೮. ದುತಿಯಬಲಸುತ್ತವಣ್ಣನಾ

೨೮. ಅಟ್ಠಮೇ ಖೀಣಾಸವಸ್ಸ ಸಬ್ಬೇಸಂ ಸಙ್ಖಾರಾನಂ ಅನಿಚ್ಚತಾ ಅಸಮ್ಮೋಹವಸೇನ ಕಿಚ್ಚತೋ ಮಗ್ಗಪಞ್ಞಾಯ ಸುಪ್ಪಟಿವಿದ್ಧಾ, ವಿಪಸ್ಸನಾಯ ಆರಮ್ಮಣಕರಣವಸೇನಪೀತಿ ದಸ್ಸೇನ್ತೋ ಆಹ ‘‘ಸಹವಿಪಸ್ಸನಾಯ ಮಗ್ಗಪಞ್ಞಾಯಾ’’ತಿ. ಇಮೇ ಕಾಮಾತಿ ದ್ವೇಪಿ ಕಾಮೇ ವದತಿ. ಕಿಲೇಸವಸೇನ ಉಪ್ಪಜ್ಜಮಾನೋ ಹಿ ಪರಿಳಾಹೋ ವತ್ಥುಕಾಮಸನ್ನಿಸ್ಸಯೋ ವತ್ಥುಕಾಮವಿಸಯೋ ವಾತಿ ದ್ವೇಪಿ ಸಪರಿಳಾಹಟ್ಠೇನ ಅಙ್ಗಾರಕಾಸು ವಿಯಾತಿ ‘‘ಅಙ್ಗಾರಕಾಸೂಪಮಾ’’ತಿ ವುತ್ತಾ. ಅನ್ತೋ ವುಚ್ಚತಿ ಲಾಮಕಟ್ಠೇನ ತಣ್ಹಾ, ಬ್ಯನ್ತಂ ವಿಗತನ್ತಂ ಭೂತನ್ತಿ ಬ್ಯನ್ತಿಭೂತನ್ತಿ ಆಹ ‘‘ವಿಗತನ್ತಭೂತ’’ನ್ತಿ, ನಿತ್ತಣ್ಹನ್ತಿ ಅತ್ಥೋ.

ದುತಿಯಬಲಸುತ್ತವಣ್ಣನಾ ನಿಟ್ಠಿತಾ.