೬೪-೬೭. ಸುದ್ಧಿಕಪಟಿಸಮ್ಭಿದಾಞಾಣನಿದ್ದೇಸೋ

೧೧೦. ಕಥಂ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನಪಟಿಸಮ್ಭಿದೇ ಞಾಣಂ? ಅತ್ಥೇಸು ಞಾಣಂ ಅತ್ಥಪಟಿಸಮ್ಭಿದಾ, ಧಮ್ಮೇಸು ಞಾಣಂ ಧಮ್ಮಪಟಿಸಮ್ಭಿದಾ, ನಿರುತ್ತೀಸು ಞಾಣಂ ನಿರುತ್ತಿಪಟಿಸಮ್ಭಿದಾ, ಪಟಿಭಾನೇಸು ಞಾಣಂ ಪಟಿಭಾನಪಟಿಸಮ್ಭಿದಾ. ಅತ್ಥನಾನತ್ತೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮನಾನತ್ತೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿನಾನತ್ತೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನನಾನತ್ತೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ, ಅತ್ಥವವತ್ಥಾನೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮವವತ್ಥಾನೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ ನಿರುತ್ತಿವವತ್ಥಾನೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನವವತ್ಥಾನೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ.

ಅತ್ಥಸಲ್ಲಕ್ಖಣೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮಸಲ್ಲಕ್ಖಣೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿಸಲ್ಲಕ್ಖಣೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನಸಲ್ಲಕ್ಖಣೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ. ಅತ್ಥೂಪಲಕ್ಖಣೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮೂಪಲಕ್ಖಣೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತೂಪಲಕ್ಖಣೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನೂಪಲಕ್ಖಣೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ.

ಅತ್ಥಪ್ಪಭೇದೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮಪ್ಪಭೇದೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿಪ್ಪಭೇದೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನಪ್ಪಭೇದೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ. ಅತ್ಥಪ್ಪಭಾವನೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮಪ್ಪಭಾವನೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿಪ್ಪಭಾವನೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನಪ್ಪಭಾವನೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ.

ಅತ್ಥಜೋತನೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮಜೋತನೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿಜೋತನೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನಜೋತನೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ. ಅತ್ಥವಿರೋಚನೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮವಿರೋಚನೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿವಿರೋಚನೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನವಿರೋಚನೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ. ಅತ್ಥಪ್ಪಕಾಸನೇ ಪಞ್ಞಾ ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮಪ್ಪಕಾಸನೇ ಪಞ್ಞಾ ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿಪ್ಪಕಾಸನೇ ಪಞ್ಞಾ ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನಪ್ಪಕಾಸನೇ ಪಞ್ಞಾ ಪಟಿಭಾನಪಟಿಸಮ್ಭಿದೇ ಞಾಣಂ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಅತ್ಥಪಟಿಸಮ್ಭಿದೇ ಞಾಣಂ, ಧಮ್ಮಪಟಿಸಮ್ಭಿದೇ ಞಾಣಂ, ನಿರುತ್ತಿಪಟಿಸಮ್ಭಿದೇ ಞಾಣಂ, ಪಟಿಭಾನಪಟಿಸಮ್ಭಿದೇ ಞಾಣಂ’’.

ಸುದ್ಧಿಕಪಟಿಸಮ್ಭಿದಾಞಾಣನಿದ್ದೇಸೋ ಸತ್ತಸಟ್ಠಿಮೋ.