೧೦. ಸೂಚಿಮುಖೀಸುತ್ತಂ

೩೪೧. ಏಕಂ ಸಮಯಂ ಆಯಸ್ಮಾ ಸಾರಿಪುತ್ತೋ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ಅಥ ಖೋ ಆಯಸ್ಮಾ ಸಾರಿಪುತ್ತೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ರಾಜಗಹೇ ಪಿಣ್ಡಾಯ ಪಾವಿಸಿ. ರಾಜಗಹೇ ಸಪದಾನಂ ಪಿಣ್ಡಾಯ ಚರಿತ್ವಾ ತಂ ಪಿಣ್ಡಪಾತಂ ಅಞ್ಞತರಂ ಕುಟ್ಟಮೂಲಂ [ಕುಡ್ಡಮೂಲಂ (ಸೀ. ಸ್ಯಾ. ಕಂ.), ಕುಡ್ಡಂ (ಪೀ.)] ನಿಸ್ಸಾಯ ಪರಿಭುಞ್ಜತಿ. ಅಥ ಖೋ ಸೂಚಿಮುಖೀ ಪರಿಬ್ಬಾಜಿಕಾ ಯೇನಾಯಸ್ಮಾ ಸಾರಿಪುತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಸಾರಿಪುತ್ತಂ ಏತದವೋಚ –

‘‘ಕಿಂ ನು ಖೋ, ಸಮಣ, ಅಧೋಮುಖೋ ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ಅಧೋಮುಖೋ ಭುಞ್ಜಾಮೀ’’ತಿ. ‘‘ತೇನ ಹಿ, ಸಮಣ, ಉಬ್ಭಮುಖೋ [ಉದ್ಧಂಮುಖೋ (ಸೀ. ಅಟ್ಠ.)] ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ಉಬ್ಭಮುಖೋ ಭುಞ್ಜಾಮೀ’’ತಿ. ‘‘ತೇನ ಹಿ, ಸಮಣ, ದಿಸಾಮುಖೋ ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ದಿಸಾಮುಖೋ ಭುಞ್ಜಾಮೀ’’ತಿ. ‘‘ತೇನ ಹಿ, ಸಮಣ, ವಿದಿಸಾಮುಖೋ ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ವಿದಿಸಾಮುಖೋ ಭುಞ್ಜಾಮೀ’’ತಿ.

‘‘‘ಕಿಂ ನು, ಸಮಣ, ಅಧೋಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ಅಧೋಮುಖೋ ಭುಞ್ಜಾಮೀ’ತಿ ವದೇಸಿ. ‘ತೇನ ಹಿ, ಸಮಣ, ಉಬ್ಭಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ಉಬ್ಭಮುಖೋ ಭುಞ್ಜಾಮೀ’ತಿ ವದೇಸಿ. ‘ತೇನ ಹಿ, ಸಮಣ, ದಿಸಾಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ದಿಸಾಮುಖೋ ಭುಞ್ಜಾಮೀ’ತಿ ವದೇಸಿ. ‘ತೇನ ಹಿ, ಸಮಣ, ವಿದಿಸಾಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ವಿದಿಸಾಮುಖೋ ಭುಞ್ಜಾಮೀ’ತಿ ವದೇಸಿ’’.

‘‘ಕಥಞ್ಚರಹಿ, ಸಮಣ, ಭುಞ್ಜಸೀ’’ತಿ? ‘‘ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ [ಸಮಣಾ ವಾ ಬ್ರಾಹ್ಮಣಾ ವಾ (ಸೀ.) ನಿಗಮನವಾಕ್ಯೇ ಪನ ಸಬ್ಬತ್ಥಾಪಿ ಸಮಾಸೋಯೇವ ದಿಸ್ಸತಿ] ವತ್ಥುವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ [ಜೀವಿತಂ (ಕ.)] ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ಅಧೋಮುಖಾ ಭುಞ್ಜನ್ತೀ’ತಿ. ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ ನಕ್ಖತ್ತವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ಉಬ್ಭಮುಖಾ ಭುಞ್ಜನ್ತೀ’ತಿ. ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ ದೂತೇಯ್ಯಪಹಿಣಗಮನಾನುಯೋಗಾಯ [… ನುಯೋಗಾ (ಸೀ. ಸ್ಯಾ. ಕಂ. ಪೀ.), … ನುಯೋಗೇನ (?)] ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ದಿಸಾಮುಖಾ ಭುಞ್ಜನ್ತೀ’ತಿ. ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ ಅಙ್ಗವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ವಿದಿಸಾಮುಖಾ ಭುಞ್ಜನ್ತೀ’’’ತಿ.

‘‘ಸೋ ಖ್ವಾಹಂ, ಭಗಿನಿ, ನ ವತ್ಥುವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ, ನ ನಕ್ಖತ್ತವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ, ನ ದೂತೇಯ್ಯಪಹಿಣಗಮನಾನುಯೋಗಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ, ನ ಅಙ್ಗವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ. ಧಮ್ಮೇನ ಭಿಕ್ಖಂ ಪರಿಯೇಸಾಮಿ; ಧಮ್ಮೇನ ಭಿಕ್ಖಂ ಪರಿಯೇಸಿತ್ವಾ ಭುಞ್ಜಾಮೀ’’ತಿ.

ಅಥ ಖೋ ಸೂಚಿಮುಖೀ ಪರಿಬ್ಬಾಜಿಕಾ ರಾಜಗಹೇ ರಥಿಯಾಯ ರಥಿಯಂ, ಸಿಙ್ಘಾಟಕೇನ ಸಿಙ್ಘಾಟಕಂ ಉಪಸಙ್ಕಮಿತ್ವಾ ಏವಮಾರೋಚೇಸಿ – ‘‘ಧಮ್ಮಿಕಂ ಸಮಣಾ ಸಕ್ಯಪುತ್ತಿಯಾ ಆಹಾರಂ ಆಹಾರೇನ್ತಿ; ಅನವಜ್ಜಂ [ಅನವಜ್ಜೇನ (ಕ.)] ಸಮಣಾ ಸಕ್ಯಪುತ್ತಿಯಾ ಆಹಾರಂ ಆಹಾರೇನ್ತಿ. ದೇಥ ಸಮಣಾನಂ ಸಕ್ಯಪುತ್ತಿಯಾನಂ ಪಿಣ್ಡ’’ನ್ತಿ. ದಸಮಂ.

ಸಾರಿಪುತ್ತಸಂಯುತ್ತಂ ಸಮತ್ತಂ.