ನಿಗಮನಕಥಾವಣ್ಣನಾ

೧೪೦೧. ಸುಮತಿಮತಿವಿಚಾರಬೋಧನೋತಿ ಸುಮತೀನಂ ಸುನ್ದರಪಞ್ಞಾನಂ ಕವೀನಂ ಮತಿಯಾ ವಿಚಾರಸ್ಸ ಬೋಧನೋ. ವಿಮತಿವಿಮೋಹವಿನಾಸನೋತಿ ವಿಮತೀನಂ ಬಾಲಾನಂ ವಿಮೋಹಸ್ಸ ವಿನಾಸನೋ. ಕುಮತಿಮತಿಮಹಾತಮೋನಾಸೋತಿ ಕುಮತೀನಂ ಬಾಲಾನಂ ಮಹಾತಮಸನ್ನಿಭಾಯ ಮತಿಯಾ ನಾಸಕೋ. ಪಟುಮತಿಭಾಸಕರೋತಿ ಪಟೂನಂ ಪಣ್ಡಿತಾನಂ ತಿಕ್ಖಪಞ್ಞಾಯ ಓಭಾಸಕರೋ.

೧೪೦೨. ಸುಮತಿನಾಮಕೋ ಭಿಕ್ಖು ಅಸಮಾನತೋ ಅಸದಿಸಾಯ ಪೂಜಾಯ ಮಮ ಆಯಾಚಿತೋ ಯತೋ ಯಸ್ಮಾ ಕಾರಣಾ, ತತೋ ತಸ್ಮಾ ಕಾರಣಾ ಅಯಂ ಅಭಿಧಮ್ಮಾವತಾರೋ. ಪದಾತೋ ಪದಾತಿ ಕೋಟ್ಠಾಸತೋ ಕೋಟ್ಠಾಸತೋ. ಹಿತವಿಭಾವನಾ ಭಾವನಾತಿ ಹಿತಪ್ಪಕಾಸನಾಯ ಭಾವನಾಯ ಮಯಾ ರಚಿತೋ. ಅಥ ವಾ ಅಹಂ ಸುಮತಿನಾ ಭಿಕ್ಖುನಾ ಅಸಮಾನತೋ ಮಾನತೋ ಆಯಾಚಿತೋ ಯತೋ ಯಸ್ಮಾ, ತತೋ ತಸ್ಮಾ.

೧೪೦೫. ತಿವಿಧಾ ಬ್ಯಪ್ಪಥಾನಞ್ಹಿ ಗತಿಯೋತಿ ಬ್ಯಪ್ಪಥಾನಂ ವಚನಾನಂ ಅತ್ಥಗನ್ಥಯುತ್ತಿವಸೇನ ತಿವಿಧಾ ಗತಿಯೋ.

೧೪೦೬. ನಿಕಾಯನ್ತರಲದ್ಧೀಹೀತಿ ಅಞ್ಞಸ್ಮಿಂ ನಿಕಾಯೇ ಲದ್ಧೀಹಿ. ವಾಚನಾಮಗ್ಗನಿಸ್ಸಿತೋತಿ ವಚನಪ್ಪಬನ್ಧನಿಸ್ಸಿತೋ.

೧೪೧೦. ಅಸಂಕಿಣ್ಣಕುಲಾಕುಲೇತಿ ಅಸಮ್ಮಿಸ್ಸಕುಲೇಹಿ ಆಕಿಣ್ಣೇ. ಸುಪಸನ್ನಸಿತೋದಕೇತಿ ಮಧುರಸೀತೋದಕೇ.

೧೪೧೧. ಸಙ್ಕಟೇತಿ ಸಮ್ಬಾಧೇ.

೧೪೧೨. ಕೇಲಾಸಸಿಖರಾಕಾರಪಾಸಾದಪಟಿಮಣ್ಡಿತೇತಿ ರಜತಪಬ್ಬತಮತ್ಥಕನಿಭೇಹಿ ಪಾಸಾದೇಹಿ ಅಲಙ್ಕತೇ.

೧೪೧೩. ವಿವಿಧಾಕಾರಚಾರುಪಾಕಾರಗೋಪುರೇತಿ ವಿವಿಧಸಣ್ಠಾನಮನುಞ್ಞಪಾಕಾರದ್ವಾರಕೋಟ್ಠಕೇ.

೧೪೧೪. ಸಲ್ಲೇಖಾತಿ ಸಲ್ಲೇಖವುತ್ತಿ. ಸಾಖಲ್ಯೇತಿ ಸಖಿಲಭಾವೇ. ಸತಾತಿ ಸತಿಸಮ್ಪನ್ನೇನ.

೧೪೧೫. ವಸ್ಸವಲಾಹಕಾ ದೇವಾತಿ ವಸ್ಸವಲಾಹಕಭೂತಾ ದೇವಾ ಅಮರಾ.

ನಿಗಮನಕಥಾವಣ್ಣನಾ ನಿಟ್ಠಿತಾ.

ಅಭಿಧಮ್ಮಾವತಾರಪುರಾಣಟೀಕಾ ನಿಟ್ಠಿತಾ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಅಭಿಧಮ್ಮಾವತಾರ-ಅಭಿನವಟೀಕಾ

(ಪಠಮೋ ಭಾಗೋ)

ಗನ್ಥಾರಮ್ಭಕಥಾ

(ಕ) ವಿಸುದ್ಧಕರುಣಾಞಾಣಂ, ಬುದ್ಧಂ ಸಮ್ಬುದ್ಧಪೂಜಿತಂ;

ಧಮ್ಮಂ ಸದ್ಧಮ್ಮಸಮ್ಭೂತಂ, ವನ್ದೇ ಸಂಘಂ ನಿರಙ್ಗಣಂ.

(ಖ) ಸಾರಿಪುತ್ತಂ ಮಹಾಥೇರಂ, ಪರಿಯತ್ತಿವಿಸಾರದಂ;

ನಮಾಮಿ ಸನ್ತವುತ್ತಿಂ ಮೇ, ಗುರುಂ ಗಾರವಭಾಜನಂ.

(ಗ) ವನ್ದನ್ತೇನ ಮಯಾ ಏವಂ,

ಯಾ ಲದ್ಧಾ ಪುಞ್ಞಸಮ್ಪದಾ;

ಹಿತ್ವಾ ತಸ್ಸಾನುಭಾವೇನ,

ಅನ್ತರಾಯೇ ಅಸೇಸತೋ.

(ಘ) ಮಹಾವಿಹಾರವಾಸೀನಂ, ಥೇರಾನಂ ಥಿರಸೀಲಿನಂ;

ವಂಸಾಲಙ್ಕಾರಭೂತೇನ, ಭೂತಾನುಗ್ಗಹಕಾರಿನಾ.

(ಙ) ಥೇರೇನ ಬುದ್ಧದತ್ತೇನ, ರಚಿತಂ ಯಂ ಮನೋರಮಂ;

ಪಿಟಕೇ ಅಭಿಧಮ್ಮಸ್ಮಿಂ, ಓತಾರುಪಾಯಭಾವತೋ.

(ಚ) ಅಭಿಧಮ್ಮಾವತಾರೋತಿ, ಲದ್ಧನಾಮೇನ ವಿಸ್ಸುತಂ;

ನಾನಾನಿಪುಣಗಮ್ಭೀರನಯಂ ಪಕರಣುತ್ತಮಂ.

(ಛ) ಅತ್ಥಸಂವಣ್ಣನಂ ತಸ್ಸ, ಆರಭಿಸ್ಸಂ ಯಥಾಬಲಂ;

ಪಾಮೋಜ್ಜಜನನತ್ಥಾಯ, ಆಭಿಧಮ್ಮಿಕಭಿಕ್ಖುನನ್ತಿ.