೩. ತಪನೀಯಸುತ್ತವಣ್ಣನಾ

೩. ತತಿಯೇ ತಪನೀಯಾತಿ ಏತ್ಥ ಕತ್ತುಅತ್ಥೇ ಅನೀಯ-ಸದ್ದೋತಿ ಆಹ ‘‘ತಪನ್ತೀತಿ ತಪನೀಯಾ’’ತಿ. ತಪನ್ತೀತಿ ವಿಬಾಧೇನ್ತಿ, ವಿಹೇಠೇನ್ತೀತಿ ಅತ್ಥೋ. ತಪನಂ ವಾ ದುಕ್ಖಂ, ದಿಟ್ಠೇ ಚೇವ ಧಮ್ಮೇ ಅಭಿಸಮ್ಪರಾಯಞ್ಚ ತಸ್ಸ ಉಪ್ಪಾದನೇನ ಚೇವ ಅನುಬಲಪ್ಪದಾನೇನ ಚ ಹಿತಾತಿ ತಪನೀಯಾ. ಅಥ ವಾ ತಪನ್ತಿ ತೇನಾತಿ ತಪನಂ, ಅನುತಾಪೋ, ವಿಪ್ಪಟಿಸಾರೋತಿ ಅತ್ಥೋ. ತಸ್ಸ ಹೇತುಭಾವತೋ ಹಿತಾತಿ ತಪನೀಯಾ. ಅನುಸೋಚತೀತಿ ವಿಪ್ಪಟಿಸಾರೀ ಹುತ್ವಾ ಕತಾಕತಂ ಅನುಗಮ್ಮ ಸೋಚತಿ. ಸೋಚನಞ್ಹಿ ಕತತ್ತಾ ಚ ಹೋತಿ ಅಕತತ್ತಾ ಚ. ತಥಾ ಚೇವ ಪಾಳಿಯಂ ವಿಭತ್ತಂ. ನನ್ದಯಕ್ಖಾದೀನಂ ವತ್ಥೂನಿ ಪಾಕಟಾನೀತಿ ತಾನಿ ಅದಸ್ಸೇತ್ವಾ ದ್ವೇಭಾತಿಕವತ್ಥುಂ ದಸ್ಸೇನ್ತೋ ‘‘ತೇ ಕಿರಾ’’ತಿ ಆದಿಮಾಹ. ತತ್ಥ ತೇತಿ ದ್ವೇ ಭಾತರೋ. ಪುನ ಕಿಂ ಮಗ್ಗಸೀತಿ ಪುನ ಕಿಂ ಇಚ್ಛಸಿ.

ತಪನೀಯಸುತ್ತವಣ್ಣನಾ ನಿಟ್ಠಿತಾ.