೪. ನನ್ದನಸುತ್ತಂ

೯೫. ಏಕಮನ್ತಂ ಠಿತೋ ಖೋ ನನ್ದನೋ ದೇವಪುತ್ತೋ ಭಗವನ್ತಂ ಗಾಥಾಯ ಅಜ್ಝಭಾಸಿ –

‘‘ಪುಚ್ಛಾಮಿ ತಂ ಗೋತಮ ಭೂರಿಪಞ್ಞ,

ಅನಾವಟಂ ಭಗವತೋ ಞಾಣದಸ್ಸನಂ;

ಕಥಂವಿಧಂ ಸೀಲವನ್ತಂ ವದನ್ತಿ,

ಕಥಂವಿಧಂ ಪಞ್ಞವನ್ತಂ ವದನ್ತಿ;

ಕಥಂವಿಧೋ ದುಕ್ಖಮತಿಚ್ಚ ಇರಿಯತಿ,

ಕಥಂವಿಧಂ ದೇವತಾ ಪೂಜಯನ್ತೀ’’ತಿ.

‘‘ಯೋ ಸೀಲವಾ ಪಞ್ಞವಾ ಭಾವಿತತ್ತೋ,

ಸಮಾಹಿತೋ ಝಾನರತೋ ಸತೀಮಾ;

ಸಬ್ಬಸ್ಸ ಸೋಕಾ ವಿಗತಾ ಪಹೀನಾ,

ಖೀಣಾಸವೋ ಅನ್ತಿಮದೇಹಧಾರೀ.

‘‘ತಥಾವಿಧಂ ಸೀಲವನ್ತಂ ವದನ್ತಿ,

ತಥಾವಿಧಂ ಪಞ್ಞವನ್ತಂ ವದನ್ತಿ;

ತಥಾವಿಧೋ ದುಕ್ಖಮತಿಚ್ಚ ಇರಿಯತಿ,

ತಥಾವಿಧಂ ದೇವತಾ ಪೂಜಯನ್ತೀ’’ತಿ.