೯. ಮಗ್ಗಕಥಾ

೨೩೭. ಮಗ್ಗೋತಿ ಕೇನಟ್ಠೇನ ಮಗ್ಗೋ? ಸೋತಾಪತ್ತಿಮಗ್ಗಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ ಮಿಚ್ಛಾದಿಟ್ಠಿಯಾ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ, ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ [ಉತ್ತರಿಂ ಪಟಿವೇಧಾಯ (ಸ್ಯಾ.)] ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ಅಭಿನಿರೋಪನಟ್ಠೇನ ಸಮ್ಮಾಸಙ್ಕಪ್ಪೋ ಮಿಚ್ಛಾಸಙ್ಕಪ್ಪಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ, ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ಪರಿಗ್ಗಹಟ್ಠೇನ ಸಮ್ಮಾವಾಚಾ ಮಿಚ್ಛಾವಾಚಾಯ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ, ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ಸಮುಟ್ಠಾನಟ್ಠೇನ ಸಮ್ಮಾಕಮ್ಮನ್ತೋ ಮಿಚ್ಛಾಕಮ್ಮನ್ತಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ವೋದಾನಟ್ಠೇನ ಸಮ್ಮಾಆಜೀವೋ ಮಿಚ್ಛಾಆಜೀವಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ…ಪೇ… ಪಗ್ಗಹಟ್ಠೇನ ಸಮ್ಮಾವಾಯಾಮೋ ಮಿಚ್ಛಾವಾಯಾಮಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ…ಪೇ… ಉಪಟ್ಠಾನಟ್ಠೇನ ಸಮ್ಮಾಸತಿ ಮಿಚ್ಛಾಸತಿಯಾ ಪಹಾನಾಯ ಮಗ್ಗೋ ಚೇವ ಹೇತು ಚ…ಪೇ… ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ಮಿಚ್ಛಾಸಮಾಧಿಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ, ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ಸಕದಾಗಾಮಿಮಗ್ಗಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ…ಪೇ… ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ಓಳಾರಿಕಸ್ಸ ಕಾಮರಾಗಸಞ್ಞೋಜನಸ್ಸ ಪಟಿಘಸಞ್ಞೋಜನಸ್ಸ ಓಳಾರಿಕಸ್ಸ ಕಾಮರಾಗಾನುಸಯಸ್ಸ ಪಟಿಘಾನುಸಯಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ, ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ಅನಾಗಾಮಿಮಗ್ಗಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ…ಪೇ… ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ಅನುಸಹಗತಸ್ಸ ಕಾಮರಾಗಸಞ್ಞೋಜನಸ್ಸ ಪಟಿಘಸಞ್ಞೋಜನಸ್ಸ, ಅನುಸಹಗತಸ್ಸ ಕಾಮರಾಗಾನುಸಯಸ್ಸ ಪಟಿಘಾನುಸಯಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ, ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ಅರಹತ್ತಮಗ್ಗಕ್ಖಣೇ ದಸ್ಸನಟ್ಠೇನ ಸಮ್ಮಾದಿಟ್ಠಿ…ಪೇ… ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ರೂಪರಾಗಸ್ಸ ಅರೂಪರಾಗಸ್ಸ ಮಾನಸ್ಸ ಉದ್ಧಚ್ಚಸ್ಸ ಅವಿಜ್ಜಾಯ, ಮಾನಾನುಸಯಸ್ಸ ಭವರಾಗಾನುಸಯಸ್ಸ ಅವಿಜ್ಜಾನುಸಯಸ್ಸ ಪಹಾನಾಯ ಮಗ್ಗೋ ಚೇವ ಹೇತು ಚ, ಸಹಜಾತಾನಂ ಧಮ್ಮಾನಂ ಉಪತ್ಥಮ್ಭನಾಯ ಮಗ್ಗೋ ಚೇವ ಹೇತು ಚ, ಕಿಲೇಸಾನಂ ಪರಿಯಾದಾನಾಯ ಮಗ್ಗೋ ಚೇವ ಹೇತು ಚ, ಪಟಿವೇಧಾದಿವಿಸೋಧನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ ಅಧಿಟ್ಠಾನಾಯ ಮಗ್ಗೋ ಚೇವ ಹೇತು ಚ, ಚಿತ್ತಸ್ಸ, ವೋದಾನಾಯ ಮಗ್ಗೋ ಚೇವ ಹೇತು ಚ, ವಿಸೇಸಾಧಿಗಮಾಯ ಮಗ್ಗೋ ಚೇವ ಹೇತು ಚ, ಉತ್ತರಿ ಪಟಿವೇಧಾಯ ಮಗ್ಗೋ ಚೇವ ಹೇತು ಚ, ಸಚ್ಚಾಭಿಸಮಯಾಯ ಮಗ್ಗೋ ಚೇವ, ಹೇತು ಚ, ನಿರೋಧೇ ಪತಿಟ್ಠಾಪನಾಯ ಮಗ್ಗೋ ಚೇವ ಹೇತು ಚ.

ದಸ್ಸನಮಗ್ಗೋ ಸಮ್ಮಾದಿಟ್ಠಿ, ಅಭಿನಿರೋಪನಮಗ್ಗೋ ಸಮ್ಮಾಸಙ್ಕಪ್ಪೋ, ಪರಿಗ್ಗಹಮಗ್ಗೋ ಸಮ್ಮಾವಾಚಾ, ಸಮುಟ್ಠಾನಮಗ್ಗೋ ಸಮ್ಮಾಕಮ್ಮನ್ತೋ, ವೋದಾನಮಗ್ಗೋ ಸಮ್ಮಾಆಜೀವೋ, ಪಗ್ಗಹಮಗ್ಗೋ ಸಮ್ಮಾವಾಯಾಮೋ, ಉಪಟ್ಠಾನಮಗ್ಗೋ ಸಮ್ಮಾಸತಿ, ಅವಿಕ್ಖೇಪಮಗ್ಗೋ ಸಮ್ಮಾಸಮಾಧಿ. ಉಪಟ್ಠಾನಮಗ್ಗೋ ಸತಿಸಮ್ಬೋಜ್ಝಙ್ಗೋ, ಪವಿಚಯಮಗ್ಗೋ ಧಮ್ಮವಿಚಯಸಮ್ಬೋಜ್ಝಙ್ಗೋ, ಪಗ್ಗಹಮಗ್ಗೋ ವೀರಿಯಸಮ್ಬೋಜ್ಝಙ್ಗೋ, ಫರಣಮಗ್ಗೋ ಪೀತಿಸಮ್ಬೋಜ್ಝಙ್ಗೋ, ಉಪಸಮಮಗ್ಗೋ ಪಸ್ಸದ್ಧಿಸಮ್ಬೋಜ್ಝಙ್ಗೋ, ಅವಿಕ್ಖೇಪಮಗ್ಗೋ ಸಮಾಧಿಸಮ್ಬೋಜ್ಝಙ್ಗೋ, ಪಟಿಸಙ್ಖಾನಮಗ್ಗೋ ಉಪೇಕ್ಖಾಸಮ್ಬೋಜ್ಝಙ್ಗೋ.

ಅಸ್ಸದ್ಧಿಯೇ ಅಕಮ್ಪಿಯಮಗ್ಗೋ ಸದ್ಧಾಬಲಂ, ಕೋಸಜ್ಜೇ ಅಕಮ್ಪಿಯಮಗ್ಗೋ ವೀರಿಯಬಲಂ, ಪಮಾದೇ ಅಕಮ್ಪಿಯಮಗ್ಗೋ ಸತಿಬಲಂ, ಉದ್ಧಚ್ಚೇ ಅಕಮ್ಪಿಯಮಗ್ಗೋ ಸಮಾಧಿಬಲಂ, ಅವಿಜ್ಜಾಯ ಅಕಮ್ಪಿಯಮಗ್ಗೋ ಪಞ್ಞಾಬಲಂ. ಅಧಿಮೋಕ್ಖಮಗ್ಗೋ ಸದ್ಧಿನ್ದ್ರಿಯಂ, ಪಗ್ಗಹಮಗ್ಗೋ ವೀರಿಯಿನ್ದ್ರಿಯಂ, ಉಪಟ್ಠಾನಮಗ್ಗೋ ಸತಿನ್ದ್ರಿಯಂ, ಅವಿಕ್ಖೇಪಮಗ್ಗೋ ಸಮಾಧಿನ್ದ್ರಿಯಂ, ದಸ್ಸನಮಗ್ಗೋ ಪಞ್ಞಿನ್ದ್ರಿಯಂ.

ಆಧಿಪತೇಯ್ಯಟ್ಠೇನ ಇನ್ದ್ರಿಯಾ ಮಗ್ಗೋ, ಅಕಮ್ಪಿಯಟ್ಠೇನ ಬಲಾ ಮಗ್ಗೋ, ನಿಯ್ಯಾನಟ್ಠೇನ ಬೋಜ್ಝಙ್ಗಾ ಮಗ್ಗೋ, ಹೇತುಟ್ಠೇನ ಮಗ್ಗಙ್ಗಾ ಮಗ್ಗೋ, ಉಪಟ್ಠಾನಟ್ಠೇನ ಸತಿಪಟ್ಠಾನಾ ಮಗ್ಗೋ, ಪದಹನಟ್ಠೇನ ಸಮ್ಮಪ್ಪಧಾನಾ ಮಗ್ಗೋ, ಇಜ್ಝನಟ್ಠೇನ ಇದ್ಧಿಪಾದಾ ಮಗ್ಗೋ, ತಥಟ್ಠೇನ ಸಚ್ಚಾನಿ ಮಗ್ಗೋ, ಅವಿಕ್ಖೇಪಟ್ಠೇನ ಸಮಥೋ ಮಗ್ಗೋ, ಅನುಪಸ್ಸನಟ್ಠೇನ ವಿಪಸ್ಸನಾ ಮಗ್ಗೋ, ಏಕರಸಟ್ಠೇನ ಸಮಥವಿಪಸ್ಸನಾ ಮಗ್ಗೋ, ಅನತಿವತ್ತನಟ್ಠೇನ ಯುಗನದ್ಧಾ ಮಗ್ಗೋ, ಸಂವರಟ್ಠೇನ ಸೀಲವಿಸುದ್ಧಿ ಮಗ್ಗೋ, ಅವಿಕ್ಖೇಪಟ್ಠೇನ ಚಿತ್ತವಿಸುದ್ಧಿ ಮಗ್ಗೋ, ದಸ್ಸನಟ್ಠೇನ ದಿಟ್ಠಿವಿಸುದ್ಧಿ ಮಗ್ಗೋ, ಮುತ್ತಟ್ಠೇನ ವಿಮೋಕ್ಖೋ ಮಗ್ಗೋ, ಪಟಿವೇಧಟ್ಠೇನ ವಿಜ್ಜಾ ಮಗ್ಗೋ, ಪರಿಚ್ಚಾಗಟ್ಠೇನ ವಿಮುತ್ತಿ ಮಗ್ಗೋ, ಸಮುಚ್ಛೇದಟ್ಠೇನ ಖಯೇ ಞಾಣಂ ಮಗ್ಗೋ, ಛನ್ದೋ ಮೂಲಟ್ಠೇನ ಮಗ್ಗೋ, ಮನಸಿಕಾರೋ ಸಮುಟ್ಠಾನಟ್ಠೇನ ಮಗ್ಗೋ, ಫಸ್ಸೋ ಸಮೋಧಾನಟ್ಠೇನ ಮಗ್ಗೋ, ವೇದನಾ ಸಮೋಸರಣಟ್ಠೇನ ಮಗ್ಗೋ, ಸಮಾಧಿ ಪಮುಖಟ್ಠೇನ ಮಗ್ಗೋ, ಸತಿ ಆಧಿಪತೇಯ್ಯಟ್ಠೇನ ಮಗ್ಗೋ, ಪಞ್ಞಾ ತತುತ್ತರಟ್ಠೇನ ಮಗ್ಗೋ, ವಿಮುತ್ತಿ ಸಾರಟ್ಠೇನ ಮಗ್ಗೋ, ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಮಗ್ಗೋತಿ.

ಮಗ್ಗಕಥಾ ನಿಟ್ಠಿತಾ.