೧೭. ಪಸಾದಕರಧಮ್ಮವಗ್ಗವಣ್ಣನಾ

೩೬೬. ಅದ್ಧಮಿದನ್ತಿ ಸನ್ಧಿವಸೇನ ಪಾಳಿಯಂ ರಸ್ಸಂ ಕತ್ವಾ ವುತ್ತಂ, ಮ-ಕಾರೋ ಪದಸನ್ಧಿಕರೋತಿ ಆಹ – ‘‘ಅದ್ಧಾ ಇದ’’ನ್ತಿ. ಏಕಂಸೋ ಏಸಾತಿ ಏಕಂಸೋ ಹೇತು ಏಸ ಲಾಭಾನಂ. ಪಾಪಕಂ ನಾಮಾತಿ ಅಪ್ಪಕಮ್ಪಿ ಪಾಪಂ ನಾಮ ಬ್ಯತ್ತಂ ಏಕಂಸೇನ ನ ಕರೋತಿ. ತಥಸ್ಸಾತಿ ತಥಾ ಸಮ್ಮಾಪಟಿಪಜ್ಜಮಾನಸ್ಸ ಅಸ್ಸ. ಆರಞ್ಞಿಕತ್ತಂ…ಪೇ… ತೇಚೀವರಿಕತ್ತನ್ತಿ ಇಮೇಸಂ ಧುತಧಮ್ಮಾನಂ ಗಹಣೇನೇವ ಇತರೇಸಮ್ಪಿ ತಂಸಭಾಗಾನಂ ಗಹಿತಭಾವೋ ದಟ್ಠಬ್ಬೋ. ಥಾವರಪ್ಪತ್ತಭಾವೋತಿ ಸಾಸನೇ ಥಿರಭಾವಪ್ಪತ್ತಿ ಥೇರಭಾವೋ. ಆಕಪ್ಪಸ್ಸ ಸಮ್ಪತ್ತೀತಿ ‘‘ಅಞ್ಞೋ ಮೇ ಆಕಪ್ಪೋ ಕರಣೀಯೋ’’ತಿ ಏವಂ ವುತ್ತಸ್ಸ ಆಕಪ್ಪಸ್ಸ ಸಮ್ಪತ್ತಿ. ಕೋಲಪುತ್ತೀತಿ ಕೋಲಪುತ್ತಿಯನ್ತಿ ಆಹ – ‘‘ಕುಲಪುತ್ತಭಾವೋ’’ತಿ. ಸಮ್ಪನ್ನರೂಪತಾತಿ ಉಪಧಿಸಮ್ಪದಾ. ವಚನಕಿರಿಯಾಯಾತಿ ವಚನಪ್ಪಯೋಗಸ್ಸ ಮಧುರಭಾವೋ ಮಞ್ಜುಸ್ಸರತಾ. ತೇನಸ್ಸ ಲಾಭೋ ಉಪ್ಪಜ್ಜತೀತಿ ಇದಂ ನ ಲಾಭುಪ್ಪಾದನೂಪಾಯದಸ್ಸನಪರಂ, ಅಥ ಖೋ ಏವಂ ಸಮ್ಮಾಪಟಿಪಜ್ಜಮಾನಸ್ಸ ಅನಿಚ್ಛನ್ತಸ್ಸೇವ ಲಾಭೋ ಉಪ್ಪಜ್ಜತೀತಿ ಲಾಭಸ್ಸ ಅಬ್ಯಭಿಚಾರಹೇತುದಸ್ಸನಪರಂ ದಟ್ಠಬ್ಬಂ. ಯಥಾಹ –

‘‘ಆಕಙ್ಖೇಯ್ಯ ಚೇ, ಭಿಕ್ಖವೇ, ಭಿಕ್ಖು ಲಾಭೀ ಅಸ್ಸಂ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಾನನ್ತಿ, ಸೀಲೇಸ್ವೇವಸ್ಸ ಪರಿಪೂರಕಾರೀ’’ತಿ (ಮ. ನಿ. ೧.೬೫).

ಪಸಾದಕರಧಮ್ಮವಗ್ಗವಣ್ಣನಾ ನಿಟ್ಠಿತಾ.