೧೦. ಪುರಾಭೇದಸುತ್ತಂ

೮೫೪. ‘‘ಕಥಂದಸ್ಸೀ ಕಥಂಸೀಲೋ, ಉಪಸನ್ತೋತಿ ವುಚ್ಚತಿ;

ತಂ ಮೇ ಗೋತಮ ಪಬ್ರೂಹಿ, ಪುಚ್ಛಿತೋ ಉತ್ತಮಂ ನರಂ’’.

೮೫೫. ‘‘ವೀತತಣ್ಹೋ ಪುರಾ ಭೇದಾ, (ಇತಿ ಭಗವಾ) ಪುಬ್ಬಮನ್ತಮನಿಸ್ಸಿತೋ;

ವೇಮಜ್ಝೇ ನುಪಸಙ್ಖೇಯ್ಯೋ, ತಸ್ಸ ನತ್ಥಿ ಪುರಕ್ಖತಂ.

೮೫೬. ‘‘ಅಕ್ಕೋಧನೋ ಅಸನ್ತಾಸೀ, ಅವಿಕತ್ಥೀ ಅಕುಕ್ಕುಚೋ;

ಮನ್ತಭಾಣೀ [ಮನ್ತಾಭಾಣೀ (ಸ್ಯಾ. ಪೀ.)] ಅನುದ್ಧತೋ, ಸ ವೇ ವಾಚಾಯತೋ ಮುನಿ.

೮೫೭. ‘‘ನಿರಾಸತ್ತಿ ಅನಾಗತೇ, ಅತೀತಂ ನಾನುಸೋಚತಿ;

ವಿವೇಕದಸ್ಸೀ ಫಸ್ಸೇಸು, ದಿಟ್ಠೀಸು ಚ ನ ನೀಯತಿ [ನಿಯ್ಯತಿ (ಬಹೂಸು)].

೮೫೮. ‘‘ಪತಿಲೀನೋ ಅಕುಹಕೋ, ಅಪಿಹಾಲು ಅಮಚ್ಛರೀ;

ಅಪ್ಪಗಬ್ಭೋ ಅಜೇಗುಚ್ಛೋ, ಪೇಸುಣೇಯ್ಯೇ ಚ ನೋ ಯುತೋ.

೮೫೯. ‘‘ಸಾತಿಯೇಸು ಅನಸ್ಸಾವೀ, ಅತಿಮಾನೇ ಚ ನೋ ಯುತೋ;

ಸಣ್ಹೋ ಚ ಪಟಿಭಾನವಾ [ಪಟಿಭಾಣವಾ (ಸ್ಯಾ. ಪೀ.)], ನ ಸದ್ಧೋ ನ ವಿರಜ್ಜತಿ.

೮೬೦. ‘‘ಲಾಭಕಮ್ಯಾ ನ ಸಿಕ್ಖತಿ, ಅಲಾಭೇ ಚ ನ ಕುಪ್ಪತಿ;

ಅವಿರುದ್ಧೋ ಚ ತಣ್ಹಾಯ, ರಸೇಸು ನಾನುಗಿಜ್ಝತಿ.

೮೬೧. ‘‘ಉಪೇಕ್ಖಕೋ ಸದಾ ಸತೋ, ನ ಲೋಕೇ ಮಞ್ಞತೇ ಸಮಂ;

ನ ವಿಸೇಸೀ ನ ನೀಚೇಯ್ಯೋ, ತಸ್ಸ ನೋ ಸನ್ತಿ ಉಸ್ಸದಾ.

೮೬೨. ‘‘ಯಸ್ಸ ನಿಸ್ಸಯನಾ [ನಿಸ್ಸಯತಾ (ಸೀ. ಸ್ಯಾ. ಪೀ.)] ನತ್ಥಿ, ಞತ್ವಾ ಧಮ್ಮಂ ಅನಿಸ್ಸಿತೋ;

ಭವಾಯ ವಿಭವಾಯ ವಾ, ತಣ್ಹಾ ಯಸ್ಸ ನ ವಿಜ್ಜತಿ.

೮೬೩. ‘‘ತಂ ಬ್ರೂಮಿ ಉಪಸನ್ತೋತಿ, ಕಾಮೇಸು ಅನಪೇಕ್ಖಿನಂ;

ಗನ್ಥಾ ತಸ್ಸ ನ ವಿಜ್ಜನ್ತಿ, ಅತರೀ ಸೋ ವಿಸತ್ತಿಕಂ.

೮೬೪. ‘‘ನ ತಸ್ಸ ಪುತ್ತಾ ಪಸವೋ, ಖೇತ್ತಂ ವತ್ಥುಞ್ಚ ವಿಜ್ಜತಿ;

ಅತ್ತಾ ವಾಪಿ ನಿರತ್ತಾ ವಾ [ಅತ್ತಂ ವಾಪಿ ನಿರತ್ತಂ ವಾ (ಬಹೂಸು)], ನ ತಸ್ಮಿಂ ಉಪಲಬ್ಭತಿ.

೮೬೫. ‘‘ಯೇನ ನಂ ವಜ್ಜುಂ ಪುಥುಜ್ಜನಾ, ಅಥೋ ಸಮಣಬ್ರಾಹ್ಮಣಾ;

ತಂ ತಸ್ಸ ಅಪುರಕ್ಖತಂ, ತಸ್ಮಾ ವಾದೇಸು ನೇಜತಿ.

೮೬೬. ‘‘ವೀತಗೇಧೋ ಅಮಚ್ಛರೀ, ನ ಉಸ್ಸೇಸು ವದತೇ ಮುನಿ;

ನ ಸಮೇಸು ನ ಓಮೇಸು, ಕಪ್ಪಂ ನೇತಿ ಅಕಪ್ಪಿಯೋ.

೮೬೭. ‘‘ಯಸ್ಸ ಲೋಕೇ ಸಕಂ ನತ್ಥಿ, ಅಸತಾ ಚ ನ ಸೋಚತಿ;

ಧಮ್ಮೇಸು ಚ ನ ಗಚ್ಛತಿ, ಸ ವೇ ಸನ್ತೋತಿ ವುಚ್ಚತೀ’’ತಿ.

ಪುರಾಭೇದಸುತ್ತಂ ದಸಮಂ ನಿಟ್ಠಿತಂ.