೧೦. ಸುಭಸುತ್ತವಣ್ಣನಾ

ಸುಭಮಾಣವಕವತ್ಥುವಣ್ಣನಾ

೪೪೪. ‘‘ಅಚಿರಪರಿನಿಬ್ಬುತೇ’’ತಿ ಸತ್ಥು ಪರಿನಿಬ್ಬುತಭಾವಸ್ಸ ಚಿರಕಾಲತಾಪಟಿಕ್ಖೇಪೇನ ಆಸನ್ನತಾ ದಸ್ಸಿತಾ, ಕಾಲಪರಿಚ್ಛೇದೋ ನ ದಸ್ಸಿತೋತಿ ತಂ ಪರಿಚ್ಛೇದತೋ ದಸ್ಸೇತುಂ ‘‘ಪರಿನಿಬ್ಬಾನತೋ ಉದ್ಧಂ ಮಾಸಮತ್ತೇ ಕಾಲೇ’’ತಿ ವುತ್ತಂ. ತತ್ಥ ಮತ್ತ-ಗ್ಗಹಣೇನ ಕಾಲಸ್ಸ ಅಸಮ್ಪುಣ್ಣತಂ ಜೋತೇತಿ. ತುದಿಸಞ್ಞಿತೋ ಗಾಮೋ ನಿವಾಸೋ ಏತಸ್ಸಾತಿ ತೋದೇಯ್ಯೋ. ತಂ ಪನೇಸ ಯಸ್ಮಾ ಸೋಣದಣ್ಡೋ ವಿಯ ಚಮ್ಪಂ, ಕೂಟದನ್ತೋ ವಿಯ ಚ ಖಾಣುಮತಂ ಅಜ್ಝಾವಸತಿ, ತಸ್ಮಾ ವುತ್ತಂ ‘‘ತಸ್ಸ ಅಧಿಪತಿತ್ತಾ’’ತಿ ಇಸ್ಸರಭಾವತೋತಿ ಅತ್ಥೋ. ಸಮಾಹಾರನ್ತಿ ಸನ್ನಿಚಯಂ. ಪಣ್ಡಿತೋ ಘರಮಾವಸೇತಿ ಯಸ್ಮಾ ಅಪ್ಪತರಪ್ಪತರೇಪಿ ವಯಮಾನೇ ಭೋಗಾ ಖಿಯನ್ತಿ, ಅಪ್ಪತರಪ್ಪತರೇಪಿ ಸಞ್ಚಿಯಮಾನೇ ವಡ್ಢನ್ತಿ, ತಸ್ಮಾ ವಿಞ್ಞುಜಾತಿಕೋ ಕಿಞ್ಚಿ ವಯಂ ಅಕತ್ವಾ ಆಯಮೇವ ಉಪ್ಪಾದೇನ್ತೋ ಘರಾವಾಸಂ ಅನುತಿಟ್ಠೇಯ್ಯಾತಿ ಲೋಭಾದೇಸಿತಂ ಪಟಿಪತ್ತಿಂ ಉಪದಿಸತಿ.

ಅದಾನಮೇವ ಸಿಕ್ಖಾಪೇತ್ವಾ ಲೋಭಾಭಿಭೂತತಾಯ ತಸ್ಮಿಂಯೇವ ಘರೇ ಸುನಖೋ ಹುತ್ವಾ ನಿಬ್ಬತ್ತಿ. ಲೋಭವಸಿಕಸ್ಸ ಹಿ ದುಗ್ಗತಿ ಪಾಟಿಕಙ್ಖಾ. ಅತಿವಿಯ ಪಿಯಾಯತಿ ಪುಬ್ಬಪರಿಚಯೇನ. ಪಿಣ್ಡಾಯ ಪಾವಿಸಿ ಸುಭಂ ಮಾಣವಂ ಅನುಗ್ಗಣ್ಹಿತುಕಾಮೋ. ನಿರಯೇ ನಿಬ್ಬತ್ತಿಸ್ಸಸಿ ಕತೋಕಾಸಸ್ಸ ಕಮ್ಮಸ್ಸ ಪಟಿಬಾಹಿತುಂ ಅಸಕ್ಕುಣೇಯ್ಯಭಾವತೋ.

ಬ್ರಾಹ್ಮಣಚಾರಿತ್ತಸ್ಸ ಭಾವಿತತಂ ಸನ್ಧಾಯ, ತಥಾ ಪಿತರಂ ಉಕ್ಕಂಸೇನ್ತೋ ಚ ‘‘ಬ್ರಹ್ಮಲೋಕೇ ನಿಬ್ಬತ್ತೋ’’ತಿ ಆಹ. ತಂ ಪವತ್ತಿಂ ಪುಚ್ಛೀತಿ ಸುತಮೇತಂ ಮಯಾ ‘‘ಮಯ್ಹಂ ಪಿತಾ ಸುನಖೋ ಹುತ್ವಾ ನಿಬ್ಬತ್ತೋ’’ತಿ ತುಮ್ಹೇಹಿ ವುತ್ತಂ, ಕಿಮಿದಂ ಸಚ್ಚನ್ತಿ ಪುಚ್ಛಿ. ತಥೇವ ವತ್ವಾತಿ ಯಥಾ ಪುಬ್ಬೇ ಸುನಖಸ್ಸ ವುತ್ತಂ, ತಥೇವ ವತ್ವಾ. ಅವಿಸಂವಾದನತ್ಥನ್ತಿ ಸಚ್ಚಾಪನತ್ಥಂ ‘‘ತೋದೇಯ್ಯಬ್ರಾಹ್ಮಣೋ ಸುನಖೋ ಹುತ್ವಾ ನಿಬ್ಬತ್ತೋ’’ತಿ ಅತ್ತನೋ ವಚನಸ್ಸ ಅವಿಸಂವಾದನತ್ಥಂ ಅವಿಸಂವಾದಭಾವಸ್ಸ ದಸ್ಸನತ್ಥನ್ತಿ ಅತ್ಥೋ. ಸಬ್ಬಂ ದಸ್ಸೇಸೀತಿ ಬುದ್ಧಾನುಭಾವೇನ ಸೋ ಸುನಖೋ ತಂ ಸಬ್ಬಂ ನೇತ್ವಾ ದಸ್ಸೇಸಿ, ನ ಜಾತಿಸ್ಸರತಾಯ. ಭಗವನ್ತಂ ದಿಸ್ವಾ ಭುಕ್ಕರಣಂ ಪನ ಪುರಿಮಜಾತಿಸಿದ್ಧವಾಸನಾವಸೇನ. ಚುದ್ದಸ ಪಞ್ಹೇ ಪುಚ್ಛಿತ್ವಾತಿ ‘‘ದಿಸ್ಸನ್ತಿ ಹಿ ಭೋ ಗೋತಮ ಮನುಸ್ಸಾ ಅಪ್ಪಾಯುಕಾ, ದಿಸ್ಸನ್ತಿ ದೀಘಾಯುಕಾ. ದಿಸ್ಸನ್ತಿ ಬವ್ಹಾಬಾಧಾ, ದಿಸ್ಸನ್ತಿ ಅಪ್ಪಾಬಾಧಾ. ದಿಸ್ಸನ್ತಿ ದುಬ್ಬಣ್ಣಾ, ದಿಸ್ಸನ್ತಿ ವಣ್ಣವನ್ತೋ. ದಿಸ್ಸನ್ತಿ ಅಪ್ಪೇಸಕ್ಖಾ, ದಿಸ್ಸನ್ತಿ ಮಹೇಸಕ್ಖಾ. ದಿಸ್ಸನ್ತಿ ಅಪ್ಪಭೋಗಾ, ದಿಸ್ಸನ್ತಿ ಮಹಾಭೋಗಾ. ದಿಸ್ಸನ್ತಿ ನೀಚಕುಲೀನಾ, ದಿಸ್ಸನ್ತಿ ಉಚ್ಚಾಕುಲೀನಾ. ದಿಸ್ಸನ್ತಿ ದುಪ್ಪಞ್ಞಾ, ದಿಸ್ಸನ್ತಿ ಪಞ್ಞಾವನ್ತೋ’’ತಿ (ಮ. ನಿ. ೩.೨೮೯). ಇಮೇ ಚುದ್ದಸ ಪಞ್ಹೇ ಪುಚ್ಛಿತ್ವಾ, ಅಙ್ಗಸುಭತಾಯ ಕಿರೇಸ ‘‘ಸುಭೋ’’ತಿ ನಾಮಂ ಲಭಿ.

೪೪೫. ‘‘ಏಕಾ ಚ ಮೇ ಕಙ್ಖಾ ಅತ್ಥೀ’’ತಿ ಇಮಿನಾ ಉಪರಿ ಪುಚ್ಛಿಯಮಾನಸ್ಸ ಪಞ್ಹಸ್ಸ ಪಗೇವ ತೇನ ಅಭಿಸಙ್ಖತಭಾವಂ ದಸ್ಸೇತಿ. ವಿಸಭಾಗವೇದನಾತಿ ದುಕ್ಖವೇದನಾ. ಸಾ ಹಿ ಕುಸಲಕಮ್ಮನಿಬ್ಬತ್ತೇ ಅತ್ತಭಾವೇ ಉಪ್ಪಜ್ಜನಕಸುಖವೇದನಾಪಟಿಪಕ್ಖಭಾವತೋ ‘‘ವಿಸಭಾಗವೇದನಾ’’ತಿ. ಕಾಯಂ ಗಾಳ್ಹಾ ಹುತ್ವಾ ಬಾಧತಿ ಪೀಳೇತೀತಿ ‘‘ಆಬಾಧೋ’’ತಿ ಚ ವುಚ್ಚತಿ. ಏಕದೇಸೇ ಉಪ್ಪಜ್ಜಿತ್ವಾತಿ ಸರೀರಸ್ಸ ಏಕದೇಸೇ ಉಟ್ಠಿತಾಪಿ ಅಯಪಟ್ಟೇನ ಆಬನ್ಧಿತ್ವಾ ವಿಯ ಗಣ್ಹಾತಿ ಅಪರಿವತ್ತಭಾವಕರಣತೋ, ಏತೇನ ಬಲವರೋಗೋ ಆಬಾಧೋ ನಾಮಾತಿ ದಸ್ಸೇತಿ. ಕಿಚ್ಛಜೀವಿತಕರೋತಿ ಅಸುಖಜೀವಿತಾವಹೋ, ಏತೇನ ದುಬ್ಬಲೋ ಅಪ್ಪಮತ್ತಕೋ ರೋಗೋ ಆತಙ್ಕೋತಿ ದಸ್ಸೇತಿ. ಉಟ್ಠಾನನ್ತಿ ಸಯನನಿಸಜ್ಜಾದಿತೋ ಉಟ್ಠಹನಂ, ತೇನ ಯಥಾ ತಥಾ ಅಪರಾಪರಂ ಸರೀರಸ್ಸ ಪರಿವತ್ತನಂ ವದತಿ. ಗರುಕನ್ತಿ ಭಾರಿಯಂ ಕಿಚ್ಛಸಿದ್ಧಿಕಂ. ಕಾಯೇ ಬಲಂ ನ ಹೋತೀತಿ ಏತ್ಥಾಪಿ ‘‘ಗಿಲಾನಸ್ಸೇವಾ’’ತಿ ಪದಂ ಆನೇತ್ವಾ ಸಮ್ಬನ್ಧಿತಬ್ಬಂ. ಹೇಟ್ಠಾ ಚತೂಹಿ ಪದೇಹಿ ಅಫಾಸುವಿಹಾರಾಭಾವಂ ಪುಚ್ಛಿತ್ವಾ ಇದಾನಿ ಫಾಸುವಿಹಾರಸಬ್ಭಾವಂ ಪುಚ್ಛತಿ, ತೇನ ಸವಿಸೇಸೋ ಫಾಸುವಿಹಾರೋ ಪುಚ್ಛಿತೋತಿ ದಟ್ಠಬ್ಬೋ, ಅಸತಿಪಿ ಅತಿಸಯತ್ಥಜೋತನೇ ಸದ್ದೇ ಅತಿಸಯತ್ಥಸ್ಸ ಲಬ್ಭನತೋ ಯಥಾ ‘‘ಅಭಿರೂಪಾಯ ದೇಯ್ಯಂ ದಾತಬ್ಬ’’ನ್ತಿ.

೪೪೭. ಕಾಲಞ್ಚ ಸಮಯಞ್ಚ ಉಪಾದಾಯಾತಿ. ಏತ್ಥ ಕಾಲೋ ನಾಮ ಉಪಸಙ್ಕಮನಸ್ಸ ಯುತ್ತಪತ್ತಕಾಲೋ. ಸಮಯೋ ನಾಮ ತಸ್ಸೇವ ಪಚ್ಚಯಸಾಮಗ್ಗೀ, ಅತ್ಥತೋ ತಜ್ಜಂ ಸರೀರಬಲಞ್ಚೇವ ತಪ್ಪಚ್ಚಯಪರಿಸ್ಸಯಾಭಾವೋ ಚ. ಉಪಾದಾನಂ ನಾಮ ಞಾಣೇನ ತೇಸಂ ಗಹಣಂ ಸಲ್ಲಕ್ಖಣನ್ತಿ ದಸ್ಸೇತುಂ ‘‘ಕಾಲಞ್ಚಾ’’ತಿಆದಿ ವುತ್ತಂ. ಫರಿಸ್ಸತೀತಿ ವಡ್ಢಿಸ್ಸತಿ.

೪೪೮. ಚೇತಿಯರಟ್ಠೇತಿ ಚೇತಿರಟ್ಠೇ. ಯ-ಕಾರೇನ ಹಿ ಪದಂ ವಡ್ಢೇತ್ವಾ ವುತ್ತಂ. ಚೇತಿರಟ್ಠತೋ ಅಞ್ಞಂ ವಿಸುಂಯೇವೇಕಂ ರಟ್ಠನ್ತಿ ಚ ವದನ್ತಿ. ಮರಣಪಟಿಸಂಯುತ್ತನ್ತಿ ಮರಣಂ ನಾಮ ತಾದಿಸಾನಂ ರೋಗ ವಸೇನೇವ ಹೋತೀತಿ ಯೇನ ರೋಗೇನ ತಂ ಜಾತಂ, ತಸ್ಸ ಸರೂಪಪುಚ್ಛಾ, ಕಾರಣಪುಚ್ಛಾ, ಮರಣಹೇತುಕಚಿತ್ತಸನ್ತಾಪಪುಚ್ಛಾ, ತಸ್ಸ ಚ ಸನ್ತಾಪಸ್ಸ ಸಬ್ಬಲೋಕಸಾಧಾರಣತಾ, ತಥಾ ಮರಣಸ್ಸ ಚ ಅಪ್ಪತಿಕಾರತಾತಿ ಏವಂ ಆದಿನಾ ಮರಣಪಟಿಸಂಯುತ್ತಂ ಸಮ್ಮೋದನೀಯಂ ಕಥಂ ಕಥೇಸೀತಿ ದಸ್ಸೇತುಂ ‘‘ಭೋ ಆನನ್ದಾ’’ತಿಆದಿ ವುತ್ತಂ. ನ ರನ್ಧಗವೇಸೀ ಮಾರೋ ವಿಯ, ನ ವೀಮಂಸನಾಧಿಪ್ಪಾಯೋ ಉತ್ತರಮಾಣವೋ ವಿಯಾತಿ ಅಧಿಪ್ಪಾಯೋ. ಯೇಸು ಧಮ್ಮೇಸೂತಿ ವಿಮೋಕ್ಖುಪಾಯೇಸು ನಿಯ್ಯಾನಧಮ್ಮೇಸು. ಧರನ್ತೀತಿ ತಿಟ್ಠನ್ತಿ, ಪವತ್ತನ್ತೀತಿ ಅತ್ಥೋ.

೪೪೯. ಅತ್ಥಪ್ಪಯುತ್ತತಾಯ ಸದ್ದಪಯೋಗಸ್ಸ ಸದ್ದಪ್ಪಬನ್ಧಲಕ್ಖಣಾನಿ ತೀಣಿ ಪಿಟಕಾನಿ ತದತ್ಥಭೂತೇಹಿ ಸೀಲಾದೀಹಿ ಧಮ್ಮಕ್ಖನ್ಧೇಹಿ ಸಙ್ಗಯ್ಹನ್ತೀತಿ ವುತ್ತಂ ‘‘ತೀಣಿ ಪಿಟಕಾನಿ ತೀಹಿ ಖನ್ಧೇಹಿ ಸಙ್ಗಹೇತ್ವಾ’’ತಿ. ಸಙ್ಖಿತ್ತೇನ ಕಥಿತನ್ತಿ ‘‘ತಿಣ್ಣಂ ಖನ್ಧಾನ’’ನ್ತಿ ಏವಂ ಗಹಣತೋ ಸಾಮಞ್ಞತೋ ಚಾತಿ ಸಙ್ಖೇಪೇನೇವ ಕಥಿತಂ. ‘‘ಕತಮೇಸಂ ತಿಣ್ಣ’’ನ್ತಿ ಅಯಂ ಅದಿಟ್ಠಜೋತನಾ ಪುಚ್ಛಾ, ನ ಕಥೇತುಕಮ್ಯತಾ ಪುಚ್ಛಾತಿ ವುತ್ತಂ ‘‘ವಿತ್ಥಾರತೋ ಪುಚ್ಛಿಸ್ಸಾಮೀ ‘ತಿ ಚಿನ್ತೇತ್ವಾ ‘ಕತಮೇಸಂ ತಿಣ್ಣ’ನ್ತಿ ಆಹಾ’’ತಿ. ಕಥೇತುಕಮ್ಯತಾಭಾವೇ ಪನಸ್ಸ ಥೇರಸ್ಸ ವಚನತಾ ಸಿಯಾ.

ಸೀಲಕ್ಖನ್ಧವಣ್ಣನಾ

೪೫೦-೪೫೩. ಸೀಲಕ್ಖನ್ಧಸ್ಸಾತಿ ಏತ್ಥ ಇತಿ-ಸದ್ದೋ ಆದಿಅತ್ಥೋ, ಪಕಾರತ್ಥೋ ವಾ, ತೇನ ‘‘ಅರಿಯಸ್ಸ ಸಮಾಧಿಕ್ಖನ್ಧಸ್ಸ…ಪೇ… ಪತಿಟ್ಠಾಪೇಸೀ’’ತಿ ಅಯಂ ಏತ್ತಕೋ ಪಾಠೋ ದಸ್ಸಿತೋತಿ ದಟ್ಠಬ್ಬಂ ತೇನಾಹ ‘‘ತೇಸು ದಸ್ಸಿತೇಸೂ’’ತಿ, ಉದ್ದೇಸವಸೇನಾತಿ ಅಧಿಪ್ಪಾಯೋ. ಭಗವತಾ ವುತ್ತನಯೇನೇವಾತಿ ಸಾಮಞ್ಞಫಲದೇಸನಾದೀಸು ಭಗವತಾ ದೇಸಿತನಯೇನೇವ, ತೇನಸ್ಸ ಸುತ್ತಸ್ಸ ಸತ್ಥುಭಾಸಿತಭಾವಂ ಜಿನವಚನಭಾವಂ ದಸ್ಸೇತಿ. ಸಾಸನೇ ನ ಸೀಲಮೇವ ಸಾರೋತಿ ಅರಿಯಮಗ್ಗಸಾರೇ ಭಗವತೋ ಸಾಸನೇ ಯಥಾ ದಸ್ಸಿತಂ ಸೀಲಂ ಸಾರೋ ಏವ ನ ಹೋತಿ ಸಾರವತೋ ಮಹತೋ ರುಕ್ಖಸ್ಸ ಪಪಟಿಕಟ್ಠಾನಿಯತ್ತಾ. ಯದಿ ಏವಂ ಕಸ್ಮಾ ಇಧ ಗಹಿತನ್ತಿ ಆಹ ‘‘ಕೇವಲಞ್ಹೇತಂ ಪತಿಟ್ಠಾಮತ್ತಕಮೇವಾ’’ತಿ. ಝಾನಾದಿಉತ್ತರಿಮನುಸ್ಸಧಮ್ಮೇ ಅಧಿಗನ್ತುಕಾಮಸ್ಸ ಅಧಿಟ್ಠಾನಮತ್ತಂ ತತ್ಥ ಅಪ್ಪತಿಟ್ಠಿತಸ್ಸ ತೇಸಂ ಅಸಮ್ಭವತೋ. ಅಥ ವಾ ನ ಸೀಲಮೇವ ಸಾರೋತಿ ಕಾಮಞ್ಚೇತ್ಥ ಸಾಸನೇ ‘‘ಮಗ್ಗಸೀಲಂ, ಫಲಸೀಲ’’ನ್ತಿ ಇದಂ ಲೋಕುತ್ತರಸೀಲಮ್ಪಿ ಸಾರಮೇವ, ತಥಾಪಿ ನ ಸೀಲಕ್ಖನ್ಧೋ ಏವ ಸಾರೋ ಅಥ ಖೋ ಸಮಾಧಿಕ್ಖನ್ಧೋಪಿ ಪಞ್ಞಾಕ್ಖನ್ಧೋಪಿ ಸಾರೋ ಏವಾತಿ ಏವಮೇತ್ಥ ಅತ್ಥೋ ದಟ್ಠಬ್ಬೋ. ಪುರಿಮೋ ಏವ ಸಾರೋ, ತೇನಾಹ ‘‘ಇತೋ ಉತ್ತರೀ’’ತಿಆದಿ.

ಸಮಾಧಿಕ್ಖನ್ಧವಣ್ಣನಾ

೪೫೪. ಕಸ್ಮಾ ಪನೇತ್ಥ ಥೇರೋ ಸಮಾಧಿಕ್ಖನ್ಧಂ ಪುಟ್ಠೋ ಇನ್ದ್ರಿಯಸಂವರಾದಿಕೇ ವಿಸ್ಸಜ್ಜೇಸಿ, ನನು ಏವಂ ಸನ್ತೇ ಅಞ್ಞಂ ಪುಟ್ಠೋ ಅಞ್ಞಂ ಬ್ಯಾಕರೋನ್ತೋ ಅಮ್ಬಂ ಪುಟ್ಠೋ ಲಬುಜಂ ಬ್ಯಾಕರೋನ್ತೋ ವಿಯ ಹೋತೀತಿ ಈದಿಸೀ ಚೋದನಾ ಇಧ ಅನೋಕಾಸಾತಿ ದಸ್ಸೇನ್ತೋ ‘‘ಕಥಞ್ಚ ಮಾಣವ ಭಿಕ್ಖು…ಪೇ… ಸಮಾಧಿಕ್ಖನ್ಧಂ ದಸ್ಸೇತುಕಾಮೋ ಆರಭೀ’’ತಿ ಆಹ, ತೇನೇತ್ಥ ಇನ್ದ್ರಿಯಸಂವರಾದಯೋಪಿ ಸಮಾಧಿಉಪಕಾರತಂ ಉಪಾದಾಯ ಸಮಾಧಿಕ್ಖನ್ಧಪಕ್ಖಿಕಾನಿ ಉದ್ದಿಟ್ಠಾನೀತಿ ದಸ್ಸೇತಿ ರೂಪಜ್ಝಾನಾನೇವ ಆಗತಾನಿ, ನ ಅರೂಪಜ್ಝಾನಾನಿ ರೂಪಾವಚರಚತುತ್ಥಜ್ಝಾನದೇಸನಾನನ್ತರಂ ಅಭಿಞ್ಞಾದೇಸನಾಯ ಅವಸರೋತಿ ಕತ್ವಾ. ರೂಪಾವಚರಚತುತ್ಥಜ್ಝಾನಪಾದಿಕಾ ಹಿ ಸಪರಿಭಣ್ಡಾ ಛಪಿ ಅಭಿಞ್ಞಾಯೋ. ಲೋಕಿಯಾ ಅಭಿಞ್ಞಾ ಪನ ಸಿಜ್ಝಮಾನಾ ಯಸ್ಮಾ ಅಟ್ಠಸು ಸಮಾಪತ್ತೀಸು ಚುದ್ದಸವಿಧೇನ ಚಿತ್ತಪರಿದಮನೇನ ವಿನಾ ನ ಇಜ್ಝನ್ತಿ, ತಸ್ಮಾ ಅಭಿಞ್ಞಾಸು ದೇಸಿಯಮಾನಾಸು ಅರೂಪಜ್ಝಾನಾನಿಪಿ ದೇಸಿತಾನೇವ ಹೋನ್ತಿ ನಾನನ್ತರಿಯಭಾವತೋ, ತೇನಾಹ ‘‘ಆನೇತ್ವಾ ಪನ ದೀಪೇತಬ್ಬಾನೀ’’ತಿ. ವುತ್ತನಯೇನ ದೇಸಿತಾನೇವ ಕತ್ವಾ ಸಂವಣ್ಣಕೇಹಿ ಪಕಾಸೇತಬ್ಬಾನೀತಿ ಅತ್ಥೋ. ಅಟ್ಠಕಥಾಯಂ ಪನ ‘‘ಚತುತ್ಥಜ್ಝಾನಂ ಉಪಸಮ್ಪಜ್ಜ ವಿಹರತೀ’’ತಿ ಇಮಿನಾವ ಅರೂಪಜ್ಝಾನಮ್ಪಿ ಸಙ್ಗಹಿತನ್ತಿ ದಸ್ಸೇತುಂ ‘‘ಚತುತ್ಥಜ್ಝಾನೇನ ಹೀ’’ತಿಆದಿ ವುತ್ತಂ. ಚತುತ್ಥಜ್ಝಾನಞ್ಹಿ ರೂಪವಿರಾಗಭಾವನಾವಸೇನ ಪವತ್ತಂ ‘‘ಅರೂಪಜ್ಝಾನ’’ನ್ತಿ ವುಚ್ಚತೀತಿ.

೪೭೧-೪೮೦. ನ ಚಿತ್ತೇಕಗ್ಗತಾಮತ್ತಕೇನೇವಾತಿ ಏತ್ಥ ಹೇಟ್ಠಾ ವುತ್ತನಯಾನುಸಾರೇನ ಅತ್ಥೋ ವೇದಿತಬ್ಬೋ. ಲೋಕಿಯಸ್ಸ ಸಮಾಧಿಕ್ಖನ್ಧಸ್ಸ ಅಧಿಪ್ಪೇತತ್ತಾ ‘‘ನ ಚಿತ್ತೇ…ಪೇ… ಅತ್ಥೀ’’ತಿ ವುತ್ತಂ. ಅರಿಯ-ಸದ್ದೋ ಚೇತ್ಥ ಸುದ್ಧಪರಿಯಾಯೋ, ನ ಲೋಕುತ್ತರಪರಿಯಾಯೋ. ತಥಾ ಹೇಟ್ಠಾಪಿ ಲೋಕಿಯಾಭಿಞ್ಞಾಪಟಿಸಮ್ಭಿದಾಹಿ ವಿನಾವ ಅರಹತ್ತೇ ಅಧಿಗತೇ ನತ್ಥೇವ ಉತ್ತರಿಂಕರಣೀಯನ್ತಿ ಸಕ್ಕಾ ವತ್ತುಂ ಯದತ್ಥಂ ಭಗವತಿ ಬ್ರಹ್ಮಚರಿಯಂ ವುಸ್ಸತಿ, ತಸ್ಸ ಸಿದ್ಧತ್ತಾ. ಇಧ ಪನ ಲೋಕಿಯಾಭಿಞ್ಞಾಪಿ ಆಗತಾ ಏವ. ಸೇಸಂ ಸುವಿಞ್ಞೇಯ್ಯಮೇವ.

ಸುಭಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ.