೧೩-೧೪. ಉಚ್ಚಸದ್ದಸಿಕ್ಖಾಪದವಣ್ಣನಾ

ತೇರಸಮೇ ಅಪ್ಪಸದ್ದೋತಿ ನ ಉಚ್ಚಾಸದ್ದಮಹಾಸದ್ದೋ ಹುತ್ವಾ. ಚುದ್ದಸಮೇಪಿ ಏಸೇವ ನಯೋ. ಅಯಂ ಪನೇತ್ಥ ಅಪ್ಪಸದ್ದತಾಪರಿಚ್ಛೇದೋ – ಸಚೇ ದ್ವಾದಸಹತ್ಥೇ ಗೇಹೇ ಆದಿಮ್ಹಿ ಸಙ್ಘತ್ಥೇರೋ, ಮಜ್ಝೇ ದುತಿಯತ್ಥೇರೋ, ಅನ್ತೇ ತತಿಯತ್ಥೇರೋತಿ ಏವಂ ನಿಸಿನ್ನೇಸು ಯಂ ಸಙ್ಘತ್ಥೇರೋ ದುತಿಯತ್ಥೇರೇನ ಸದ್ಧಿಂ ಮನ್ತೇತಿ, ದುತಿಯತ್ಥೇರೋ ಚ ತಸ್ಸ ಸದ್ದಂ ಸುಣಾತಿ, ಕಥಞ್ಚ ವವತ್ಥಪೇತಿ. ತತಿಯತ್ಥೇರೋ ಪನ ಸದ್ದಮೇವ ಸುಣಾತಿ, ಕಥಂ ನ ವವತ್ಥಪೇತಿ, ಏತ್ತಾವತಾ ಅಪ್ಪಸದ್ದೋ ಹೋತಿ. ಸಚೇ ಪನ ತತಿಯತ್ಥೇರೋ ಕಥಞ್ಚ ವವತ್ಥಪೇತಿ, ಮಹಾಸದ್ದೋ ನಾಮ ಹೋತಿ.

೧೫…ಪೇ…೨೦. ಕಾಯಪ್ಪಚಾಲಕಾದಿಸಿಕ್ಖಾಪದವಣ್ಣನಾ

ಇತೋ ಪರೇಸು ಛಸು ಕಾಯಪ್ಪಚಾಲಕನ್ತಿ ಕಾಯಂ ಚಾಲೇತ್ವಾ ಚಾಲೇತ್ವಾ, ಏಸ ನಯೋ ಸಬ್ಬತ್ಥ. ತಸ್ಮಾ ಕಾಯಾದೀನಿ ಪಗ್ಗಹೇತ್ವಾ ನಿಚ್ಚಲಾನಿ ಉಜುಕಾನಿ ಠಪೇತ್ವಾ ಗನ್ತಬ್ಬಞ್ಚೇವ ನಿಸೀದಿತಬ್ಬಞ್ಚ, ನಿಸೀದನಪ್ಪಟಿಸಂಯುತ್ತೇಸು ತೀಸು ವಾಸೂಪಗತಸ್ಸ ಅನಾಪತ್ತಿ.