೧೦. ಗೋತ್ರಭುಞಾಣನಿದ್ದೇಸೋ

೫೯. ಕಥಂ ಬಹಿದ್ಧಾ ವುಟ್ಠಾನವಿವಟ್ಟನೇ ಪಞ್ಞಾ ಗೋತ್ರಭುಞಾಣಂ? ಉಪ್ಪಾದಂ ಅಭಿಭುಯ್ಯತೀತಿ – ಗೋತ್ರಭು. ಪವತ್ತಂ ಅಭಿಭುಯ್ಯತೀತಿ – ಗೋತ್ರಭು. ನಿಮಿತ್ತಂ ಅಭಿಭುಯ್ಯತೀತಿ – ಗೋತ್ರಭು. ಆಯೂಹನಂ ಅಭಿಭುಯ್ಯತೀತಿ – ಗೋತ್ರಭು. ಪಟಿಸನ್ಧಿಂ ಅಭಿಭುಯ್ಯತೀತಿ – ಗೋತ್ರಭು. ಗತಿಂ ಅಭಿಭುಯ್ಯತೀತಿ – ಗೋತ್ರಭು. ನಿಬ್ಬತ್ತಿಂ ಅಭಿಭುಯ್ಯತೀತಿ – ಗೋತ್ರಭು. ಉಪಪತ್ತಿಂ ಅಭಿಭುಯ್ಯತೀತಿ – ಗೋತ್ರಭು. ಜಾತಿಂ ಅಭಿಭುಯ್ಯತೀತಿ – ಗೋತ್ರಭು. ಜರಂ ಅಭಿಭುಯ್ಯತೀತಿ – ಗೋತ್ರಭು. ಬ್ಯಾಧಿಂ ಅಭಿಭುಯ್ಯತೀತಿ – ಗೋತ್ರಭು. ಮರಣಂ ಅಭಿಭುಯ್ಯತೀತಿ – ಗೋತ್ರಭು. ಸೋಕಂ ಅಭಿಭುಯ್ಯತೀತಿ – ಗೋತ್ರಭು. ಪರಿದೇವಂ ಅಭಿಭುಯ್ಯತೀತಿ – ಗೋತ್ರಭು. ಉಪಾಯಾಸಂ ಅಭಿಭುಯ್ಯತೀತಿ – ಗೋತ್ರಭು. ಬಹಿದ್ಧಾ ಸಙ್ಖಾರನಿಮಿತ್ತಂ ಅಭಿಭುಯ್ಯತೀತಿ – ಗೋತ್ರಭು. ಅನುಪ್ಪಾದಂ ಪಕ್ಖನ್ದತೀತಿ – ಗೋತ್ರಭು. ಅಪ್ಪವತ್ತಂ ಪಕ್ಖನ್ದತೀತಿ – ಗೋತ್ರಭು…ಪೇ… ನಿರೋಧಂ ನಿಬ್ಬಾನಂ ಪಕ್ಖನ್ದತೀತಿ – ಗೋತ್ರಭು.

ಉಪ್ಪಾದಂ ಅಭಿಭುಯ್ಯಿತ್ವಾ ಅನುಪ್ಪಾದಂ ಪಕ್ಖನ್ದತೀತಿ – ಗೋತ್ರಭು. ಪವತ್ತಂ ಅಭಿಭುಯ್ಯಿತ್ವಾ ಅಪ್ಪವತ್ತಂ ಪಕ್ಖನ್ದತೀತಿ – ಗೋತ್ರಭು. ನಿಮಿತ್ತಂ ಅಭಿಭುಯ್ಯಿತ್ವಾ ಅನಿಮಿತ್ತಂ ಪಕ್ಖನ್ದತೀತಿ – ಗೋತ್ರಭು …ಪೇ… ಬಹಿದ್ಧಾ ಸಙ್ಖಾರನಿಮಿತ್ತಂ ಅಭಿಭುಯ್ಯಿತ್ವಾ ನಿರೋಧಂ ನಿಬ್ಬಾನಂ ಪಕ್ಖನ್ದತೀತಿ – ಗೋತ್ರಭು.

ಉಪ್ಪಾದಾ ವುಟ್ಠಾತೀತಿ – ಗೋತ್ರಭು. ಪವತ್ತಾ ವುಟ್ಠಾತೀತಿ – ಗೋತ್ರಭು. ನಿಮಿತ್ತಾ ವುಟ್ಠಾತೀತಿ – ಗೋತ್ರಭು. ಆಯೂಹನಾ ವುಟ್ಠಾತೀತಿ – ಗೋತ್ರಭು. ಪಟಿಸನ್ಧಿಯಾ ವುಟ್ಠಾತೀತಿ – ಗೋತ್ರಭು. ಗತಿಯಾ ವುಟ್ಠಾತೀತಿ – ಗೋತ್ರಭು. ನಿಬ್ಬತ್ತಿಯಾ ವುಟ್ಠಾತೀತಿ – ಗೋತ್ರಭು. ಉಪಪತ್ತಿಯಾ ವುಟ್ಠಾತೀತಿ – ಗೋತ್ರಭು. ಜಾತಿಯಾ ವುಟ್ಠಾತೀತಿ – ಗೋತ್ರಭು. ಜರಾಯ ವುಟ್ಠಾತೀತಿ – ಗೋತ್ರಭು. ಬ್ಯಾಧಿಮ್ಹಾ ವುಟ್ಠಾತೀತಿ – ಗೋತ್ರಭು. ಮರಣಾ ವುಟ್ಠಾತೀತಿ – ಗೋತ್ರಭು. ಸೋಕಾ ವುಟ್ಠಾತೀತಿ – ಗೋತ್ರಭು. ಪರಿದೇವಾ ವುಟ್ಠಾತೀತಿ – ಗೋತ್ರಭು. ಉಪಾಯಾಸಾ ವುಟ್ಠಾತೀತಿ – ಗೋತ್ರಭು. ಬಹಿದ್ಧಾ ಸಙ್ಖಾರನಿಮಿತ್ತಾ ವುಟ್ಠಾತೀತಿ – ಗೋತ್ರಭು. ಅನುಪ್ಪಾದಂ ಪಕ್ಖನ್ದತೀತಿ – ಗೋತ್ರಭು. ಅಪ್ಪವತ್ತಂ ಪಕ್ಖನ್ದತೀತಿ – ಗೋತ್ರಭು…ಪೇ… ನಿರೋಧಂ ನಿಬ್ಬಾನಂ ಪಕ್ಖನ್ದತೀತಿ – ಗೋತ್ರಭು.

ಉಪ್ಪಾದಾ ವುಟ್ಠಹಿತ್ವಾ [ವುಟ್ಠಿತ್ವಾ (ಸ್ಯಾ. ಕ.)] ಅನುಪ್ಪಾದಂ ಪಕ್ಖನ್ದತೀತಿ – ಗೋತ್ರಭು. ಪವತ್ತಾ ವುಟ್ಠಹಿತ್ವಾ ಅಪ್ಪವತ್ತಂ ಪಕ್ಖನ್ದತೀತಿ – ಗೋತ್ರಭು. ನಿಮಿತ್ತಾ ವುಟ್ಠಹಿತ್ವಾ ಅನಿಮಿತ್ತಂ ಪಕ್ಖನ್ದತೀತಿ – ಗೋತ್ರಭು. ಆಯೂಹನಾ ವುಟ್ಠಹಿತ್ವಾ ಅನಾಯೂಹನಂ ಪಕ್ಖನ್ದತೀತಿ – ಗೋತ್ರಭು. ಪಟಿಸನ್ಧಿಯಾ ವುಟ್ಠಹಿತ್ವಾ ಅಪ್ಪಟಿಸನ್ಧಿಂ ಪಕ್ಖನ್ದತೀತಿ – ಗೋತ್ರಭು. ಗತಿಯಾ ವುಟ್ಠಹಿತ್ವಾ ಅಗತಿಂ ಪಕ್ಖನ್ದತೀತಿ – ಗೋತ್ರಭು. ನಿಬ್ಬತ್ತಿಯಾ ವುಟ್ಠಹಿತ್ವಾ ಅನಿಬ್ಬತ್ತಿಂ ಪಕ್ಖನ್ದತೀತಿ – ಗೋತ್ರಭು. ಉಪಪತ್ತಿಯಾ ವುಟ್ಠಹಿತ್ವಾ ಅನುಪಪತ್ತಿಂ ಪಕ್ಖನ್ದತೀತಿ – ಗೋತ್ರಭು. ಜಾತಿಯಾ ವುಟ್ಠಹಿತ್ವಾ ಅಜಾತಿಂ ಪಕ್ಖನ್ದತೀತಿ – ಗೋತ್ರಭು. ಜರಾಯ ವುಟ್ಠಹಿತ್ವಾ ಅಜರಂ ಪಕ್ಖನ್ದತೀತಿ – ಗೋತ್ರಭು. ಬ್ಯಾಧಿಮ್ಹಾ ವುಟ್ಠಹಿತ್ವಾ ಅಬ್ಯಾಧಿಂ ಪಕ್ಖನ್ದತೀತಿ – ಗೋತ್ರಭು. ಮರಣಾ ವುಟ್ಠಹಿತ್ವಾ ಅಮತಂ ಪಕ್ಖನ್ದತೀತಿ – ಗೋತ್ರಭು. ಸೋಕಾ ವುಟ್ಠಹಿತ್ವಾ ಅಸೋಕಂ ಪಕ್ಖನ್ದತೀತಿ – ಗೋತ್ರಭು. ಪರಿದೇವಾ ವುಟ್ಠಹಿತ್ವಾ ಅಪರಿದೇವಂ ಪಕ್ಖನ್ದತೀತಿ – ಗೋತ್ರಭು. ಉಪಾಯಾಸಾ ವುಟ್ಠಹಿತ್ವಾ ಅನುಪಾಯಾಸಂ ಪಕ್ಖನ್ದತೀತಿ – ಗೋತ್ರಭು. ಬಹಿದ್ಧಾ ಸಙ್ಖಾರನಿಮಿತ್ತಾ ವುಟ್ಠಹಿತ್ವಾ ನಿರೋಧಂ ನಿಬ್ಬಾನಂ ಪಕ್ಖನ್ದತೀತಿ – ಗೋತ್ರಭು.

ಉಪ್ಪಾದಾ ವಿವಟ್ಟತೀತಿ – ಗೋತ್ರಭು. ಪವತ್ತಾ ವಿವಟ್ಟತೀತಿ – ಗೋತ್ರಭು…ಪೇ… ಬಹಿದ್ಧಾ ಸಙ್ಖಾರನಿಮಿತ್ತಾ ವಿವಟ್ಟತೀತಿ – ಗೋತ್ರಭು. ಅನುಪ್ಪಾದಂ ಪಕ್ಖನ್ದತೀತಿ – ಗೋತ್ರಭು. ಅಪ್ಪವತ್ತಂ ಪಕ್ಖನ್ದತೀತಿ – ಗೋತ್ರಭು…ಪೇ… ನಿರೋಧಂ ನಿಬ್ಬಾನಂ ಪಕ್ಖನ್ದತೀತಿ – ಗೋತ್ರಭು.

ಉಪ್ಪಾದಾ ವಿವಟ್ಟಿತ್ವಾ ಅನುಪ್ಪಾದಂ ಪಕ್ಖನ್ದತೀತಿ – ಗೋತ್ರಭು. ಪವತ್ತಾ ವಿವಟ್ಟಿತ್ವಾ ಅಪ್ಪವತ್ತಂ ಪಕ್ಖನ್ದತೀತಿ – ಗೋತ್ರಭು…ಪೇ… ಬಹಿದ್ಧಾ ಸಙ್ಖಾರನಿಮಿತ್ತಾ ವಿವಟ್ಟಿತ್ವಾ ನಿರೋಧಂ ನಿಬ್ಬಾನಂ ಪಕ್ಖನ್ದತೀತಿ – ಗೋತ್ರಭು.

೬೦. ಕತಿ ಗೋತ್ರಭೂ ಧಮ್ಮಾ ಸಮಥವಸೇನ ಉಪ್ಪಜ್ಜನ್ತಿ? ಕತಿ ಗೋತ್ರಭೂ ಧಮ್ಮಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ? ಅಟ್ಠ ಗೋತ್ರಭೂ ಧಮ್ಮಾ ಸಮಥವಸೇನ ಉಪ್ಪಜ್ಜನ್ತಿ. ದಸ ಗೋತ್ರಭೂ ಧಮ್ಮಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ.

ಕತಮೇ ಅಟ್ಠ ಗೋತ್ರಭೂ ಧಮ್ಮಾ ಸಮಥವಸೇನ ಉಪ್ಪಜ್ಜನ್ತಿ? ಪಠಮಂ ಝಾನಂ ಪಟಿಲಾಭತ್ಥಾಯ ನೀವರಣೇ ಅಭಿಭುಯ್ಯತೀತಿ – ಗೋತ್ರಭು. ದುತಿಯಂ ಝಾನಂ ಪಟಿಲಾಭತ್ಥಾಯ ವಿತಕ್ಕವಿಚಾರೇ ಅಭಿಭುಯ್ಯತೀತಿ – ಗೋತ್ರಭು. ತತಿಯಂ ಝಾನಂ ಪಟಿಲಾಭತ್ಥಾಯ ಪೀತಿಂ ಅಭಿಭುಯ್ಯತೀತಿ – ಗೋತ್ರಭು. ಚತುತ್ಥಂ ಝಾನಂ ಪಟಿಲಾಭತ್ಥಾಯ ಸುಖದುಕ್ಖೇ ಅಭಿಭುಯ್ಯತೀತಿ – ಗೋತ್ರಭು. ಆಕಾಸಾನಞ್ಚಾಯತನಸಮಾಪತ್ತಿಂ ಪಟಿಲಾಭತ್ಥಾಯ ರೂಪಸಞ್ಞಂ ಪಟಿಘಸಞ್ಞಂ ನಾನತ್ತಸಞ್ಞಂ ಅಭಿಭುಯ್ಯತೀತಿ – ಗೋತ್ರಭು. ವಿಞ್ಞಾಣಞ್ಚಾಯತನಸಮಾಪತ್ತಿಂ ಪಟಿಲಾಭತ್ಥಾಯ ಆಕಾಸಾನಞ್ಚಾಯತನಸಞ್ಞಂ ಅಭಿಭುಯ್ಯತೀತಿ – ಗೋತ್ರಭು. ಆಕಿಞ್ಚಞ್ಞಾಯತನಸಮಾಪತ್ತಿಂ ಪಟಿಲಾಭತ್ಥಾಯ ವಿಞ್ಞಾಣಞ್ಚಾಯತನಸಞ್ಞಂ ಅಭಿಭುಯ್ಯತೀತಿ – ಗೋತ್ರಭು. ನೇವಸಞ್ಞಾನಾಸಞ್ಞಾಯತನಸಮಾಪತ್ತಿಂ ಪಟಿಲಾಭತ್ಥಾಯ ಆಕಿಞ್ಚಞ್ಞಾಯತನಸಞ್ಞಂ ಅಭಿಭುಯ್ಯತೀತಿ – ಗೋತ್ರಭು. ಇಮೇ ಅಟ್ಠ ಗೋತ್ರಭೂ ಧಮ್ಮಾ ಸಮಥವಸೇನ ಉಪ್ಪಜ್ಜನ್ತಿ.

ಕತಮೇ ದಸ ಗೋತ್ರಭೂ ಧಮ್ಮಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ? ಸೋತಾಪತ್ತಿಮಗ್ಗಂ ಪಟಿಲಾಭತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ ಗತಿಂ ನಿಬ್ಬತ್ತಿಂ ಉಪಪತ್ತಿಂ ಜಾತಿಂ ಜರಂ ಬ್ಯಾಧಿಂ ಮರಣಂ ಸೋಕಂ ಪರಿದೇವಂ ಉಪಾಯಾಸಂ ಬಹಿದ್ಧಾ ಸಙ್ಖಾರನಿಮಿತ್ತಂ ಅಭಿಭುಯ್ಯತೀತಿ – ಗೋತ್ರಭು. ಸೋತಾಪತ್ತಿಫಲಸಮಾಪತ್ತತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ…ಪೇ… ಅಭಿಭುಯ್ಯತೀತಿ – ಗೋತ್ರಭು. ಸಕದಾಗಾಮಿಮಗ್ಗಂ ಪಟಿಲಾಭತ್ಥಾಯ…ಪೇ… ಸಕದಾಗಾಮಿಫಲಸಮಾಪತ್ತತ್ಥಾಯ… ಅನಾಗಾಮಿಮಗ್ಗಂ ಪಟಿಲಾಭತ್ಥಾಯ… ಅನಾಗಾಮಿಫಲಸಮಾಪತ್ತತ್ಥಾಯ… ಅರಹತ್ತಮಗ್ಗಂ ಪಟಿಲಾಭತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ ಗತಿಂ ನಿಬ್ಬತ್ತಿಂ ಉಪಪತ್ತಿಂ ಜಾತಿಂ ಜರಂ ಬ್ಯಾಧಿಂ ಮರಣಂ ಸೋಕಂ ಪರಿದೇವಂ ಉಪಾಯಾಸಂ ಬಹಿದ್ಧಾ ಸಙ್ಖಾರನಿಮಿತ್ತಂ ಅಭಿಭುಯ್ಯತೀತಿ – ಗೋತ್ರಭು. ಅರಹತ್ತಫಲಸಮಾಪತ್ತತ್ಥಾಯ… ಸುಞ್ಞತವಿಹಾರಸಮಾಪತ್ತತ್ಥಾಯ… ಅನಿಮಿತ್ತವಿಹಾರಸಮಾಪತ್ತತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ…ಪೇ… ಅಭಿಭುಯ್ಯತೀತಿ – ಗೋತ್ರಭು. ಇಮೇ ದಸ ಗೋತ್ರಭೂ ಧಮ್ಮಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ.

ಕತಿ ಗೋತ್ರಭೂ ಧಮ್ಮಾ ಕುಸಲಾ, ಕತಿ ಅಕುಸಲಾ, ಕತಿ ಅಬ್ಯಾಕತಾ? ಪನ್ನರಸ ಗೋತ್ರಭೂ ಧಮ್ಮಾ ಕುಸಲಾ, ತಯೋ ಗೋತ್ರಭೂ ಧಮ್ಮಾ ಅಬ್ಯಾಕತಾ. ನತ್ಥಿ ಗೋತ್ರಭೂ ಧಮ್ಮಾ ಅಕುಸಲಾತಿ.

ಸಾಮಿಸಞ್ಚ ನಿರಾಮಿಸಂ, ಪಣಿಹಿತಞ್ಚ ಅಪ್ಪಣಿಹಿತಂ;

ಸಞ್ಞುತ್ತಞ್ಚ ವಿಸಞ್ಞುತ್ತಂ, ವುಟ್ಠಿತಞ್ಚ ಅವುಟ್ಠಿತಂ.

ಅಟ್ಠ ಸಮಾಧಿಸ್ಸ ಪಚ್ಚಯಾ, ದಸ ಞಾಣಸ್ಸ ಗೋಚರಾ;

ಅಟ್ಠಾರಸ ಗೋತ್ರಭೂ ಧಮ್ಮಾ, ತಿಣ್ಣಂ ವಿಮೋಕ್ಖಾನ ಪಚ್ಚಯಾ.

ಇಮೇ ಅಟ್ಠಾರಸಾಕಾರಾ, ಪಞ್ಞಾ ಯಸ್ಸ ಪರಿಚ್ಚಿತಾ;

ಕುಸಲೋ ವಿವಟ್ಟೇ ವುಟ್ಠಾನೇ, ನಾನಾದಿಟ್ಠೀಸು ನ ಕಮ್ಪತೀತಿ.

ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಬಹಿದ್ಧಾ ವುಟ್ಠಾನವಿವಟ್ಟನೇ ಪಞ್ಞಾ ಗೋತ್ರಭುಞಾಣಂ’’.

ಗೋತ್ರಭುಞಾಣನಿದ್ದೇಸೋ ದಸಮೋ.