೩. ಚೀವರಪರಿವತ್ತನಸಿಕ್ಖಾಪದವಣ್ಣನಾ

ತತಿಯೇ ಹನ್ದಾತಿ ಗಣ್ಹ. ಅಚ್ಛಿನ್ದೇಯ್ಯಾತಿ ಸಯಂ ಅಚ್ಛಿನ್ದನ್ತಿಯಾ ಬನ್ಧಿತ್ವಾ ಠಪಿತೇಸು ಬಹೂಸುಪಿ ಏಕಾಪತ್ತಿ, ಇತರೇಸು ವತ್ಥುಗಣನಾಯ ಆಪತ್ತಿಯೋ. ಅಚ್ಛಿನ್ದಾಪನೇ ಪನ ಏಕಾಯ ಆಣತ್ತಿಯಾ ಬಹೂಸು ಅಚ್ಛಿನ್ನೇಸುಪಿ ಏಕಾವಾಪತ್ತಿ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಚೀವರಂ ಪರಿವತ್ತೇತ್ವಾ ಅಚ್ಛಿನ್ದನವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಂ, ತಿಕಪಾಚಿತ್ತಿಯಂ, ಅಞ್ಞಸ್ಮಿಂ ಪರಿಕ್ಖಾರೇ ತಿಕದುಕ್ಕಟಂ, ಅನುಪಸಮ್ಪನ್ನಾಯ ಚೀವರೇಪಿ ತಿಕದುಕ್ಕಟಮೇವ. ಯಾ ಪನ ತಾಯ ವಾ ದಿಯ್ಯಮಾನಂ, ತಸ್ಸಾ ವಾ ವಿಸ್ಸಾಸಂ ಗಣ್ಹಾತಿ, ತಸ್ಸಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಉಪಸಮ್ಪನ್ನತಾ, ಪರಿವತ್ತಿತಚೀವರಸ್ಸ ವಿಕಪ್ಪನುಪಗತಾ, ಸಕಸಞ್ಞಾಯ ಅಚ್ಛಿನ್ದನಂ ವಾ ಅಚ್ಛಿನ್ದಾಪನಂ ವಾತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ದುಕ್ಖವೇದನನ್ತಿ.

ಚೀವರಪರಿವತ್ತನಸಿಕ್ಖಾಪದವಣ್ಣನಾ ನಿಟ್ಠಿತಾ.