೇನ ಸಮ್ಬನ್ಧಿತುಂ ಯೋಜೇತುಂ ಸಮತ್ಥಭಾವತೋ. ತಪೋ ವುಟ್ಠೀತಿ ವುತ್ತವಚನಂ ಸನ್ಧಾಯ ವುತ್ತಂ. ಸಙ್ಖೇಪತೋ ವುತ್ತಮತ್ಥಂ ಪಾಕಟಂ ಕಾತುಂ ‘‘ಅಯಂ ಹೀ’’ತಿಆದಿ ವುತ್ತಂ. ಕಸ್ಸಕಸ್ಸ ಉಪಕಾರಸ್ಸ ಬೀಜಸ್ಸ ಅನನ್ತರಂ ವುಟ್ಠಿ ವುಚ್ಚಮಾನಾ ಅಟ್ಠಾನೇ ವುತ್ತಾ ನಾಮ ನ ಹೋತಿ. ಕಸ್ಮಾ? ಬೀಜಸ್ಸ ವಪ್ಪಕಾಲೇ ಅನುರೂಪಾಯ ವುಟ್ಠಿಯಾ ಇಚ್ಛಿತಬ್ಬತೋ, ತಸ್ಮಾ ಅವಸಾನೇ ಮಜ್ಝೇ ವಾ ವುಚ್ಚಮಾನಾಯ ಧಮ್ಮಸಮ್ಬನ್ಧಸಮತ್ಥತಾ ತಸ್ಸಾ ವಿಭಾವಿತಾ ನ ಸಿಯಾ. ಅತ್ತನೋ ಅವಿಸಯೇತಿ ಝಾನಾದಿಉತ್ತರಿಮನುಸ್ಸಧಮ್ಮೇ. ಪಚ್ಛಾಪೀತಿ ಕಸಿಸಮ್ಭಾರಕಥನತೋ ಪಚ್ಛಾಪಿ. ವತ್ತಬ್ಬೋತಿ ಏಕನ್ತೇನ ವತ್ತಬ್ಬೋ. ತದನನ್ತರಂಯೇವಾತಿ ಬೀಜಾನನ್ತರಂಯೇವ. ವುಚ್ಚಮಾನಾ ವುಟ್ಠಿ ಸಮತ್ಥಾ ಹೋತಿ, ಬೀಜಸ್ಸ ಫಲೇನ ಸಮ್ಬನ್ಧನೇ ಸಮತ್ಥಾತಿ ದೀಪಿತಾ ಹೋತಿ ಅನನ್ತರವಚನೇನೇವ ತಸ್ಸಾ ಆಸನ್ನಉಪಕಾರತ್ತದೀಪನತೋ.

ಸಮ್ಪಸಾದಲಕ್ಖಣಾತಿ ಪಸೀದಿತಬ್ಬೇ ವತ್ಥುಸ್ಮಿಂ ಸಮ್ಮದೇವ ಪಸೀದನಲಕ್ಖಣಾ. ಓಕಪ್ಪನಲಕ್ಖಣಾತಿ ಸದ್ಧೇಯ್ಯವತ್ಥುನೋ ಏವಮೇತನ್ತಿ ಪಕ್ಖನ್ದನಲಕ್ಖಣಾ. ಮೂಲಬೀಜನ್ತಿಆದೀಸು ಮೂಲಮೇವ ಬೀಜಂ ಮೂಲಬೀಜಂ. ಏಸ ನಯೋ ಸೇಸೇಸುಪಿ ಬೀಜಗಾಮಸ್ಸ ಅಧಿಪ್ಪೇತತ್ತಾ. ಭೂತಗಾಮೋ ಪನ ಮೂಲಂ ಬೀಜಂ ಏತಸ್ಸಾತಿ ಮೂಲಬೀಜನ್ತಿಆದಿನಾ ವೇದಿತಬ್ಬೋ. ಬೀಜಬೀಜನ್ತಿ ಪಞ್ಚಮಂ ಪನ ಪಚ್ಚಯನ್ತರಸಮವಾಯೇ ಸದಿಸಫಲುಪ್ಪತ್ತಿಯಾ ವಿಸೇಸಕಾರಣಭಾವತೋ ವಿರೂಹನಸಮತ್ಥೇ ಸಾರಫಲೇ ನಿರುಳ್ಹೋ ಬೀಜಸದ್ದೋ ತದತ್ಥಸಿದ್ಧಿಯಾ ಮೂಲಾದೀಸುಪಿ ಕೇಸುಚಿ ಪವತ್ತತೀತಿ ತತೋ ನಿವತ್ತನತ್ಥಂ ಏಕೇನ ಬೀಜ-ಸದ್ದೇನ ವಿಸೇಸೇತ್ವಾ ವುತ್ತಂ ‘‘ಬೀಜಬೀಜ’’ನ್ತಿ ‘‘ದುಕ್ಖದುಕ್ಖಂ ರೂಪರೂಪ’’ನ್ತಿ ಚ ಯಥಾ. ಏವಮ್ಪಿ ಇಮಿನಾ ಅತ್ಥೇನ ಇಮಸ್ಸಪಿ ನಿಪ್ಪರಿಯಾಯೋವ ಬೀಜಭಾವೋತಿ ದಸ್ಸೇನ್ತೋ ಆಹ ‘‘ತಂ ಸಬ್ಬಮ್ಪಿ…ಪೇ… ಗಚ್ಛತೀ’’ತಿ.

ಇದಾನಿ ಕಥಞ್ಚಿ ವತ್ತಬ್ಬೇ ಸದ್ಧಾಯ ಓಪಮ್ಮತ್ತೇ ಬೀಜೇ ಸದ್ಧಾಯ ಬೀಜಭಾವಂ ವಿಭಾವೇತುಂ ‘‘ತತ್ಥ ಯಥಾ’’ತಿಆದಿ ಆರದ್ಧಂ. ಕಾಮಂ ಸದ್ಧೂಪನಿಸಂ ಸೀಲಂ, ತಥಾಪಿ ಸಮಾಧಿಸ್ಸ ವಿಯ ಸಬ್ಬೇಸಮ್ಪಿ ಅನವಜ್ಜಧಮ್ಮಾನಂ ಆದಿಮೂಲಭಾವತೋ ಸದ್ಧಾಯಪಿ ಪತಿಟ್ಠಾ ಹೋತೀತಿ ಆಹ ‘‘ಹೇಟ್ಠಾ ಸೀಲಮೂಲೇನ ಪತಿಟ್ಠಾತೀ’’ತಿ. ಯಸ್ಮಾ ಸಬ್ಬಸ್ಸೇವ ಪುಗ್ಗಲಸ್ಸ ಸದ್ಧಾವಸೇನ ಸಮಥವಿಪಸ್ಸನಾರಮ್ಭೋ, ತಸ್ಮಾ ಸಾ ‘‘ಉಪರಿ ಸಮಥವಿಪಸ್ಸನಙ್ಕುರಂ ಉಟ್ಠಾಪೇತೀ’’ತಿ ವುತ್ತಾ. ತನ್ತಿ ಧಞ್ಞಬೀಜಂ. ಪಥವಿರಸಂ ಆಪೋರಸನ್ತಿ ಸಸಮ್ಭಾರಪಥವೀಆಪೇಸು ಲಬ್ಭಮಾನಂ ರಸಂ. ಗಹೇತ್ವಾತಿ ಪಚ್ಚಯಪರಮ್ಪರಾಯ ಗಹೇತ್ವಾ. ಧಞ್ಞಪರಿಪಾಕಗಹಣತ್ಥನ್ತಿ ಧಞ್ಞಪರಿಪಾಕನಿಬ್ಬತ್ತಿಅತ್ಥಂ. ರಸನ್ತಿ ಸದ್ಧಾಸೀಲಮೂಲಹೇತುಸಮಥವಿಪಸ್ಸನಾಭಾವನಾರಸಂ ಆದಿಯಿತ್ವಾ. ಅರಿಯಮಗ್ಗನಾಳೇನಾತಿ ಅರಿಯಮಗ್ಗಸೋತೇನ ಅರಿಯಫಲಧಞ್ಞಪರಿಪಾಕಗಹಣತ್ಥನ್ತಿ ಅರಿಯಫಲಮೇವ ಧನಾಯಿತಬ್ಬತೋ ಧಞ್ಞಂ ತಸ್ಸ ನಿಬ್ಬತ್ತಿಅತ್ಥಂ. ಧಞ್ಞನಾಳಂ ನಾಮ ಕಣ್ಡಸ್ಸ ನಿಸ್ಸಯಭೂತೋ ಪಚ್ಛಿಮದೇಸೋ, ಕಣ್ಡೋ ತಬ್ಭನ್ತರೋ ತಂನಿಸ್ಸಯೋಯೇವ ದಣ್ಡೋ. ಪಸವೋ ನಾಮ ಪುಪ್ಫಂ. ವುದ್ಧಿನ್ತಿ ಅವಯವಪಾರಿಪೂರಿವಸೇನ ವುದ್ಧಿಂ. ವಿರೂಳ್ಹಿನ್ತಿ ಮೂಲಸನ್ತಾನದಳ್ಹತಾಯ ವಿರುಳ್ಹತಂ. ವೇಪುಲ್ಲನ್ತಿ ಪತ್ತನಾಳಾದೀಹಿ ವಿಪುಲಭಾವಂ. ಖೀರಂ ಜನೇತ್ವಾತಿ ತರುಣಸಲಾಟುಕಭಾವಪ್ಪತ್ತಿಯಾ ತಣ್ಡುಲಸ್ಸ ಬೀಜಸ್ಸ ಬೀಜಭೂತಂ ಖೀರಂ ಉಪ್ಪಾದೇತ್ವಾ. ಏಸಾತಿ ಸದ್ಧಾ. ಪತಿಟ್ಠಹಿತ್ವಾತಿ ಕಮ್ಮಪಥಾಕಮ್ಮಪಥಸಮ್ಮಾದಿಟ್ಠಿಸಹಿತೇನ ಆದಿತೋ ಪವತ್ತಸೀಲಮತ್ತೇನ ಪತಿಟ್ಠಹಿತ್ವಾ. ವುದ್ಧಿನ್ತಿಆದೀಸು ಸುಪರಿಸುದ್ಧಾಹಿ ಸೀಲಚಿತ್ತವಿಸುದ್ಧೀಹಿ ವುದ್ಧಿಂ, ದಿಟ್ಠಿಕಙ್ಖಾವಿತರಣವಿಸುದ್ಧೀಹಿ ವಿರೂಳ್ಹಿಂ. ಮಗ್ಗಾಮಗ್ಗಪಟಿಪದಾಞಾಣದಸ್ಸನವಿಸುದ್ಧೀಹಿ ವೇಪುಲ್ಲಂ ಪತ್ವಾ. ಞಾಣದಸ್ಸನವಿಸುದ್ಧಿಖೀರನ್ತಿ ಸಾದುರಸಸುವಿಸುದ್ಧಿಭಾವತೋ ಞಾಣದಸ್ಸನವಿಸುದ್ಧಿಸಙ್ಖಾತಂ ಖೀರಂ ಜನೇತ್ವಾ. ಅನೇಕ…ಪೇ… ಫಲನ್ತಿ ಅನೇಕಪಟಿಸಮ್ಭಿದಾ-ಅನೇಕಾಭಿಞ್ಞಾಣಪರಿಪುಣ್ಣಂ ಅರಹತ್ತಫಲಸೀಸಂ ನಿಪ್ಫಾದೇತಿ.

ಬೀಜಕಿಚ್ಚಕರಣತೋತಿ ಬೀಜಕಿಚ್ಚಸ್ಸ ಕರಣತೋ. ಯಞ್ಹಿ ತಂಸದಿಸಸ್ಸ ವಿಸದಿಸಸ್ಸ ಚ ಅತ್ತನೋ ಫಲಸ್ಸ ಪತಿಟ್ಠಾಪನಸಮ್ಬನ್ಧನನಿಪ್ಫಾದನಸಙ್ಖಾತಂ ಬೀಜಸ್ಸ ಕಿಚ್ಚಂ, ತಸ್ಸ ಕರಣತೋ ನಿಬ್ಬತ್ತನತೋ ‘‘ಏವಂ ಸದ್ಧಾ ಬೀಜಕಿಚ್ಚ’’ನ್ತಿ ವುತ್ತಂ. ಇಮಿನಾ ಅನಞ್ಞಸಾಧಾರಣಂ ಸದ್ಧಾಯ ಕುಸಲಧಮ್ಮಾನಂ ಬೀಜಭಾವಂ ದಸ್ಸೇತಿ. ಸಾ ಚಾತಿಆದಿನಾ ತಮೇವತ್ಥಂ ಸಮತ್ಥೇತಿ. ಇದಾನಿ ತತ್ಥ ಆಗಮಂ ದಸ್ಸೇನ್ತೋ ‘‘ಸದ್ಧಾಜಾತೋ’’ತಿಆದಿಮಾಹ. ತೇನ ಯಥಾ ಸಪ್ಪುರಿಸೂಪನಿಸ್ಸಯಸ್ಸ ಸದ್ಧಮ್ಮಸ್ಸವನಸ್ಸ ಚ, ಏವಂ ಅನವಸೇಸಾಯ ಸಮ್ಮಾಪಟಿಪತ್ತಿಯಾ ಸದ್ಧಾ ಮೂಲಕಾರಣನ್ತಿ ದಸ್ಸೇತಿ.

ಇನ್ದ್ರಿಯಸಂವರೋ ವೀರಿಯಞ್ಚ ಅಕುಸಲಧಮ್ಮೇ, ದುಕ್ಕರಕಾರಿಕಾ ಧುತಙ್ಗಞ್ಚ ಅಕುಸಲಧಮ್ಮೇ ಚೇವ ಕಾಯಞ್ಚ ತಪತಿ ವಿಬಾಧತೀತಿ ತಪೋತಿ ವುಚ್ಚತಿ. ಇನ್ದ್ರಿಯಸಂವರೋ ಅಧಿಪ್ಪೇತೋ ವೀರಿಯಸ್ಸ ಧೋರಯ್ಹಭಾವೇನ ಗಯ್ಹಮಾನತ್ತಾ, ಇತರೇಸಂ ವುಟ್ಠಿಭಾವಸ್ಸ ಅನುಯುಞ್ಜಮಾನತ್ತಾ. ಆದಿ-ಸದ್ದೇನ ಕಲಲಙ್ಗಾರವುಟ್ಠಿಆದೀನಂ ಸಙ್ಗಹೋ. ಸಮನುಗ್ಗಹಿತನ್ತಿ ಉಪಗತಂ. ವಿರುಹನಾಮಿಲಾಯನನಿಪ್ಫತ್ತಿವಚನೇಹಿ ಧಞ್ಞಬೀಜಸನ್ತಾನಸ್ಸ ವಿಯ ತೇಸಂ ವುದ್ಧಿಯಾ ಸದ್ಧಾಬೀಜಸನ್ತಾನಸ್ಸ ತಪೋವುಟ್ಠಿಯಾ ಆದಿಮಜ್ಝಪರಿಯೋಸಾನೇಸು ಉಪಕಾರತಂ ದಸ್ಸೇತಿ.

ಪುರಿಮಪದೇಸುಪೀತಿ ಅಪಿ-ಸದ್ದೇನ ಪರಪದೇಸುಪೀತಿ ಅತ್ಥೋ ದಟ್ಠಬ್ಬೋ ‘‘ಹಿರೀ ಮೇ ಈಸಾ, ಮನೋ ಮೇ ಯೋತ್ತ’’ನ್ತಿ ಇಚ್ಛಿತತ್ತಾ, ‘‘ಸತಿ ಮೇ’’ತಿ ಏತ್ಥ ಮೇ-ಸದ್ದೋ ಆನೇತ್ವಾ ಯೋಜೇತಬ್ಬೋ. ಉದಕಮ್ಪಿ ತಾವ ದಾತಬ್ಬಂ ಹೋತಿ ನದೀತಳಾಕಾದಿತೋ ಆನೇತ್ವಾ. ವೀರಿಯಬಲೀಬದ್ದೇ ಚತುಬ್ಬಿಧೇ ಯೋಜೇತ್ವಾ. ನಿಚ್ಚಕಾಲಂ ಅತ್ಥೀತಿ ವಚನಸೇಸೋ.

ಸಹ ವಿಪಸ್ಸನಾಯ ಮಗ್ಗಪಞ್ಞಾ ಅಧಿಪ್ಪೇತಾ ಅಮತಪ್ಫಲಾಯ ಕಸಿಯಾ ಅಧಿಪ್ಪೇತತ್ತಾ. ವಿಪಸ್ಸನಾ ಪಞ್ಞಾ ಚಾತಿ ದುವಿಧಾಪಿ ಪಞ್ಞಾ ಉಪನಿಸ್ಸಯಾ ಹೋತಿ ವಿಸಿಟ್ಠಭಾವತೋ. ತೇನಾಹ ‘‘ಯಥಾ ಹೀ’’ತಿಆದಿ. ಪಞ್ಞಾತಿ ಪಕಾರೇಹಿ ಜಾನಾತೀತಿ ಪಞ್ಞಾ. ಪಞ್ಞವತಂ ಪಞ್ಞಾ ಪುರತೋ ಹೋತಿ ಯೋನಿಸೋಮನಸಿಕಾರಸ್ಸ ವಿಸೇಸಪಚ್ಚಯಭಾವತೋ, ಸಹಜಾತಾಧಿಪತೀಸು ಚ ಉಕ್ಕಟ್ಠಭಾವತೋ. ಸಿರೀತಿ ಸೋಭಗ್ಗಂ. ಸತಂ ಧಮ್ಮಾ ಸದ್ಧಾದಯೋ, ಅನ್ವಾಯಿಕಾತಿ ಅನುಗಾಮಿನೋ. ಈಸಾಬದ್ಧಾ ಹೋತೀತಿ ಹಿರಿಸಙ್ಖಾತಈಸಾಯ ಬದ್ಧಾ ಹೋತಿ, ಪಞ್ಞಾಯ ಕದಾಚಿ ಅಪ್ಪಯೋಗತೋ ಮನೋಸೀಸೇನ ಸಮಾಧಿ ಇಧ ವುತ್ತೋತಿ ಆಹ ‘‘ಮನೋಸಙ್ಖಾತಸ್ಸ ಸಮಾಧಿಯೋತ್ತಸ್ಸಾ’’ತಿ. ಸಮಂ ಉಪನೇತ್ವಾ ಬನ್ಧಿತ್ವಾ ಬದ್ಧರಜ್ಜುಕತ್ತಾ ಸಮಾಧಿಯೋತ್ತಂ. ಏಕತೋ ಗಮನನ್ತಿ ಲೀನಚ್ಚಾರದ್ಧಸಙ್ಖಾತಂ ಏಕಪಸ್ಸತೋ ಗಮನಂ ವಾರೇತಿ. ಮಜ್ಝಿಮಾಯ ವಿಪಸ್ಸನಾವೀಥಿಯಾ ಪಟಿಪಾದನತೋ ಕಾಯಾದೀಸು ಸುಭಸುಖನಿಚ್ಚತ್ತಭಾವವಿಗಮನೇ ಪಞ್ಞಾಯ ವಿಸೇಸಪಚ್ಚಯಾ ಸತೀತಿ ವುತ್ತಂ – ‘‘ಸತಿಯುತ್ತಾ ಪಞ್ಞಾ’’ತಿ ತಸ್ಸಾ ಸತಿವಿಪ್ಪಯೋಗಾಸಬ್ಭಾವತೋ. ಸನ್ತತಿಘನಾದೀನಂ ಅಯಂ ವಿಸೇಸೋ – ಪುರಿಮಪಚ್ಛಿಮಾನಂ ಧಮ್ಮಾನಂ ನಿರನ್ತರತಾಯ ಏಕೀಭೂತಾನಂ ವಿಯ ಪವತ್ತಿ ಸನ್ತತಿಘನತಾ, ಏಕಸಮೂಹವಸೇನ ಏಕೀಭೂತಾನಮಿವ ಪವತ್ತಿ ಸಮೂಹಘನತಾ, ದುಬ್ಬಿಞ್ಞೇಯ್ಯಕಿಚ್ಚಭೇದವಸೇನ ಏಕೀಭೂತಾನಮಿವ ಪವತ್ತಿ. ಕಿಚ್ಚಘನತಾ, ಏಕಾರಮ್ಮಣವಸೇನ ಏಕೀಭೂತಾನಮಿವ ಪವತ್ತಿ ಆರಮ್ಮಣಘನತಾ. ಸಬ್ಬೇಸಂ, ಸಬ್ಬಾನಿ ವಾ ಕಿಲೇಸಾನಂ ಮೂಲಸನ್ತಾನಕಾನಿ ಸಬ್ಬ…ಪೇ… ಸನ್ತಾನಕಾನಿ. ಅನುಪ್ಪಯೋಗೋ ಹಿ ಅತ್ಥೋ. ಪದಾಲೇತೀತಿ ಭಿನ್ದತಿ ಸಮುಚ್ಛಿನ್ದತಿ. ಸಾ ಚ ಖೋ ‘‘ಪದಾಲೇತೀ’’ತಿ ವುತ್ತಾ ಲೋಕುತ್ತರಾವ ಪಞ್ಞಾ ಅನುಸಯಪ್ಪಹಾನಸ್ಸ ಅಧಿಪ್ಪೇತತ್ತಾ. ಸನ್ತತಿಘನಾದಿಭೇದನಾ ಪನ ಲೋಕಿಯಾಪಿ ಹೋತಿ ವಿಪಸ್ಸನಾವಸೇನ ಘನವಿನಿಬ್ಭೋಗಸ್ಸ ನಿಪ್ಫಾದನತೋ. ತೇನಾಹ ‘‘ಇತರಾ ಪನ ಲೋಕಿಕಾಪಿ ಸಿಯಾ’’ತಿ.

ಹಿರೀಯತೀತಿ ಲಜ್ಜತಿ, ಜಿಗುಚ್ಛತೀತಿ ಅತ್ಥೋ. ತಸ್ಮಾ ‘‘ಪಾಪಕೇಹಿ ಧಮ್ಮೇಹೀ’’ತಿ ನಿಸ್ಸಕ್ಕವಚನಂ ದಟ್ಠಬ್ಬಂ, ಹೇತುಮ್ಹಿ ವಾ ಕರಣವಚನಂ. ಓತ್ತಪ್ಪಮ್ಪಿ ಗಹಿತಮೇವ, ನ ಹಿ ಲಜ್ಜನಂ ನಿಬ್ಭಯಂ ಪಾಪಭಯಂ ವಾ ಅಲಜ್ಜನಂ ಅತ್ಥೀತಿ. ರುಕ್ಖಲಟ್ಠೀತಿ ರುಕ್ಖದಣ್ಡೋ. ತೇನ ಪದೇಸೇನ ಕಸನತೋ ವಿಸೇಸತೋ ನಙ್ಗಲನ್ತಿ ವುಚ್ಚತೀತಿ ಆಹ ‘‘ಈಸಾ ಯುಗನಙ್ಗಲಂ ಧಾರೇತೀ’’ತಿ. ಕಾಮಂ ಪಞ್ಞಾರಹಿತಾ ಹಿರೀ ಅತ್ಥಿ, ಹಿರಿರಹಿತಾ ಪನ ಪಞ್ಞಾ ನತ್ಥೇವಾತಿ ಆಹ ‘‘ಹಿರಿ…ಪೇ… ಅಭಾವತೋ’’ತಿ. ಸನ್ಧಿಟ್ಠಾನೇ ಕಮ್ಪನಾಭಾವತೋ ಅಚಲಂ. ಥಿರಭಾವೇನ ಅಸಿಥಿಲಂ. ಹಿರಿಪಟಿಬದ್ಧಪಞ್ಞಾ ಪಟಿಪಕ್ಖವಸೇನ ಚ ಅಸಿಥಿಲಭಾವೇನ ಚ ಅಚಲಾ ಅಸಿಥಿಲಾತಿ ಆಹ ‘‘ಅಬ್ಬೋಕಿಣ್ಣಾ ಅಹಿರಿಕೇನಾ’’ತಿ. ನಾಳಿಯಾ ಮಿನಮಾನಪುರಿಸೋ ವಿಯ ಆರಮ್ಮಣಂ ಮುನಾತಿ ಪರಿಚ್ಛೇದತೋ ಜಾನಾತೀತಿ ಮನೋ. ಮನೋಸೀಸೇನಾತಿ ಮನಸೋ ಅಪದೇಸೇನ. ತಂಸಮ್ಪಯುತ್ತೋತಿ ಇಮಿನಾ ಕುನ್ತಸಹಚರಣತೋ ಪುರಿಸೋ ಕುನ್ತೋ ವಿಯ ಮನಸಹಚರಣಸಮಾಧಿ ‘‘ಮನೋ’’ತಿ ವುತ್ತೋತಿ ದಸ್ಸೇತಿ. ಸಾರಥಿನಾತಿ ಕಸ್ಸಕೇನ. ಸೋ ಹಿ ಇಧ ಬಲೀಬದ್ದಾನಂ ಸಾರಣತೋ ಪಾಚನತೋ ‘‘ಸಾರಥೀ’’ತಿ ಅಧಿಪ್ಪೇತೋ. ಏಕಾಬನ್ಧನನ್ತಿ ಏಕಾಬದ್ಧಕರಣಂ. ಸಕಕಿಚ್ಚೇತಿ ಸಕಕಿಚ್ಚೇನ ಯುತ್ತೇ. ತೇನ ಹಿ ಈಸಾದೀಸು ಯಥಾರಹಂ ಬನ್ಧಿತ್ವಾ ಏಕಾಬದ್ಧೇಸು ಕತೇಸು ನಙ್ಗಲೇಸು ಕಿಚ್ಚಂ ಇಜ್ಝತಿ, ನೋ ಅಞ್ಞಥಾತಿ ತಂ ‘‘ಸಕಕಿಚ್ಚೇ ಪಟಿಪಾದೇತೀ’’ತಿ ವುತ್ತಂ. ಅವಿಕ್ಖೇಪಸಭಾವೇನಾತಿ ಅತ್ತನೋ ಅವಿಕ್ಖೇಪಸಭಾವೇನ. ಬನ್ಧಿತ್ವಾತಿ ಸಹಜಾತಾದಿಪಚ್ಚಯಭಾವೇನ ಅತ್ತನಾ ಸಮ್ಬನ್ಧಿತ್ವಾ. ಸಕಕಿಚ್ಚೇತಿ ಹಿರೀಆದೀಹಿ ಯಥಾಸಕಂ ಕತ್ತಬ್ಬೇ ಕಿಚ್ಚೇ.

ಚಿರಕತಾದಿಮತ್ಥನ್ತಿ ಚಿರಭಾಸಿತಮ್ಪಿ ಅತ್ಥಂ. ಸರತಿ ಅನುಸ್ಸರತಿ ಕಾಯಾದಿಂ ಅಸುಭಾದಿತೋ ನಿಜ್ಝಾಯತಿ. ಫಾಲೇತೀತಿ ಪದಾಲೇತಿ. ಪಾಜೇನ್ತಿ ಗಮೇನ್ತೀತಿ ತಂ ಪಾಜನಂ. ಇಧ ಇಮಸ್ಮಿಂ ಸುತ್ತೇ ‘‘ಪಾಚನ’’ನ್ತಿ ವುತ್ತಂ ಜ-ಕಾರಸ್ಸ ಚ-ಕಾರಂ ಕತ್ವಾ. ಫಾಲಪಾಚನನ್ತಿ ಇಮಮತ್ಥಂ ದಸ್ಸೇತುಂ ‘‘ಯಥಾ ಹಿ ಬ್ರಾಹ್ಮಣ…ಪೇ… ಸತೀ’’ತಿ ವುತ್ತಂ. ಇದಾನಿ ತಮತ್ಥಂ ವಿತ್ಥಾರತೋ ದಸ್ಸೇನ್ತೋ ‘‘ತತ್ಥ ಯಥಾ’’ತಿಆದಿಮಾಹ. ನಙ್ಗಲಂ ಅನುರಕ್ಖತಿ ಭಿಜ್ಜನಫಾಲನತೋ. ಪುರತೋ ಚಸ್ಸ ಗಚ್ಛತೀತಿ ಅಸ್ಸ ನಙ್ಗಲಸ್ಸ ಕಸ್ಸನೇ ಭೂಮಿಯಾ ವಿಲಿಖನೇ ಪುರತೋ ಗಚ್ಛತಿ ಪುಬ್ಬಙ್ಗಮಾ ಹೋತಿ. ಗತಿಯೋತಿ ಪವತ್ತಿಯೋ. ಸಮನ್ವೇಸಮಾನಾತಿ ಸರಣವಸೇನ ಗವೇಸಮಾನಾ. ಆರಮ್ಮಣೇ ವಾ ಕಾಯಾದಿಕೇ ಉಪಟ್ಠಾಪಯಮಾನಾ ಅಸುಭಾದಿವಸೇನ ಪಞ್ಞಾನಙ್ಗಲಂ ರಕ್ಖತಿ. ಸಭಾವಾಸಭಾವೂಪಗಮೇ ಫಾಲೋ ವಿಯ ನಙ್ಗಲಸ್ಸ ‘‘ಆರಕ್ಖಾ’’ತಿ ವುತ್ತಾ ‘‘ಸಬ್ಬಾನತ್ಥತೋ ಸತಿ ರಕ್ಖತೀ’’ತಿ ಕತ್ವಾ. ತಥಾ ಹೇಸಾ ಆರಕ್ಖಪಚ್ಚುಪಟ್ಠಾನಾ. ಚಿರಕತಚಿರಭಾಸಿತಾನಂ ಅಸಮ್ಮುಸ್ಸನವಸೇನ ಸತಿ ಪಞ್ಞಾನಙ್ಗಲಸ್ಸ ಪುರತೋ ಹೋತೀತಿ ವತ್ವಾ ತಸ್ಸ ಪುರತೋಭಾವಂ ದಸ್ಸೇತುಂ ‘‘ಸತಿ…ಪೇ… ನೋ ಪಮುಟ್ಠೇ’’ತಿ ಆಹ. ಸತಿಪರಿಚಿತೇತಿ ಸತಿಯಾ ಪಟ್ಠಾಪಿತೇ. ‘‘ಉಪಟ್ಠಾಪಿತೇ’’ತಿಪಿ ಪಾಠೋ, ಅಯಮೇವತ್ಥೋ. ಸಂಸೀದಿತುಂ ನ ದೇತೀತಿ ಸಕಿಚ್ಚಕಿರಿಯಾಯ ಸಂಸೀದನಂ ಕಾತುಂ ನ ದೇತಿ. ಕೋಸಜ್ಜಸಙ್ಖಾತಂ ಸಂಸೀದನಂ ಕೋಸಜ್ಜಸಂಸೀದನಂ.

ಪಾತಿಮೋಕ್ಖಸಂವರಸೀಲಂ ವುತ್ತಂ ಕಾಯಿಕವಾಚಸಿಕಸಂಯಮಸ್ಸ ಕಥಿತತ್ತಾ. ಆಹಾರೇ ಉದರೇ ಯತೋತಿ ಪರಿಭುಞ್ಜಿತಬ್ಬಆಹಾರೇ ಸಂಯತಭಾವದಸ್ಸನೇನ ಪರಿಭುಞ್ಜಿತಬ್ಬತಾಯ ಚತೂಸುಪಿ ಪಚ್ಚಯೇಸು ಸಂಯತಭಾವೋ ದೀಪಿತೋತಿ ಆಹ ‘‘ಆಹಾರಮುಖೇನಾ’’ತಿಆದಿ. ಸಂಯತಭಾವೋ ಚೇತ್ಥ ಪಚ್ಚಯಹೇತು ಅನೇಸನಾಭಾವೋತಿ ವುತ್ತಂ ‘‘ನಿರುಪಕ್ಕಿಲೇಸೋತಿ ಅತ್ಥೋ’’ತಿ. ಭೋಜನಸದ್ದೋ ಆಹಾರಪರಿಭೋಗೇ ನಿರುಳ್ಹೋತಿ ಕತ್ವಾ ವುತ್ತಂ ‘‘ಭೋಜನೇ ಮತ್ತಞ್ಞುತಾಮುಖೇನಾ’’ತಿ. ಪರಿಭುಞ್ಜನಟ್ಠೇನ ಪನ ಭೋಜನಸದ್ದಮುಖೇನಾತಿ ವುತ್ತೇ ಅಧಿಪ್ಪೇತತ್ಥೋ ಲಬ್ಭತೇವ. ತೇನಾತಿ ಕಾಯಗುತ್ತಾತಿಆದಿವಚನೇನ. ನ ವಿಲುಮ್ಪನ್ತೀತಿ ‘‘ದೀಪೇತೀ’’ತಿ ಪದಂ ಆನೇತ್ವಾ ಸಮ್ಬನ್ಧೋ.

ದ್ವೀಹಾಕಾರೇಹೀತಿ ಅದಿಟ್ಠಾದೀನಂ ಅದಿಟ್ಠಾದಿವಸೇನ ದಿಟ್ಠಾದೀನಞ್ಚ ದಿಟ್ಠಾದಿವಸೇನಾತಿ ಏವಂ ದ್ವಿಪ್ಪಕಾರೇಹಿ. ಅವಿಸಂವಾದನಂ ಅವಿತಥಕಥನಂ. ಛೇದನಂ ಮೂಲಪ್ಪದೇಸೇ ನಿಕನ್ತನಂ. ಲುನನಂ ಯತ್ಥ ಕತ್ಥಚಿ ಛೇದನಂ. ಉಪ್ಪಾಟನಂ ಉಮ್ಮೂಲನಂ. ಅಸಿತೇನಾತಿ ದತ್ತೇನ, ಲಾಯಿತೇನಾತಿ ಅತ್ಥೋ. ವಿಸಂವಾದನಸಙ್ಖಾತಾನಂ ತಿಣಾನಂ, ಅಟ್ಠನ್ನಂ ಅನರಿಯವೋಹಾರಾನನ್ತಿ ಅತ್ಥೋ. ಯಥಾಭೂತಞಾಣನ್ತಿ ನಾಮ ರೂಪಪರಿಚ್ಛೇದಕಞಾಣಂ. ಸಚ್ಚನ್ತಿ ವೇದಿತಬ್ಬಂ ಅವಿಪರೀತವುತ್ತಿಕತ್ತಾ ‘‘ಛೇದಕಂ’’ ಛಿನ್ದನಕಂ. ನಿದ್ದಾನನ್ತಿ ನಿದ್ದಾಯಕಂ. ಇದಮೇವ ಸಚ್ಚಂ ಮೋಘಮಞ್ಞನ್ತಿ ದಿಟ್ಠಿ ‘‘ದಿಟ್ಠಿಸಚ್ಚ’’ನ್ತಿ ವುಚ್ಚತಿ. ದ್ವೀಸು ವಿಕಪ್ಪೇಸೂತಿ ಭಾವಕತ್ತುಸಾಧನವಸೇನ ದ್ವೀಸು ವಿಕಪ್ಪೇಸು. ‘‘ನಿದ್ದಾನ’’ನ್ತಿ ಉಪಯೋಗವಸೇನೇವ ಅತ್ಥೋ.

ಸೀಲಮೇವ ‘‘ಸೋರಚ್ಚ’’ನ್ತಿ ವುತ್ತಂ ‘‘ಪಾಣಾತಿಪಾತಾದೀಹಿ ಸುಟ್ಠು ಓರತಸ್ಸ ಕಮ್ಮ’’ನ್ತಿ ಕತ್ವಾ. ಸಙ್ಖಾರದುಕ್ಖಾದೀನಂ ಅಭಾವತೋ ಸುನ್ದರಭಾವತೋ ಸುನ್ದರೇ ನಿಬ್ಬಾನೇ ಆರಮ್ಮಣಕರಣವಸೇನ ರತತ್ತಾ ಸುರತೋ, ಅರಹಾ. ತಸ್ಸ ಭಾವೋ ಸೋರಚ್ಚಂ, ಅರಹತ್ತಂ. ಅಪ್ಪಮೋಚನಮೇವ ಅಚ್ಚನ್ತಾಯ ಪಮೋಚನಂ ನ ಹೋತಿ.

ಯದಗ್ಗೇನ ವಿಪಸ್ಸನಾಯ ಪಞ್ಞಾಯ ತಂಸಹಗತವೀರಿಯಸ್ಸ ಚ ನಙ್ಗಲಧೋರಯ್ಹತಾ, ತಥಾಪವತ್ತಕುಸಲಭಾವನಾಯ ಚ ಕಸಿಭಾವೋ ಚ, ತದಗ್ಗೇನ ತತೋ ಪುರೇತರಂ ಪವತ್ತಪಞ್ಞಾವೀರಿಯಪಾರಮೀನಂ ನಙ್ಗಲಧೋರಯ್ಹತಾ, ತಥಾಪವತ್ತಕುಸಲಭಾವನಾಯ ಚ ಕಸಿಭಾವೋ ವೇದಿತಬ್ಬೋತಿ ದಸ್ಸೇನ್ತೋ ‘‘ಯಥಾ ಹೀ’’ತಿಆದಿಮಾಹ. ಧುರಂ ವಹತೀತಿ ಧೋರಯ್ಹಂ. ಯಥಾವುತ್ತಂ ಘನನ್ತಿ ಅಸ್ಮಿಮಾನಾದಿಭೇದಂ ಘನಂ. ವಹಿತಬ್ಬಾ ಆದಿಭೂತಾ ಧುರಾ ಏತೇಸಂ ಅತ್ಥೀತಿ ಧುರಾ, ಪುರಿಮಧುರವಾಹಕಾ. ತಂಮೂಲಕಾ ಅಪರಂ ಧುರಂ ವಹನ್ತಾ ಧೋರಯ್ಹಾ. ಧುರಾ ಚ ಧೋರಯ್ಹಾ ಚ ಧುರಧೋರಯ್ಹಂ ಏಕತ್ತವಸೇನ. ವಹನ್ತನ್ತಿ ಕಸನೇನ ಪವತ್ತನ್ತಂ.

ಕಾಮಯೋಗಾದೀಹಿ ಯೋಗೇಹಿ ಖೇಮತ್ತಾ ಅನುಪದ್ದವತ್ತಾ. ತಂ ನಿಬ್ಬಾನಂ ಅಧಿಕಿಚ್ಚ ಉದ್ದಿಸ್ಸ. ವಾಹೀಯತಿ ವಿಪಸ್ಸನಾಯ ಸಹಗತಂ. ಅಭಿಮುಖಂ ವಾಹೀಯತಿ ಮಗ್ಗಪರಿಯಾಪನ್ನಂ. ಖೇತ್ತಕೋಟಿನ್ತಿ ಖೇತ್ತಮರಿಯಾದಂ. ದಿಟ್ಠೇಕಟ್ಠೇತಿ ದಿಟ್ಠಿಯಾ ಸಹಜಾತೇಕಟ್ಠೇ ಪಹಾನೇಕಟ್ಠೇ ಚ. ಓಳಾರಿಕೇತಿ ಉಪರಿಮಗ್ಗವಜ್ಝೇ ಉಪಾದಾಯ ವುತ್ತಂ, ಅಞ್ಞಥಾ ದಸ್ಸನಪಹಾತಬ್ಬಾಪಿ ದುತಿಯಮಗ್ಗವಜ್ಝೇಹಿ ಓಳಾರಿಕಾತಿ. ಅಣುಸಹಗತೇತಿ ಅಣುಭೂತೇ. ಇದಂ ಹೇಟ್ಠಿಮಮಗ್ಗವಜ್ಝೇ ಉಪಾದಾಯ ವುತ್ತಂ. ಸಬ್ಬಕಿಲೇಸೇ ಅವಸಿಟ್ಠಸಬ್ಬಕಿಲೇಸೇ ಪಜಹನ್ತಂ ಅನಿವತ್ತನ್ತಂ ಗಚ್ಛತಿ ಪುನ ಪಹಾತಬ್ಬತಾಯ ಅಭಾವತೋ. ಅನಿವತ್ತನ್ತನ್ತಿ ನ ನಿವತ್ತನ್ತಂ, ಯಥಾ ನಿವತ್ತನಂ ನ ಹೋತಿ, ಏವಂ ಗಚ್ಛತೀತಿ ಅತ್ಥೋ. ತೇನಾಹ ‘‘ನಿವತ್ತನರಹಿತ’’ನ್ತಿಆದಿ. ಏತಂ ಪನ ತವ ಧುರಧೋರಯ್ಹಂ.

ಏವಮೇಸಾ ಕಸೀತಿ ಯಥಾವುತ್ತಸ್ಸ ಪಚ್ಚಾಮಸನಂ. ತೇನಾಹ ‘‘ನಿಗಮನಂ ಕರೋನ್ತೋ’’ತಿ. ವುತ್ತಸ್ಸೇವ ಹಿ ಅತ್ಥಸ್ಸ ಪುನ ವಚನಂ. ಪಞ್ಞಾನಙ್ಗಲೇನ ಸತಿಫಾಲಂ ಆಕೋಟೇತ್ವಾತಿ ಪಞ್ಞಾಸಙ್ಖಾತೇನ ನಙ್ಗಲೇನ ಸದ್ಧಿಂ ಸತಿಫಾಲಸ್ಸ ಏಕಾಬದ್ಧಭಾವಕರಣೇನ ಆಕೋಟೇತ್ವಾ. ಕಟ್ಠಾತಿ ಏತ್ಥ ‘‘ಕಸೀ’’ತಿ ಪದಂ ಆನೇತ್ವಾ ಸಮ್ಬನ್ಧಿತಬ್ಬಂ ‘‘ಕಟ್ಠಾ ಕಸೀ’’ತಿ. ಕಮ್ಮಪರಿಯೋಸಾನನ್ತಿ ಯಥಾವುತ್ತಕಸಿಕಮ್ಮಸ್ಸ ಪರಿಯೋಸಾನಭೂತಂ. ಯದಿಪಿ ಪುಬ್ಬೇ ‘‘ಪಞ್ಞಾ ಮೇ ಯುಗನಙ್ಗಲ’’ನ್ತಿಆದಿನಾ ಅತ್ತುದ್ದೇಸಿಕವಸೇನಾಯಂ ಅಮತಪ್ಫಲಾ ಕಸಿ ದಸ್ಸಿತಾ, ಮಹಾಕಾರುಣಿಕಸ್ಸ ಪನ ಭಗವತೋ ದೇಸನಾ ಸಬ್ಬಸ್ಸಪಿ ಸತ್ತನಿಕಾಯಸ್ಸ ಸಾಧಾರಣಾ ಏವಾತಿ ದಸ್ಸೇನ್ತೋ ‘‘ಸಾ ಖೋ ಪನೇಸಾ’’ತಿಆದಿಮಾಹ.

ದಿವಸೇಯೇವಾತಿ ತಂದಿವಸೇ ಏವ. ಆದಿಮಾಹಾತಿ ಏತ್ಥ ಆದಿ-ಸದ್ದೇನ ಕಥಾಪರಿಯೋಸಾನೇ ಪಾಠಪದೇಸೋ ಗಹಿತೋತಿ ತದಞ್ಞಂ ‘‘ಏವಂ ವುತ್ತೇ’’ತಿಆದಿಪಾಠಂ ಸನ್ಧಾಯ ‘‘ತತೋ ಪರಞ್ಚಾ’’ತಿ ಆಹ.

ಕಸಿಭಾರದ್ವಾಜಸುತ್ತವಣ್ಣನಾ ನಿಟ್ಠಿತಾ.

೨. ಉದಯಸುತ್ತವಣ್ಣನಾ

೧೯೮. ಏತಂ ವುತ್ತನ್ತಿ ‘‘ಓದನೇನ ಪೂರೇಸೀ’’ತಿ ಏತಂ ವಚನಂ ವುತ್ತಂ. ‘‘ಗಹೇತುಂ ಸಮತ್ಥೋ ನಾಮ ನಾಹೋಸೀತಿ ಭಗವತೋ ಅಧಿಟ್ಠಾನಬಲೇನಾ’’ತಿ ವದನ್ತಿ. ತಂ ಬ್ರಾಹ್ಮಣಂ ವಿನೇತುಕಾಮತಾಯ ಕಿರ ಭಗವಾ ತಥಾ ಅಕಾಸಿ.

ಉಪಾರಮ್ಭಭಯೇನಾತಿ ಪರೂಪವಾದಭಯೇನ. ಅವತ್ವಾವ ನಿವತ್ತೋ ‘‘ಅಬ್ಭಾಗತೋಪಿ ಪಾಸಣ್ಡೋ ವಾಚಾಮತ್ತೇನಪಿ ನ ಪೂಜೇತಬ್ಬೋ’’ತಿ ಬ್ರಾಹ್ಮಣಧಮ್ಮೇ ವುತ್ತತ್ತಾ. ಪಕ್ಕನ್ತೋತಿ ಬ್ರಾಹ್ಮಣಸ್ಸ ಧಮ್ಮಂ ಅವತ್ವಾ ಪಕ್ಕನ್ತೋ ಬ್ರಾಹ್ಮಣಸ್ಸ ನ ತಾವ ಞಾಣಂ ಪರಿಪಕ್ಕನ್ತಿ. ಏತಂ ವಚನಂ…ಪೇ… ಮಗಮಾಸಿ ‘‘ಪುನಪ್ಪುನಞ್ಚೇವ ವಪನ್ತಿ ಬೀಜ’’ನ್ತಿಆದಿನಾ ಧಮ್ಮಂ ಕಥೇತುಂ ಅವಸ್ಸಂ ಆಕಙ್ಖನ್ತೋ. ಪಕಾರತೋ ಕಸ್ಸತೀತಿ ಪಕಟ್ಠಕೋ, ರಸತಣ್ಹಾಯ ಪಕಟ್ಠೋತಿ ಅತ್ಥೋ. ತೇನಾಹ ‘‘ರಸಗಿದ್ಧೋ’’ತಿ.

‘‘ಪುನಪ್ಪುನಞ್ಚೇವ ವಪನ್ತಿ ಬೀಜ’’ನ್ತಿ ಇಮಂ ದೇಸನಂ ಆರಭೀತಿ ಸಮ್ಬನ್ಧೋ. ಬೀಜನ್ತಿ ಚ ಇತಿ-ಸದ್ದೋ ನಿದಸ್ಸನತ್ಥೋ ವಾ. ತೇನ ಅವಯವೇನ ಸಮುದಾಯಂ ನಿದಸ್ಸೇತಿ. ಓಸಕ್ಕಸೀತಿ ಸಙ್ಕೋಚಸಿ. ವುತ್ತನ್ತಿ ವಪನಂ ಕತಂ. ತಸ್ಮಾ ವುತ್ತಂ ‘‘ಅಲಮೇತ್ತಾವತಾ’’ತಿ. ‘‘ವಸ್ಸಿತ್ವಾ’’ತಿ ವುಟ್ಠಿಂ ಪವತ್ತೇತ್ವಾ.

ದೇಸನಾ…ಪೇ… ದಸ್ಸೇತಿ ಬ್ರಾಹ್ಮಣೇನ ವುತ್ತಂ ಅಯುತ್ತವಚನಂ ಪರಿವಟ್ಟೇನ್ತೋಪಿ ದಿವಸೇ ದಿವಸೇ ಭಿಕ್ಖಾಚರಿಯಾ ನಾಮ ಭಿಕ್ಖೂನಂ ಕಾಯಗತಾ ವುತ್ತೀತಿ. ಖೀರಂ ಹತ್ಥೇನ ನಯನ್ತೀತಿ ವಾ ಖೀರನಿಕಾ. ಕಿಲಮತೀತಿ ತಂತಂಕಿಚ್ಚಕರಣವಸೇನ ಖಿಜ್ಜತಿ. ಫನ್ದತೀತಿ ಅನತ್ಥಸಮಾಯೋಗವಸೇನ ವಿಪ್ಫನ್ದತಿ. ಅಪುನಬ್ಭವಾಯಾತಿ ಆಯತಿಂ ಅನುಪ್ಪತ್ತಿಯಾ. ಮಗ್ಗೋ ನಾಮಾತಿ ಉಪಾಯೋ ನಾಮ ನಿಬ್ಬಾನಂ, ತಸ್ಮಿಂ ಲದ್ಧೇ ಪುನಬ್ಭವಾಭಾವತೋ. ‘‘ಪುನಪ್ಪುನ’’ನ್ತಿ ವಚನಂ ಉಪಾದಾಯ ಬೀಜವಪನಾದಯೋ ಪುನಪ್ಪುನಧಮ್ಮಾ ನಾಮ ಜಾತಾತಿ ಆಹ ‘‘ಸೋಳಸ ಪುನಪ್ಪುನಧಮ್ಮೇ ದೇಸೇನ್ತೇನಾ’’ತಿ.

ಉದಯಸುತ್ತವಣ್ಣನಾ ನಿಟ್ಠಿತಾ.

೩. ದೇವಹಿತಸುತ್ತವಣ್ಣನಾ

೧೯೯. ಉದರವಾತೇಹೀತಿ ವಾತಕತವಿಜ್ಝನತೋದನಾದಿವಸೇನ ಅಪರಾಪರಂ ವತ್ತಮಾನೇಹಿ ಉದರವಾತೇಹಿ, ತಸ್ಸ ವಾ ವಿಕಾರೇಹಿ. ನಿಬದ್ಧುಪಟ್ಠಾಕಕಾಲೇ ಪನ ಧಮ್ಮಭಣ್ಡಾಗಾರಿಕೋವ. ಅರಞ್ಞನ್ತಿ ಭಗವತೋ ಭಿಕ್ಖೂನಞ್ಚ ವಸನಟ್ಠಾನಭೂತಂ ತಪೋವನಂ. ತಂ ನಿದ್ಧೂಮಂ ಹೋತಿ ಉದಕತಾಪನಸ್ಸಪಿ ಅಕರಣತೋ. ತಸ್ಮಾತಿ ಯಸ್ಮಾ ತಸ್ಸ ಉಣ್ಹೋದಕವಿಕ್ಕಿಣನಚರಿಯಾಯ ಜೀವಿಕಾಕಪ್ಪನಂ ಹೋತಿ, ತಸ್ಮಾ.

ವತ್ತಮೇತಂ ತಸ್ಸ ಪತಿಕಾರತ್ಥಂ ಪರಿಕಥಾದೀನಮ್ಪಿ ಕಾತುಂ ಲಬ್ಭನತೋ. ಇದಾನಿ ತತ್ಥ ಕಾರಣಮ್ಪಿ ಸವಿಸಯಂ ದಸ್ಸೇತುಂ ‘‘ವಣ್ಣಂ ಹೀ’’ತಿಆದಿ ವುತ್ತಂ. ಭಗವಾ ಹಿ ಆಯಸ್ಮತೋ ಉಪವಾಣಸ್ಸ ದೇವಹಿತಬ್ರಾಹ್ಮಣಸ್ಸ ತಂ ಸಮ್ಭಾವಿತಂ ಭವಿಸ್ಸತಿ ತಿಕಿಚ್ಛಾಪಟಿಯತ್ತಂ, ತಾಯ ಚ ಅತ್ತನೋ ರೋಗಸ್ಸ ವೂಪಸಮನಂ, ತಪ್ಪಸಙ್ಗೇನ ಚ ದೇವಹಿತಬ್ರಾಹ್ಮಣೋ ಮಮ ಸನ್ತಿಕಂ ಆಗನ್ತ್ವಾ ಧಮ್ಮಸ್ಸವನೇನ ಸರಣೇಸು ಸೀಲೇಸು ಚ ಪತಿಟ್ಠಹಿಸ್ಸತೀತಿ ಸಬ್ಬಮಿದಂ ಞತ್ವಾ ಏವಂ ‘‘ಇಙ್ಘ ಮೇ ತ್ವಂ, ಉಪವಾಣ, ಉಣ್ಹೋದಕಂ ಜಾನಾಹೀ’’ತಿ ಅವೋಚ. ಆಗಮನೀಯಪ್ಪಟಿಪದಂ ಪುಬ್ಬಭಾಗಪ್ಪಟಿಪದಂ ಪುಬ್ಬಭಾಗಪ್ಪಟಿಪತ್ತಿಂ ಕಥೇತುಂ ವಟ್ಟತಿ ಅನುತ್ತರಿಮನುಸ್ಸಧಮ್ಮತ್ತಾ. ಸದೇವಕೇನ ಲೋಕೇನಾತಿ ಅನವಸೇಸತೋ ಲೋಕಸ್ಸ ಗಹಣಂ. ಫಲವಿಸೇಸಾಕಙ್ಖಾಯ ಪೂಜೇತಬ್ಬಾತಿ ಪೂಜನೀಯಾ, ತೇ ಏವ ಇಧ ‘‘ಪೂಜನೇಯ್ಯಾ’’ತಿ ವುತ್ತಾ. ತಥಾ ಆದರೇನ ಪೂಜೇತಬ್ಬತಾಯ ಸಕ್ಕಾರಿಯಾ, ಆ-ಕಾರಸ್ಸ ರಸ್ಸತ್ತಂ, ರಿ-ಸದ್ದಸ್ಸ ಚ ರೇ-ಆದೇಸಂ ಕತ್ವಾ ‘‘ಸಕ್ಕರೇಯ್ಯಾ’’ತಿ ವುತ್ತಂ. ‘‘ಅಪಚಯೇಯ್ಯಾ’’ತಿ ವತ್ತಬ್ಬೇ ಯ-ಕಾರಲೋಪಂ ಕತ್ವಾ ‘‘ಅಪಚೇಯ್ಯಾ’’ತಿ ವುತ್ತಂ. ತೇಸನ್ತಿ ಸದೇವಕೇನ ಪೂಜನೇಯ್ಯಾದೀನಂ. ಹರಿತುನ್ತಿ ನೇತುಂ.

ಏತ್ತಕೇನಪೀತಿ ಉಪಸಙ್ಕಮನಾದಿನಾ ಏತ್ತಕೇನ ಅಪ್ಪಮತ್ತಕೇನಪಿ ಕತವತ್ತೇನ ಅಯಂ ಕಿತ್ತಿ…ಪೇ… ಸೋಮನಸ್ಸಜಾತೋ.

ಯಜಮಾನಸ್ಸಾತಿ ದೇಯ್ಯಧಮ್ಮಂ ದೇನ್ತಸ್ಸ. ದಕ್ಖಿಣಾಯ ಇಜ್ಝನಂ ನಾಮ ವಿಪುಲಫಲಭಾವೋತಿ ಆಹ ‘‘ಮಹಪ್ಫಲೋ ಹೋತೀ’’ತಿ. ವಿದಿತನ್ತಿ ಪಟಿವಿದ್ಧಪಚ್ಚಕ್ಖಕತಂ. ಆಜಾನಾತೀತಿ ವುತ್ಥಭವಾದಿಂ ಪರಿಯಾದಾಯ ಜಾನಾತಿ ಪಟಿವಿಜ್ಝತಿ. ಜಾನಿತ್ವಾತಿ ಚತ್ತಾರಿ ಸಚ್ಚಾನಿ ಮಗ್ಗಪಟಿಪಾಟಿಯಾ ಪಟಿವಿಜ್ಝಿತ್ವಾ. ಅಗ್ಗಪ್ಪತ್ತತಾಯ ಕತಕಿಚ್ಚತಂ ಪತ್ತೋ. ಬ್ರಾಹ್ಮಣೇನ ಅತ್ತನಾ ಕತೋ ಕಾರೋ ಚ ಭಗವತೋ ಏವ ಪಚ್ಚುಪಟ್ಠಾತೀತಿ ತಂ ದಸ್ಸೇನ್ತೋ ‘‘ಇಮಿನಾ ಖೀಣಾಸವೇ ಯಜನಾಕಾರೇನ ಯಜನ್ತಸ್ಸಾ’’ತಿ ವುತ್ತಂ.

ದೇವಹಿತಸುತ್ತವಣ್ಣನಾ ನಿಟ್ಠಿತಾ.

೪. ಮಹಾಸಾಲಸುತ್ತವಣ್ಣನಾ

೨೦೦. ಯಸ್ಮಾ ತಸ್ಸ ಬ್ರಾಹ್ಮಣಸ್ಸ ಅನಿಸ್ಸಯಸ್ಸ ಜಿಣ್ಣಭಾವೇನ ವಿಸೇಸತೋ ಕಾಯೋ ಲೂಖೋ ಜಾತೋ, ಜಿಣ್ಣಪಿಲೋತಿಕಖಣ್ಡೇಹಿ ಸಙ್ಘಟಿತಂ ಪಾವುರಣಂ, ತಸ್ಮಾ ‘‘ಲೂಖಪಾವುರಣೋ’’ತಿ ಪದಸ್ಸ ‘‘ಜಿಣ್ಣಪಾವುರಣೋ’’ತಿ ಅತ್ಥೋ ವುತ್ತೋ. ಪಾಟಿಯೇಕ್ಕನ್ತಿ ಪುತ್ತೇಸು ಏಕಮೇಕೋ ಏಕಮೇಕಾಯ ವಾಚಾಯ ವಿಸುಂ ವಿಸುಂ.

ಸಮ್ಪುಚ್ಛನಂ ನಾಮ ಇಧ ಸಮ್ಮನ್ತನನ್ತಿ ಆಹ ‘‘ಸದ್ಧಿಂ ಮನ್ತಯಿತ್ವಾ’’ತಿ. ನನ್ದಿಸ್ಸನ್ತಿ ಅಭಿನನ್ದಿಂ. ಅತೀತತ್ಥೇ ಹಿ ಇದಂ ಅನಾಗತವಚನಂ. ತೇನಾಹ ‘‘ನನ್ದಿಜಾತೋ…ಪೇ… ಅಹೋಸಿ’’ನ್ತಿ. ಭುಸ್ಸನ್ತಾತಿ ನಿಬ್ಭುಸ್ಸನವಸೇನ ರವನ್ತಾ.

ವಯೋಗತನ್ತಿ ಪಚ್ಛಿಮವಯಂ ಉಪಗತಂ. ಸೋ ಪನ ಯಸ್ಮಾ ಪುರಿಮೇ ದ್ವೇ ವಯೇ ಅತಿಕ್ಕಮವಸೇನ ಗತೋ. ಪಚ್ಛಿಮಂ ಏಕದೇಸತೋ ಅತಿಕ್ಕಮನವಸೇನ, ತಸ್ಮಾ ವುತ್ತಂ – ‘‘ತಯೋ ವಯೇ ಗತಂ ಅತಿಕ್ಕನ್ತಂ ಪಚ್ಛಿಮವಯೇ ಠಿತ’’ನ್ತಿ.

ನಿಪ್ಪರಿಭೋಗೋತಿ ಜಿಣ್ಣಭಾವೇನ ಜವಪರಕ್ಕಮಹಾನಿಯಾ ಅಪರಿಭೋಗೋ ನ ಭುಞ್ಜಿತಬ್ಬೋ. ಖಾದನಾ ಅಪನೀಯತೀತಿ ಯವಸಂ ಅದದನ್ತಾ ತತೋ ನೀಹರನ್ತಿ ನಾಮ. ಥೇರೋತಿ ವುಡ್ಢೋ.

ಅನಸ್ಸವಾತಿ ನ ವಚನಕರಾ. ಅಪ್ಪತಿಸ್ಸಾತಿ ಪತಿಸ್ಸಯರಹಿತಾ. ಅವಸವತ್ತಿನೋತಿ ನ ಮಯ್ಹಂ ವಸೇನ ವತ್ತನಕಾ. ಸುನ್ದರತರೋತಿ ಉಪತ್ಥಮ್ಭಕಾರಿಭಾವೇನ ಸುನ್ದರತರೋ.

ಪುರತೋತಿ ಉಪತ್ಥಮ್ಭಕಭಾವೇನ ಪುರತೋ ಕತ್ವಾ. ಉದಕೇ ಪತಿಟ್ಠಂ ಲಭತಿ ತತ್ಥ ಪತಿಟ್ಠತೋ ಥಿರಪತಿಟ್ಠಭಾವತೋ. ಅದ್ಧಪತಿಟ್ಠೋ ಹಿ ದಣ್ಡೋ ದಣ್ಡಧರಪುರಿಸಸ್ಸ ಪತಿಟ್ಠಂ ಲಭಾಪೇತಿ.

ಬ್ರಾಹ್ಮಣಿಯೋತಿ ಅತ್ತನೋ ಬ್ರಾಹ್ಮಣಿಯೋ. ಪಾಟಿಯೇಕ್ಕನ್ತಿ ‘‘ಅಸುಕಸ್ಸ ಗೇಹೇ ಅಸುಕಸ್ಸ ಗೇಹೇ’’ತಿ ಏವಂ ಉದ್ದೇಸಿಕಂ ಕತ್ವಾ ವಿಸುಂ ವಿಸುಂ. ಮಾ ನಿಯ್ಯಾದೇಹಿ, ಅಮ್ಹಾಕಂ ರುಚ್ಚನಟ್ಠಾನಮೇವಾತಿ ತವ ಪುತ್ತಾನಂ ಗೇಹೇಸು ಯಂ ಅಮ್ಹಾಕಂ ರುಚ್ಚನಟ್ಠಾನಂ. ತತ್ಥಮೇವ ಗಮಿಸ್ಸಾಮಾತಿ ಸಬ್ಬೇಸಮ್ಪಿ ಏತೇಸಂ ಅನುಗ್ಗಹಂ ಕಾತುಕಾಮೋ ಭಗವಾ ಏವಮಾಹ.

ತತೋ ಪಟ್ಠಾಯಾತಿ ಸೋತಾಪತ್ತಿಫಲಪಟಿಲಾಭತೋ ಪಟ್ಠಾಯ. ಯದತ್ಥಂ ಮಯಂ ಇಮಸ್ಸ ಬ್ರಾಹ್ಮಣಸ್ಸ ಮಹಾಸಮ್ಪತ್ತಿದಾನಾದಿನಾ ಅನುಗ್ಗಹೋ ಕತೋ, ಸೋ ಚಸ್ಸ ಪುತ್ತಪರಿಜನಸ್ಸಪಿ ಅತ್ಥೋ ಸಿದ್ಧೋತಿ ಸತ್ಥಾ ನ ಸಬ್ಬಕಾಲಂ ತಸ್ಸ ಬ್ರಾಹ್ಮಣಸ್ಸ ಪುತ್ತಾನಂ ಗೇಹಂ ಅಗಮಾಸಿ, ತೇ ಏವ ಪನ ಕಾಲೇನ ಕಾಲಂ ಸತ್ಥು ಸನ್ತಿಕಂ ಗನ್ತ್ವಾ ಯಥಾವಿಭವಂ ಸಕ್ಕಾರಸಮ್ಮಾನಂ ಅಕಂಸೂತಿ ಅಧಿಪ್ಪಾಯೋ.

ಮಹಾಸಾಲಸುತ್ತವಣ್ಣನಾ ನಿಟ್ಠಿತಾ.

೫. ಮಾನತ್ಥದ್ಧಸುತ್ತವಣ್ಣನಾ

೨೦೧. ಮಾನೇನ ಥದ್ಧೋತಿ ‘‘ಅಯಂ ಖೋ’’ತಿಆದಿನಾ ಪಗ್ಗಹಿತೇನ ಮಾನೇನ ಥದ್ಧೋ ಬಜ್ಝಿತಚಿತ್ತೋ ಥದ್ಧಅಯೋಸಲಾಕೋ ವಿಯ ಕಸ್ಸಚಿಪಿ ಅನೋನತೋ. ನ ಕಿಞ್ಚಿ ಜಾನಾತಿ ಲೋಕೇ ಪಟಿಸನ್ಥಾರಮತ್ತಸ್ಸಪಿ ಅಜಾನನತೋ.

ಅಬ್ಭುತವಿತ್ತಜಾತಾತಿ ಸಞ್ಜಾತಅಬ್ಭುತವಿತ್ತಾ. ವಿತ್ತಂ ವಿತ್ತೀತಿ ಚ ತುಟ್ಠಿಪರಿಯಾಯಾ. ಅಭೂತಪುಬ್ಬಾಯಾತಿ ಯಾ ತಸ್ಸಾ ಪರಿಸಾಯ ವಿತ್ತಿ ತದಾ ಭೂತಾ, ಸಾ ಇತೋ ಪುಬ್ಬೇ ಅಭೂತಾ. ತೇನಾಹ ‘‘ಅಭೂತ…ಪೇ… ಸಮನ್ನಾಗತಾ’’ತಿ. ಅಸ್ಸ ಪುಗ್ಗಲಸ್ಸಾತಿ ಅನೇನ ಪುಗ್ಗಲೇನ. ಅಪಚಿತಾತಿ ಪರಮನಿಪಚ್ಚೇನ ಪೂಜನೀಯಸಾಮಞ್ಞತೋ ತತ್ಥ ಅತ್ತನೋ ಪಕ್ಖಿಪನಂ ಇಧ ದೇಸನಾಕೋಸಲ್ಲಂ.

ಮಾನತ್ಥದ್ಧಸುತ್ತವಣ್ಣನಾ ನಿಟ್ಠಿತಾ.

೬. ಪಚ್ಚನೀಕಸುತ್ತವಣ್ಣನಾ

೨೦೨. ‘‘ಸಬ್ಬಂ ಸೇತ’’ನ್ತಿ ಕೇನಚಿ ವುತ್ತೇ ತಸ್ಸ ಪಚ್ಚನೀಕಂ ಕರೋನ್ತಸ್ಸೇವ ಅಸ್ಸ ಬ್ರಾಹ್ಮಣಸ್ಸ. ವಿನೇತ್ವಾತಿ ವಿನಾಸೇತ್ವಾ. ಸುಣಾತೀತಿ ಅತ್ಥೋತಿ ‘‘ಸುಣಾತೀ’’ತಿ ಕಿರಿಯಾಪದಂ ಆಹರಿತ್ವಾ ಗಾಥಾಯ ಅತ್ಥೋ ವೇದಿತಬ್ಬೋ ‘‘ಜಞ್ಞಾ ಸುಭಾಸಿತ’’ನ್ತಿ ವುತ್ತತ್ತಾ. ನ ಹಿ ಅಸುತ್ವಾ ದೇಸಿತಂ ಜಾನಿತುಂ ಸಕ್ಕೋನ್ತಿ.

ಪಚ್ಚನೀಕಸುತ್ತವಣ್ಣನಾ ನಿಟ್ಠಿತಾ.

೭. ವನಕಮ್ಮಿಕಸುತ್ತವಣ್ಣನಾ

೨೦೩. ವನಕಮ್ಮೇ ನಿಯುತ್ತೋ, ಕಿರಿಯಮಾನೇನ ವನಕಮ್ಮಂ ಏತಸ್ಸ ಅತ್ಥೀತಿ ವನಕಮ್ಮಿಕೋ. ಇಮಸ್ಮಿಂ ವನಸಣ್ಡೇತಿ ಇಮಸ್ಮಿಂ ಏವಂಮಹನ್ತೇ ವನಸಣ್ಡೇ. ನ ಮೇ ವನಸ್ಮಿಂ ಕರಣೀಯಮತ್ಥಿ ಯಥಾ, ‘‘ಬ್ರಾಹ್ಮಣ, ತುಯ್ಹ’’ನ್ತಿ ಅಧಿಪ್ಪಾಯೋ. ಇತರಂ ಪನ ಯಂ ಮಹಾಕಿಲೇಸವನಂ, ತಂ ಮಗ್ಗಞಾಣಫರಸುನಾ ಸಮಾಧಿಮಯಸಿಲಾಯಂ ಸುನಿಸಿತೇನ ಸಬ್ಬಸೋ ಉಚ್ಛಿನ್ನಮೂಲಂ, ತತೋ ಏವ ನಿಬ್ಬನಥೋ ನಿಕ್ಕಿಲೇಸಗಹನೋ. ವಿವೇಕಾಭಿರತಿಯಾ ಏಕಕೋ ಅಭಿರತೋ ಪಟಿಪಕ್ಖವಿಗಮೇನ. ತೇನಾಹ ‘‘ಅರತಿಂ…ಪೇ… ಜಹಿತ್ವಾ’’ತಿ.

ವನಕಮ್ಮಿಕಸುತ್ತವಣ್ಣನಾ ನಿಟ್ಠಿತಾ.

೮. ಕಟ್ಠಹಾರಸುತ್ತವಣ್ಣನಾ

೨೦೪. ಧಮ್ಮನ್ತೇವಾಸಿಕಾತಿ ಕಿಞ್ಚಿಪಿ ಧನಂ ಅದತ್ವಾ ಕೇವಲಂ ಅನ್ತೇವಾಸಿಕಾ. ತೇನಾಹ ‘‘ವೇಯ್ಯಾವಚ್ಚಂ ಕತ್ವಾ ಸಿಪ್ಪುಗ್ಗಣ್ಹನಕಾ’’ತಿ. ಗಮ್ಭೀರಸಭಾವೇತಿ ಸಮನ್ತತೋ ದೂರತೋ ಗಹನಸಚ್ಛನ್ನವಿಪುಲತರರುಕ್ಖಗಚ್ಛಲತಾಯ ಚ, ತದಾ ಹಿಮಪಿಣ್ಡಸಿನ್ನಭಾವೇನ ಮಯೂರಯಾನೇಹಿ ಪತಿಟ್ಠಾತುಂ ಅಸಕ್ಕುಣೇಯ್ಯತಾಯ ಚ ಗಮ್ಭೀರಭಾವೇ.

ಬಹುಭೇರವೇತಿ ಬಹುಭಯಾನಕೇ. ಅನಿಞ್ಜಮಾನೇನಾತಿ ಇತ್ಥಮ್ಭೂತತ್ಥೇ ಕರಣವಚನಂ. ಅತಿಸುನ್ದರಂ ವತಾತಿ ಏವಂ ಸನ್ತೇ ನಾಮ ಅರಞ್ಞೇ ಏವಂ ನಿಚ್ಚಲಕಾಯೋ ನಿಸಿನ್ನೋ ಝಾಯನ್ತೋ ಅತಿವಿಯ ಸುನ್ದರಞ್ಚ ಝಾನಂ ಝಾಯಸೀತಿ ವದತಿ.

ಅಚ್ಛೇರರೂಪನ್ತಿ ಅಚ್ಛರಿಯಭಾವಂ. ಸೇಟ್ಠಪ್ಪತ್ತಿಯಾತಿ ಸೇಟ್ಠಭಾವಪ್ಪತ್ತಿಯಾ.

‘‘ಲೋಕಾಧಿಪತಿಸಹಬ್ಯತಂ ಆಕಙ್ಖಮಾನೋ’’ತಿ ಇಮಿನಾ ಬ್ರಾಹ್ಮಣೋ ಲೋಕಾಧಿಪತಿಸಹಯೋಗಂ ಪುಚ್ಛತಿ, ‘‘ಕಸ್ಮಾ ಭವ’’ನ್ತಿಆದಿನಾ ಪನ ತದಞ್ಞವಿಸೇಸಾಕಙ್ಖಂ ಪುಚ್ಛತೀತಿ ಆಹ ‘‘ಅಪರೇನಪಿ ಆಕಾರೇನ ಪುಚ್ಛತೀ’’ತಿ.

ಕಙ್ಖಾತಿ ತಣ್ಹಾ ಅಭಿಕ್ಖಣವಸೇನ ಪವತ್ತಾ. ಅನೇಕಸಭಾವೇಸೂತಿ ರೂಪಾದಿವಸೇನ ಅಜ್ಝತ್ತಿಕಾದಿವಸೇನ ಏವಂ ನಾನಾಸಭಾವೇಸು ಆರಮ್ಮಣೇಸು. ಅಸ್ಸಾದರಾಗೋ ಲೋಭೋ ಅಭಿಜ್ಝಾತಿ ನಾನಪ್ಪಕಾರಾ. ಸೇಸಕಿಲೇಸಾ ವಾ ದಿಟ್ಠಿಮಾನದೋಸಾದಯೋ. ನಿಚ್ಚಕಾಲಂ ಅವಸ್ಸಿತಾ ಸತ್ತಾನಂ ಅವಸ್ಸಯಭಾವತ್ತಾ. ಪಜಪ್ಪಾಪನವಸೇನಾತಿ ಪಕಾರೇಹಿ ತಣ್ಹಾಯನವಸೇನ. ನಿರನ್ತಾತಿ ಅನ್ತರಹಿತಾ ನಿರವಸೇಸಾ.

ಅನುಪಗಮನೋತಿ ಅನುಪಾದಾನೋ. ಸಬ್ಬಞ್ಞುತಞ್ಞಾಣಂ ದೀಪೇತಿ, ತಸ್ಸ ಹಿ ವಸೇನ ಏವ ನಾನಾಸಭಾವೇಸು ಭಗವಾ ಸಮನ್ತಚಕ್ಖುನಾ ಪಸ್ಸತೀತಿ ‘‘ಸಬ್ಬೇ…ಪೇ… ದಸ್ಸನೋ’’ತಿ ವುಚ್ಚತಿ. ಅರಹತ್ತಂ ಸನ್ಧಾಯಾಹ, ತಞ್ಹಿ ನಿಪ್ಪರಿಯಾಯತೋ ‘‘ಅನುತ್ತರ’’ನ್ತಿ ವುಚ್ಚತಿ.

ಕಟ್ಠಹಾರಸುತ್ತವಣ್ಣನಾ ನಿಟ್ಠಿತಾ.

೯. ಮಾತುಪೋಸಕಸುತ್ತವಣ್ಣನಾ

೨೦೫. ಇತೋತಿ ಮನುಸ್ಸತ್ತಭಾವತೋ. ಪಟಿಗನ್ತ್ವಾತಿ ಅಭಿಗನ್ತ್ವಾ. ಸಗ್ಗೇ ಹಿ ನಿಬ್ಬತ್ತನ್ತೋ ಕಮ್ಮಫಲೇನ ಧಮ್ಮತಾವಸೇನ ಪಟಿಸನ್ಧಿಕಾಲತೋ ಪಟ್ಠಾಯ ಅಭಿರತಿವಸೇನ ಅಭಿರಮತಿ ಏವ ನಾಮಾತಿ.

ಮಾತುಪೋಸಕಸುತ್ತವಣ್ಣನಾ ನಿಟ್ಠಿತಾ.

೧೦. ಭಿಕ್ಖಕಸುತ್ತವಣ್ಣನಾ

೨೦೬. ವಿರೂಪಂ ಗನ್ಧಂ ಪಸವತೀತಿ ವಿಸ್ಸೋ, ದುಗ್ಗನ್ಧೋ. ಬಾಹಿತ್ವಾತಿ ಅತ್ತನೋ ಸನ್ತಾನತೋ ಬಹಿಕತ್ವಾ ನೀಹರಿತ್ವಾ. ತಂ ಪನ ಅನವಸೇಸತೋ ಪಜಹನನ್ತಿ ಆಹ ‘‘ಅಗ್ಗಮಗ್ಗೇನ ಜಹಿತ್ವಾ’’ತಿ. ಸಙ್ಖಾಯತಿ ಸಮ್ಮದೇವ ಪರಿಚ್ಛಿನ್ದತಿ ಏತಾಯಾತಿ ಸಙ್ಖಾ, ಞಾಣನ್ತಿ ಆಹ ‘‘ಸಙ್ಖಾಯಾತಿ ಞಾಣೇನಾ’’ತಿ. ಭಿನ್ನಕಿಲೇಸತ್ತಾತಿ ನಿರುತ್ತಿನಯೇನ ಭಿಕ್ಖುಸದ್ದಸಿದ್ಧಿಮಾಹ.

ಭಿಕ್ಖಕಸುತ್ತವಣ್ಣನಾ ನಿಟ್ಠಿತಾ.

೧೧. ಸಙ್ಗಾರವಸುತ್ತವಣ್ಣನಾ

೨೦೭. ಪಚ್ಚೇತೀತಿ ಪತ್ತಿಯಾಯತಿ ಸದ್ದಹತಿ. ತಥಾಭೂತೋ ಚ ತಮತ್ಥಂ ನಿಕಾಮೇನ್ತೋ ನಾಮ ಹೋತೀತಿ ವುತ್ತಂ ‘‘ಇಚ್ಛತಿ ಪತ್ಥೇತೀ’’ತಿ. ಸಾಧು, ಭನ್ತೇತಿ ಏತ್ಥ ಸಾಧು-ಸದ್ದೋ ಆಯಾಚನತ್ಥೋ, ನ ಅಭಿನನ್ದನತ್ಥೋತಿ ‘‘ಆಯಾಚಮಾನೋ ಆಹಾ’’ತಿ ವತ್ವಾ ಆಯಾಚನೇ ಕಾರಣಂ ದಸ್ಸೇನ್ತೋ ‘‘ಥೇರಸ್ಸ ಕಿರಾ’’ತಿಆದಿಮಾಹ. ಉದಕಸುದ್ಧಿಕೋ ನ ಏಕಂಸೇನ ಅಪಾಯೂಪಗೋ, ಲದ್ಧಿಯಾ ಪನ ಸಾವಜ್ಜಕಿಲೇಸಭೂತಭಾವತೋ ಆಯಾಚತಿ. ಅಞ್ಞಂ ಕಾರಣಂ ಅಪದಿಸನ್ತೋ ‘‘ಅಪಿಚಾ’’ತಿಆದಿಮಾಹ. ಫಲಭೂತೋ ಅತ್ಥೋ ಏತಸ್ಸಾತಿ ಅತ್ಥವಸಂ, ಕಾರಣನ್ತಿ ಆಹ ‘‘ಅತ್ಥಾನಿಸಂಸಂ ಅತ್ಥಕಾರಣ’’ನ್ತಿ. ಪಪಞ್ಚಸೂದನಿಯಂ ಪನ ಫಲೇನೇವ ಅರಣೀಯತೋ ಅತ್ಥೋ, ಕಾರಣನ್ತಿ ಕತ್ವಾ ‘‘ಅತ್ಥೋ ಏವ ಅತ್ಥವಸೋ, ತಸ್ಮಾ ದ್ವೇ ಅತ್ಥವಸೇತಿ ದ್ವೇ ಅತ್ಥೇ ದ್ವೇ ಕಾರಣಾನೀ’’ತಿ ವುತ್ತಂ.

ಸಙ್ಗಾರವಸುತ್ತವಣ್ಣನಾ ನಿಟ್ಠಿತಾ.

೧೨. ಖೋಮದುಸ್ಸಸುತ್ತವಣ್ಣನಾ

೨೦೮. ಏವಂಲದ್ಧನಾಮಂ ಪಿಣ್ಡಾಯ ಪಾವಿಸೀತಿ ಯೋಜನಾ. ಏವಮೇವನ್ತಿ ಕೇನಚಿ ಅನಿಮನ್ತಿತೇನ ಸಯಮೇವ ಉಪಸಙ್ಕಮನ್ತೇ. ಅಫಾಸುಕಧಾತುಕನ್ತಿ ಅಯುತ್ತರೂಪಂ. ಸಭಾಧಮ್ಮನ್ತಿ ಸಭಾಯ ಚರಿತಬ್ಬಂ ಚಾರಿತ್ತಧಮ್ಮಂ. ಅಸಞ್ಚಾಲೇತ್ವಾತಿ ಆಸನತೋ ಅವುಟ್ಠಾಪೇತ್ವಾ. ಉಜುಕಮೇವ ಆಗಚ್ಛತಿ ಲೋಕಗ್ಗನಾಯಕೋ ಭಗವಾ ಸಬ್ಬಸತ್ತುತ್ತಮೋ ಅತ್ತನೋ ಉತ್ತರಿತರಸ್ಸ ಅಭಾವತೋ ಲೋಕಸ್ಸ ಅಪಚಿತಿಂ ನ ದಸ್ಸೇತಿ. ಯೇ ಸಬ್ಬಸೋ ಸಂಕಿಲೇಸೇ ಪಜಹನ್ತಿ, ತೇವ ಪಣ್ಡಿತೇ ‘‘ಸನ್ತೋ’’ತಿ ದಸ್ಸೇತಿ ‘‘ಏತೇ’’ತಿಆದಿನಾ.

ಖೋಮದುಸ್ಸಸುತ್ತವಣ್ಣನಾ ನಿಟ್ಠಿತಾ.

ದುತಿಯವಗ್ಗವಣ್ಣನಾ ನಿಟ್ಠಿತಾ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ಬ್ರಾಹ್ಮಣಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.