೮. ಸಙ್ಗಾಮಜಿಸುತ್ತಂ

೮. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಸಙ್ಗಾಮಜಿ ಸಾವತ್ಥಿಂ ಅನುಪ್ಪತ್ತೋ ಹೋತಿ ಭಗವನ್ತಂ ದಸ್ಸನಾಯ. ಅಸ್ಸೋಸಿ ಖೋ ಆಯಸ್ಮತೋ ಸಙ್ಗಾಮಜಿಸ್ಸ ಪುರಾಣದುತಿಯಿಕಾ – ‘‘ಅಯ್ಯೋ ಕಿರ ಸಙ್ಗಾಮಜಿ ಸಾವತ್ಥಿಂ ಅನುಪ್ಪತ್ತೋ’’ತಿ. ಸಾ ದಾರಕಂ ಆದಾಯ ಜೇತವನಂ ಅಗಮಾಸಿ.

ತೇನ ಖೋ ಪನ ಸಮಯೇನ ಆಯಸ್ಮಾ ಸಙ್ಗಾಮಜಿ ಅಞ್ಞತರಸ್ಮಿಂ ರುಕ್ಖಮೂಲೇ ದಿವಾವಿಹಾರಂ ನಿಸಿನ್ನೋ ಹೋತಿ. ಅಥ ಖೋ ಆಯಸ್ಮತೋ ಸಙ್ಗಾಮಜಿಸ್ಸ ಪುರಾಣದುತಿಯಿಕಾ ಯೇನಾಯಸ್ಮಾ ಸಙ್ಗಾಮಜಿ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಸಙ್ಗಾಮಜಿಂ ಏತದವೋಚ – ‘‘ಖುದ್ದಪುತ್ತಞ್ಹಿ [ಖುದ್ದಪುತ್ತಾಮ್ಹಿ (ಸೀ.)], ಸಮಣ, ಪೋಸ ಮ’’ನ್ತಿ. ಏವಂ ವುತ್ತೇ, ಆಯಸ್ಮಾ ಸಙ್ಗಾಮಜಿ ತುಣ್ಹೀ ಅಹೋಸಿ.

ದುತಿಯಮ್ಪಿ ಖೋ ಆಯಸ್ಮತೋ ಸಙ್ಗಾಮಜಿಸ್ಸ ಪುರಾಣದುತಿಯಿಕಾ ಆಯಸ್ಮನ್ತಂ ಸಙ್ಗಾಮಜಿಂ ಏತದವೋಚ – ‘‘ಖುದ್ದಪುತ್ತಞ್ಹಿ, ಸಮಣ, ಪೋಸ ಮ’’ನ್ತಿ. ದುತಿಯಮ್ಪಿ ಖೋ ಆಯಸ್ಮಾ ಸಙ್ಗಾಮಜಿ ತುಣ್ಹೀ ಅಹೋಸಿ.

ತತಿಯಮ್ಪಿ ಖೋ ಆಯಸ್ಮತೋ ಸಙ್ಗಾಮಜಿಸ್ಸ ಪುರಾಣದುತಿಯಿಕಾ ಆಯಸ್ಮನ್ತಂ ಸಙ್ಗಾಮಜಿಂ ಏತದವೋಚ – ‘‘ಖುದ್ದಪುತ್ತಞ್ಹಿ, ಸಮಣ, ಪೋಸ ಮ’’ನ್ತಿ. ತತಿಯಮ್ಪಿ ಖೋ ಆಯಸ್ಮಾ ಸಙ್ಗಾಮಜಿ ತುಣ್ಹೀ ಅಹೋಸಿ.

ಅಥ ಖೋ ಆಯಸ್ಮತೋ ಸಙ್ಗಾಮಜಿಸ್ಸ ಪುರಾಣದುತಿಯಿಕಾ ತಂ ದಾರಕಂ ಆಯಸ್ಮತೋ ಸಙ್ಗಾಮಜಿಸ್ಸ ಪುರತೋ ನಿಕ್ಖಿಪಿತ್ವಾ ಪಕ್ಕಾಮಿ [ಪಕ್ಕಮಿ (ಕ.) ಏವಮುಪರಿಪಿ] – ‘‘ಏಸೋ [ಏಸ (ಸೀ. ಕ.)] ತೇ, ಸಮಣ, ಪುತ್ತೋ; ಪೋಸ ನ’’ನ್ತಿ.

ಅಥ ಖೋ ಆಯಸ್ಮಾ ಸಙ್ಗಾಮಜಿ ತಂ ದಾರಕಂ ನೇವ ಓಲೋಕೇಸಿ ನಾಪಿ ಆಲಪಿ. ಅಥ ಖೋ ಆಯಸ್ಮತೋ ಸಙ್ಗಾಮಜಿಸ್ಸ ಪುರಾಣದುತಿಯಿಕಾ ಅವಿದೂರಂ [ಅವಿದೂರೇ (ಸ್ಯಾ. ಪೀ.)] ಗನ್ತ್ವಾ ಅಪಲೋಕೇನ್ತೀ ಅದ್ದಸ ಆಯಸ್ಮನ್ತಂ ಸಙ್ಗಾಮಜಿಂ ತಂ ದಾರಕಂ ನೇವ ಓಲೋಕೇನ್ತಂ ನಾಪಿ ಆಲಪನ್ತಂ, ದಿಸ್ವಾನಸ್ಸಾ ಏತದಹೋಸಿ – ‘‘ನ ಚಾಯಂ ಸಮಣೋ ಪುತ್ತೇನಪಿ ಅತ್ಥಿಕೋ’’ತಿ. ತತೋ ಪಟಿನಿವತ್ತಿತ್ವಾ ದಾರಕಂ ಆದಾಯ ಪಕ್ಕಾಮಿ. ಅದ್ದಸಾ ಖೋ ಭಗವಾ ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ಆಯಸ್ಮತೋ ಸಙ್ಗಾಮಜಿಸ್ಸ ಪುರಾಣದುತಿಯಿಕಾಯ ಏವರೂಪಂ ವಿಪ್ಪಕಾರಂ.

ಅಥ ಖೋ ಭಗವಾ ಏತಮತ್ಥಂ ವಿದಿತ್ವಾ ತಾಯಂ ವೇಲಾಯಂ ಇಮಂ ಉದಾನಂ ಉದಾನೇಸಿ –

‘‘ಆಯನ್ತಿಂ ನಾಭಿನನ್ದತಿ, ಪಕ್ಕಮನ್ತಿಂ ನ ಸೋಚತಿ;

ಸಙ್ಗಾ ಸಙ್ಗಾಮಜಿಂ ಮುತ್ತಂ, ತಮಹಂ ಬ್ರೂಮಿ ಬ್ರಾಹ್ಮಣ’’ನ್ತಿ. ಅಟ್ಠಮಂ;