೭. ಪುನಬ್ಬಸುಸುತ್ತವಣ್ಣನಾ

೨೪೧. ವಸನಟ್ಠಾನಗ್ಗಹಣೇನ ರತ್ತಿಟ್ಠಾನದಿವಾಟ್ಠಾನಾದಯೋ ಸಙ್ಗಣ್ಹಾತಿ. ದ್ವಾದಸಹತ್ಥಮತ್ತಮೇವ ಗಣ್ಹಾತಿ ಪಕತಿಸಞ್ಚರಣೂಪಚಾರಮತ್ತಬ್ಯಾಪನತೋ. ಯಥಾಪರಿಸನ್ತಿ ಪರಿಸಾನುರೂಪಂ, ಯತ್ಥ ಯತ್ಥ ಪರಿಸಾ ತಿಟ್ಠತಿ, ತಂ ತಂ ಠಾನಂ ಗಚ್ಛತಿ ಪರಿಸಪರಿಯನ್ತಿಕತ್ತಾ. ಸತ್ಥು ಮುಖವಿಕಾರಾಭಾವತೋ ಪವೇಸಾನುಞ್ಞಂ ಸಲ್ಲಕ್ಖೇನ್ತೀ ‘‘ನೂನ ಅಯಂ ಕತಾಧಿಕಾರಾ ಭವಿಸ್ಸತೀ’’ತಿ ಅನುಮಾನಸಿದ್ಧಂ ಉಪನಿಸ್ಸಯಂ ದಿಸ್ವಾ. ಏಕೀಭಾವಗಮನೇನಾತಿ ಹತ್ಥಪಾಸೂಪಗಮನೇನ ಪರಿಸಾಯ ಮಿಸ್ಸೀಭಾವಪ್ಪತ್ತಿಯಾ. ಪುತ್ತಕಾತಿ ಪುತ್ತಪುತ್ತಿಯೋ. ಅನುಕಮ್ಪಾಯಞ್ಹಿ ಕ-ಸದ್ದೋ.

ನಿಬ್ಬಾನಾರಮ್ಮಣೇನ ಅರಿಯಮಗ್ಗೇನ ಮುಞ್ಚಿಯಮಾನಾ ಗನ್ಥಾ ‘‘ನಿಬ್ಬಾನಂ ಆಗಮ್ಮ ಪಮುಚ್ಚನ್ತೀ’’ತಿ ವುತ್ತಾ. ವೇಲಾತಿಕ್ಕನ್ತಾತಿ ಪಮಾಣತೋ ಪರಿಚ್ಛಿನ್ದಿತುಂ ನ ಸಕ್ಕಾತಿ ಆಹ ‘‘ಪಮಾಣಾತಿಕ್ಕನ್ತಾ’’ತಿ. ಪಿಯಾಯನಾತಿ ಆಸೀಸನಾ. ಆಸೀಸನಂ ಪೇಮವಸೇನ ಪೇಮವತ್ಥುನೋ ಏಸನಾ ಪತ್ಥನಾವ ಹೋತೀತಿ ಆಹ ‘‘ಮಗ್ಗನಾ ಪತ್ಥನಾ’’ತಿ. ತತೋತಿ ಪಿಯಪುತ್ತಾದಿತೋ. ಪಾಣೀನನ್ತಿ ಸಾಮಿಅತ್ಥೇ ಪುಥುವಚನಂ ದುಕ್ಖಸದ್ದಾಪೇಕ್ಖಂ. ಕೇ ಮೋಚೇತೀತಿ ಮೋಚನಕಿರಿಯಾಯ ಕಮ್ಮಂ ಪುಚ್ಛತಿ? ಇಭರೋ ಪನ ಅತ್ಥವಸೇನ ವಿಭತ್ತಿವಿಪರಿಣಾಮೋತಿ ‘‘ಪಾಣಿನೇತಿ ಆಹರಿತ್ವಾ ವತ್ತಬ್ಬ’’ನ್ತಿ ಆಹ. ಅಭಿಸಮ್ಬುಧನ್ತಿ ಅಭಿಸಮ್ಬುಧನ್ತೋ. ತೇನಾಹ ‘‘ಅಭಿಸಮ್ಬುದ್ಧೋ’’ತಿ. ಸದ್ಧಮ್ಮಸ್ಸಾತಿ ಉಪಯೋಗತ್ಥೇ ಸಾಮಿವಚನನ್ತಿ ಆಹ ‘‘ಸದ್ಧಮ್ಮಮೇವ ಅಜಾನಿತ್ವಾ’’ತಿ.

ಪುತ್ತಸ್ಸ ಅನುಮೋದನಂ ಕರೋನ್ತೀತಿ ಪುತ್ತಸ್ಸ ಪಟಿಪತ್ತಿಅನುಮೋದನಂ ಕರೋನ್ತೀ. ಉಗ್ಗತಾತಿ ಏತ್ಥ ಕಲಲೇ ವಟ್ಟದುಕ್ಖೇ ನಿಮುಜ್ಜಮಾನಾ ತತೋ ಸೀಸಂ ಉಕ್ಖಿಪಿತುಂ ಅಸಕ್ಕೋನ್ತಿ ಅಜ್ಜ ಬುದ್ಧಾನುಭಾವೇನ ಪಞ್ಞಾಸೀಸಂ ಉಕ್ಖಿಪಿತಾ ಉಗ್ಗತಾ. ಪುನ ವಿನಿಪಾತಾಭಾವತೋ ಸಮ್ಮದೇವ ಉಗ್ಗತತ್ತಾ ಸಮುಗ್ಗತಾ. ತಥಾಭೂತಾ ಸಾಸನೇಪಿ ಉಗ್ಗತಾ ಸಮುಗ್ಗತಾ ಜಾತಾ. ಚತುಸಚ್ಚಪಟಿವೇಧಭಾವನ್ತಿ ಚತುಸಚ್ಚಪಟಿವೇಧಸ್ಸ ಅತ್ಥಿಭಾವಂ. ಕಣ್ಡುಕಚ್ಛುಆದೀತಿ ಆದಿ-ಸದ್ದೇನ ಜೇಗುಚ್ಛಅಸಾತಾದಿಂ ಸಙ್ಗಣ್ಹಾತಿ. ದಿಬ್ಬಸಮ್ಪತ್ತಿಂ ಪಟಿಲಭತಿ ಪವತ್ತಿಯಂ ಸಮ್ಪತ್ತಿದಾಯಿನೋ ಕಮ್ಮಸ್ಸ ಕತೋಕಾಸತ್ತಾ. ತುಣ್ಹೀ ಉತ್ತರಿಕೇ ಹೋಹೀತಿ ಮಾತು-ವಚನಂ ಸಮ್ಪಟಿಚ್ಛಿತ್ವಾ ತಸ್ಸ ವಿಸೇಸಾಧಿಗಮಸ್ಸ ಅವಿಬನ್ಧಕರಣಸಮ್ಮಾಪಯೋಗೇನ ಯಥಾಲದ್ಧವಿಸೇಸಾಯ ಮಾತುಯಾ ವಸೇನ ಯಸ್ಮಾ ಧೀತಾ ದಿಟ್ಠಧಮ್ಮಿಕಸಮ್ಪತ್ತಿಲಾಭೀ, ತಸ್ಮಾ ವುತ್ತಂ ‘‘ಮಾತು ಆನುಭಾವೇನೇವಾ’’ತಿ.

ಪುನಬ್ಬಸುಸುತ್ತವಣ್ಣನಾ ನಿಟ್ಠಿತಾ.