೫೫. ವಿಞ್ಞಾಣಅಪ್ಪಚ್ಚಕ್ಖಕಮ್ಮಸುತ್ತಂ

೬೬೧. ಸಾವತ್ಥಿನಿದಾನಂ. ‘‘ವಿಞ್ಞಾಣೇ ಖೋ, ವಚ್ಛ, ಅಪ್ಪಚ್ಚಕ್ಖಕಮ್ಮಾ, ವಿಞ್ಞಾಣಸಮುದಯೇ ಅಪ್ಪಚ್ಚಕ್ಖಕಮ್ಮಾ, ವಿಞ್ಞಾಣನಿರೋಧೇ ಅಪ್ಪಚ್ಚಕ್ಖಕಮ್ಮಾ, ವಿಞ್ಞಾಣನಿರೋಧಗಾಮಿನಿಯಾ ಪಟಿಪದಾಯ ಅಪ್ಪಚ್ಚಕ್ಖಕಮ್ಮಾ; ಏವಮಿಮಾನಿ ಅನೇಕವಿಹಿತಾನಿ ದಿಟ್ಠಿಗತಾನಿ ಲೋಕೇ ಉಪ್ಪಜ್ಜನ್ತಿ – ಸಸ್ಸತೋ ಲೋಕೋತಿ ವಾ, ಅಸಸ್ಸತೋ ಲೋಕೋತಿ ವಾ…ಪೇ… ನೇವ ಹೋತಿ ನ ನ ಹೋತಿ ತಥಾಗತೋ ಪರಂ ಮರಣಾತಿ ವಾತಿ. ಅಯಂ ಖೋ, ವಚ್ಛ, ಹೇತು, ಅಯಂ ಪಚ್ಚಯೋ, ಯಾನಿಮಾನಿ ಅನೇಕವಿಹಿತಾನಿ ದಿಟ್ಠಿಗತಾನಿ ಲೋಕೇ ಉಪ್ಪಜ್ಜನ್ತಿ – ಸಸ್ಸತೋ ಲೋಕೋತಿ ವಾ, ಅಸಸ್ಸತೋ ಲೋಕೋತಿ ವಾ, ಅನ್ತವಾ ಲೋಕೋತಿ ವಾ, ಅನನ್ತವಾ ಲೋಕೋತಿ ವಾ, ತಂ ಜೀವಂ ತಂ ಸರೀರನ್ತಿ ವಾ, ಅಞ್ಞಂ ಜೀವಂ ಅಞ್ಞಂ ಸರೀರನ್ತಿ ವಾ, ಹೋತಿ ತಥಾಗತೋ ಪರಂ ಮರಣಾತಿ ವಾ, ನ ಹೋತಿ ತಥಾಗತೋ ಪರಂ ಮರಣಾತಿ ವಾ, ಹೋತಿ ಚ ನ ಚ ಹೋತಿ ತಥಾಗತೋ ಪರಂ ಮರಣಾತಿ ವಾ, ನೇವ ಹೋತಿ ನ ನ ಹೋತಿ ತಥಾಗತೋ ಪರಂ ಮರಣಾತಿ ವಾ’’ತಿ. ಪಞ್ಚಪಞ್ಞಾಸಮಂ.

ವಚ್ಛಗೋತ್ತಸಂಯುತ್ತಂ ಸಮತ್ತಂ.