೧೩. ಅಪ್ಪಮಞ್ಞಾವಿಭಙ್ಗೋ

೧. ಸುತ್ತನ್ತಭಾಜನೀಯವಣ್ಣನಾ

೬೪೨. ಸಬ್ಬಧೀತಿ ದಿಸಾದೇಸೋಧಿನಾ ಅನೋಧಿಸೋಫರಣಂ ವುತ್ತಂ, ಸಬ್ಬತ್ತತಾಯ ಸಬ್ಬಾವನ್ತನ್ತಿ ಸತ್ತೋಧಿನಾ. ತೇನಾಹ ‘‘ಅನೋಧಿಸೋ ದಸ್ಸನತ್ಥ’’ನ್ತಿ. ತಥಾ-ಸದ್ದೋ ಇತಿ-ಸದ್ದೋ ವಾ ನ ವುತ್ತೋತಿ ‘‘ಮೇತ್ತಾಸಹಗತೇನ ಚೇತಸಾ’’ತಿ ಏತಸ್ಸ ಅನುವತ್ತಕಂ ತಂ ದ್ವಯಂ ತಸ್ಸ ಫರಣನ್ತರಾದಿಟ್ಠಾನಂ ಅಟ್ಠಾನನ್ತಿ ಕತ್ವಾ ನ ವುತ್ತಂ, ಪುನ ‘‘ಮೇತ್ತಾಸಹಗತೇನ ಚೇತಸಾ’’ತಿ ವುತ್ತನ್ತಿ ಅತ್ಥೋ.

೬೪೩. ಹಿರೋತ್ತಪ್ಪಾನುಪಾಲಿತಾ ಮೇತ್ತಾ ನ ಪರಿಹಾಯತಿ ಆಸನ್ನಸಪತ್ತಸ್ಸ ರಾಗಸ್ಸ ಸಿನೇಹಸ್ಸ ಚ ವಿಪತ್ತಿಯಾ ಅನುಪ್ಪತ್ತಿತೋತಿ ಅಧಿಪ್ಪಾಯೋ.

೬೪೫. ಅಧಿಮುಞ್ಚಿತ್ವಾತಿ ಸುಟ್ಠು ಪಸಾರೇತ್ವಾತಿ ಅತ್ಥೋ. ತಂ ದಸ್ಸೇನ್ತೋ ‘‘ಅಧಿಕಭಾವೇನಾ’’ತಿಆದಿಮಾಹ, ಬಲವತಾ ವಾ ಅಧಿಮೋಕ್ಖೇನ ಅಧಿಮುಚ್ಚಿತ್ವಾ.

೬೪೮. ಹೇಟ್ಠಾ ವುತ್ತೋಯೇವಾತಿ ‘‘ಸಬ್ಬೇನ ಸಬ್ಬಂ ಸಬ್ಬಥಾ ಸಬ್ಬ’’ನ್ತಿ ಏತೇಸಂ ‘‘ಸಬ್ಬೇನ ಸಿಕ್ಖಾಸಮಾದಾನೇನ ಸಬ್ಬಂ ಸಿಕ್ಖಂ, ಸಬ್ಬೇನ ಸಿಕ್ಖಿತಬ್ಬಾಕಾರೇನ ಸಬ್ಬಂ ಸಿಕ್ಖ’’ನ್ತಿ ಚ ಝಾನವಿಭಙ್ಗೇ (ವಿಭ. ಅಟ್ಠ. ೫೧೬) ಅತ್ಥೋ ವುತ್ತೋ. ಇಧ ಪನ ಸಬ್ಬೇನ ಅವಧಿನಾ ಅತ್ತಸಮತಾಯ ಸಬ್ಬಸತ್ತಯುತ್ತತಾಯ ಚ ಸಬ್ಬಂ ಲೋಕಂ, ಸಬ್ಬಾವಧಿದಿಸಾದಿಫರಣಾಕಾರೇಹಿ ಸಬ್ಬಂ ಲೋಕನ್ತಿ ಚ ಅತ್ಥೋ ಯುಜ್ಜತಿ.

೬೫೦. ಪಚ್ಚತ್ಥಿಕವಿಘಾತವಸೇನಾತಿ ಮೇತ್ತಾದೀನಂ ಆಸನ್ನದೂರಪಚ್ಚತ್ಥಿಕಾನಂ ರಾಗಬ್ಯಾಪಾದಾದೀನಂ ವಿಘಾತವಸೇನ. ಯಂ ಅಪ್ಪಮಾಣಂ, ಸೋ ಅವೇರೋತಿ ಸೋ ಅವೇರಭಾವೋತಿ ಅಯಂ ವಾ ತಸ್ಸ ಅತ್ಥೋತಿ.

೬೫೩. ನಿರಯಾದಿ ಗತಿ, ಚಣ್ಡಾಲಾದಿ ಕುಲಂ, ಅನ್ನಾದೀನಂ ಅಲಾಭಿತಾ ಭೋಗೋ. ಆದಿ-ಸದ್ದೇನ ದುಬ್ಬಣ್ಣತಾದಿ ಗಹಿತಂ.

ಸುತ್ತನ್ತಭಾಜನೀಯವಣ್ಣನಾ ನಿಟ್ಠಿತಾ.

೩. ಪಞ್ಹಪುಚ್ಛಕವಣ್ಣನಾ

೬೯೯. ಇಮಸ್ಮಿಂ ಪನ…ಪೇ… ಕಥಿತಾತಿ ಇಮಿನಾ ಇಮಸ್ಮಿಂ ವಿಭಙ್ಗೇ ಕಥಿತಾನಂ ಲೋಕಿಯಭಾವಮೇವ ದಸ್ಸೇನ್ತೋ ಖನ್ಧವಿಭಙ್ಗಾದೀಹಿ ವಿಸೇಸೇತೀತಿ ನ ಅಞ್ಞತ್ಥ ಲೋಕುತ್ತರಾನಂ ಅಪ್ಪಮಞ್ಞಾನಂ ಕಥಿತತಾ ಅನುಞ್ಞಾತಾ ಹೋತಿ.

ಪಞ್ಹಪುಚ್ಛಕವಣ್ಣನಾ ನಿಟ್ಠಿತಾ.

ಅಪ್ಪಮಞ್ಞಾವಿಭಙ್ಗವಣ್ಣನಾ ನಿಟ್ಠಿತಾ.