೭. ನನ್ದಮಾಣವಪುಚ್ಛಾ

೧೦೮೩. ‘‘ಸನ್ತಿ ಲೋಕೇ ಮುನಯೋ, (ಇಚ್ಚಾಯಸ್ಮಾ ನನ್ದೋ)

ಜನಾ ವದನ್ತಿ ತಯಿದಂ ಕಥಂಸು;

ಞಾಣೂಪಪನ್ನಂ ನೋ ಮುನಿಂ [ಮುನಿ ನೋ (ಸ್ಯಾ. ಕ.)] ವದನ್ತಿ, ಉದಾಹು ವೇ ಜೀವಿತೇನೂಪಪನ್ನಂ’’.

೧೦೮೪. ‘‘ನ ದಿಟ್ಠಿಯಾ ನ ಸುತಿಯಾ ನ ಞಾಣೇನ, (ನ ಸೀಲಬ್ಬತೇನ) [( ) ನತ್ಥಿ ಸೀ.-ಪೀ ಪೋತ್ಥಕೇಸು]

ಮುನೀಧ ನನ್ದ ಕುಸಲಾ ವದನ್ತಿ;

ವಿಸೇನಿಕತ್ವಾ ಅನೀಘಾ ನಿರಾಸಾ, ಚರನ್ತಿ ಯೇ ತೇ ಮುನಯೋತಿ ಬ್ರೂಮಿ’’.

೧೦೮೫. ‘‘ಯೇ ಕೇಚಿಮೇ ಸಮಣಬ್ರಾಹ್ಮಣಾಸೇ, (ಇಚ್ಚಾಯಸ್ಮಾ ನನ್ದೋ)

ದಿಟ್ಠಸ್ಸುತೇನಾಪಿ [ದಿಟ್ಠೇನ ಸುತೇನಾಪಿ (ಸೀ.), ದಿಟ್ಠೇ ಸುತೇನಾಪಿ (ಸ್ಯಾ. ಪೀ. ಕ.)] ವದನ್ತಿ ಸುದ್ಧಿಂ;

ಸೀಲಬ್ಬತೇನಾಪಿ ವದನ್ತಿ ಸುದ್ಧಿಂ, ಅನೇಕರೂಪೇನ ವದನ್ತಿ ಸುದ್ಧಿಂ;

ಕಚ್ಚಿಸ್ಸು ತೇ ಭಗವಾ ತತ್ಥ ಯತಾ ಚರನ್ತಾ, ಅತಾರು ಜಾತಿಞ್ಚ ಜರಞ್ಚ ಮಾರಿಸ;

ಪುಚ್ಛಾಮಿ ತಂ ಭಗವಾ ಬ್ರೂಹಿ ಮೇ ತಂ’’.

೧೦೮೬. ‘‘ಯೇ ಕೇಚಿಮೇ ಸಮಣಬ್ರಾಹ್ಮಣಾಸೇ, (ನನ್ದಾತಿ ಭಗವಾ)

ದಿಟ್ಠಸ್ಸುತೇನಾಪಿ ವದನ್ತಿ ಸುದ್ಧಿಂ;

ಸೀಲಬ್ಬತೇನಾಪಿ ವದನ್ತಿ ಸುದ್ಧಿಂ, ಅನೇಕರೂಪೇನ ವದನ್ತಿ ಸುದ್ಧಿಂ;

ಕಿಞ್ಚಾಪಿ ತೇ ತತ್ಥ ಯತಾ ಚರನ್ತಿ, ನಾರಿಂಸು ಜಾತಿಜರನ್ತಿ ಬ್ರೂಮಿ’’.

೧೦೮೭. ‘‘ಯೇ ಕೇಚಿಮೇ ಸಮಣಬ್ರಾಹ್ಮಣಾಸೇ, (ಇಚ್ಚಾಯಸ್ಮಾ ನನ್ದೋ)

ದಿಟ್ಠಸ್ಸುತೇನಾಪಿ ವದನ್ತಿ ಸುದ್ಧಿಂ;

ಸೀಲಬ್ಬತೇನಾಪಿ ವದನ್ತಿ ಸುದ್ಧಿಂ, ಅನೇಕರೂಪೇನ ವದನ್ತಿ ಸುದ್ಧಿಂ;

ತೇ ಚೇ ಮುನಿ [ಸಚೇ ಮುನಿ (ಸೀ.)] ಬ್ರೂಸಿ ಅನೋಘತಿಣ್ಣೇ, ಅಥ ಕೋ ಚರಹಿ ದೇವಮನುಸ್ಸಲೋಕೇ;

ಅತಾರಿ ಜಾತಿಞ್ಚ ಜರಞ್ಚ ಮಾರಿಸ, ಪುಚ್ಛಾಮಿ ತಂ ಭಗವಾ ಬ್ರೂಹಿ ಮೇ ತಂ’’.

೧೦೮೮. ‘‘ನಾಹಂ ಸಬ್ಬೇ ಸಮಣಬ್ರಾಹ್ಮಣಾಸೇ, (ನನ್ದಾತಿ ಭಗವಾ)

ಜಾತಿಜರಾಯ ನಿವುತಾತಿ ಬ್ರೂಮಿ;

ಯೇ ಸೀಧ ದಿಟ್ಠಂವ ಸುತಂ ಮುತಂ ವಾ, ಸೀಲಬ್ಬತಂ ವಾಪಿ ಪಹಾಯ ಸಬ್ಬಂ;

ಅನೇಕರೂಪಮ್ಪಿ ಪಹಾಯ ಸಬ್ಬಂ, ತಣ್ಹಂ ಪರಿಞ್ಞಾಯ ಅನಾಸವಾಸೇ;

ತೇ ವೇ ನರಾ ಓಘತಿಣ್ಣಾತಿ ಬ್ರೂಮಿ’’.

೧೦೮೯. ‘‘ಏತಾಭಿನನ್ದಾಮಿ ವಚೋ ಮಹೇಸಿನೋ, ಸುಕಿತ್ತಿತಂ ಗೋತಮನೂಪಧೀಕಂ;

ಯೇ ಸೀಧ ದಿಟ್ಠಂ ವ ಸುತಂ ಮುತಂ ವಾ, ಸೀಲಬ್ಬತಂ ವಾಪಿ ಪಹಾಯ ಸಬ್ಬಂ;

ಅನೇಕರೂಪಮ್ಪಿ ಪಹಾಯ ಸಬ್ಬಂ, ತಣ್ಹಂ ಪರಿಞ್ಞಾಯ ಅನಾಸವಾಸೇ;

ಅಹಮ್ಪಿ ತೇ ಓಘತಿಣ್ಣಾತಿ ಬ್ರೂಮೀ’’ತಿ.

ನನ್ದಮಾಣವಪುಚ್ಛಾ ಸತ್ತಮಾ ನಿಟ್ಠಿತಾ.