೨೦. ವೀಸತಿಮೋ ಪರಿಚ್ಛೇದೋ

ಮಗ್ಗಾಮಗ್ಗಞಾಣದಸ್ಸನವಿಸುದ್ಧಿನಿದ್ದೇಸೋ

೧೨೬೩. ಕಲಾಪಸಮ್ಮಸನೇನೇವ,

ಯೋಗೋ ಕರಣಿಯೋ ಸಿಯಾ;

ಮಗ್ಗಾಮಗ್ಗೇ ತು ಞಾಣಂ ತ-

ಮಧಿಗನ್ತುಂ ಪನಿಚ್ಛತಾ.

೧೨೬೪. ಪಚ್ಚುಪ್ಪನ್ನಸ್ಸ ಧಮ್ಮಸ್ಸ, ನಿಬ್ಬತ್ತಿ ಉದಯೋ ಮತೋ;

ವಯೋ ವಿಪರಿಣಾಮೋತಿ, ತಸ್ಸೇವ ಸಮುದೀರಿತಾ.

೧೨೬೫. ಅನುಪಸ್ಸನಾಪಿ ಞಾಣನ್ತಿ, ವರಞಾಣೇನ ದೇಸಿತಂ;

ಸೋ ಪನೇವಂ ಪಜಾನಾತಿ, ಯೋಗಾವಚರಮಾಣವೋ.

೧೨೬೬. ಇಮಸ್ಸ ನಾಮರೂಪಸ್ಸ, ಪುಬ್ಬೇ ಉಪ್ಪತ್ತಿತೋ ಪನ;

ನಿಚಯೋ ರಾಸಿ ವಾ ನತ್ಥಿ, ತಥಾ ಉಪ್ಪಜ್ಜತೋಪಿ ಚ.

೧೨೬೭. ರಾಸಿತೋ ನಿಚಯಾ ವಾಪಿ, ನತ್ಥಿ ಆಗಮನನ್ತಿ ಚ;

ತಥಾ ನಿರುಜ್ಝಮಾನಸ್ಸ, ನ ದಿಸಾಗಮನನ್ತಿ ಚ.

೧೨೬೮. ನಿರುದ್ಧಸ್ಸಾಪಿ ಏಕಸ್ಮಿಂ, ಠಾನೇ ನತ್ಥಿ ಚಯೋತಿ ಚ;

ಏತ್ಥ ವೀಣೂಪಮಾ ವುತ್ತಾ, ಏತಸ್ಸತ್ಥಸ್ಸ ದೀಪನೇ.

೧೨೬೯. ಉದಬ್ಬಯಮನಕ್ಕಾರಮೇವಂ ಸಙ್ಖೇಪತೋ ಪನ;

ಕತ್ವಾ ತಸ್ಸೇವ ಞಾಣಸ್ಸ, ವಿಭಙ್ಗಸ್ಸ ವಸೇನ ತು.

೧೨೭೦. ‘‘ಅವಿಜ್ಜಾಸಮುದಯಾ ರೂಪಸಮುದಯೋ’’ತಿ ಹಿ ಆದಿನಾ;

ನಯೇನೇಕೇಕಖನ್ಧಸ್ಸ, ಉದಯಬ್ಬಯದಸ್ಸನೇ.

೧೨೭೧. ದಸ ದಸಾತಿ ಕತ್ವಾನ, ವುತ್ತಾ ಪಞ್ಞಾಸಲಕ್ಖಣಾ;

ತೇಸಂ ಪನ ವಸೇನಾಪಿ, ಧಮ್ಮೇ ಸಮನುಪಸ್ಸತಿ.

೧೨೭೨. ಏವಂ ರೂಪುದಯೋ ಹೋತಿ, ಏವಮಸ್ಸ ವಯೋ ಇತಿ;

ಉದೇತಿ ಏವಂ ರೂಪಮ್ಪಿ, ಏವಂ ರೂಪಂ ತು ವೇತಿ ಚ.

೧೨೭೩. ಏವಂ ಪಚ್ಚಯತೋಪೇತ್ಥ, ಖಣತೋ ಉದಯಬ್ಬಯಂ;

ಪಸ್ಸತೋ ಸಬ್ಬಧಮ್ಮಾ ಚ, ಪಾಕಟಾ ಹೋನ್ತಿ ತಸ್ಸ ತೇ.

೧೨೭೪. ಉದಕೇ ದಣ್ಡರಾಜೀವ, ಆರಗ್ಗೇರಿವ ಸಾಸಪೋ;

ವಿಜ್ಜುಪ್ಪಾದಾವ ಧಮ್ಮಾ ತೇ, ಪರಿತ್ತಟ್ಠಾಯಿನೋ ಸಿಯುಂ.

೧೨೭೫. ಕದಲೀಸುಪಿನಾಲಾತಚಕ್ಕಮಾಯುಪಮಾ ಇಮೇ;

ಅಸಾರಾ ಪನ ನಿಸ್ಸಾರಾ, ಹುತ್ವಾ ಖಾಯನ್ತಿ ಯೋಗಿನೋ.

೧೨೭೬. ಏವಮೇತ್ತಾವತಾ ತೇನ, ಉದಯಬ್ಬಯದಸ್ಸನಂ;

ಲಕ್ಖಣಾನಿ ಚ ಪಞ್ಞಾಸ, ಪಟಿವಿಜ್ಝ ಠಿತಂ ಪನ.

೧೨೭೭. ಞಾಣಂ ಅಧಿಗತಂ ಹೋತಿ, ತರುಣಂ ಪಠಮಂ ಪನ;

ಯಸ್ಸ ಚಾಧಿಗಮಾ ಯೋಗೀ, ಹೋತಾರದ್ಧವಿಪಸ್ಸಕೋ.

೧೨೭೮. ವಿಪಸ್ಸನಾಯ ಹೇತಾಯ,

ಕರುಣಾಯಾಥ ಯೋಗಿನೋ;

ವಿಪಸ್ಸಕಸ್ಸ ಜಾಯನ್ತೇ,

ಉಪಕ್ಲೇಸಾ ದಸೇವಿಮೇ.

೧೨೭೯. ಓಭಾಸೋ ಪೀತಿ ಪಸ್ಸದ್ಧಿ, ಞಾಣಂ ಸದ್ಧಾ ಸತೀ ಸುಖಂ;

ಉಪೇಕ್ಖಾ ವೀರಿಯಂ ನಿಕನ್ತೀತಿ, ಉಪಕ್ಲೇಸಾ ದಸೇವಿಮೇ.

೧೨೮೦. ಸಮ್ಪತ್ತಪಟಿವೇಧಸ್ಸ, ಸೋತಾಪನ್ನಾದಿನೋಪಿ ಚ;

ತಥಾ ವಿಪ್ಪಟಿಪನ್ನಸ್ಸ, ಉಪಕ್ಲೇಸಾ ನ ಜಾಯರೇ.

೧೨೮೧. ಸಮ್ಮಾವ ಪಟಿಪನ್ನಸ್ಸ, ಯುತ್ತಯೋಗಸ್ಸ ಭಿಕ್ಖುನೋ;

ಸದಾ ವಿಪಸ್ಸಕಸ್ಸೇವ, ಉಪ್ಪಜ್ಜನ್ತಿ ಕಿರಸ್ಸು ತೇ.

೧೨೮೨. ವಿಪಸ್ಸನಾಯ ಓಭಾಸೋ, ಓಭಾಸೋತಿ ಪವುಚ್ಚತಿ;

ತಸ್ಮಿಂ ಪನ ಸಮುಪ್ಪನ್ನೇ, ಯೋಗಾವಚರಭಿಕ್ಖು ಸೋ.

೧೨೮೩. ಮಗ್ಗಪ್ಪತ್ತೋ ಫಲಪ್ಪತ್ತೋ, ಅಹಮಸ್ಮೀತಿ ಗಣ್ಹತಿ;

ಅಮಗ್ಗಂಯೇವ ಮಗ್ಗೋತಿ, ತಸ್ಸೇವಂ ಪನ ಗಣ್ಹತೋ.

೧೨೮೪. ಏವಂ ವಿಪಸ್ಸನಾವೀಥಿ,

ಓಕ್ಕನ್ತಾ ನಾಮ ಹೋತಿ ಸಾ;

ಓಭಾಸಮೇವ ಸೋ ಭಿಕ್ಖು,

ಅಸ್ಸಾದೇನ್ತೋ ನಿಸೀದತಿ.

೧೨೮೫. ಪೀತಿ ವಿಪ್ಪಸ್ಸನಾಪೀತಿ, ತಸ್ಸ ತಸ್ಮಿಂ ಖಣೇ ಪನ;

ತದಾ ಪಞ್ಚವಿಧಾ ಪೀತಿ, ಜಾಯನ್ತೇ ಖುದ್ದಿಕಾದಿಕಾ.

೧೨೮೬. ವಿಪಸ್ಸನಾಯ ಪಸ್ಸದ್ಧಿ, ಪಸ್ಸದ್ಧೀತಿ ಪವುಚ್ಚತಿ;

ಯೋಗಿನೋ ಕಾಯಚಿತ್ತಾನಿ, ಪಸ್ಸದ್ಧಾನೇವ ಹೋನ್ತಿ ಹಿ.

೧೨೮೭. ಲಹೂನಿ ಚ ಮುದೂನೇವ, ಕಮ್ಮಞ್ಞಾನೇವ ಹೋನ್ತಿ ಹಿ;

ಪಸ್ಸದ್ಧಾದೀಹಿ ಸೋ ಭಿಕ್ಖು, ಅನುಗ್ಗಹಿತಮಾನಸೋ.

೧೨೮೮. ಅಮಾನುಸಿಂ ರತಿಂ ನಾಮ,

ಅನುಭೋತಿ ಅನುತ್ತರಂ;

ಯಂ ಸನ್ಧಾಯ ಚ ಗಾಥಾಯೋ,

ಭಾಸಿತಾ ಹಿ ಮಹೇಸಿನಾ.

೧೨೮೯. ‘‘ಸುಞ್ಞಾಗಾರಂ ಪವಿಟ್ಠಸ್ಸ, ಸನ್ತಚಿತ್ತಸ್ಸ ಭಿಕ್ಖುನೋ;

ಅಮಾನುಸೀ ರತಿ ಹೋತಿ, ಸಮ್ಮಾ ಧಮ್ಮಂ ವಿಪಸ್ಸತೋ.

೧೨೯೦. ‘‘ಯತೋ ಯತೋ ಸಮ್ಮಸತಿ, ಖನ್ಧಾನಂ ಉದಯಬ್ಬಯಂ;

ಲಭತೀ ಪೀತಿಪಾಮೋಜ್ಜಂ, ಅಮತಂ ತಂ ವಿಜಾನತ’’ನ್ತಿ.

೧೨೯೧. ಞಾಣಾದಯೋ ಉಪಕ್ಲೇಸಾ, ಞೇಯ್ಯಾ ವುತ್ತನಯೇನಿಧ;

ಏತೇ ದಸ ಉಪಕ್ಲೇಸಾ, ವಜ್ಜನೀಯಾವ ಯೋಗಿನಾ.

೧೨೯೨. ಏತ್ಥೋಭಾಸಾದಯೋ ಧಮ್ಮಾ,

ಉಪಕ್ಲೇಸಸ್ಸ ವತ್ಥುತೋ;

ಉಪಕ್ಲೇಸಾತಿ ನಿದ್ದಿಟ್ಠಾ,

ಉಪಕ್ಲೇಸನಿಕನ್ತಿ ತು.

೧೨೯೩. ತಂ ತಮಾವಜ್ಜಮಾನಸ್ಸ, ಭಾವನಾ ಪರಿಹಾಯತಿ;

ಅಸತ್ತೇ ಸತ್ತಸಞ್ಞೀ ಚ, ಹೋತಿ ಅಪ್ಪಸ್ಸುತೋ ನರೋ.

೧೨೯೪. ಸಬ್ಬೋಭಾಸಾದಯೋ ಧಮ್ಮೇ, ನ ಮಗ್ಗೋತಿ ವಿಚಾರಯಂ;

ಮಗ್ಗೋ ವಿಪಸ್ಸನಾಞಾಣಂ, ಇಚ್ಚೇವಂ ಪನ ಪಣ್ಡಿತೋ.

೧೨೯೫. ವವತ್ಥಪೇತಿ ಮಗ್ಗಞ್ಚ, ಅಮಗ್ಗಞ್ಚೇವ ಚೇತಸಾ;

ತಸ್ಸ ಚೇವಂ ಅಯಂ ಮಗ್ಗೋ, ನಾಯಂ ಮಗ್ಗೋತಿ ಯೋಗಿನೋ.

೧೨೯೬. ಮಗ್ಗಾಮಗ್ಗಞ್ಚ ವಿಞ್ಞಾಯ, ಠಿತಞಾಣಮಿದಂ ಪನ;

ಮಗ್ಗಾಮಗ್ಗೇಸುಞಾಣನ್ತಿ, ಭೂರಿಞಾಣೇನ ದೇಸಿತಂ.

೧೨೯೭. ಮಗ್ಗಾಮಗ್ಗಞಾಣದಸ್ಸನೇಸು ಕೋವಿದಾ,

ಸಾರಾಸಾರವೇದಿನೋ ಸಮಾಹಿತಾಹಿತಾ;

ಮಗ್ಗಾಮಗ್ಗಞಾಣದಸ್ಸನನ್ತಿ ತಂ ಇದಂ,

ಬುದ್ಧಾ ಬುದ್ಧಸಾವಕಾ ವದನ್ತಿ ವಾದಿನೋ.

ಇತಿ ಅಭಿಧಮ್ಮಾವತಾರೇ ಮಗ್ಗಾಮಗ್ಗಞಾಣದಸ್ಸನವಿಸುದ್ಧಿನಿದ್ದೇಸೋ

ನಾಮ ವೀಸತಿಮೋ ಪರಿಚ್ಛೇದೋ.