೮. ಆದೀನವಞಾಣನಿದ್ದೇಸೋ

೫೩. ಕಥಂ ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ? ಉಪ್ಪಾದೋ ಭಯನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ. ಪವತ್ತಂ ಭಯನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ. ನಿಮಿತ್ತಂ ಭಯನ್ತಿ…ಪೇ… ಆಯೂಹನಾ ಭಯನ್ತಿ…ಪೇ… ಪಟಿಸನ್ಧಿ ಭಯನ್ತಿ… ಗತಿ ಭಯನ್ತಿ… ನಿಬ್ಬತ್ತಿ ಭಯನ್ತಿ… ಉಪಪತ್ತಿ ಭಯನ್ತಿ… ಜಾತಿ ಭಯನ್ತಿ… ಜರಾ ಭಯನ್ತಿ… ಬ್ಯಾಧಿ ಭಯನ್ತಿ … ಮರಣಂ ಭಯನ್ತಿ… ಸೋಕೋ ಭಯನ್ತಿ… ಪರಿದೇವೋ ಭಯನ್ತಿ… ಉಪಾಯಾಸೋ ಭಯನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ.

ಅನುಪ್ಪಾದೋ ಖೇಮನ್ತಿ – ಸನ್ತಿಪದೇ ಞಾಣಂ. ಅಪ್ಪವತ್ತಂ ಖೇಮನ್ತಿ – ಸನ್ತಿಪದೇ ಞಾಣಂ…ಪೇ… ಅನುಪಾಯಾಸೋ ಖೇಮನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದೋ ಭಯಂ, ಅನುಪ್ಪಾದೋ ಖೇಮನ್ತಿ – ಸನ್ತಿಪದೇ ಞಾಣಂ. ಪವತ್ತಂ ಭಯಂ, ಅಪ್ಪವತ್ತಂ ಖೇಮನ್ತಿ – ಸನ್ತಿಪದೇ ಞಾಣಂ…ಪೇ… ಉಪಾಯಾಸೋ ಭಯಂ, ಅನುಪಾಯಾಸೋ ಖೇಮನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದೋ ದುಕ್ಖನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ. ಪವತ್ತಂ ದುಕ್ಖನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ…ಪೇ… ಉಪಾಯಾಸೋ ದುಕ್ಖನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ.

ಅನುಪ್ಪಾದೋ ಸುಖನ್ತಿ – ಸನ್ತಿಪದೇ ಞಾಣಂ. ಅಪ್ಪವತ್ತಂ ಸುಖನ್ತಿ – ಸನ್ತಿಪದೇ ಞಾಣಂ…ಪೇ… ಅನುಪಾಯಾಸೋ ಸುಖನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದೋ ದುಕ್ಖಂ, ಅನುಪ್ಪಾದೋ ಸುಖನ್ತಿ – ಸನ್ತಿಪದೇ ಞಾಣಂ. ಪವತ್ತಂ ದುಕ್ಖಂ, ಅಪ್ಪವತ್ತಂ ಸುಖನ್ತಿ – ಸನ್ತಿಪದೇ ಞಾಣಂ…ಪೇ… ಉಪಾಯಾಸೋ ದುಕ್ಖಂ, ಅನುಪಾಯಾಸೋ ಸುಖನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದೋ ಸಾಮಿಸನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ. ಪವತ್ತಂ ಸಾಮಿಸನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ…ಪೇ… ಉಪಾಯಾಸೋ ಸಾಮಿಸನ್ತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ.

ಅನುಪ್ಪಾದೋ ನಿರಾಮಿಸನ್ತಿ – ಸನ್ತಿಪದೇ ಞಾಣಂ. ಅಪ್ಪವತ್ತಂ ನಿರಾಮಿಸನ್ತಿ – ಸನ್ತಿಪದೇ ಞಾಣಂ…ಪೇ… ಅನುಪಾಯಾಸೋ ನಿರಾಮಿಸನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದೋ ಸಾಮಿಸಂ, ಅನುಪ್ಪಾದೋ ನಿರಾಮಿಸನ್ತಿ – ಸನ್ತಿಪದೇ ಞಾಣಂ. ಪವತ್ತಂ ಸಾಮಿಸಂ, ಅಪ್ಪವತ್ತಂ ನಿರಾಮಿಸನ್ತಿ – ಸನ್ತಿಪದೇ ಞಾಣಂ…ಪೇ… ಉಪಾಯಾಸೋ ಸಾಮಿಸಂ, ಅನುಪಾಯಾಸೋ ನಿರಾಮಿಸನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದೋ ಸಙ್ಖಾರಾತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ. ಪವತ್ತಂ ಸಙ್ಖಾರಾತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ…ಪೇ… ಉಪಾಯಾಸೋ ಸಙ್ಖಾರಾತಿ – ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ.

ಅನುಪ್ಪಾದೋ ನಿಬ್ಬಾನನ್ತಿ – ಸನ್ತಿಪದೇ ಞಾಣಂ. ಅಪ್ಪವತ್ತಂ ನಿಬ್ಬಾನನ್ತಿ – ಸನ್ತಿಪದೇ ಞಾಣಂ…ಪೇ… ಅನುಪಾಯಾಸೋ ನಿಬ್ಬಾನನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದೋ ಸಙ್ಖಾರಾ, ಅನುಪ್ಪಾದೋ ನಿಬ್ಬಾನನ್ತಿ – ಸನ್ತಿಪದೇ ಞಾಣಂ. ಪವತ್ತಂ ಸಙ್ಖಾರಾ, ಅಪ್ಪವತ್ತಂ ನಿಬ್ಬಾನನ್ತಿ – ಸನ್ತಿಪದೇ ಞಾಣಂ…ಪೇ… ಉಪಾಯಾಸೋ ಸಙ್ಖಾರಾ, ಅನುಪಾಯಾಸೋ ನಿಬ್ಬಾನನ್ತಿ – ಸನ್ತಿಪದೇ ಞಾಣಂ.

ಉಪ್ಪಾದಞ್ಚ ಪವತ್ತಞ್ಚ, ನಿಮಿತ್ತಂ ದುಕ್ಖನ್ತಿ ಪಸ್ಸತಿ;

ಆಯೂಹನಂ ಪಟಿಸನ್ಧಿಂ, ಞಾಣಂ ಆದೀನವೇ ಇದಂ.

ಅನುಪ್ಪಾದಂ ಅಪ್ಪವತ್ತಂ, ಅನಿಮಿತ್ತಂ ಸುಖನ್ತಿ ಚ;

ಅನಾಯೂಹನಂ ಅಪ್ಪಟಿಸನ್ಧಿಂ, ಞಾಣಂ ಸನ್ತಿಪದೇ ಇದಂ.

ಇದಂ ಆದೀನವೇ ಞಾಣಂ, ಪಞ್ಚಠಾನೇಸು ಜಾಯತಿ;

ಪಞ್ಚಠಾನೇ ಸನ್ತಿಪದೇ, ದಸ ಞಾಣೇ ಪಜಾನಾತಿ;

ದ್ವಿನ್ನಂ ಞಾಣಾನಂ ಕುಸಲತಾ, ನಾನಾದಿಟ್ಠೀಸು ನ ಕಮ್ಪತೀತಿ.

ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಭಯತುಪಟ್ಠಾನೇ ಪಞ್ಞಾ ಆದೀನವೇ ಞಾಣಂ’’.

ಆದೀನವಞಾಣನಿದ್ದೇಸೋ ಅಟ್ಠಮೋ.