೭. ಕಣ್ಹಸುತ್ತವಣ್ಣನಾ

೭. ಸತ್ತಮೇ ಯಥಾ ‘‘ಕಣ್ಹಾ ಗಾವೀ’’ತಿಆದೀಸು ಕಾಳವಣ್ಣೇನ ಸಮನ್ನಾಗತಾ ‘‘ಕಣ್ಹಾ’’ತಿ ವುಚ್ಚತಿ, ನ ಏವಂ ಕಾಳವಣ್ಣತಾಯ ಧಮ್ಮಾ ‘‘ಕಣ್ಹಾ’’ತಿ ವುಚ್ಚನ್ತಿ, ಅಥ ಖೋ ಕಣ್ಹಾಭಿಜಾತಿನಿಬ್ಬತ್ತಿಹೇತುತೋ ಅಪ್ಪಭಸ್ಸರಭಾವಕರಣತೋ ವಾ ‘‘ಕಣ್ಹಾ’’ತಿ ವುಚ್ಚನ್ತೀತಿ ದಸ್ಸೇನ್ತೋ ‘‘ನ ಕಾಳವಣ್ಣತಾಯಾ’’ತಿಆದಿಮಾಹ. ಕಣ್ಹತಾಯಾತಿ ಕಣ್ಹಾಭಿಜಾತಿತಾಯ. ಕಣ್ಹಾಭಿಜಾತೀತಿ ಚ ಅಪಾಯಾ ವುಚ್ಚನ್ತಿ ಮನುಸ್ಸೇಸು ಚ ದೋಭಗ್ಗಿಯಂ. ಸರಸೇನಾತಿ ಸಭಾವೇನ. ನ ಹಿರೀಯತಿ ನ ಲಜ್ಜತೀತಿ ಅಹಿರಿಕೋ, ಪುಗ್ಗಲೋ, ಚಿತ್ತಂ, ತಂ ಸಮ್ಪಯುತ್ತಧಮ್ಮಸಮುದಾಯೋ ವಾ. ತಸ್ಸ ಭಾವೋ ಅಹಿರಿಕ್ಕನ್ತಿ ವತ್ತಬ್ಬೇ ಏಕಸ್ಸ ಕ-ಕಾರಸ್ಸ ಲೋಪಂ ಕತ್ವಾ ಅಹಿರಿಕನ್ತಿ ವುತ್ತನ್ತಿ ಆಹ ‘‘ಅಹಿರಿಕನ್ತಿ ಅಹಿರಿಕಭಾವೋ’’ತಿ. ನ ಓತ್ತಪ್ಪತೀತಿ ಅನೋತ್ತಾಪೀ, ಪುಗ್ಗಲೋ, ಯಥಾವುತ್ತಧಮ್ಮಸಮುದಾಯೋ ವಾ, ತಸ್ಸ ಭಾವೋ ಅನೋತ್ತಪ್ಪನ್ತಿ ಆಹ ‘‘ಅನೋತ್ತಾಪಿಭಾವೋ’’ತಿ.

ಕಣ್ಹಸುತ್ತವಣ್ಣನಾ ನಿಟ್ಠಿತಾ.