೩. ಮೋದಕದಾಯಿಕಾಥೇರೀಅಪದಾನಂ

೩೦. ‘‘ನಗರೇ ಬನ್ಧುಮತಿಯಾ, ಕುಮ್ಭದಾಸೀ ಅಹೋಸಹಂ;

ಮಮ ಭಾಗಂ ಗಹೇತ್ವಾನ, ಗಚ್ಛಂ ಉದಕಹಾರಿಕಾ [ಉದಕಹಾರಿಕಂ (ಸೀ.), ಉದಕಹಾರಿಕೇ (ಸ್ಯಾ.)].

೩೧. ‘‘ಪನ್ಥಮ್ಹಿ ಸಮಣಂ ದಿಸ್ವಾ, ಸನ್ತಚಿತ್ತಂ ಸಮಾಹತಂ;

ಪಸನ್ನಚಿತ್ತಾ ಸುಮನಾ, ಮೋದಕೇ ತೀಣಿದಾಸಹಂ.

೩೨. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಏಕನವುತಿಕಪ್ಪಾನಿ [ಏಕೂನತಿಂಸಕಪ್ಪಾನಿ (ಸ್ಯಾ.)], ವಿನಿಪಾತಂ ನಗಚ್ಛಹಂ.

೩೩. ‘‘ಸಮ್ಪತ್ತಿ ತಂ [ಸಮ್ಪತ್ತಿಞ್ಚ (ಸ್ಯಾ.), ಸಮ್ಪತ್ತಿಕಂ (ಕ.)] ಕರಿತ್ವಾನ, ಸಬ್ಬಂ ಅನುಭವಿಂ ಅಹಂ;

ಮೋದಕೇ ತೀಣಿ ದತ್ವಾನ, ಪತ್ತಾಹಂ ಅಚಲಂ ಪದಂ.

೩೪. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೩೫. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೩೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಮೋದಕದಾಯಿಕಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮೋದಕದಾಯಿಕಾಥೇರಿಯಾಪದಾನಂ ತತಿಯಂ.