೧೦. ಅನಾಥಪಿಣ್ಡಿಕಸುತ್ತವಣ್ಣನಾ

೧೦೧. ದಸಮೇ ಕಾಮಂ ದೇವತಾಸಂಯುತ್ತೇಪಿ ‘‘ಇದಂ ಹಿ ತಂ ಜೇತವನ’’ನ್ತಿಆದಿನಾ ಇಮಾ ಏವ ಗಾಥಾ ಆಗತಾ. ತತ್ಥ ‘‘ಅಞ್ಞತರಾ ದೇವತಾ’’ತಿ ನಿದಾನಂ ಆರೋಪಿತಂ. ಹೇಟ್ಠಾ ಆಗತನಯತ್ತಾ ಏವ ಹಿ ಪೋತ್ಥಕೇಸು ನ ಲಿಖಿತಂ, ಇಧ ಪನ ದೇವಪುತ್ತಸಂಯುತ್ತೇ ‘‘ಅನಾಥಪಿಣ್ಡಿಕೋ ದೇವಪುತ್ತೋ’’ತಿ ನಿದಾನೇ ನಿಗಮೇ ಚ ಆಗತಂ, ತತ್ಥ ದೇವಪುತ್ತೇನ ಸತ್ಥು ವುತ್ತಪ್ಪಕಾರಗುಣಪವೇದನವಸೇನ ವುತ್ತಂ. ಸತ್ಥಾ ಪನ ಭಿಕ್ಖೂನಂ ತಮತ್ಥಂ ಪವೇದೇನ್ತೋ ‘‘ಅಞ್ಞತರೋ ದೇವಪುತ್ತೋ’’ತಿ ಆಹ. ತಥಾ ಪವೇದನೇ ಪನ ಕಾರಣಂ ದಸ್ಸೇನ್ತೋ ‘‘ಆನನ್ದತ್ಥೇರಸ್ಸಾ’’ತಿಆದಿಮಾಹ. ಅನುಮಾನಬುದ್ಧಿಯಾತಿ ಅನುಮಾನಞಾಣಸ್ಸ. ಆನುಭಾವಪ್ಪಕಾಸನತ್ಥನ್ತಿ ಬಲದೀಪನತ್ಥಂ.

ಅನಾಥಪಿಣ್ಡಿಕಸುತ್ತವಣ್ಣನಾ ನಿಟ್ಠಿತಾ.

ದುತಿಯವಗ್ಗವಣ್ಣನಾ ನಿಟ್ಠಿತಾ.