೬. ಕಾಮದಸುತ್ತಂ

೮೭. ಸಾವತ್ಥಿನಿದಾನಂ. ಏಕಮನ್ತಂ ಠಿತೋ ಖೋ ಕಾಮದೋ ದೇವಪುತ್ತೋ ಭಗವನ್ತಂ ಏತದವೋಚ – ‘‘ದುಕ್ಕರಂ ಭಗವಾ, ಸುದುಕ್ಕರಂ ಭಗವಾ’’ತಿ.

‘‘ದುಕ್ಕರಂ ವಾಪಿ ಕರೋನ್ತಿ (ಕಾಮದಾತಿ ಭಗವಾ),

ಸೇಖಾ ಸೀಲಸಮಾಹಿತಾ;

ಠಿತತ್ತಾ ಅನಗಾರಿಯುಪೇತಸ್ಸ,

ತುಟ್ಠಿ ಹೋತಿ ಸುಖಾವಹಾ’’ತಿ.

‘‘ದುಲ್ಲಭಾ ಭಗವಾ ಯದಿದಂ ತುಟ್ಠೀ’’ತಿ.

‘‘ದುಲ್ಲಭಂ ವಾಪಿ ಲಭನ್ತಿ (ಕಾಮದಾತಿ ಭಗವಾ),

ಚಿತ್ತವೂಪಸಮೇ ರತಾ;

ಯೇಸಂ ದಿವಾ ಚ ರತ್ತೋ ಚ,

ಭಾವನಾಯ ರತೋ ಮನೋ’’ತಿ.

‘‘ದುಸ್ಸಮಾದಹಂ ಭಗವಾ ಯದಿದಂ ಚಿತ್ತ’’ನ್ತಿ.

‘‘ದುಸ್ಸಮಾದಹಂ ವಾಪಿ ಸಮಾದಹನ್ತಿ (ಕಾಮದಾತಿ ಭಗವಾ),

ಇನ್ದ್ರಿಯೂಪಸಮೇ ರತಾ;

ತೇ ಛೇತ್ವಾ ಮಚ್ಚುನೋ ಜಾಲಂ,

ಅರಿಯಾ ಗಚ್ಛನ್ತಿ ಕಾಮದಾ’’ತಿ.

‘‘ದುಗ್ಗಮೋ ಭಗವಾ ವಿಸಮೋ ಮಗ್ಗೋ’’ತಿ.

‘‘ದುಗ್ಗಮೇ ವಿಸಮೇ ವಾಪಿ, ಅರಿಯಾ ಗಚ್ಛನ್ತಿ ಕಾಮದ;

ಅನರಿಯಾ ವಿಸಮೇ ಮಗ್ಗೇ, ಪಪತನ್ತಿ ಅವಂಸಿರಾ;

ಅರಿಯಾನಂ ಸಮೋ ಮಗ್ಗೋ, ಅರಿಯಾ ಹಿ ವಿಸಮೇ ಸಮಾ’’ತಿ.