೫೫. ಆಸವಕ್ಖಯಞಾಣನಿದ್ದೇಸೋ

೧೦೭. ಕಥಂ ಚತುಸಟ್ಠಿಯಾ ಆಕಾರೇಹಿ ತಿಣ್ಣನ್ನಂ ಇನ್ದ್ರಿಯಾನಂ ವಸಿಭಾವತಾ ಪಞ್ಞಾ ಆಸವಾನಂ ಖಯೇ ಞಾಣಂ? ಕತಮೇಸಂ ತಿಣ್ಣನ್ನಂ ಇನ್ದ್ರಿಯಾನಂ? ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಸ್ಸ ಅಞ್ಞಿನ್ದ್ರಿಯಸ್ಸ ಅಞ್ಞಾತಾವಿನ್ದ್ರಿಯಸ್ಸ.

ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಕತಿ ಠಾನಾನಿ ಗಚ್ಛತಿ, ಅಞ್ಞಿನ್ದ್ರಿಯಂ ಕತಿ ಠಾನಾನಿ ಗಚ್ಛತಿ, ಅಞ್ಞಾತಾವಿನ್ದ್ರಿಯಂ ಕತಿ ಠಾನಾನಿ ಗಚ್ಛತಿ? ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಏಕಂ ಠಾನಂ ಗಚ್ಛತಿ – ಸೋತಾಪತ್ತಿಮಗ್ಗಂ. ಅಞ್ಞಿನ್ದ್ರಿಯಂ ಛ ಠಾನಾನಿ ಗಚ್ಛತಿ – ಸೋತಾಪತ್ತಿಫಲಂ, ಸಕದಾಗಾಮಿಮಗ್ಗಂ, ಸಕದಾಗಾಮಿಫಲಂ, ಅನಾಗಾಮಿಮಗ್ಗಂ, ಅನಾಗಾಮಿಫಲಂ, ಅರಹತ್ತಮಗ್ಗಂ. ಅಞ್ಞಾತಾವಿನ್ದ್ರಿಯಂ ಏಕಂ ಠಾನಂ ಗಚ್ಛತಿ – ಅರಹತ್ತಫಲಂ.

ಸೋತಾಪತ್ತಿಮಗ್ಗಕ್ಖಣೇ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಸ್ಸ ಸದ್ಧಿನ್ದ್ರಿಯಂ ಅಧಿಮೋಕ್ಖಪರಿವಾರಂ ಹೋತಿ, ವೀರಿಯಿನ್ದ್ರಿಯಂ ಪಗ್ಗಹಪರಿವಾರಂ ಹೋತಿ, ಸತಿನ್ದ್ರಿಯಂ ಉಪಟ್ಠಾನಪರಿವಾರಂ ಹೋತಿ, ಸಮಾಧಿನ್ದ್ರಿಯಂ ಅವಿಕ್ಖೇಪಪರಿವಾರಂ ಹೋತಿ, ಪಞ್ಞಿನ್ದ್ರಿಯಂ ದಸ್ಸನಪರಿವಾರಂ ಹೋತಿ, ಮನಿನ್ದ್ರಿಯಂ ವಿಜಾನನಪರಿವಾರಂ ಹೋತಿ, ಸೋಮನಸ್ಸಿನ್ದ್ರಿಯಂ ಅಭಿಸನ್ದನಪರಿವಾರಂ ಹೋತಿ, ಜೀವಿತಿನ್ದ್ರಿಯಂ ಪವತ್ತಸನ್ತತಾಧಿಪತೇಯ್ಯಪರಿವಾರಂ ಹೋತಿ. ಸೋತಾಪತ್ತಿಮಗ್ಗಕ್ಖಣೇ ಜಾತಾ ಧಮ್ಮಾ ಠಪೇತ್ವಾ ಚಿತ್ತಸಮುಟ್ಠಾನಂ ರೂಪಂ ಸಬ್ಬೇವ ಕುಸಲಾ ಹೋನ್ತಿ, ಸಬ್ಬೇವ ಅನಾಸವಾ ಹೋನ್ತಿ, ಸಬ್ಬೇವ ನಿಯ್ಯಾನಿಕಾ ಹೋನ್ತಿ, ಸಬ್ಬೇವ ಅಪಚಯಗಾಮಿನೋ ಹೋನ್ತಿ, ಸಬ್ಬೇವ ಲೋಕುತ್ತರಾ ಹೋನ್ತಿ, ಸಬ್ಬೇವ ನಿಬ್ಬಾನಾರಮ್ಮಣಾ ಹೋನ್ತಿ. ಸೋತಾಪತ್ತಿಮಗ್ಗಕ್ಖಣೇ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಸ್ಸ ಇಮಾನಿ ಅಟ್ಠಿನ್ದ್ರಿಯಾನಿ ಸಹಜಾತಪರಿವಾರಾ ಹೋನ್ತಿ, ಅಞ್ಞಮಞ್ಞಪರಿವಾರಾ ಹೋನ್ತಿ, ನಿಸ್ಸಯಪರಿವಾರಾ ಹೋನ್ತಿ, ಸಮ್ಪಯುತ್ತಪರಿವಾರಾ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ. ತೇವ ತಸ್ಸ ಆಕಾರಾ ಚೇವ ಹೋನ್ತಿ ಪರಿವಾರಾ ಚ.

ಸೋತಾಪತ್ತಿಫಲಕ್ಖಣೇ ಅಞ್ಞಿನ್ದ್ರಿಯಸ್ಸ ಸದ್ಧಿನ್ದ್ರಿಯಂ ಅಧಿಮೋಕ್ಖಪರಿವಾರಂ ಹೋತಿ, ವೀರಿಯಿನ್ದ್ರಿಯಂ ಪಗ್ಗಹಪರಿವಾರಂ ಹೋತಿ, ಸತಿನ್ದ್ರಿಯಂ ಉಪಟ್ಠಾನಪರಿವಾರಂ ಹೋತಿ, ಸಮಾಧಿನ್ದ್ರಿಯಂ ಅವಿಕ್ಖೇಪಪರಿವಾರಂ ಹೋತಿ, ಪಞ್ಞಿನ್ದ್ರಿಯಂ ದಸ್ಸನಪರಿವಾರಂ ಹೋತಿ, ಮನಿನ್ದ್ರಿಯಂ ವಿಜಾನನಪರಿವಾರಂ ಹೋತಿ, ಸೋಮನಸ್ಸಿನ್ದ್ರಿಯಂ ಅಭಿಸನ್ದನಪರಿವಾರಂ ಹೋತಿ, ಜೀವಿತಿನ್ದ್ರಿಯಂ ಪವತ್ತಸನ್ತತಾಧಿಪತೇಯ್ಯಪರಿವಾರಂ ಹೋತಿ. ಸೋತಾಪತ್ತಿಫಲಕ್ಖಣೇ ಜಾತಾ ಧಮ್ಮಾ ಸಬ್ಬೇವ ಅಬ್ಯಾಕತಾ ಹೋನ್ತಿ, ಠಪೇತ್ವಾ ಚಿತ್ತಸಮುಟ್ಠಾನಂ ರೂಪಂ ಸಬ್ಬೇವ ಅನಾಸವಾ ಹೋನ್ತಿ, ಸಬ್ಬೇವ ಲೋಕುತ್ತರಾ ಹೋನ್ತಿ, ಸಬ್ಬೇವ ನಿಬ್ಬಾನಾರಮ್ಮಣಾ ಹೋನ್ತಿ. ಸೋತಾಪತ್ತಿಫಲಕ್ಖಣೇ ಅಞ್ಞಿನ್ದ್ರಿಯಸ್ಸ ಇಮಾನಿ ಅಟ್ಠಿನ್ದ್ರಿಯಾನಿ ಸಹಜಾತಪರಿವಾರಾ ಹೋನ್ತಿ, ಅಞ್ಞಮಞ್ಞಪರಿವಾರಾ ಹೋನ್ತಿ, ನಿಸ್ಸಯಪರಿವಾರಾ ಹೋನ್ತಿ, ಸಮ್ಪಯುತ್ತಪರಿವಾರಾ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ. ತೇವ ತಸ್ಸ ಆಕಾರಾ ಚೇವ ಹೋನ್ತಿ ಪರಿವಾರಾ ಚ.

ಸಕದಾಗಾಮಿಮಗ್ಗಕ್ಖಣೇ …ಪೇ… ಸಕದಾಗಾಮಿಫಲಕ್ಖಣೇ…ಪೇ… ಅನಾಗಾಮಿಮಗ್ಗಕ್ಖಣೇ…ಪೇ… ಅನಾಗಾಮಿಫಲಕ್ಖಣೇ…ಪೇ… ಅರಹತ್ತಮಗ್ಗಕ್ಖಣೇ ಅಞ್ಞಿನ್ದ್ರಿಯಸ್ಸ ಸದ್ಧಿನ್ದ್ರಿಯಂ ಅಧಿಮೋಕ್ಖಪರಿವಾರಂ ಹೋತಿ…ಪೇ… ಜೀವಿತಿನ್ದ್ರಿಯಂ ಪವತ್ತಸನ್ತತಾಧಿಪತೇಯ್ಯಪರಿವಾರಂ ಹೋತಿ. ಅರಹತ್ತಮಗ್ಗಕ್ಖಣೇ ಜಾತಾ ಧಮ್ಮಾ ಠಪೇತ್ವಾ ಚಿತ್ತಸಮುಟ್ಠಾನಂ ರೂಪಂ ಸಬ್ಬೇವ ಕುಸಲಾ ಹೋನ್ತಿ, ಸಬ್ಬೇವ ಅನಾಸವಾ ಹೋನ್ತಿ, ಸಬ್ಬೇವ ನಿಯ್ಯಾನಿಕಾ ಹೋನ್ತಿ, ಸಬ್ಬೇವ ಅಪಚಯಗಾಮಿನೋ ಹೋನ್ತಿ, ಸಬ್ಬೇವ ಲೋಕುತ್ತರಾ ಹೋನ್ತಿ, ಸಬ್ಬೇವ ನಿಬ್ಬಾನಾರಮ್ಮಣಾ ಹೋನ್ತಿ. ಅರಹತ್ತಮಗ್ಗಕ್ಖಣೇ ಅಞ್ಞಿನ್ದ್ರಿಯಸ್ಸ ಇಮಾನಿ ಅಟ್ಠಿನ್ದ್ರಿಯಾನಿ ಸಹಜಾತಪರಿವಾರಾ ಹೋನ್ತಿ, ಅಞ್ಞಮಞ್ಞಪರಿವಾರಾ ಹೋನ್ತಿ, ನಿಸ್ಸಯಪರಿವಾರಾ ಹೋನ್ತಿ, ಸಮ್ಪಯುತ್ತಪರಿವಾರಾ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ. ತೇವ ತಸ್ಸ ಆಕಾರಾ ಚೇವ ಹೋನ್ತಿ ಪರಿವಾರಾ ಚ.

ಅರಹತ್ತಫಲಕ್ಖಣೇ ಅಞ್ಞಾತಾವಿನ್ದ್ರಿಯಸ್ಸ ಸದ್ಧಿನ್ದ್ರಿಯಂ ಅಧಿಮೋಕ್ಖಪರಿವಾರಂ ಹೋತಿ, ವೀರಿಯಿನ್ದ್ರಿಯಂ ಪಗ್ಗಹಪರಿವಾರಂ ಹೋತಿ, ಸತಿನ್ದ್ರಿಯಂ ಉಪಟ್ಠಾನಪರಿವಾರಂ ಹೋತಿ, ಸಮಾಧಿನ್ದ್ರಿಯಂ ಅವಿಕ್ಖೇಪಪರಿವಾರಂ ಹೋತಿ, ಪಞ್ಞಿನ್ದ್ರಿಯಂ ದಸ್ಸನಪರಿವಾರಂ ಹೋತಿ, ಮನಿನ್ದ್ರಿಯಂ ವಿಜಾನನಪರಿವಾರಂ ಹೋತಿ, ಸೋಮನಸ್ಸಿನ್ದ್ರಿಯಂ ಅಭಿಸನ್ದನಪರಿವಾರಂ ಹೋತಿ, ಜೀವಿತಿನ್ದ್ರಿಯಂ ಪವತ್ತಸನ್ತತಾಧಿಪತೇಯ್ಯಪರಿವಾರಂ ಹೋತಿ. ಅರಹತ್ತಫಲಕ್ಖಣೇ ಜಾತಾ ಧಮ್ಮಾ ಸಬ್ಬೇವ ಅಬ್ಯಾಕತಾ ಹೋನ್ತಿ, ಠಪೇತ್ವಾ ಚಿತ್ತಸಮುಟ್ಠಾನಂ ರೂಪಂ ಸಬ್ಬೇವ ಅನಾಸವಾ ಹೋನ್ತಿ, ಸಬ್ಬೇವ ಲೋಕುತ್ತರಾ ಹೋನ್ತಿ, ಸಬ್ಬೇವ ನಿಬ್ಬಾನಾರಮ್ಮಣಾ ಹೋನ್ತಿ. ಅರಹತ್ತಫಲಕ್ಖಣೇ ಅಞ್ಞಾತಾವಿನ್ದ್ರಿಯಸ್ಸ ಇಮಾನಿ ಅಟ್ಠಿನ್ದ್ರಿಯಾನಿ ಸಹಜಾತಪರಿವಾರಾ ಹೋನ್ತಿ, ಅಞ್ಞಮಞ್ಞಪರಿವಾರಾ ಹೋನ್ತಿ, ನಿಸ್ಸಯಪರಿವಾರಾ ಹೋನ್ತಿ, ಸಮ್ಪಯುತ್ತಪರಿವಾರಾ ಹೋನ್ತಿ, ಸಹಗತಾ ಹೋನ್ತಿ, ಸಹಜಾತಾ ಹೋನ್ತಿ, ಸಂಸಟ್ಠಾ ಹೋನ್ತಿ, ಸಮ್ಪಯುತ್ತಾ ಹೋನ್ತಿ. ತೇವ ತಸ್ಸ ಆಕಾರಾ ಚೇವ ಹೋನ್ತಿ ಪರಿವಾರಾ ಚ. ಇತಿ ಇಮಾನಿ ಅಟ್ಠಟ್ಠಕಾನಿ ಚತುಸಟ್ಠಿ ಹೋನ್ತಿ.

ಆಸವಾತಿ ಕತಮೇ ತೇ ಆಸವಾ? ಕಾಮಾಸವೋ, ಭವಾಸವೋ, ದಿಟ್ಠಾಸವೋ, ಅವಿಜ್ಜಾಸವೋ. ಕತ್ಥೇತೇ ಆಸವಾ ಖೀಯನ್ತಿ? ಸೋತಾಪತ್ತಿಮಗ್ಗೇನ ಅನವಸೇಸೋ ದಿಟ್ಠಾಸವೋ ಖೀಯತಿ, ಅಪಾಯಗಮನೀಯೋ ಕಾಮಾಸವೋ ಖೀಯತಿ, ಅಪಾಯಗಮನೀಯೋ ಭವಾಸವೋ ಖೀಯತಿ, ಅಪಾಯಗಮನೀಯೋ ಅವಿಜ್ಜಾಸವೋ ಖೀಯತಿ. ಏತ್ಥೇತೇ ಆಸವಾ ಖೀಯನ್ತಿ. ಸಕದಾಗಾಮಿಮಗ್ಗೇನ ಓಳಾರಿಕೋ ಕಾಮಾಸವೋ ಖೀಯತಿ, ತದೇಕಟ್ಠೋ ಭವಾಸವೋ ಖೀಯತಿ, ತದೇಕಟ್ಠೋ ಅವಿಜ್ಜಾಸವೋ ಖೀಯತಿ. ಏತ್ಥೇತೇ ಆಸವಾ ಖೀಯನ್ತಿ. ಅನಾಗಾಮಿಮಗ್ಗೇನ ಅನವಸೇಸೋ ಕಾಮಾಸವೋ ಖೀಯತಿ, ತದೇಕಟ್ಠೋ ಭವಾಸವೋ ಖೀಯತಿ, ತದೇಕಟ್ಠೋ ಅವಿಜ್ಜಾಸವೋ ಖೀಯತಿ. ಏತ್ಥೇತೇ ಆಸವಾ ಖೀಯನ್ತಿ. ಅರಹತ್ತಮಗ್ಗೇನ ಅನವಸೇಸೋ ಭವಾಸವೋ ಖೀಯತಿ, ಅನವಸೇಸೋ ಅವಿಜ್ಜಾಸವೋ ಖೀಯತಿ. ಏತ್ಥೇತೇ ಆಸವಾ ಖೀಯನ್ತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಚತುಸಟ್ಠಿಯಾ ಆಕಾರೇಹಿ ತಿಣ್ಣನ್ನಂ ಇನ್ದ್ರಿಯಾನಂ ವಸಿಭಾವತಾ ಪಞ್ಞಾ ಆಸವಾನಂ ಖಯೇ ಞಾಣಂ’’.

ಆಸವಕ್ಖಯಞಾಣನಿದ್ದೇಸೋ ಪಞ್ಚಪಞ್ಞಾಸಮೋ.