(೮) ೩. ಯಮಕವಗ್ಗೋ

೧-೧೦. ಸದ್ಧಾಸುತ್ತಾದಿವಣ್ಣನಾ

೭೧-೮೦. ಅಟ್ಠಮಸ್ಸ ಪಠಮಾದೀನಿ ಉತ್ತಾನತ್ಥಾನೇವ. ದಸಮೇ ಕುಚ್ಛಿತಂ ಸೀದತೀತಿ ಕುಸೀತೋ ದ-ಕಾರಸ್ಸ ತ-ಕಾರಂ ಕತ್ವಾ. ಯಸ್ಸ ಧಮ್ಮಸ್ಸ ವಸೇನ ಪುಗ್ಗಲೋ ‘‘ಕುಸೀತೋ’’ತಿ ವುಚ್ಚತಿ, ಸೋ ಕುಸಿತಭಾವೋ ಇಧ ಕುಸಿತ-ಸದ್ದೇನ ವುತ್ತೋ. ವಿನಾಪಿ ಹಿ ಭಾವಜೋತನಸದ್ದಂ ಭಾವತ್ಥೋ ವಿಞ್ಞಾಯತಿ ಯಥಾ ‘‘ಪಟಸ್ಸ ಸುಕ್ಕ’’ನ್ತಿ, ತಸ್ಮಾ ಕುಸೀತಭಾವವತ್ಥೂನೀತಿ ಅತ್ಥೋ. ತೇನಾಹ ‘‘ಕೋಸಜ್ಜಕಾರಣಾನೀತಿ ಅತ್ಥೋ’’ತಿ. ಕಮ್ಮಂ ನಾಮ ಸಮಣಸಾರುಪ್ಪಂ ಈದಿಸನ್ತಿ ಆಹ ‘‘ಚೀವರವಿಚಾರಣಾದೀ’’ತಿ. ವೀರಿಯನ್ತಿ ಪಧಾನವೀರಿಯಂ. ತಂ ಪನ ಚಙ್ಕಮನವಸೇನ ಕರಣೇ ಕಾಯಿಕನ್ತಿಪಿ ವತ್ತಬ್ಬತಂ ಲಭತೀತಿ ಆಹ ‘‘ದುವಿಧಮ್ಪೀ’’ತಿ. ಪತ್ತಿಯಾತಿ ಪಾಪುಣನತ್ಥಂ. ಓಸೀದನನ್ತಿ ಭಾವನಾನುಯೋಗೇ ಸಙ್ಕೋಚೋ. ಮಾಸೇಹಿ ಆಚಿತಂ ನಿಚಿತಂ ವಿಯಾತಿ ಮಾಸಾಚಿತಂ, ತಂ ಮಞ್ಞೇ. ಯಸ್ಮಾ ಮಾಸಾ ತಿನ್ತಾ ವಿಸೇಸೇನ ಗರುಕಾ ಹೋನ್ತಿ, ತಸ್ಮಾ ‘‘ಯಥಾ ತಿನ್ತಮಾಸೋ’’ತಿಆದಿ ವುತ್ತಂ. ವುಟ್ಠಿತೋ ಹೋತಿ ಗಿಲಾನಭಾವಾತಿ ಅಧಿಪ್ಪಾಯೋ.

ತೇಸನ್ತಿ ಆರಮ್ಭವತ್ಥೂನಂ. ಇಮಿನಾವ ನಯೇನಾತಿ ಇಮಿನಾ ಕುಸೀತವತ್ಥೂಸು ವುತ್ತೇನೇವ ನಯೇನ ‘‘ದುವಿಧಮ್ಪಿ ವೀರಿಯಂ ಆರಭತೀ’’ತಿಆದಿನಾ. ಇದಂ ಪಠಮನ್ತಿ ‘‘ಇದಂ, ಹನ್ದಾಹಂ, ವೀರಿಯಂ ಆರಭಾಮೀ’’ತಿ, ‘‘ಏವಂ ಭಾವನಾಯ ಅಬ್ಭುಸ್ಸಹನಂ ಪಠಮಂ ಆರಮ್ಭವತ್ಥೂ’’ತಿಆದಿನಾ ಚ ಅತ್ಥೋ ವೇದಿತಬ್ಬೋ. ಯಥಾ ತಥಾ ಪಠಮಂ ಪವತ್ತಂ ಅಬ್ಭುಸ್ಸಹನಞ್ಹಿ ಉಪರಿ ವೀರಿಯಾರಮ್ಭಸ್ಸ ಕಾರಣಂ ಹೋತಿ. ಅನುರೂಪಪಚ್ಚವೇಕ್ಖಣಸಹಿತಾನಿ ಹಿ ಅಬ್ಭುಸ್ಸಹನಾನಿ ತಮ್ಮೂಲಕಾನಿ ವಾ ಪಚ್ಚವೇಕ್ಖಣಾನಿ ಅಟ್ಠ ಆರಮ್ಭವತ್ಥೂನೀತಿ ವೇದಿತಬ್ಬಾನಿ.

ಸದ್ಧಾಸುತ್ತಾದಿವಣ್ಣನಾ ನಿಟ್ಠಿತಾ.

ಯಮಕವಗ್ಗವಣ್ಣನಾ ನಿಟ್ಠಿತಾ.

೮೧-೬೨೬. ಸೇಸಂ ಉತ್ತಾನಮೇವ.

ಇತಿ ಮನೋರಥಪೂರಣಿಯಾ ಅಙ್ಗುತ್ತರನಿಕಾಯ-ಅಟ್ಠಕಥಾಯ

ಅಟ್ಠಕನಿಪಾತವಣ್ಣನಾಯ ಅನುತ್ತಾನತ್ಥದೀಪನಾ ಸಮತ್ತಾ.