೧೦. ಸಜ್ಝಾಯಸುತ್ತಂ

೨೩೦. ಏಕಂ ಸಮಯಂ ಅಞ್ಞತರೋ ಭಿಕ್ಖು ಕೋಸಲೇಸು ವಿಹರತಿ ಅಞ್ಞತರಸ್ಮಿಂ ವನಸಣ್ಡೇ. ತೇನ ಖೋ ಪನ ಸಮಯೇನ ಸೋ ಭಿಕ್ಖು ಯಂ ಸುದಂ ಪುಬ್ಬೇ ಅತಿವೇಲಂ ಸಜ್ಝಾಯಬಹುಲೋ ವಿಹರತಿ ಸೋ ಅಪರೇನ ಸಮಯೇನ ಅಪ್ಪೋಸ್ಸುಕ್ಕೋ ತುಣ್ಹೀಭೂತೋ ಸಙ್ಕಸಾಯತಿ. ಅಥ ಖೋ ಯಾ ತಸ್ಮಿಂ ವನಸಣ್ಡೇ ಅಧಿವತ್ಥಾ ದೇವತಾ ತಸ್ಸ ಭಿಕ್ಖುನೋ ಧಮ್ಮಂ ಅಸುಣನ್ತೀ ಯೇನ ಸೋ ಭಿಕ್ಖು ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಭಿಕ್ಖುಂ ಗಾಥಾಯ ಅಜ್ಝಭಾಸಿ –

‘‘ಕಸ್ಮಾ ತುವಂ ಧಮ್ಮಪದಾನಿ ಭಿಕ್ಖು, ನಾಧೀಯಸಿ ಭಿಕ್ಖೂಹಿ ಸಂವಸನ್ತೋ;

ಸುತ್ವಾನ ಧಮ್ಮಂ ಲಭತಿಪ್ಪಸಾದಂ, ದಿಟ್ಠೇವ ಧಮ್ಮೇ ಲಭತಿಪ್ಪಸಂಸ’’ನ್ತಿ.

‘‘ಅಹು ಪುರೇ ಧಮ್ಮಪದೇಸು ಛನ್ದೋ, ಯಾವ ವಿರಾಗೇನ ಸಮಾಗಮಿಮ್ಹ;

ಯತೋ ವಿರಾಗೇನ ಸಮಾಗಮಿಮ್ಹ, ಯಂ ಕಿಞ್ಚಿ ದಿಟ್ಠಂವ ಸುತಂ ಮುತಂ ವಾ;

ಅಞ್ಞಾಯ ನಿಕ್ಖೇಪನಮಾಹು ಸನ್ತೋ’’ತಿ.