೨. ಸಾಣವಾಸೀಥೇರಪೇತವತ್ಥು

೪೦೮. ಕುಣ್ಡಿನಾಗರಿಯೋ ಥೇರೋ, ಸಾಣವಾಸಿ [ಸಾನುವಾಸಿ (ಸೀ.), ಸಾನವಾಸಿ (ಸ್ಯಾ.)] ನಿವಾಸಿಕೋ;

ಪೋಟ್ಠಪಾದೋತಿ ನಾಮೇನ, ಸಮಣೋ ಭಾವಿತಿನ್ದ್ರಿಯೋ.

೪೦೯. ತಸ್ಸ ಮಾತಾ ಪಿತಾ ಭಾತಾ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ.

೪೧೦. ತೇ ದುಗ್ಗತಾ ಸೂಚಿಕಟ್ಟಾ, ಕಿಲನ್ತಾ ನಗ್ಗಿನೋ ಕಿಸಾ;

ಉತ್ತಸನ್ತಾ [ಓತ್ತಪ್ಪನ್ತಾ (ಸ್ಯಾ. ಕ.)] ಮಹತ್ತಾಸಾ [ಮಹಾತಾಸಾ (ಸೀ.)], ನ ದಸ್ಸೇನ್ತಿ ಕುರೂರಿನೋ [ಕುರುದ್ದಿನೋ (ಕ.)].

೪೧೧. ತಸ್ಸ ಭಾತಾ ವಿತರಿತ್ವಾ, ನಗ್ಗೋ ಏಕಪಥೇಕಕೋ;

ಚತುಕುಣ್ಡಿಕೋ ಭವಿತ್ವಾನ, ಥೇರಸ್ಸ ದಸ್ಸಯೀತುಮಂ.

೪೧೨. ಥೇರೋ ಚಾಮನಸಿಕತ್ವಾ, ತುಣ್ಹೀಭೂತೋ ಅತಿಕ್ಕಮಿ;

ಸೋ ಚ ವಿಞ್ಞಾಪಯೀ ಥೇರಂ, ‘ಭಾತಾ ಪೇತಗತೋ ಅಹಂ’.

೪೧೩. ‘‘ಮಾತಾ ಪಿತಾ ಚ ತೇ ಭನ್ತೇ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ.

೪೧೪. ‘‘ತೇ ದುಗ್ಗತಾ ಸೂಚಿಕಟ್ಟಾ, ಕಿಲನ್ತಾ ನಗ್ಗಿನೋ ಕಿಸಾ;

ಉತ್ತಸನ್ತಾ ಮಹತ್ತಾಸಾ, ನ ದಸ್ಸೇನ್ತಿ ಕುರೂರಿನೋ.

೪೧೫. ‘‘ಅನುಕಮ್ಪಸ್ಸು ಕಾರುಣಿಕೋ, ದತ್ವಾ ಅನ್ವಾದಿಸಾಹಿ ನೋ;

ತವ ದಿನ್ನೇನ ದಾನೇನ, ಯಾಪೇಸ್ಸನ್ತಿ ಕುರೂರಿನೋ’’ತಿ.

೪೧೬. ಥೇರೋ ಚರಿತ್ವಾ ಪಿಣ್ಡಾಯ, ಭಿಕ್ಖೂ ಅಞ್ಞೇ ಚ ದ್ವಾದಸ;

ಏಕಜ್ಝಂ ಸನ್ನಿಪತಿಂಸು, ಭತ್ತವಿಸ್ಸಗ್ಗಕಾರಣಾ.

೪೧೭. ಥೇರೋ ಸಬ್ಬೇವ ತೇ ಆಹ, ‘‘ಯಥಾಲದ್ಧಂ ದದಾಥ ಮೇ;

ಸಙ್ಘಭತ್ತಂ ಕರಿಸ್ಸಾಮಿ, ಅನುಕಮ್ಪಾಯ ಞಾತಿನಂ’’.

೪೧೮. ನಿಯ್ಯಾದಯಿಂಸು ಥೇರಸ್ಸ, ಥೇರೋ ಸಙ್ಘಂ ನಿಮನ್ತಯಿ;

ದತ್ವಾ ಅನ್ವಾದಿಸಿ ಥೇರೋ, ಮಾತು ಪಿತು ಚ ಭಾತುನೋ;

‘‘ಇದಂ ಮೇ ಞಾತೀನಂ ಹೋತು, ಸುಖಿತಾ ಹೋನ್ತು ಞಾತಯೋ’’.

೪೧೯. ಸಮನನ್ತರಾನುದ್ದಿಟ್ಠೇ, ಭೋಜನಂ ಉದಪಜ್ಜಥ;

ಸುಚಿಂ ಪಣೀತಂ ಸಮ್ಪನ್ನಂ, ಅನೇಕರಸಬ್ಯಞ್ಜನಂ.

೪೨೦. ತತೋ ಉದ್ದಸ್ಸಯೀ [ಉದ್ದಿಸಯೀ (ಸೀ. ಕ.), ಉದ್ದಿಸ್ಸತಿ (ಸ್ಯಾ. ಕ.)] ಭಾತಾ, ವಣ್ಣವಾ ಬಲವಾ ಸುಖೀ;

‘‘ಪಹೂತಂ ಭೋಜನಂ ಭನ್ತೇ, ಪಸ್ಸ ನಗ್ಗಾಮ್ಹಸೇ ಮಯಂ;

ತಥಾ ಭನ್ತೇ ಪರಕ್ಕಮ, ಯಥಾ ವತ್ಥಂ ಲಭಾಮಸೇ’’ತಿ.

೪೨೧. ಥೇರೋ ಸಙ್ಕಾರಕೂಟಮ್ಹಾ, ಉಚ್ಚಿನಿತ್ವಾನ ನನ್ತಕೇ;

ಪಿಲೋತಿಕಂ ಪಟಂ ಕತ್ವಾ, ಸಙ್ಘೇ ಚಾತುದ್ದಿಸೇ ಅದಾ.

೪೨೨. ದತ್ವಾ ಅನ್ವಾದಿಸೀ ಥೇರೋ, ಮಾತು ಪಿತು ಚ ಭಾತುನೋ;

‘‘ಇದಂ ಮೇ ಞಾತೀನಂ ಹೋತು, ಸುಖಿತಾ ಹೋನ್ತು ಞಾತಯೋ’’.

೪೨೩. ಸಮನನ್ತರಾನುದ್ದಿಟ್ಠೇ, ವತ್ಥಾನಿ ಉದಪಜ್ಜಿಸುಂ;

ತತೋ ಸುವತ್ಥವಸನೋ, ಥೇರಸ್ಸ ದಸ್ಸಯೀತುಮಂ.

೪೨೪. ‘‘ಯಾವತಾ ನನ್ದರಾಜಸ್ಸ, ವಿಜಿತಸ್ಮಿಂ ಪಟಿಚ್ಛದಾ;

ತತೋ ಬಹುತರಾ ಭನ್ತೇ, ವತ್ಥಾನಚ್ಛಾದನಾನಿ ನೋ.

೪೨೫. ‘‘ಕೋಸೇಯ್ಯಕಮ್ಬಲೀಯಾನಿ, ಖೋಮ ಕಪ್ಪಾಸಿಕಾನಿ ಚ;

ವಿಪುಲಾ ಚ ಮಹಗ್ಘಾ ಚ, ತೇಪಾಕಾಸೇವಲಮ್ಬರೇ.

೪೨೬. ‘‘ತೇ ಮಯಂ ಪರಿದಹಾಮ, ಯಂ ಯಂ ಹಿ ಮನಸೋ ಪಿಯಂ;

ತಥಾ ಭನ್ತೇ ಪರಕ್ಕಮ, ಯಥಾ ಗೇಹಂ ಲಭಾಮಸೇ’’ತಿ.

೪೨೭. ಥೇರೋ ಪಣ್ಣಕುಟಿಂ ಕತ್ವಾ, ಸಙ್ಘೇ ಚಾತುದ್ದಿಸೇ ಅದಾ;

ದತ್ವಾ ಅನ್ವಾದಿಸೀ ಥೇರೋ, ಮಾತು ಪಿತು ಚ ಭಾತುನೋ;

‘‘ಇದಂ ಮೇ ಞಾತೀನಂ ಹೋತು, ಸುಖಿತಾ ಹೋನ್ತು ಞಾತಯೋ’’.

೪೨೮. ಸಮನನ್ತರಾನುದ್ದಿಟ್ಠೇ, ಘರಾನಿ ಉದಪಜ್ಜಿಸುಂ;

ಕೂಟಾಗಾರನಿವೇಸನಾ, ವಿಭತ್ತಾ ಭಾಗಸೋ ಮಿತಾ.

೪೨೯. ‘‘ನ ಮನುಸ್ಸೇಸು ಈದಿಸಾ, ಯಾದಿಸಾ ನೋ ಘರಾ ಇಧ;

ಅಪಿ ದಿಬ್ಬೇಸು ಯಾದಿಸಾ, ತಾದಿಸಾ ನೋ ಘರಾ ಇಧ.

೪೩೦. ‘‘ದದ್ದಲ್ಲಮಾನಾ ಆಭೇನ್ತಿ [ಆಭನ್ತಿ (ಕ.)], ಸಮನ್ತಾ ಚತುರೋ ದಿಸಾ;

‘ತಥಾ ಭನ್ತೇ ಪರಕ್ಕಮ, ಯಥಾ ಪಾನೀಯಂ ಲಭಾಮಸೇ’’ತಿ.

೪೩೧. ಥೇರೋ ಕರಣಂ [ಕರಕಂ (ಸೀ. ಸ್ಯಾ. ಪೀ.)] ಪೂರೇತ್ವಾ, ಸಙ್ಘೇ ಚಾತುದ್ದಿಸೇ ಅದಾ;

ದತ್ವಾ ಅನ್ವಾದಿಸೀ ಥೇರೋ, ಮಾತು ಪಿತು ಚ ಭಾತುನೋ;

‘‘ಇದಂ ಮೇ ಞಾತೀನಂ ಹೋತು, ಸುಖಿತಾ ಹೋನ್ತು ಞಾತಯೋ’.

೪೩೨. ಸಮನನ್ತರಾನುದ್ದಿಟ್ಠೇ, ಪಾನೀಯಂ ಉದಪಜ್ಜಥ;

ಗಮ್ಭೀರಾ ಚತುರಸ್ಸಾ ಚ, ಪೋಕ್ಖರಞ್ಞೋ ಸುನಿಮ್ಮಿತಾ.

೪೩೩. ಸೀತೋದಿಕಾ ಸುಪ್ಪತಿತ್ಥಾ, ಸೀತಾ ಅಪ್ಪಟಿಗನ್ಧಿಯಾ;

ಪದುಮುಪ್ಪಲಸಞ್ಛನ್ನಾ, ವಾರಿಕಿಞ್ಜಕ್ಖಪೂರಿತಾ.

೪೩೪. ತತ್ಥ ನ್ಹತ್ವಾ ಪಿವಿತ್ವಾ ಚ, ಥೇರಸ್ಸ ಪಟಿದಸ್ಸಯುಂ;

‘‘ಪಹೂತಂ ಪಾನೀಯಂ ಭನ್ತೇ, ಪಾದಾ ದುಕ್ಖಾ ಫಲನ್ತಿ ನೋ’’.

೪೩೫. ‘‘ಆಹಿಣ್ಡಮಾನಾ ಖಞ್ಜಾಮ, ಸಕ್ಖರೇ ಕುಸಕಣ್ಟಕೇ;

‘ತಥಾ ಭನ್ತೇ ಪರಕ್ಕಮ, ಯಥಾ ಯಾನಂ ಲಭಾಮಸೇ’’’ತಿ.

೪೩೬. ಥೇರೋ ಸಿಪಾಟಿಕಂ ಲದ್ಧಾ, ಸಙ್ಘೇ ಚಾತುದ್ದಿಸೇ ಅದಾ;

ದತ್ವಾ ಅನ್ವಾದಿಸೀ ಥೇರೋ, ಮಾತು ಪಿತು ಚ ಭಾತುನೋ;

‘‘ಇದಂ ಮೇ ಞಾತೀನಂ ಹೋತು, ಸುಖಿತಾ ಹೋನ್ತು ಞಾತಯೋ’’.

೪೩೭. ಸಮನನ್ತರಾನುದ್ದಿಟ್ಠೇ, ಪೇತಾ ರಥೇನ ಮಾಗಮುಂ;

‘‘ಅನುಕಮ್ಪಿತಮ್ಹ ಭದನ್ತೇ, ಭತ್ತೇನಚ್ಛಾದನೇನ ಚ.

೪೩೮. ‘‘ಘರೇನ ಪಾನೀಯದಾನೇನ, ಯಾನದಾನೇನ ಚೂಭಯಂ;

ಮುನಿಂ ಕಾರುಣಿಕಂ ಲೋಕೇ, ಭನ್ತೇ ವನ್ದಿತುಮಾಗತಾ’’ತಿ.

ಸಾಣವಾಸೀಥೇರಪೇತವತ್ಥು ದುತಿಯಂ.