೩೫. ಪರಿನಿಬ್ಬಾನಞಾಣನಿದ್ದೇಸೋ

೮೬. ಕಥಂ ಸಮ್ಪಜಾನಸ್ಸ ಪವತ್ತಪರಿಯಾದಾನೇ ಪಞ್ಞಾ ಪರಿನಿಬ್ಬಾನೇ ಞಾಣಂ? ಇಧ ಸಮ್ಪಜಾನೋ ನೇಕ್ಖಮ್ಮೇನ ಕಾಮಚ್ಛನ್ದಸ್ಸ ಪವತ್ತಂ ಪರಿಯಾದಿಯತಿ, ಅಬ್ಯಾಪಾದೇನ ಬ್ಯಾಪಾದಸ್ಸ ಪವತ್ತಂ ಪರಿಯಾದಿಯತಿ, ಆಲೋಕಸಞ್ಞಾಯ ಥಿನಮಿದ್ಧಸ್ಸ ಪವತ್ತಂ ಪರಿಯಾದಿಯತಿ, ಅವಿಕ್ಖೇಪೇನ ಉದ್ಧಚ್ಚಸ್ಸ ಪವತ್ತಂ ಪರಿಯಾದಿಯತಿ, ಧಮ್ಮವವತ್ಥಾನೇನ ವಿಚಿಕಿಚ್ಛಾಯ…ಪೇ… ಞಾಣೇನ ಅವಿಜ್ಜಾಯ… ಪಾಮೋಜ್ಜೇನ ಅರತಿಯಾ … ಪಠಮೇನ ಝಾನೇನ ನೀವರಣಾನಂ ಪವತ್ತಂ ಪರಿಯಾದಿಯತಿ…ಪೇ… ಅರಹತ್ತಮಗ್ಗೇನ ಸಬ್ಬಕಿಲೇಸಾನಂ ಪವತ್ತಂ ಪರಿಯಾದಿಯತಿ.

ಅಥ ವಾ ಪನ ಸಮ್ಪಜಾನಸ್ಸ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯನ್ತಸ್ಸ ಇದಞ್ಚೇವ ಚಕ್ಖುಪವತ್ತಂ ಪರಿಯಾದಿಯತಿ, ಅಞ್ಞಞ್ಚ ಚಕ್ಖುಪವತ್ತಂ ನ ಉಪ್ಪಜ್ಜತಿ. ಇದಞ್ಚೇವ ಸೋತಪವತ್ತಂ…ಪೇ… ಘಾನಪವತ್ತಂ… ಜಿವ್ಹಾಪವತ್ತಂ… ಕಾಯಪವತ್ತಂ… ಮನೋಪವತ್ತಂ ಪರಿಯಾದಿಯತಿ, ಅಞ್ಞಞ್ಚ ಮನೋಪವತ್ತಂ ನ ಉಪ್ಪಜ್ಜತಿ. ಇದಂ ಸಮ್ಪಜಾನಸ್ಸ ಪವತ್ತಪರಿಯಾದಾನೇ ಪಞ್ಞಾ ಪರಿನಿಬ್ಬಾನೇ ಞಾಣಂ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಸಮ್ಪಜಾನಸ್ಸ ಪವತ್ತಪರಿಯಾದಾನೇ ಪಞ್ಞಾ ಪರಿನಿಬ್ಬಾನೇ ಞಾಣಂ’’.

ಪರಿನಿಬ್ಬಾನಞಾಣನಿದ್ದೇಸೋ ಪಞ್ಚತಿಂಸತಿಮೋ.