೨. ದುತಿಯೋ ಪರಿಚ್ಛೇದೋ

ಲಕ್ಖಣರಸುಪಟ್ಠಾನವಿಭಾಗೋ

೬೭. ಸಭಾವೋ ಲಕ್ಖಣಂ ನಾಮ, ಕಿಚ್ಚಸಮ್ಪಜ್ಜನಾ ರಸೋ;

ಗಯ್ಹಾಕಾರೋ ಉಪಟ್ಠಾನಂ, ಪದಟ್ಠಾನಂ ತು ಪಚ್ಚಯೋ.

೬೮. ಅತ್ತುಪಲದ್ಧಿಸಙ್ಖಾತಾ, ಸಮ್ಪತ್ತಾ ಚ ಪನತ್ಥತೋ;

ಲಕ್ಖಣರಸುಪಟ್ಠಾನಾ, ವೋಹಾರಾಭೋಗಭೇದಿತಾ.

೬೯. ತೇಪಞ್ಞಾಸಸಭಾವೇಸು, ತಸ್ಮಾ ಭೇದಂ ಯಥಾರಹಂ;

ಲಕ್ಖಣಾದಿಪ್ಪಕಾರೇಹಿ, ಪವಕ್ಖಾಮಿ ಇತೋ ಪರಂ.

೭೦. ಚಿನ್ತೇತೀತಿ ಭವೇ ಚಿತ್ತಂ, ಚಿನ್ತನಮತ್ತಮೇವ ವಾ;

ಸಮ್ಪಯುತ್ತಾಥ ವಾ ತೇನ, ಚಿನ್ತೇನ್ತೀತಿ ಚ ಗೋಚರಂ.

೭೧. ಫುಸತೀತಿ ಭವೇ ಫಸ್ಸೋ, ಫುಸನಂ ವಾಥ ಕೇವಲಂ;

ಸಮ್ಪಯುತ್ತಾಥ ವಾ ತೇನ, ಫುಸನ್ತೀತಿ ಚ ಗೋಚರಂ.

೭೨. ಏವಂ ಕತ್ತರಿ ಭಾವೇ ಚ, ಕರಣೇ ಚ ಯಥಾರಹಂ;

ತೇಪಞ್ಞಾಸಸಭಾವೇಸು, ಸದ್ದನಿಬ್ಬಚನಂ ನಯೇ.

೭೩. ಆಲಮ್ಬಣಮನಂ ಚಿತ್ತಂ, ತಂವಿಜಾನನಲಕ್ಖಣಂ;

ಸಹಜಾಧಿಟ್ಠಾನರಸಂ, ಚಿನ್ತಾಕಪ್ಪೋತಿ ಗಯ್ಹತಿ.

೭೪. ಆಲಮ್ಬಣಸಮೋಧಾನೋ,

ಫಸ್ಸೋ ಫುಸನಲಕ್ಖಣೋ;

ಸಙ್ಘಟ್ಟನರಸೋ ತತ್ಥ,

ಸನ್ನಿಪಾತೋತಿ ಗಯ್ಹತಿ.

೭೫. ವೇದನಾಲಮ್ಬಣರಸಾ, ಸಾ ವೇದಯಿತಲಕ್ಖಣಾ;

ಗೋಚರಾನುಭವರಸಾ, ಅನುಭುತ್ತೀತಿ ಗಯ್ಹತಿ.

೭೬. ಆಕಾರಗಹಣಂ ಸಞ್ಞಾ, ಸಾ ಸಞ್ಜಾನನಲಕ್ಖಣಾ;

ನಿಮಿತ್ತುಪ್ಪಾದನರಸಾ, ಉಪಲಕ್ಖಾತಿ ಗಯ್ಹತಿ.

೭೭. ಚೇತನಾ ಚಿತ್ತವಿಪ್ಫಾರಾ, ಸಾಯಂ ಬ್ಯಾಪಾರಲಕ್ಖಣಾ;

ಕಮ್ಮನ್ತಾಯೂಹನರಸಾ, ಸಂವಿಧಾನನ್ತಿ ಗಯ್ಹತಿ.

೭೮. ಏಕಗ್ಗತಾ ಅವಿಕ್ಖೇಪೋ, ಸಾವಿಸಾಹಾರಲಕ್ಖಣಾ;

ಸಮ್ಪಿಣ್ಡನರಸಾ ಚಿತ್ತಂ, ಸಮೋಧಾನನ್ತಿ ಗಯ್ಹತಿ.

೭೯. ಯಾಪನಂ ಸಹಜಾತಾನ-ಮನುಪಾಲನಲಕ್ಖಣಂ;

ಜೀವಿತಂ ಜೀವನರಸಂ, ಆಯುಬನ್ಧೋತಿ ಗಯ್ಹತಿ.

೮೦. ಸಾರಣಾ ಮನಸೀಕಾರೋ, ಸಮನ್ನಾಹಾರಲಕ್ಖಣೋ;

ಸಂಯೋಜನರಸೋ ಚಿತ್ತ-ಪಟಿಪತ್ತೀತಿ ಗಯ್ಹತಿ.

೮೧. ಸಙ್ಕಪ್ಪನಲಕ್ಖಣೋ ತಕ್ಕೋ, ಸಹಜಾಭಿನಿರೋಪನೋ;

ಆಲಮ್ಬಾಹನನರಸೋ, ಸನ್ನಿರುಜ್ಝೋತಿ ಗಯ್ಹತಿ.

೮೨. ವಿಚಾರೋ ಅನುಸನ್ಧಾನೋ, ಅನುಮಜ್ಜನಲಕ್ಖಣೋ;

ಚಿತ್ತಾನುಯೋಜನರಸೋ, ಅನುಪೇಕ್ಖಾತಿ ಗಯ್ಹತಿ.

೮೩. ಅಧಿಮೋಕ್ಖೋ ಅಸಂಸಪ್ಪೋ, ಸುಸನ್ನಿಟ್ಠಾನಲಕ್ಖಣೋ;

ನಿಚ್ಚಲಾಪಾದನರಸೋ, ದಳ್ಹವುತ್ತೀತಿ ಗಯ್ಹತಿ.

೮೪. ವೀರಿಯಂ ಪನ ವಾಯಾಮೋ, ಮಹುಸ್ಸಾಹನಲಕ್ಖಣೋ;

ಕಿಚ್ಚಾಸಂಸೀದನರಸೋ, ಉಪತ್ಥಮ್ಭೋತಿ ಗಯ್ಹತಿ.

೮೫. ಆಲಮ್ಬತ್ಥಿಕತಾ ಛನ್ದೋ, ಕತ್ತುಕಾಮತಲಕ್ಖಣೋ;

ಆಲಮ್ಬಣೇಸನರಸೋ, ಹತ್ಥಾದಾನನ್ತಿ ಗಯ್ಹತಿ.

೮೬. ಸಹಜಾತಾನುಫರಣಾ, ಸಮ್ಪಿಯಾಯನಲಕ್ಖಣಾ;

ಸಮ್ಪೀನನರಸಾ ಪೀತಿ, ಪಾಮೋಜ್ಜಮಿತಿ ಗಯ್ಹತಿ.

೮೭. ಚೇತೋಸದ್ದಹನಂ ಸದ್ಧಾ, ಭೂತೋಕಪ್ಪನಲಕ್ಖಣಾ;

ಹಿತಪಕ್ಖನ್ದನರಸಾ, ಅಧಿಮುತ್ತೀತಿ ಗಯ್ಹತಿ.

೮೮. ಅಸಮ್ಮೋಸಾ ಸಭಾವೇಸು, ಸತಿ ಧಾರಣಲಕ್ಖಣಾ;

ಧಮ್ಮಾಪಿಲಾಪನರಸಾ, ಅಪ್ಪಮಾದೋತಿ ಗಯ್ಹತಿ.

೮೯. ಹಿರೀ ಜೇಗುಚ್ಛಾ ಪಾಪೇಸು, ಸಾ ಹರಾಯನಲಕ್ಖಣಾ;

ಹೀಳಸಂಕೋಚನರಸಾ, ಪಾಪಲಜ್ಜಾತಿ ಗಯ್ಹತಿ.

೯೦. ಪಾಪಸಾರಜ್ಜಮೋತ್ತಪ್ಪಂ, ಉಬ್ಬೇಗುತ್ತಾಸಲಕ್ಖಣಂ;

ಭಯಸಙ್ಕೋಚನರಸಂ, ಅವಿಸ್ಸಾಸೋತಿ ಗಯ್ಹತಿ.

೯೧. ಅಲೋಭೋ ಅನಭಿಸಙ್ಗೋ, ಅಪರಿಗ್ಗಹಲಕ್ಖಣೋ;

ಮುತ್ತಪ್ಪವತ್ತನರಸೋ, ಅಸಂಸಗ್ಗೋತಿ ಗಯ್ಹತಿ.

೯೨. ಅದೋಸೋ ಚಿತ್ತಸಾಖಲ್ಯಂ, ಅಬ್ಯಾಪಜ್ಜನಲಕ್ಖಣೋ;

ಸಣ್ಹಪ್ಪವತ್ತನರಸೋ, ಸೋಮ್ಮಭಾವೋತಿ ಗಯ್ಹತಿ.

೯೩. ಅಮೋಹೋ ಖಲಿತಾಭಾವೋ, ಪಟಿವಿಜ್ಝನಲಕ್ಖಣೋ;

ವಿಸಯೋಭಾಸನರಸೋ, ಪಟಿಬೋಧೋತಿ ಗಯ್ಹತಿ.

೯೪. ತತ್ರಮಜ್ಝತ್ತತೋಪೇಕ್ಖಾ, ಸಮೀಕರಣಲಕ್ಖಣಾ;

ಅಪಕ್ಖಪಾತನರಸಾ, ಸಮವಾಹೋತಿ ಗಯ್ಹತಿ.

೯೫. ಪಸ್ಸದ್ಧಿ ಕಾಯಚಿತ್ತಾನಂ, ದರಥಾಭಾವಲಕ್ಖಣಾ;

ಅಪರಿಪ್ಫನ್ದನರಸಾ, ಸೀತಿಭಾವೋತಿ ಗಯ್ಹತಿ.

೯೬. ಲಹುತಾ ಕಾಯಚಿತ್ತಾನಂ, ಅದನ್ಧಾಕಾರಲಕ್ಖಣಾ;

ಅವಿತ್ಥಾರರಸಾ ಸಲ್ಲಹುಕವುತ್ತೀತಿ ಗಯ್ಹತಿ.

೯೭. ಮುದುತಾ ಕಾಯಚಿತ್ತಾನಂ, ಕಕ್ಖಳಾಭಾವಲಕ್ಖಣಾ;

ಕಿಚ್ಚಾವಿರೋಧನರಸಾ, ಅನುಕುಲ್ಯನ್ತಿ ಗಯ್ಹತಿ.

೯೮. ಕಮ್ಮಞ್ಞತಾ ಉಭಿನ್ನಮ್ಪಿ, ಅಲಂಕಿಚ್ಚಸ್ಸ ಲಕ್ಖಣಾ;

ಪವತ್ತಿಸಮ್ಪತ್ತಿರಸಾ, ಯೋಗಭಾವೋತಿ ಗಯ್ಹತಿ.

೯೯. ತಥಾ ಪಾಗುಞ್ಞತಾ ದ್ವಿನ್ನಂ, ವಿಸದಾಕಾರಲಕ್ಖಣಾ;

ಸುಖಪ್ಪವತ್ತನರಸಾ, ಸೇರಿಭಾವೋತಿ ಗಯ್ಹತಿ.

೧೦೦. ಉಜುತಾ ಕಾಯಚಿತ್ತಾನಂ, ಕುಟಿಲಾಭಾವಲಕ್ಖಣಾ;

ಜಿಮ್ಹನಿಮ್ಮದನರಸಾ, ಉಜುವುತ್ತೀತಿ ಗಯ್ಹತಿ.

೧೦೧. ಸಮ್ಮಾವಾಚಾ ವಚೀಸುದ್ಧಿ, ವಾಚಾಸಂಯಮಲಕ್ಖಣಾ;

ಮಿಚ್ಛಾವಾಚೋರಮರಸಾ, ವಚೀವೇಲಾತಿ ಗಯ್ಹತಿ.

೧೦೨. ಸಮ್ಮಾಕಮ್ಮಂ ಕ್ರಿಯಾಸುದ್ಧಂ, ಸಮ್ಮಾಕರಣಲಕ್ಖಣಂ;

ಮಿಚ್ಛಾಕಮ್ಮೋರಮರಸಂ, ಕ್ರಿಯಾವೇಲಾತಿ ಗಯ್ಹತಿ.

೧೦೩. ಸಮ್ಮಾಜೀವೋ ವಿಸುದ್ಧೇಟ್ಠಿ, ಅಲ್ಲಿಟ್ಠಾಜೀವಲಕ್ಖಣೋ;

ಮಿಚ್ಛಾಜೀವೋರಮರಸೋ, ಸಮ್ಮಾವುತ್ತೀತಿ ಗಯ್ಹತಿ.

೧೦೪. ಕರುಣಾ ದೀನಸತ್ತೇಸು, ದುಕ್ಖಾಪನಯಲಕ್ಖಣಾ;

ಸೋತ್ಥಿತಾಪತ್ಥನರಸಾ, ಅನುಕಮ್ಪಾತಿ ಗಯ್ಹತಿ.

೧೦೫. ಸುಖಟ್ಠಿತೇಸು ಮುದಿತಾ, ಅನುಮೋದನಲಕ್ಖಣಾ;

ಚೇತೋವಿಕಾಸನರಸಾ, ಅವಿರೋಧೋತಿ ಗಯ್ಹತಿ.

೧೦೬. ಚೇತೋಸಾರಜ್ಜನಾ ಲೋಭೋ, ಅಪರಿಚ್ಚಾಗಲಕ್ಖಣೋ;

ಆಲಮ್ಬಗಿಜ್ಝನರಸೋ, ಅಭಿಲಗ್ಗೋತಿ ಗಯ್ಹತಿ.

೧೦೭. ಚೇತೋಬ್ಯಾಪಜ್ಜನಂ ದೋಸೋ, ಸಮ್ಪದುಸ್ಸನಲಕ್ಖಣೋ;

ಆಲಮ್ಬಣಘಾತರಸೋ, ಚಣ್ಡಿಕ್ಕಮಿತಿ ಗಯ್ಹತಿ.

೧೦೮. ಚೇತೋಸಮ್ಮುಯ್ಹನಂ ಮೋಹೋ,

ಸೋ ಸಮ್ಮುಯ್ಹನಲಕ್ಖಣೋ;

ಸಭಾವಚ್ಛಾದನರಸೋ,

ಅನ್ಧಭಾವೋತಿ ಗಯ್ಹತಿ.

೧೦೯. ಪಾಪಾಜಿಗುಚ್ಛಾಹಿರಿಕಂ, ನಿಲ್ಲಜ್ಜಾಕಾರಲಕ್ಖಣಂ;

ಪಾಪೋಪಲಾಪನರಸಂ, ಮಲಗ್ಗಾಹೋತಿ ಗಯ್ಹತಿ.

೧೧೦. ಅಸಾರಜ್ಜನಮನೋತ್ತಪ್ಪಮನುತ್ತಾಸನಲಕ್ಖಣಂ;

ಪಾಪಪಕ್ಖನ್ದನರಸಂ, ಪಾಗಬ್ಭಮಿತಿ ಗಯ್ಹತಿ.

೧೧೧. ದಿಟ್ಠಿ ದಳ್ಹವಿಪಲ್ಲಾಸೋ, ಸಾ ಪರಾಮಾಸಲಕ್ಖಣಾ;

ತುಚ್ಛಾಭಿನಿವೇಸನರಸಾ, ಮಿಚ್ಛಾಗಾಹೋತಿ ಗಯ್ಹತಿ.

೧೧೨. ‘‘ಅಹಸ್ಮೀ’’ತಿ ಮಞ್ಞಮಾನೋ, ಸೋ ಸಮುನ್ನತಿಲಕ್ಖಣೋ;

ಕೇತುಸಮ್ಪಗ್ಗಹರಸೋ, ಅಹಂಕಾರೋತಿ ಗಯ್ಹತಿ.

೧೧೩. ಪರಸಮ್ಪತ್ತೀಸು ಇಸ್ಸಾ, ಅಕ್ಖಮಾಕಾರಲಕ್ಖಣಾ;

ಚೇತೋವಿಕುಚನರಸಾ, ವಿಮುಖತ್ತನ್ತಿ ಗಯ್ಹತಿ.

೧೧೪. ಪರಿಗ್ಗಹೇಸು ಮಚ್ಛೇರಂ, ಸನ್ನಿಗೂಹನಲಕ್ಖಣಂ;

ಸಾಮಞ್ಞಾಸಹನರಸಂ, ವೇವಿಚ್ಛಮಿತಿ ಗಯ್ಹತಿ.

೧೧೫. ಚೇತೋಪಹನನಂ ಥೀನಂ, ತಂ ಸಂಸೀದನಲಕ್ಖಣಂ;

ಉಸ್ಸಾಹಭಞ್ಜನರಸಂ, ಸಂಖಿತ್ತತ್ತನ್ತಿ ಗಯ್ಹತಿ.

೧೧೬. ವಿಘಾತೋ ಸಹಜಾತಾನಂ, ಮಿದ್ಧಂ ಮೋಹನಲಕ್ಖಣಂ;

ಸತ್ತಿಸಂಭಞ್ಜನರಸಂ, ಆತುರತ್ತನ್ತಿ ಗಯ್ಹತಿ.

೧೧೭. ಉದ್ಧಚ್ಚಂ ಚಿತ್ತವಿಕ್ಖೇಪೋ, ಅವೂಪಸಮಲಕ್ಖಣಂ;

ಚೇತೋನವಟ್ಠಾನರಸಂ, ಭನ್ತತ್ತಮಿತಿ ಗಯ್ಹತಿ.

೧೧೮. ವಿಪ್ಪಟಿಸಾರೋ ಕುಕ್ಕುಚ್ಚಮನುಸೋಚನಲಕ್ಖಣಂ;

ಅತ್ತಾನುಸೋಚನರಸಂ, ಪಚ್ಛಾತಾಪೋತಿ ಗಯ್ಹತಿ.

೧೧೯. ಕಙ್ಖಾಯನಾ ವಿಚಿಕಿಚ್ಛಾ, ಅಸನ್ನಿಟ್ಠಾನಲಕ್ಖಣಾ;

ಅನೇಕಗಾಹನರಸಾ, ಅಪ್ಪತಿಟ್ಠಾತಿ ಗಯ್ಹತಿ.

೧೨೦. ಇಚ್ಚೇವಂ ಲಕ್ಖಣಾದೀಹಿ, ವಿಭಾವೇಯ್ಯ ವಿಚಕ್ಖಣೋ;

ತೇಪಞ್ಞಾಸಸಭಾವೇಸು, ಸಭಾವಾಕಾರಲಕ್ಖಣಂ.

೧೨೧. ಲಕ್ಖಣತ್ಥಕುಸಲಾ ಸಲಕ್ಖಣೇ,

ಲಕ್ಖಣತ್ಥಪರಮೇಪಿ ಕೇವಲಂ;

ಲಕ್ಖಣುಗ್ಗಹಸುಖಾಯ ವಣ್ಣಯುಂ,

ಲಕ್ಖಣಾದಿಮುಖತೋ ಸಲಕ್ಖಣಂ.

೧೨೨. ಅತ್ಥಂ ತಮೇವಮನುಗಮ್ಮ ಮಯೇತ್ಥ ವುತ್ತ-

ಮತ್ಥಾನಮತ್ಥನಯನತ್ಥಮನೇಕಧಾಪಿ;

ಪತ್ಥೇಯ್ಯ ಮೇತ್ಥ ವಚನತ್ಥನಯೇಹಿ ಞಾಣ-

ಮತ್ಥೇಸು ಬುದ್ಧವಚನತ್ಥನಯತ್ಥಿಕೇಹಿ.

ಇತಿ ನಾಮರೂಪಪರಿಚ್ಛೇದೇ ಲಕ್ಖಣರಸುಪಟ್ಠಾನವಿಭಾಗೋ ನಾಮ

ದುತಿಯೋ ಪರಿಚ್ಛೇದೋ.