೧೦. ಚೂಳಅಸ್ಸಪುರಸುತ್ತಂ

೪೩೫. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಅಙ್ಗೇಸು ವಿಹರತಿ ಅಸ್ಸಪುರಂ ನಾಮ ಅಙ್ಗಾನಂ ನಿಗಮೋ. ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ. ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ. ಭಗವಾ ಏತದವೋಚ – ‘‘ಸಮಣಾ ಸಮಣಾತಿ ವೋ, ಭಿಕ್ಖವೇ, ಜನೋ ಸಞ್ಜಾನಾತಿ. ತುಮ್ಹೇ ಚ ಪನ ‘ಕೇ ತುಮ್ಹೇ’ತಿ ಪುಟ್ಠಾ ಸಮಾನಾ ‘ಸಮಣಾಮ್ಹಾ’ತಿ ಪಟಿಜಾನಾಥ. ತೇಸಂ ವೋ, ಭಿಕ್ಖವೇ, ಏವಂಸಮಞ್ಞಾನಂ ಸತಂ ಏವಂಪಟಿಞ್ಞಾನಂ ಸತಂ – ‘ಯಾ ಸಮಣಸಾಮೀಚಿಪ್ಪಟಿಪದಾ ತಂ ಪಟಿಪಜ್ಜಿಸ್ಸಾಮ; ಏವಂ ನೋ ಅಯಂ ಅಮ್ಹಾಕಂ ಸಮಞ್ಞಾ ಚ ಸಚ್ಚಾ ಭವಿಸ್ಸತಿ ಪಟಿಞ್ಞಾ ಚ ಭೂತಾ; ಯೇಸಞ್ಚ ಮಯಂ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಂ ಪರಿಭುಞ್ಜಾಮ, ತೇಸಂ ತೇ ಕಾರಾ ಅಮ್ಹೇಸು ಮಹಪ್ಫಲಾ ಭವಿಸ್ಸನ್ತಿ ಮಹಾನಿಸಂಸಾ, ಅಮ್ಹಾಕಞ್ಚೇವಾಯಂ ಪಬ್ಬಜ್ಜಾ ಅವಞ್ಝಾ ಭವಿಸ್ಸತಿ ಸಫಲಾ ಸಉದ್ರಯಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬಂ.

೪೩೬. ‘‘ಕಥಞ್ಚ, ಭಿಕ್ಖವೇ, ಭಿಕ್ಖು ನ ಸಮಣಸಾಮೀಚಿಪ್ಪಟಿಪದಂ ಪಟಿಪನ್ನೋ ಹೋತಿ? ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುನೋ ಅಭಿಜ್ಝಾಲುಸ್ಸ ಅಭಿಜ್ಝಾ ಅಪ್ಪಹೀನಾ ಹೋತಿ, ಬ್ಯಾಪನ್ನಚಿತ್ತಸ್ಸ ಬ್ಯಾಪಾದೋ ಅಪ್ಪಹೀನೋ ಹೋತಿ, ಕೋಧನಸ್ಸ ಕೋಧೋ ಅಪ್ಪಹೀನೋ ಹೋತಿ, ಉಪನಾಹಿಸ್ಸ ಉಪನಾಹೋ ಅಪ್ಪಹೀನೋ ಹೋತಿ, ಮಕ್ಖಿಸ್ಸ ಮಕ್ಖೋ ಅಪ್ಪಹೀನೋ ಹೋತಿ, ಪಳಾಸಿಸ್ಸ ಪಳಾಸೋ ಅಪ್ಪಹೀನೋ ಹೋತಿ, ಇಸ್ಸುಕಿಸ್ಸ ಇಸ್ಸಾ ಅಪ್ಪಹೀನಾ ಹೋತಿ, ಮಚ್ಛರಿಸ್ಸ ಮಚ್ಛರಿಯಂ ಅಪ್ಪಹೀನಂ ಹೋತಿ, ಸಠಸ್ಸ ಸಾಠೇಯ್ಯಂ ಅಪ್ಪಹೀನಂ ಹೋತಿ, ಮಾಯಾವಿಸ್ಸ ಮಾಯಾ ಅಪ್ಪಹೀನಾ ಹೋತಿ, ಪಾಪಿಚ್ಛಸ್ಸ ಪಾಪಿಕಾ ಇಚ್ಛಾ ಅಪ್ಪಹೀನಾ ಹೋತಿ, ಮಿಚ್ಛಾದಿಟ್ಠಿಕಸ್ಸ ಮಿಚ್ಛಾದಿಟ್ಠಿ ಅಪ್ಪಹೀನಾ ಹೋತಿ – ಇಮೇಸಂ ಖೋ ಅಹಂ, ಭಿಕ್ಖವೇ, ಸಮಣಮಲಾನಂ ಸಮಣದೋಸಾನಂ ಸಮಣಕಸಟಾನಂ ಆಪಾಯಿಕಾನಂ ಠಾನಾನಂ ದುಗ್ಗತಿವೇದನಿಯಾನಂ ಅಪ್ಪಹಾನಾ ‘ನ ಸಮಣಸಾಮೀಚಿಪ್ಪಟಿಪದಂ ಪಟಿಪನ್ನೋ’ತಿ ವದಾಮಿ. ಸೇಯ್ಯಥಾಪಿ, ಭಿಕ್ಖವೇ, ಮತಜಂ ನಾಮ ಆವುಧಜಾತಂ ಉಭತೋಧಾರಂ ಪೀತನಿಸಿತಂ. ತದಸ್ಸ ಸಙ್ಘಾಟಿಯಾ ಸಮ್ಪಾರುತಂ ಸಮ್ಪಲಿವೇಠಿತಂ. ತಥೂಪಮಾಹಂ, ಭಿಕ್ಖವೇ, ಇಮಸ್ಸ ಭಿಕ್ಖುನೋ ಪಬ್ಬಜ್ಜಂ ವದಾಮಿ.

೪೩೭. ‘‘ನಾಹಂ, ಭಿಕ್ಖವೇ, ಸಙ್ಘಾಟಿಕಸ್ಸ ಸಙ್ಘಾಟಿಧಾರಣಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ಅಚೇಲಕಸ್ಸ ಅಚೇಲಕಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ರಜೋಜಲ್ಲಿಕಸ್ಸ ರಜೋಜಲ್ಲಿಕಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ಉದಕೋರೋಹಕಸ್ಸ ಉದಕೋರೋಹಣಮತ್ತೇನ [ಉದಕೋರೋಹಕಮತ್ತೇನ (ಸೀ. ಪೀ.)] ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ರುಕ್ಖಮೂಲಿಕಸ್ಸ ರುಕ್ಖಮೂಲಿಕಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ಅಬ್ಭೋಕಾಸಿಕಸ್ಸ ಅಬ್ಭೋಕಾಸಿಕಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ಉಬ್ಭಟ್ಠಕಸ್ಸ ಉಬ್ಭಟ್ಠಕಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ಪರಿಯಾಯಭತ್ತಿಕಸ್ಸ ಪರಿಯಾಯಭತ್ತಿಕಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ಮನ್ತಜ್ಝಾಯಕಸ್ಸ ಮನ್ತಜ್ಝಾಯಕಮತ್ತೇನ ಸಾಮಞ್ಞಂ ವದಾಮಿ. ನಾಹಂ, ಭಿಕ್ಖವೇ, ಜಟಿಲಕಸ್ಸ ಜಟಾಧಾರಣಮತ್ತೇನ ಸಾಮಞ್ಞಂ ವದಾಮಿ.

‘‘ಸಙ್ಘಾಟಿಕಸ್ಸ ಚೇ, ಭಿಕ್ಖವೇ, ಸಙ್ಘಾಟಿಧಾರಣಮತ್ತೇನ ಅಭಿಜ್ಝಾಲುಸ್ಸ ಅಭಿಜ್ಝಾ ಪಹೀಯೇಥ, ಬ್ಯಾಪನ್ನಚಿತ್ತಸ್ಸ ಬ್ಯಾಪಾದೋ ಪಹೀಯೇಥ, ಕೋಧನಸ್ಸ ಕೋಧೋ ಪಹೀಯೇಥ, ಉಪನಾಹಿಸ್ಸ ಉಪನಾಹೋ ಪಹೀಯೇಥ, ಮಕ್ಖಿಸ್ಸ ಮಕ್ಖೋ ಪಹೀಯೇಥ, ಪಳಾಸಿಸ್ಸ ಪಳಾಸೋ ಪಹೀಯೇಥ, ಇಸ್ಸುಕಿಸ್ಸ ಇಸ್ಸಾ ಪಹೀಯೇಥ, ಮಚ್ಛರಿಸ್ಸ ಮಚ್ಛರಿಯಂ ಪಹೀಯೇಥ, ಸಠಸ್ಸ ಸಾಠೇಯ್ಯಂ ಪಹೀಯೇಥ, ಮಾಯಾವಿಸ್ಸ ಮಾಯಾ ಪಹೀಯೇಥ, ಪಾಪಿಚ್ಛಸ್ಸ ಪಾಪಿಕಾ ಇಚ್ಛಾ ಪಹೀಯೇಥ, ಮಿಚ್ಛಾದಿಟ್ಠಿಕಸ್ಸ ಮಿಚ್ಛಾದಿಟ್ಠಿ ಪಹೀಯೇಥ, ತಮೇನಂ ಮಿತ್ತಾಮಚ್ಚಾ ಞಾತಿಸಾಲೋಹಿತಾ ಜಾತಮೇವ ನಂ ಸಙ್ಘಾಟಿಕಂ ಕರೇಯ್ಯುಂ, ಸಙ್ಘಾಟಿಕತ್ತಮೇವ [ಸಂಘಾಟೀಕತ್ತೇ ಚೇವ (ಕ.)] ಸಮಾದಪೇಯ್ಯುಂ – ‘ಏಹಿ ತ್ವಂ, ಭದ್ರಮುಖ, ಸಙ್ಘಾಟಿಕೋ ಹೋಹಿ, ಸಙ್ಘಾಟಿಕಸ್ಸ ತೇ ಸತೋ ಸಙ್ಘಾಟಿಧಾರಣಮತ್ತೇನ ಅಭಿಜ್ಝಾಲುಸ್ಸ ಅಭಿಜ್ಝಾ ಪಹೀಯಿಸ್ಸತಿ, ಬ್ಯಾಪನ್ನಚಿತ್ತಸ್ಸ ಬ್ಯಾಪಾದೋ ಪಹೀಯಿಸ್ಸತಿ, ಕೋಧನಸ್ಸ ಕೋಧೋ ಪಹೀಯಿಸ್ಸತಿ, ಉಪನಾಹಿಸ್ಸ ಉಪನಾಹೋ ಪಹೀಯಿಸ್ಸತಿ, ಮಕ್ಖಿಸ್ಸ ಮಕ್ಖೋ ಪಹೀಯಿಸ್ಸತಿ, ಪಳಾಸಿಸ್ಸ ಪಳಾಸೋ ಪಹೀಯಿಸ್ಸತಿ, ಇಸ್ಸುಕಿಸ್ಸ ಇಸ್ಸಾ ಪಹೀಯಿಸ್ಸತಿ, ಮಚ್ಛರಿಸ್ಸ ಮಚ್ಛರಿಯಂ ಪಹೀಯಿಸ್ಸತಿ, ಸಠಸ್ಸ ಸಾಠೇಯ್ಯಂ ಪಹೀಯಿಸ್ಸತಿ, ಮಾಯಾವಿಸ್ಸ ಮಾಯಾ ಪಹೀಯಿಸ್ಸತಿ, ಪಾಪಿಚ್ಛಸ್ಸ ಪಾಪಿಕಾ ಇಚ್ಛಾ ಪಹೀಯಿಸ್ಸತಿ, ಮಿಚ್ಛಾದಿಟ್ಠಿಕಸ್ಸ ಮಿಚ್ಛಾದಿಟ್ಠಿ ಪಹೀಯಿಸ್ಸತೀ’ತಿ. ಯಸ್ಮಾ ಚ ಖೋ ಅಹಂ, ಭಿಕ್ಖವೇ, ಸಙ್ಘಾಟಿಕಮ್ಪಿ ಇಧೇಕಚ್ಚಂ ಪಸ್ಸಾಮಿ ಅಭಿಜ್ಝಾಲುಂ ಬ್ಯಾಪನ್ನಚಿತ್ತಂ ಕೋಧನಂ ಉಪನಾಹಿಂ ಮಕ್ಖಿಂ ಪಳಾಸಿಂ ಇಸ್ಸುಕಿಂ ಮಚ್ಛರಿಂ ಸಠಂ ಮಾಯಾವಿಂ ಪಾಪಿಚ್ಛಂ ಮಿಚ್ಛಾದಿಟ್ಠಿಕಂ, ತಸ್ಮಾ ನ ಸಙ್ಘಾಟಿಕಸ್ಸ ಸಙ್ಘಾಟಿಧಾರಣಮತ್ತೇನ ಸಾಮಞ್ಞಂ ವದಾಮಿ.

‘‘ಅಚೇಲಕಸ್ಸ ಚೇ, ಭಿಕ್ಖವೇ…ಪೇ… ರಜೋಜಲ್ಲಿಕಸ್ಸ ಚೇ, ಭಿಕ್ಖವೇ…ಪೇ… ಉದಕೋರೋಹಕಸ್ಸ ಚೇ, ಭಿಕ್ಖವೇ…ಪೇ… ರುಕ್ಖಮೂಲಿಕಸ್ಸ ಚೇ, ಭಿಕ್ಖವೇ…ಪೇ… ಅಬ್ಭೋಕಾಸಿಕಸ್ಸ ಚೇ, ಭಿಕ್ಖವೇ…ಪೇ… ಉಬ್ಭಟ್ಠಕಸ್ಸ ಚೇ, ಭಿಕ್ಖವೇ…ಪೇ… ಪರಿಯಾಯಭತ್ತಿಕಸ್ಸ ಚೇ, ಭಿಕ್ಖವೇ…ಪೇ… ಮನ್ತಜ್ಝಾಯಕಸ್ಸ ಚೇ, ಭಿಕ್ಖವೇ…ಪೇ… ಜಟಿಲಕಸ್ಸ ಚೇ, ಭಿಕ್ಖವೇ, ಜಟಾಧಾರಣಮತ್ತೇನ ಅಭಿಜ್ಝಾಲುಸ್ಸ ಅಭಿಜ್ಝಾ ಪಹೀಯೇಥ, ಬ್ಯಾಪನ್ನಚಿತ್ತಸ್ಸ ಬ್ಯಾಪಾದೋ ಪಹೀಯೇಥ, ಕೋಧನಸ್ಸ ಕೋಧೋ ಪಹೀಯೇಥ, ಉಪನಾಹಿಸ್ಸ ಉಪನಾಹೋ ಪಹೀಯೇಥ, ಮಕ್ಖಿಸ್ಸ ಮಕ್ಖೋ ಪಹೀಯೇಥ, ಪಳಾಸಿಸ್ಸ ಪಳಾಸೋ ಪಹೀಯೇಥ, ಇಸ್ಸುಕಿಸ್ಸ ಇಸ್ಸಾ ಪಹೀಯೇಥ, ಮಚ್ಛರಿಸ್ಸ ಮಚ್ಛರಿಯಂ ಪಹೀಯೇಥ, ಸಠಸ್ಸ ಸಾಠೇಯ್ಯಂ ಪಹೀಯೇಥ, ಮಾಯಾವಿಸ್ಸ ಮಾಯಾ ಪಹೀಯೇಥ, ಪಾಪಿಚ್ಛಸ್ಸ ಪಾಪಿಕಾ ಇಚ್ಛಾ ಪಹೀಯೇಥ, ಮಿಚ್ಛಾದಿಟ್ಠಿಕಸ್ಸ ಮಿಚ್ಛಾದಿಟ್ಠಿ ಪಹೀಯೇಥ, ತಮೇನಂ ಮಿತ್ತಾಮಚ್ಚಾ ಞಾತಿಸಾಲೋಹಿತಾ ಜಾತಮೇವ ನಂ ಜಟಿಲಕಂ ಕರೇಯ್ಯುಂ, ಜಟಿಲಕತ್ತಮೇವ [ಜಟಿಲಕತ್ತೇ ಚೇವ (ಕ.)] ಸಮಾದಪೇಯ್ಯುಂ – ‘ಏಹಿ ತ್ವಂ, ಭದ್ರಮುಖ, ಜಟಿಲಕೋ ಹೋಹಿ, ಜಟಿಲಕಸ್ಸ ತೇ ಸತೋ ಜಟಾಧಾರಣಮತ್ತೇನ ಅಭಿಜ್ಝಾಲುಸ್ಸ ಅಭಿಜ್ಝಾ ಪಹೀಯಿಸ್ಸತಿ ಬ್ಯಾಪನ್ನಚಿತ್ತಸ್ಸ ಬ್ಯಾಪಾದೋ ಪಹೀಯಿಸ್ಸತಿ, ಕೋಧನಸ್ಸ ಕೋಧೋ ಪಹೀಯಿಸ್ಸತಿ…ಪೇ… ಪಾಪಿಚ್ಛಸ್ಸ ಪಾಪಿಕಾ ಇಚ್ಛಾ ಪಹೀಯಿಸ್ಸತಿ ಮಿಚ್ಛಾದಿಟ್ಠಿಕಸ್ಸ ಮಿಚ್ಛಾದಿಟ್ಠಿ ಪಹೀಯಿಸ್ಸತೀ’ತಿ. ಯಸ್ಮಾ ಚ ಖೋ ಅಹಂ, ಭಿಕ್ಖವೇ, ಜಟಿಲಕಮ್ಪಿ ಇಧೇಕಚ್ಚಂ ಪಸ್ಸಾಮಿ ಅಭಿಜ್ಝಾಲುಂ ಬ್ಯಾಪನ್ನಚಿತ್ತಂ ಕೋಧನಂ ಉಪನಾಹಿಂ ಮಕ್ಖಿಂ ಪಲಾಸಿಂ ಇಸ್ಸುಕಿಂ ಮಚ್ಛರಿಂ ಸಠಂ ಮಾಯಾವಿಂ ಪಾಪಿಚ್ಛಂ ಮಿಚ್ಛಾದಿಟ್ಠಿಂ, ತಸ್ಮಾ ನ ಜಟಿಲಕಸ್ಸ ಜಟಾಧಾರಣಮತ್ತೇನ ಸಾಮಞ್ಞಂ ವದಾಮಿ.

೪೩೮. ‘‘ಕಥಞ್ಚ, ಭಿಕ್ಖವೇ, ಭಿಕ್ಖು ಸಮಣಸಾಮೀಚಿಪ್ಪಟಿಪದಂ ಪಟಿಪನ್ನೋ ಹೋತಿ? ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುನೋ ಅಭಿಜ್ಝಾಲುಸ್ಸ ಅಭಿಜ್ಝಾ ಪಹೀನಾ ಹೋತಿ, ಬ್ಯಾಪನ್ನಚಿತ್ತಸ್ಸ ಬ್ಯಾಪಾದೋ ಪಹೀನೋ ಹೋತಿ, ಕೋಧನಸ್ಸ ಕೋಧೋ ಪಹೀನೋ ಹೋತಿ, ಉಪನಾಹಿಸ್ಸ ಉಪನಾಹೋ ಪಹೀನೋ ಹೋತಿ, ಮಕ್ಖಿಸ್ಸ ಮಕ್ಖೋ ಪಹೀನೋ ಹೋತಿ, ಪಳಾಸಿಸ್ಸ ಪಳಾಸೋ ಪಹೀನೋ ಹೋತಿ, ಇಸ್ಸುಕಿಸ್ಸ ಇಸ್ಸಾ ಪಹೀನಾ ಹೋತಿ, ಮಚ್ಛರಿಸ್ಸ ಮಚ್ಛರಿಯಂ ಪಹೀನಂ ಹೋತಿ, ಸಠಸ್ಸ ಸಾಠೇಯ್ಯಂ ಪಹೀನಂ ಹೋತಿ, ಮಾಯಾವಿಸ್ಸ ಮಾಯಾ ಪಹೀನಾ ಹೋತಿ, ಪಾಪಿಚ್ಛಸ್ಸ ಪಾಪಿಕಾ ಇಚ್ಛಾ ಪಹೀನಾ ಹೋತಿ, ಮಿಚ್ಛಾದಿಟ್ಠಿಕಸ್ಸ ಮಿಚ್ಛಾದಿಟ್ಠಿ ಪಹೀನಾ ಹೋತಿ – ಇಮೇಸಂ ಖೋ ಅಹಂ, ಭಿಕ್ಖವೇ, ಸಮಣಮಲಾನಂ ಸಮಣದೋಸಾನಂ ಸಮಣಕಸಟಾನಂ ಆಪಾಯಿಕಾನಂ ಠಾನಾನಂ ದುಗ್ಗತಿವೇದನಿಯಾನಂ ಪಹಾನಾ ‘ಸಮಣಸಾಮೀಚಿಪ್ಪಟಿಪದಂ ಪಟಿಪನ್ನೋ’ತಿ ವದಾಮಿ. ಸೋ ಸಬ್ಬೇಹಿ ಇಮೇಹಿ ಪಾಪಕೇಹಿ ಅಕುಸಲೇಹಿ ಧಮ್ಮೇಹಿ ವಿಸುದ್ಧಮತ್ತಾನಂ ಸಮನುಪಸ್ಸತಿ ( ) [(ವಿಮುತ್ತಮತ್ತಾನಂ ಸಮನುಪಸ್ಸತಿ) (ಸೀ. ಸ್ಯಾ. ಕಂ. ಪೀ.)]. ತಸ್ಸ ಸಬ್ಬೇಹಿ ಇಮೇಹಿ ಪಾಪಕೇಹಿ ಅಕುಸಲೇಹಿ ಧಮ್ಮೇಹಿ ವಿಸುದ್ಧಮತ್ತಾನಂ ಸಮನುಪಸ್ಸತೋ ( ) [(ವಿಮುತ್ತಮತ್ತಾನಂ ಸಮನುಪಸ್ಸತೋ) (ಸೀ. ಸ್ಯಾ. ಕಂ. ಪೀ.)] ಪಾಮೋಜ್ಜಂ ಜಾಯತಿ, ಪಮುದಿತಸ್ಸ ಪೀತಿ ಜಾಯತಿ, ಪೀತಿಮನಸ್ಸ ಕಾಯೋ ಪಸ್ಸಮ್ಭತಿ, ಪಸ್ಸದ್ಧಕಾಯೋ ಸುಖಂ ವೇದೇತಿ, ಸುಖಿನೋ ಚಿತ್ತಂ ಸಮಾಧಿಯತಿ.

‘‘ಸೋ ಮೇತ್ತಾಸಹಗತೇನ ಚೇತಸಾ ಏಕಂ ದಿಸಂ ಫರಿತ್ವಾ ವಿಹರತಿ, ತಥಾ ದುತಿಯಂ, ತಥಾ ತತಿಯಂ, ತಥಾ ಚತುತ್ಥಂ. ಇತಿ ಉದ್ಧಮಧೋ ತಿರಿಯಂ ಸಬ್ಬಧಿ ಸಬ್ಬತ್ತತಾಯ ಸಬ್ಬಾವನ್ತಂ ಲೋಕಂ ಮೇತ್ತಾಸಹಗತೇನ ಚೇತಸಾ ವಿಪುಲೇನ ಮಹಗ್ಗತೇನ ಅಪ್ಪಮಾಣೇನ ಅವೇರೇನ ಅಬ್ಯಾಬಜ್ಝೇನ ಫರಿತ್ವಾ ವಿಹರತಿ. ಕರುಣಾಸಹಗತೇನ ಚೇತಸಾ…ಪೇ… ಮುದಿತಾಸಹಗತೇನ ಚೇತಸಾ…ಪೇ… ಉಪೇಕ್ಖಾಸಹಗತೇನ ಚೇತಸಾ ಏಕಂ ದಿಸಂ ಫರಿತ್ವಾ ವಿಹರತಿ, ತಥಾ ದುತಿಯಂ, ತಥಾ ತತಿಯಂ, ತಥಾ ಚತುತ್ಥಂ. ಇತಿ ಉದ್ಧಮಧೋ ತಿರಿಯಂ ಸಬ್ಬಧಿ ಸಬ್ಬತ್ತತಾಯ ಸಬ್ಬಾವನ್ತಂ ಲೋಕಂ ಉಪೇಕ್ಖಾಸಹಗತೇನ ಚೇತಸಾ ವಿಪುಲೇನ ಮಹಗ್ಗತೇನ ಅಪ್ಪಮಾಣೇನ ಅವೇರೇನ ಅಬ್ಯಾಬಜ್ಝೇನ ಫರಿತ್ವಾ ವಿಹರತಿ. ಸೇಯ್ಯಥಾಪಿ, ಭಿಕ್ಖವೇ, ಪೋಕ್ಖರಣೀ ಅಚ್ಛೋದಕಾ ಸಾತೋದಕಾ ಸೀತೋದಕಾ ಸೇತಕಾ ಸುಪತಿತ್ಥಾ ರಮಣೀಯಾ. ಪುರತ್ಥಿಮಾಯ ಚೇಪಿ ದಿಸಾಯ ಪುರಿಸೋ ಆಗಚ್ಛೇಯ್ಯ ಘಮ್ಮಾಭಿತತ್ತೋ ಘಮ್ಮಪರೇತೋ ಕಿಲನ್ತೋ ತಸಿತೋ ಪಿಪಾಸಿತೋ. ಸೋ ತಂ ಪೋಕ್ಖರಣಿಂ ಆಗಮ್ಮ ವಿನೇಯ್ಯ ಉದಕಪಿಪಾಸಂ ವಿನೇಯ್ಯ ಘಮ್ಮಪರಿಳಾಹಂ…ಪೇ… ಪಚ್ಛಿಮಾಯ ಚೇಪಿ ದಿಸಾಯ ಪುರಿಸೋ ಆಗಚ್ಛೇಯ್ಯ…ಪೇ… ಉತ್ತರಾಯ ಚೇಪಿ ದಿಸಾಯ ಪುರಿಸೋ ಆಗಚ್ಛೇಯ್ಯ…ಪೇ… ದಕ್ಖಿಣಾಯ ಚೇಪಿ ದಿಸಾಯ ಪುರಿಸೋ ಆಗಚ್ಛೇಯ್ಯ. ಯತೋ ಕುತೋ ಚೇಪಿ ನಂ ಪುರಿಸೋ ಆಗಚ್ಛೇಯ್ಯ ಘಮ್ಮಾಭಿತತ್ತೋ ಘಮ್ಮಪರೇತೋ, ಕಿಲನ್ತೋ ತಸಿತೋ ಪಿಪಾಸಿತೋ. ಸೋ ತಂ ಪೋಕ್ಖರಣಿಂ ಆಗಮ್ಮ ವಿನೇಯ್ಯ ಉದಕಪಿಪಾಸಂ, ವಿನೇಯ್ಯ ಘಮ್ಮಪರಿಳಾಹಂ. ಏವಮೇವ ಖೋ, ಭಿಕ್ಖವೇ, ಖತ್ತಿಯಕುಲಾ ಚೇಪಿ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತೋ ಹೋತಿ, ಸೋ ಚ ತಥಾಗತಪ್ಪವೇದಿತಂ ಧಮ್ಮವಿನಯಂ ಆಗಮ್ಮ, ಏವಂ ಮೇತ್ತಂ ಕರುಣಂ ಮುದಿತಂ ಉಪೇಕ್ಖಂ ಭಾವೇತ್ವಾ ಲಭತಿ ಅಜ್ಝತ್ತಂ [ತಮಹಂ (ಕ.)] ವೂಪಸಮಂ [ತಮಹಂ (ಕ.)]. ಅಜ್ಝತ್ತಂ ವೂಪಸಮಾ ‘ಸಮಣಸಾಮೀಚಿಪ್ಪಟಿಪದಂ ಪಟಿಪನ್ನೋ’ತಿ ವದಾಮಿ. ಬ್ರಾಹ್ಮಣಕುಲಾ ಚೇಪಿ…ಪೇ… ವೇಸ್ಸಕುಲಾ ಚೇಪಿ…ಪೇ… ಸುದ್ದಕುಲಾ ಚೇಪಿ…ಪೇ… ಯಸ್ಮಾ ಕಸ್ಮಾ ಚೇಪಿ ಕುಲಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತೋ ಹೋತಿ, ಸೋ ಚ ತಥಾಗತಪ್ಪವೇದಿತಂ ಧಮ್ಮವಿನಯಂ ಆಗಮ್ಮ, ಏವಂ ಮೇತ್ತಂ ಕರುಣಂ ಮುದಿತಂ ಉಪೇಕ್ಖಂ ಭಾವೇತ್ವಾ ಲಭತಿ ಅಜ್ಝತ್ತಂ ವೂಪಸಮಂ. ಅಜ್ಝತ್ತಂ ವೂಪಸಮಾ ‘ಸಮಣಸಾಮೀಚಿಪ್ಪಟಿಪದಂ ಪಟಿಪನ್ನೋ’ತಿ ವದಾಮಿ.

‘‘ಖತ್ತಿಯಕುಲಾ ಚೇಪಿ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತೋ ಹೋತಿ. ಸೋ ಚ ಆಸವಾನಂ ಖಯಾ ಅನಾಸವಂ ಚೇತೋವಿಮುತ್ತಿಂ ಪಞ್ಞಾವಿಮುತ್ತಿಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರತಿ. ಆಸವಾನಂ ಖಯಾ ಸಮಣೋ ಹೋತಿ. ಬ್ರಾಹ್ಮಣಕುಲಾ ಚೇಪಿ…ಪೇ… ವೇಸ್ಸಕುಲಾ ಚೇಪಿ… ಸುದ್ದಕುಲಾ ಚೇಪಿ… ಯಸ್ಮಾ ಕಸ್ಮಾ ಚೇಪಿ ಕುಲಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತೋ ಹೋತಿ, ಸೋ ಚ ಆಸವಾನಂ ಖಯಾ ಅನಾಸವಂ ಚೇತೋವಿಮುತ್ತಿಂ ಪಞ್ಞಾವಿಮುತ್ತಿಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರತಿ. ಆಸವಾನಂ ಖಯಾ ಸಮಣೋ ಹೋತೀ’’ತಿ.

ಇದಮವೋಚ ಭಗವಾ. ಅತ್ತಮನಾ ತೇ ಭಿಕ್ಖೂ ಭಗವತೋ ಭಾಸಿತಂ ಅಭಿನನ್ದುನ್ತಿ.

ಚೂಳಅಸ್ಸಪುರಸುತ್ತಂ ನಿಟ್ಠಿತಂ ದಸಮಂ.

ಮಹಾಯಮಕವಗ್ಗೋ ನಿಟ್ಠಿತೋ ಚತುತ್ಥೋ.