೧. ಸೀಹನಾದಸುತ್ತವಣ್ಣನಾ

೧೧. ದುತಿಯಸ್ಸ ಪಠಮೇ ಅವಾಪುರೇನ್ತಿ ವಿವರನ್ತಿ ದ್ವಾರಂ ಏತೇನಾತಿ ಅವಾಪುರಣಂ. ರಜಂ ಹರನ್ತಿ ಏತೇನಾತಿ ರಜೋಹರಣಂ. ಕಳೋಪಿಹತ್ಥೋತಿ ವಿಲೀವಮಯಭಾಜನಹತ್ಥೋ, ‘‘ಚಮ್ಮಮಯಭಾಜನಹತ್ಥೋ’’ತಿ ಚ ವದನ್ತಿ. ಛಿನ್ನಾನಿ ವಿಸಾಣಾನಿ ಏತಸ್ಸಾತಿ ಛಿನ್ನವಿಸಾಣೋ, ಉಸಭೋ ಚ ಸೋ ಛಿನ್ನವಿಸಾಣೋ ಚಾತಿ ಉಸಭಛಿನ್ನವಿಸಾಣೋ. ವಿಸೇಸನಪರೋಯಂ ಸಮಾಸೋ. ಅಹಿಕುಣಪೇನ ವಾತಿಆದಿ ಅತಿಜೇಗುಚ್ಛಪ್ಪಟಿಕೂಲಕುಣಪದಸ್ಸನತ್ಥಂ ವುತ್ತಂ. ಕಣ್ಠೇ ಆಸತ್ತೇನಾತಿ ಕೇನಚಿದೇವ ಪಚ್ಚತ್ಥಿಕೇನ ಆನೇತ್ವಾ ಕಣ್ಠೇ ಬದ್ಧೇನ, ಓಮುಕ್ಕೇನಾತಿ ಅತ್ಥೋ. ಅಟ್ಟೋ ಆತುರೋ ದುಗ್ಗನ್ಧಪೀಳಾಯ ಪೀಳಿತೋ. ಅಚ್ಚಯಸ್ಸ ಪಟಿಗ್ಗಣ್ಹನಂ ವಾ ಅಧಿವಾಸನಂ. ಏವಞ್ಹಿ ಸೋ ಕಾರಣೇ ದೇಸಿಯಮಾನೇ ತತೋ ವಿಗತೋ ನಾಮ ಹೋತಿ. ತೇನಾಹ ‘‘ಪಟಿಗ್ಗಣ್ಹತೂತಿ ಖಮತೂ’’ತಿ. ಸೇಸಮೇತ್ಥ ಸುವಿಞ್ಞೇಯ್ಯಮೇವ.

ಸೀಹನಾದಸುತ್ತವಣ್ಣನಾ ನಿಟ್ಠಿತಾ.