೧೧. ರಾಹುಲಸುತ್ತಂ

೩೩೭. ‘‘ಕಚ್ಚಿ ಅಭಿಣ್ಹಸಂವಾಸಾ, ನಾವಜಾನಾಸಿ ಪಣ್ಡಿತಂ;

ಉಕ್ಕಾಧಾರೋ [ಓಕ್ಕಾಧಾರೋ (ಸ್ಯಾ. ಕ.)] ಮನುಸ್ಸಾನಂ, ಕಚ್ಚಿ ಅಪಚಿತೋ ತಯಾ’’ [ತವ (ಸೀ. ಅಟ್ಠ.)].

೩೩೮. ‘‘ನಾಹಂ ಅಭಿಣ್ಹಸಂವಾಸಾ, ಅವಜಾನಾಮಿ ಪಣ್ಡಿತಂ;

ಉಕ್ಕಾಧಾರೋ ಮನುಸ್ಸಾನಂ, ನಿಚ್ಚಂ ಅಪಚಿತೋ ಮಯಾ’’.

೩೩೯. ‘‘ಪಞ್ಚ ಕಾಮಗುಣೇ ಹಿತ್ವಾ, ಪಿಯರೂಪೇ ಮನೋರಮೇ;

ಸದ್ಧಾಯ ಘರಾ ನಿಕ್ಖಮ್ಮ, ದುಕ್ಖಸ್ಸನ್ತಕರೋ ಭವ.

೩೪೦. ‘‘ಮಿತ್ತೇ ಭಜಸ್ಸು ಕಲ್ಯಾಣೇ, ಪನ್ತಞ್ಚ ಸಯನಾಸನಂ;

ವಿವಿತ್ತಂ ಅಪ್ಪನಿಗ್ಘೋಸಂ, ಮತ್ತಞ್ಞೂ ಹೋಹಿ ಭೋಜನೇ.

೩೪೧. ‘‘ಚೀವರೇ ಪಿಣ್ಡಪಾತೇ ಚ, ಪಚ್ಚಯೇ ಸಯನಾಸನೇ;

ಏತೇಸು ತಣ್ಹಂ ಮಾಕಾಸಿ, ಮಾ ಲೋಕಂ ಪುನರಾಗಮಿ.

೩೪೨. ‘‘ಸಂವುತೋ ಪಾತಿಮೋಕ್ಖಸ್ಮಿಂ, ಇನ್ದ್ರಿಯೇಸು ಚ ಪಞ್ಚಸು;

ಸತಿ ಕಾಯಗತಾತ್ಯತ್ಥು, ನಿಬ್ಬಿದಾಬಹುಲೋ ಭವ.

೩೪೩. ‘‘ನಿಮಿತ್ತಂ ಪರಿವಜ್ಜೇಹಿ, ಸುಭಂ ರಾಗೂಪಸಞ್ಹಿತಂ;

ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ.

೩೪೪. ‘‘ಅನಿಮಿತ್ತಞ್ಚ ಭಾವೇಹಿ, ಮಾನಾನುಸಯಮುಜ್ಜಹ;

ತತೋ ಮಾನಾಭಿಸಮಯಾ, ಉಪಸನ್ತೋ ಚರಿಸ್ಸತೀ’’ತಿ.

ಇತ್ಥಂ ಸುದಂ ಭಗವಾ ಆಯಸ್ಮನ್ತಂ ರಾಹುಲಂ ಇಮಾಹಿ ಗಾಥಾಹಿ ಅಭಿಣ್ಹಂ ಓವದತೀತಿ.

ರಾಹುಲಸುತ್ತಂ ಏಕಾದಸಮಂ ನಿಟ್ಠಿತಂ.