೩. ಅಸ್ಸಲಾಯನಸುತ್ತವಣ್ಣನಾ

೪೦೧. ಅಞ್ಞಮಞ್ಞವಿಸಿಟ್ಠತ್ತಾ ವಿಸದಿಸಂ ರಜ್ಜಂ ವಿರಜ್ಜಂ, ವಿರಜ್ಜತೋ ಆಗತಾ, ತತ್ಥ ಜಾತಾತಿ ವಾ ವೇರಜ್ಜಕಾ, ಏವಂ ಜಾತಾ ಖೋ ಪನ ತೇ, ಯಸ್ಮಾ ವತ್ಥಾಭರಣಾದಿವಿಭಾಗೇನ ನಾನಪ್ಪಕಾರಾ ಹೋನ್ತಿ, ತಸ್ಮಾ ವುತ್ತಂ ‘‘ನಾನಾವೇರಜ್ಜಕಾನ’’ನ್ತಿ. ಅಟ್ಠಕಥಾಯಂ ಪನ ವೇರಜ್ಜಸ್ಸೇವ ವಸೇನ ನಾನಪ್ಪಕಾರತಾ ವುತ್ತಾ. ಯಞ್ಞುಪಾಸನಾದಿನಾತಿ ಯಞ್ಞಾನುಭವನಮನ್ತಜ್ಝೇನದಕ್ಖಿಣಪರಿಯೇಸನಾದಿನಾ. ಚತುವಣ್ಣಸಾಧಾರಣನ್ತಿ ಖತ್ತಿಯಾದೀನಂ ಚತುನ್ನಂ ವಣ್ಣಾನಂ ಸಾಧಾರಣಂ ಸಂಸಾರಸುದ್ಧಿಪಾಪತಸ್ಸನಂ. ನ್ಹಾನಸುದ್ಧಿಯಾತಿ ತಿತ್ಥಸಮುದ್ದಖಾತೇಸು ಮನ್ತಜಪ್ಪನಪುಬ್ಬಕಂ ಸಾಯಂತತಿಯಉದಕೋರೋಹನಾದಿನ್ಹಾನಸುದ್ಧಿಯಾ. ಭಾವನಾಸುದ್ಧಿಯಾತಿ ಪರಮಜೋತಿಭೂತಾಯ ಪುರಿಸಭಾವನಾಸಙ್ಖಾತಾಯ ಸುದ್ಧಿಯಾ. ವಾಪಿತಸಿರೋತಿ ಓರೋಪಿತಕೇಸೋ. ತಮೇವ ಹಿ ಸಿರೋ ವಾಪಿತನ್ತಿ ವುಚ್ಚತಿ.

ಸಭಾವವಾದೀತಿ ಯಥಾಭೂತವಾದೀ. ಪಬ್ಬಜನ್ತಾತಿ ಬ್ರಾಹ್ಮಣಪಬ್ಬಜ್ಜಂ ಉಪಗಚ್ಛನ್ತಾ, ತಸ್ಮಾ ಬ್ರಾಹ್ಮಣಾನಂ ಪಬ್ಬಜ್ಜಾವಿಧಾನಂ ಸಿಕ್ಖನ್ತೇನ ಭೋತಾ ‘‘ಬ್ರಾಹ್ಮಣಾವ ಸುಜ್ಝನ್ತಿ, ನೋ ಅಬ್ರಾಹ್ಮಣಾ’’ತಿ ಅಯಂ ವಿಧಿ ಸಹೇತುಕೋ ಸಉಪಾದಾನೋ ಸಕ್ಕಚ್ಚಂ ಉಗ್ಗಹಿತೋ, ತಸ್ಮಾ ತುಯ್ಹಂ ಪರಾಜಯೋ ನತ್ಥಿ…ಪೇ… ಏವಮಾಹಂಸು.

೪೦೨. ಲದ್ಧಿಭಿನ್ದನತ್ಥನ್ತಿ ‘‘ಬ್ರಾಹ್ಮಣಾವ ಬ್ರಹ್ಮುನೋ ಪುತ್ತಾ ಓರಸಾ ಮುಖತೋ ಜಾತಾ ಬ್ರಹ್ಮಜಾ’’ತಿ ಏವಂ ಪವತ್ತಲದ್ಧಿಯಾ ವಿನಿವೇಠನತ್ಥಂ. ಪುತ್ತಪಟಿಲಾಭತ್ಥಾಯಾತಿ ‘‘ಏವಂ ಮಯಂ ಪೇತ್ತಿಕಂ ಇಣಧಾರಂ ಸೋಧೇಯ್ಯಾಮಾ’’ತಿ ಲದ್ಧಿಯಂ ಠತ್ವಾ ಪುತ್ತಪಟಿಲಾಭತ್ಥಾಯ. ಅಯಞ್ಹೇತ್ಥ ಅಧಮ್ಮಿಕಾನಂ ಬ್ರಾಹ್ಮಣಾನಂ ಅಜ್ಝಾಸಯೋ. ನೇಸನ್ತಿ ಬ್ರಾಹ್ಮಣಾನಂ. ಸಚ್ಚವಚನಂ ಸಿಯಾತಿ ‘‘ಬ್ರಹ್ಮುನೋ ಪುತ್ತಾ’’ತಿಆದಿವಚನಂ ಸಚ್ಚಂ ಯದಿ ಸಿಯಾ ಬ್ರಾಹ್ಮಣೀನಂ…ಪೇ… ಭವೇಯ್ಯ, ನ ಚೇತಂ ಅತ್ಥಿ. ಮಹಾಬ್ರಹ್ಮುನೋ ಮುಖತೋ ಜಾತೋತಿ ವಾದಚ್ಛೇದಕವಾದೋ ಮುಖತೋಜಾತಚ್ಛೇಕವಾದೋ. ಅಸ್ಸಲಾಯನೋವಿಞ್ಞೂ ಜಾತಿಕೋ ‘‘ನಿರಕ್ಖೇಪಂ ಸಮಣೇನ ಗೋತಮೇನ ವುತ್ತ’’ನ್ತಿ ಜಾನನ್ತೋಪಿ ಸಹಗತಾನಂ ಬ್ರಾಹ್ಮಣಾನಂ ಚಿತ್ತಾನುರಕ್ಖಣತ್ಥಂ ‘‘ಕಿಞ್ಚಾಪಿ ಭವಂ ಗೋತಮೋ’’ತಿಆದಿಮಾಹ.

೪೦೩. ಇದಾನಿ ಬ್ರಾಹ್ಮಣೋವ ಸೇಟ್ಠೋ ವಣ್ಣೋತಿ ವಾದಂ ಭಿನ್ದಿತುಂ ‘‘ಸುತಂ ತೇ ಯೋನಕಕಮ್ಬೋಜೇಸೂ’’ತಿಆದಿ ಆರದ್ಧಂ. ಯದಿ ಬ್ರಾಹ್ಮಣೋವ ಸೇಟ್ಠೋ ವಣ್ಣೋ, ಸಬ್ಬತ್ಥ ಬ್ರಾಹ್ಮಣೋವ ಸೇಟ್ಠೋ ಭವೇಯ್ಯ, ಅಥ ಕಸ್ಮಾ ಯೋನಕಕಮ್ಬೋಜಾದಿಜನಪದೇಸು ಬ್ರಾಹ್ಮಣಾನಂ ಸೇಟ್ಠಭಾವೋ ನತ್ಥಿ? ಏವಞ್ಹಿ ತತ್ಥ ವಣ್ಣಾ, ತಸ್ಮಾ ‘‘ಬ್ರಾಹ್ಮಣೋವ ಸೇಟ್ಠೋ’’ತಿ ಲದ್ಧಿಮತ್ತಮೇತಂ. ತೇಸು ಹಿ ಜನಪದೇಸು ಜನಾ ಏಕಜ್ಝಂ ಸನ್ನಿಪತಿತ್ವಾ ಸಮ್ಮನ್ತಯಿತ್ವಾ ಕತಿಕಂ ಅಕಂಸು, ದಾಸಂ ಸಾಮಿಕಂ ಕತ್ವಾ ಇತರೇ ಸಬ್ಬೇ ತಂ ಪೂಜೇತ್ವಾ ತಸ್ಸ ವಸೇ ವತ್ತನ್ತಿ, ಯೋ ತೇಸಂ ಅಯ್ಯೋ ಹೋತಿ ಇತರೇ ಸಬ್ಬೇ ತಸ್ಸ ದಾಸಾ ಹೋನ್ತಿ, ತೇ ಕತಿಪಯಸಂವಚ್ಛರಾತಿಕ್ಕಮೇನ ತಸ್ಸ ಕಿಞ್ಚಿ ದೋಸಂ ದಿಸ್ವಾ ತಂ ತತೋ ಠಾನತೋ ಅಪನೇತ್ವಾ ಅಞ್ಞಂ ಠಪೇನ್ತಿ, ಇತಿ ಸೋ ಅಯ್ಯೋ ಹುತ್ವಾ ದಾಸೋ ಹೋತಿ, ಇತರೋ ದಾಸೋ ಹುತ್ವಾ ಅಯ್ಯೋ ಹೋತಿ, ಏವಂ ತಾವ ಕೇಚಿ ‘‘ಅಯ್ಯೋ ಹುತ್ವಾ ದಾಸೋ ಹೋತಿ, ದಾಸೋ ಹುತ್ವಾ ಅಯ್ಯೋ ಹೋತೀ’’ತಿ ಏತ್ಥ ಅತ್ಥಂ ವದನ್ತಿ. ಅಟ್ಠಕಥಾಯಂ ಪನ ಪುರಿಮವಸೇನೇವ ತಮತ್ಥಂ ದಸ್ಸೇತುಂ ‘‘ಬ್ರಾಹ್ಮಣೋ ಸಭರಿಯೋ’’ತಿಆದಿ ವುತ್ತಂ. ವಯಪ್ಪತ್ತೇ ಪುತ್ತೇ ಅಸತೀತಿ ಇದಂ ವಕ್ಖಮಾನಸ್ಸ ದಾರಕಸ್ಸ ದಾಯಜ್ಜಸಾಮಿಕಭಾವಸ್ಸ ತಾವ ದಸ್ಸನಂ. ಮಾತಿತೋ ಸುದ್ಧೋತಿ ಏತ್ಥ ಯೋ ಮಾತಿತೋ ಸುದ್ಧತ್ತಾ ಅಯ್ಯೋ, ಪಿತಿತೋ ಅಸುದ್ಧತ್ತಾ ದಾಸೋ ಹೋತಿ, ಸೋ ಏವ ಪಿತಿತೋ ಅಸುದ್ಧತ್ತಾ ದಾಸೋ ಹುತ್ವಾ ಮಾತಿತೋ ಅಯ್ಯೋ ಹೋತೀತಿ ಜಾತಿಂ ಸಮ್ಭೇದೇತಿ. ಸೋವ ಸಬ್ಬೇನ ಸಬ್ಬಂ ಹೋತೀತಿ ನ ಸಕ್ಕಾ ವತ್ತುನ್ತಿ ಅಪರೇ. ಕೋ ಥಾಮೋತಿ ಮಹನ್ತೇ ಲೋಕಸನ್ನಿವಾಸೇ ಅನಮತಗ್ಗೇ ಅತೀತೇ ಕಾಲೇ ಇತ್ಥೀನಂ ವಾ ಚಿತ್ತೇ ಅನವಟ್ಠಿತೇ ದಾಸಾ ದಾಸಾ ಏವ ಹೋನ್ತಿ, ಅಯ್ಯಾ ಅಯ್ಯಾ ಏವ ಹೋನ್ತೀತಿ ಏತ್ಥ ಕೋ ಏಕನ್ತಿಕೋ ಸಹೇತುಕೋ ಅವಸ್ಸಯೋ, ತಸ್ಸ ಸಾಧಕೋ ಸಿದ್ಧನ್ತೋ, ಕಿಂ ನಿದಸ್ಸನನ್ತಿ ಅತ್ಥೋ.

೪೦೪. ಸುಕ್ಕಚ್ಛೇದಕವಾದೋ ನಾಮಾತಿ ‘‘ಬ್ರಾಹ್ಮಣೋವ ಸುಕ್ಕೋ ವಣ್ಣೋ’’ತಿ ಏವಂ ವುತ್ತೋ ಸುಕ್ಕಚ್ಛೇದಕವಾರೋ ನಾಮ.

೪೦೮. ಸಬ್ಬಸ್ಮಿಂ ಅಗ್ಗಿಕಿಚ್ಚಂ ಕರೋನ್ತೇತಿ ಏತೇನ ಯಥಾ ಯತೋ ಕುತೋಚಿ ನಿಸ್ಸಯತೋ ಉಪ್ಪನ್ನೋ ಅಗ್ಗಿಉಪಾದಾನಸಮ್ಪನ್ನೋ ಅಗ್ಗಿಕಿಚ್ಚಂ ಕರೋತಿ, ಏವಂ ಯಸ್ಮಿಂ ಕಸ್ಮಿಞ್ಚಿ ದಾಸಕುಲೇ ಜಾತೋ ಉಪನಿಸ್ಸಯಸಮ್ಪನ್ನೋ ಸಮ್ಮಾಪಟಿಪಜ್ಜಮಾನೋ ಸಂಸಾರತೋ ಸುಜ್ಝತಿ ಏವಾತಿ ದಸ್ಸೇತಿ.

೪೦೯. ಪಾದಸಿಕವಣ್ಣೋತಿ ಅನ್ತರಾಳವಣ್ಣೋ. ಏತೇಸನ್ತಿ ಖತ್ತಿಯಕುಮಾರೇನ ಬ್ರಾಹ್ಮಣಕಞ್ಞಾಯ ಉಪ್ಪನ್ನಪುತ್ತೋ, ಬ್ರಾಹ್ಮಣಕುಮಾರೇನ ಖತ್ತಿಯಕಞ್ಞಾಯ ಉಪ್ಪನ್ನಪುತ್ತೋತಿ ಏತೇಸಂ ದ್ವಿನ್ನಂ ಮಾಣವಕಾನಂ. ಮತಕಭತ್ತೇತಿ ಮತೇ ಉದ್ದಿಸ್ಸ ಕತಭತ್ತೇ. ಥಾಲಿಪಾಕೇತಿ ಕತಮಙ್ಗಲಭತ್ತೇ.

೪೧೦. ತುಮ್ಹೇತಿ ಜಾತಿಸಾಮಞ್ಞತೋ ಮಾಣವಂ ಬ್ರಾಹ್ಮಣೇಹಿ ಸದ್ಧಿಂ ಏಕಜ್ಝಂ ಸಙ್ಗಣ್ಹನ್ತೋ ಆಹ. ಕೋ ನು ಖೋತಿ ಅವಂಸಿರೋ ಇಸಿವಾದೋ, ತೇಸಂ ಬ್ರಾಹ್ಮಣೀಸೀನಂ ಅಸಾಮತ್ಥಿಯದಸ್ಸನೇನ ಜಾತಿಯಾ ಅಪ್ಪಮಾಣತಂ ವಿಭಾವೇತುಂ ಗಾಮದಾರಕವೇಸೇನ ಉಪಗಚ್ಛಿ. ತೇನ ವುತ್ತಂ ‘‘ಗಾಮಣ್ಡಲರೂಪೋ ವಿಯಾ’’ತಿ. ಕೋಣ್ಡದಮಕೋತಿ ಅದನ್ತದಮಕೋ.

೪೧೧. ಜನೇತೀತಿ ಜನಿಕಾ ಜನೇತ್ತಿ. ಜನಕೋ ಪಿತಾತಿ ಏತ್ಥಾಪಿ ಏಸೇವ ನಯೋ. ಗನ್ಧಬ್ಬಪಞ್ಹನ್ತಿ ಗನ್ಧಬ್ಬಸ್ಸ ಮಾತುಕುಚ್ಛಿಯಂ ಉಪ್ಪಜ್ಜನಕಸತ್ತಸ್ಸ ಖತ್ತಿಯಭಾವಾದಿಪುಚ್ಛಂ. ದಬ್ಬಿಗಹಣಸಿಪ್ಪಮ್ಪಿ ಏಕಾ ವಿಜ್ಜಾ ವೇದಿತಬ್ಬಾ. ತತ್ಥ ಕಿರ ಕುಸಲೋ ಯಂ ಕಿಞ್ಚಿ ಆಹಾರೂಪಗಪಣ್ಣಪುಪ್ಫಫಲಬೀಜಂ ಅನ್ತಮಸೋ ಏಲಾಲುಕಮ್ಪಿ ಗಹೇತ್ವಾ ಭೇಸಜ್ಜೇಹಿ ಯೋಜೇತ್ವಾ ಪಚನ್ತೋ ಸಪ್ಪಿಮಧುಫಾಣಿತೇಹಿ ಸಮಾನರಸಂ ಕತ್ವಾ ಸಮ್ಪಾದೇತುಂ ಸಕ್ಕೋತಿ, ಪುಣ್ಣೋಪಿ ತಾದಿಸೋ, ತೇನ ಞಾತಂ ತ್ವಂ ದಬ್ಬಿಗಹಣಸಿಪ್ಪಮತ್ತಮ್ಪಿ ನ ಜಾನಾಸೀತಿ ಸಮ್ಬನ್ಧೋ. ಸದ್ಧೋತಿ ಕಮ್ಮಫಲಸದ್ಧಾಯ ಸದ್ಧೋ, ಪೋಥುಜ್ಜನಿಕೇನೇವ ರತನತ್ತಯಪಸಾದೇನ ಪಸನ್ನೋ. ತೇನೇವಾಹ – ‘‘ಉಪಾಸಕಂ ಮಂ ಭವಂ…ಪೇ… ಸರಣಂ ಗತ’’ನ್ತಿ.

ಅಸ್ಸಲಾಯನಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.