೨. ಸಮುದಯಸುತ್ತಂ

೪೦೮. ‘‘ಚತುನ್ನಂ, ಭಿಕ್ಖವೇ, ಸತಿಪಟ್ಠಾನಾನಂ ಸಮುದಯಞ್ಚ ಅತ್ಥಙ್ಗಮಞ್ಚ ದೇಸೇಸ್ಸಾಮಿ. ತಂ ಸುಣಾಥ. ಕೋ ಚ, ಭಿಕ್ಖವೇ, ಕಾಯಸ್ಸ ಸಮುದಯೋ? ಆಹಾರಸಮುದಯಾ ಕಾಯಸ್ಸ ಸಮುದಯೋ; ಆಹಾರನಿರೋಧಾ ಕಾಯಸ್ಸ ಅತ್ಥಙ್ಗಮೋ. ಫಸ್ಸಸಮುದಯಾ ವೇದನಾನಂ ಸಮುದಯೋ; ಫಸ್ಸನಿರೋಧಾ ವೇದನಾನಂ ಅತ್ಥಙ್ಗಮೋ. ನಾಮರೂಪಸಮುದಯಾ ಚಿತ್ತಸ್ಸ ಸಮುದಯೋ; ನಾಮರೂಪನಿರೋಧಾ ಚಿತ್ತಸ್ಸ ಅತ್ಥಙ್ಗಮೋ. ಮನಸಿಕಾರಸಮುದಯಾ ಧಮ್ಮಾನಂ ಸಮುದಯೋ; ಮನಸಿಕಾರನಿರೋಧಾ ಧಮ್ಮಾನಂ ಅತ್ಥಙ್ಗಮೋ’’ತಿ. ದುತಿಯಂ.