೧. ಪತ್ತಸನ್ನಿಚಯಸಿಕ್ಖಾಪದವಣ್ಣನಾ

ನಿಸ್ಸಗ್ಗಿಯೇಸು ಆದಿವಗ್ಗಸ್ಸ ತಾವ ಪಠಮೇ ಪತ್ತಸನ್ನಿಚಯಂ ಕರೇಯ್ಯಾತಿ ಪತ್ತಸನ್ನಿಧಿಂ ಕರೇಯ್ಯ, ಏಕಾಹಂ ಅನಧಿಟ್ಠಹಿತ್ವಾ ವಾ ಅವಿಕಪ್ಪೇತ್ವಾ ವಾ ಅಧಿಟ್ಠಾನುಪಗಂ ಪತ್ತಂ ಠಪೇಯ್ಯಾತಿ ಅತ್ಥೋ.

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪತ್ತಸನ್ನಿಚಯವತ್ಥುಸ್ಮಿಂ ಪಞ್ಞತ್ತಂ, ಸೇಸಕಥಾಮಗ್ಗೋ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯೇನೇವ ವೇದಿತಬ್ಬೋ, ತತ್ರ ಹಿ ದಸಾಹಾತಿಕ್ಕಮೇ ಆಪತ್ತಿ, ಇಧ ಏಕಾಹಾತಿಕ್ಕಮೇತಿ ಏತ್ತಕಮೇವ ತಸ್ಸ ಚ ಇಮಸ್ಸ ಚ ನಾನಾಕರಣಂ, ಸೇಸಂ ತಾದಿಸಮೇವಾತಿ.

ಪತ್ತಸನ್ನಿಚಯಸಿಕ್ಖಾಪದವಣ್ಣನಾ ನಿಟ್ಠಿತಾ.